ပြည်ပမှ ဆန်တင်သွင်းမှုသည် ပြည်တွင်းရှိ ရောင်းလိုအားနှင့် ဝယ်လိုအားအပေါ် မူတည်နေသော်လည်း အင်ဒိုနီးရှားနိုင်ငံအနေဖြင့် ယခုနှစ်၌ ဆန်တင်သွင်းခွင့်ပြုခဲ့သည့် တန်ချိန် ၃.၈ သန်း အောက်သို့ လျှော့ချပြီး ၂၀၂၄ ခုနှစ်တွင် ဆန်တန်ချိန် ၂ သန်းကို တင်သွင်းရန် စီစဉ်ဆောင်ရွက် လျက်ရှိကြောင်း နိုင်ငံပိုင်ကော်ပိုရေးရှင်းဖြစ်သော Bulog အဖွဲ့မှ အတွင်းရေးမှူး Awaludin Iqbal က ၆-၁၁-၂၀၂၃ နေ့ ၌ ထုတ်ဖော်ပြောကြားခဲ့သည်။
ဆန်ဈေးနှုန်းများမြင့်တက်လျက်ရှိသဖြင့် ဝင်ငွေနည်းပါးသည့် အိမ်ထောင်စုပေါင်း ၂၂ သန်း သို့ လစဉ်ဆန်အခမဲ့ကူညီထောက်ပံ့သည့် အစီအစဉ်ကို ၂၀၂၄ ခုနှစ် ဇွန်လအထိ လုပ်ဆောင်မည်ဟု အင်ဒိုနီးရှားအစိုးရက သတင်းထုတ်ပြန်ခဲ့ကြောင်း၊ ဈေးနှုန်းများမြင့်တက်မှုသည် အယ်လ်နီညို ရာသီဥတုဖြစ်စဉ်၏ ခြောက်သွေ့မှုဒဏ်ကြောင့် သီးနှံများရိတ်သိမ်းမှုအပေါ် ထိခိုက်ခြင်းနှင့် ဆက်နွယ်လျက်ရှိကြောင်း၊ အောက်တိုဘာလကုန်ဆုံးချိန်၌ ဆန်ဈေးနှုန်းများသည် ၁၉.၈% အထိ မြင့်တက်လာသည်ဟု အင်ဒိုနီးရှားသမ္မတ ဂျိုကိုဝီဒိုဒိုက ပြောဆိုခဲ့ကြောင်း၊ ယခုနှစ် ဇန်နဝါရီလမှ စက်တင်ဘာလအတွင်း အင်ဒိုနီးရှား၏ ဆန်တင်သွင်းမှုမှာ တန်ချိန် ၁.၇၉ သန်းရှိပြီး နိုဝင်ဘာလ လဆန်းရက်၌ Bulog အဖွဲ့ထံတွင် ဆန်တန်ချိန် ၁.၄ သန်း သိုလှောင်ထားရှိကြောင်းဖြင့် ရိုက်တာသတင်းကို ကိုးကားလျက် Nasdaq သတင်းဌာနက ဖော်ပြထားသည်။
Source: Nasdaq, 6 Nov 2023