အီသီယိုးပီးယားနိုင်ငံသည် လွန်ခဲ့သည့် ခြောက်လအတွင်း ရွှေတင်ပို့မှုမှ ဝင်ငွေ အမေရိကန် ဒေါ်လာ ၁.၃၆ ဘီလီယံ ရရှိခဲ့ကြောင်း ထုတ်ဖော်ပြောကြားခဲ့သည်။ ဇူလိုင်လ ၈ ရက်နေ့တွင် စတင်ခဲ့ သော လက်ရှိ အီသီယိုးပီးယား ၂၀၂၄/၂၀၂၅ ဘဏ္ဍာနှစ် ပထမနှစ်ဝက်အတွင်း အံ့အားသင့်ဖွယ် ပို့ကုန်စွမ်းဆောင်ရည်ကို ပြောကြားရာတွင် အီသီယိုးပီးယား၏ ကုန်သွယ်ရေးနှင့် ဒေသဆိုင်ရာ ပေါင်းစည်းရေးဝန်ကြီး Kassahun Gofe က နိုင်ငံသည် ရွှေအပါအဝင် အဓိကပို့ကုန်များတွင် အားကောင်းသည့် စွမ်းဆောင်ရည်ကို တွေ့မြင်ခဲ့ရကြောင်း ဇန်နဝါရီလ ၂၄ ရက်နေ့တွင် ပြောကြားခဲ့ သည်။ ဝန်ကြီး၏အဆိုအရ လွန်ခဲ့သည့်ခြောက်လတာကာလအတွင်း နိုင်ငံသည် ပို့ကုန်ဝင်ငွေ ဒေါ်လာ ၃.၂၈ ဘီလီယံခန့် ရရှိခဲ့ပြီး ယင်းတွင် ရွှေတင်ပို့မှုသည် စုစုပေါင်း ပို့ကုန်ဝင်ငွေ၏ အကြီးဆုံးဝေစုကို ရယူနိုင်ခဲ့ပြီး အစီရင်ခံ ကာလအတွင်း ကန်ဒေါ်လာ ၁.၃၆ ဘီလီယံအထိ ရရှိခဲ့သည်။
အီသီယိုးပီးယား၏ပို့ကုန်ဝင်ငွေသည် ကနဦးပစ်မှတ်၏ ၁၄၅ ရာခိုင်နှုန်းခန့်အောင်မြင်ခဲ့ ကြောင်း ဝန်ကြီးဌာနမှ အချက်အလက်များကိုလည်း အကြံပြုထားသည်။ ကော်ဖီသည် နိုင်ငံအတွက် အဓိက ပို့ကုန်တစ်ခုဖြစ်ပြီး အီသီယိုးပီးယား ကော်ဖီနှင့်လက်ဖက်အာဏာပိုင်အဖွဲ့၏ မကြာသေးမီက အချက်အလက်များအရ နိုင်ငံသည် လွန်ခဲ့သည့်ခြောက်လအတွင်း ကော်ဖီတင်ပို့မှုမှဝင်ငွေ ဒေါ်လာ ၉၀၈ သန်းရရှိခဲ့ပြီး နိုင်ငံတကာဈေးကွက်သို့ ကော်ဖီတန်ချိန် ၂၀၀,၀၀၀ ကျော် တင်ပို့နိုင်ခဲ့ကြောင်း သိရသည်။ စိုက်ပျိုးရေး၊ ကုန်ထုတ်လုပ်ငန်း၊ သတ္တုတူးဖော်ရေးနှင့် အခြားအဓိကစီးပွားရေးကဏ္ဍ များနှင့်ပက်သက်၍လည်း အီသီယိုးပီးယားအစိုးရသည် ၂၀၂၄ ခုနှစ် အောက်တိုဘာလတွင် လက်ရှိ ဘဏ္ဍာနှစ်အတွက် စီးပွားရေးတိုးတက်မှုနှုန်း ၈.၄ ရာခိုင်နှုန်း ရည်မှန်းချက်ကို ထုတ်ပြန်ကြေညာ ခဲ့သည်။
DOCA(ရန်ကုန်)