တရုတ်နိုင်ငံမှ တင်သွင်းလာသော ကီဝီသီးများ အလုံးအရင်းနှင့် ဝင်ရောက်လာမှုကြောင့် ဈေးကွက်အတွင်း ရောင်းလိုအားမြင့်တက်နေပြီး၊ လက်ရှိတွင် တစ်ကီလိုဂရမ်လျှင် ဗီယက်နမ် ဒေါင် ၈၀,၀၀၀ (အမေရိကန်ဒေါ်လာ ၃.၀၅ ခန့်) သာရှိတော့သဖြင့် စံချိန်တင် အနိမ့်ဆုံးဈေးနှုန်းသို့ ရောက်ရှိနေကြောင်း သိရသည်။ စူပါမားကတ်များတွင် ကီဝီသီးအစိမ်းနှင့် အဝါရောင်များကို တစ်ကီလိုဂရမ်လျှင် ၈၀,၀၀၀ မှ ၁၂၀,၀၀၀ ဗီယက်နမ်ဒေါင်အတွင်းသာရှိပြီး တွေ့ရခဲသည့် စျေးနှုန်းအခြေအနေမျိုးဖြစ်ကြောင်း ဗီယက်နမ်နိုင်ငံရှိ ဒေသခံများက ပြောကြားခဲ့သည်။ တရုတ်နိုင်ငံတွင် လူကြိုက်များပြီး အဆင့်မြင့်မျိုးစိတ် (Premium Variety) ဟု သတ်မှတ်ထားကြသော ကီဝီသီးအနီရောင်ကိုမူ ၁၀၉,၀၀၀ ဗီယက်နမ်ဒေါင်ဖြင့် ရောင်းချနေပြီး အဆိုပါ ဈေးနှုန်းချိုသာသော ကီဝီသီးများကို Go!, Bach Hoa Xanh နှင့် Kingfood ကဲ့သို့သော လက်လီအရောင်း ဆိုင်ခွဲများတွင် အများဆုံးရောင်းချလျက်ရှိသည်။ သို့သော်လည်း နယူးဇီလန်နှင့် ပြင်သစ်နိုင်ငံတို့မှ တင်သွင်းသော ကီဝီသီးများမှာမူ ဆက်လက်ဈေးကြီးနေဆဲဖြစ်သည်။ နယူးဇီလန် ကီဝီသီး အစိမ်းဈေးနှုန်းမှာ တစ်ကီလိုလျှင် ၁၃၉,၀၀၀ ဒေါင်ဝန်းကျင်ရှိနေပြီး ယခင် နှစ်ထက် ဈေးနှုန်းအနည်းငယ် ကျဆင်းလာသည်ဟု ဆိုနိုင်သော်လည်း တရုတ်နိုင်ငံမှ တင်သွင်းသော ကီဝီသီးဈေးနှုန်းနှင့် ယှဉ်လျှင်မူ အဆမတန်မြင့်မားနေဆဲဖြစ်သည်။ ယခင် ဗီယက်နမ်နိုင်ငံသည် ကီဝီသီးကို နယူးဇီလန်နိုင်ငံတစ်ခုတည်းနီးပါးမှသာ တင်သွင်းခဲ့သော်လည်း ယခုနှစ်တွင်မူ အရည်အသွေးကောင်းမွန်လာခြင်းနှင့် ထုတ်ကုန်နောက်ကြောင်းလိုက် စစ်ဆေးနိုင်မှု (Traceability) ခိုင်မာလာခြင်းတို့ကြောင့် ဝယ်လိုအားမြင့်တက်လာကာ တရုတ်နိုင်ငံမှ တင်သွင်းမှုမှာလည်း အရှိန်အဟုန်ဖြင့် မြင့်တက်လာခဲ့သည်။ တရုတ်ကီဝီသီးများသည် နယူးဇီလန် သို့မဟုတ် ပြင်သစ်နိုင်ငံတို့မှ သစ်သီးများကဲ့သို့ အမြင်အာရုံဖမ်းစားနိုင်ခြင်း မရှိသော်လည်း၊ ၎င်းတို့၏ အရည်အသွေးမှာ စိတ်ချယုံကြည်ရသည့် အခြေအနေသို့ ရောက်ရှိလာကြောင်း၊ ထို့ကြောင့် ဈေးနှုန်းကို အလေးထားသော ဝယ်ယူသူများကို အဓိကဆွဲဆောင်နိုင်ခြင်းဖြစ်ကြောင်း ဗီယက်နမ်နိုင်ငံ ဟိုချီမင်မြို့တော်ရှိ ကီဝီသီး လက်လီလက်ကား ရောင်းချသူများ ကပြောကြားခဲ့သည်။ ဗီယက်နမ် သစ်သီးဝလံနှင့် ဟင်းသီးဟင်းရွက်အသင်း (Vietnam Fruit and Vegetable Association) ၏ အထွေထွေအတွင်းရေးမှူးဖြစ်သူ Dang Phuc Nguyen က ခေတ်မီမျိုးပွား နည်းပညာများကြောင့် တရုတ်နိုင်ငံသည် ဈေးနှုန်းချိုသာသော စိုက်ပျိုးရေးထွက်ကုန်များကို အဓိကတင်ပို့သည့် နိုင်ငံဖြစ်လာကြောင်း ပြောကြားခဲ့သည်။ ယခင်က ဗီယက်နမ်နှင့် ဂျပန်နိုင်ငံတို့တွင် ဈေးကြီးပေးဝယ်ခဲ့ရသည့် သစ်သီးအမျိုးအစား အများအပြားသည် တရုတ်နိုင်ငံတွင် အကြီးအကျယ် စိုက်ပျိုးထုတ်လုပ်လာနိုင်ပြီးနောက်ပိုင်း လူအများအပြား ဝယ်ယူစားသုံးနိုင်သည့် ကုန်ပစ္စည်းများဖြစ်လာခဲ့ကြောင်း ၎င်းက ရှင်းပြသည်။ အကောက်ခွန်ဆိုင်ရာ အချက်အလက်များအရ ဗီယက်နမ်နိုင်ငံသည် ၂၀၂၅ ခုနှစ်တွင် အမေရိ ကန်ဒေါ်လာ ၃ ဘီလီယံဖိုးခန့်ရှိသော သစ်သီးဝလံနှင့် ဟင်းသီးဟင်းရွက်များကို တင်သွင်းခဲ့ပြီး ယင်းမှာ ယခင်နှစ်ထက် ၂၄ ရာခိုင်နှုန်း မြင့်တက်လာခြင်းဖြစ်သည်။ တရုတ်နိုင်ငံသည် ဗီယက်နမ်နိုင်ငံ၏ ဟင်းသီးဟင်းရွက် တင်သွင်းသော အဓိကအရင်းအမြစ်နိုင်ငံအဖြစ် ဆက်လက်တည်ရှိနေပြီး ဒေါ်လာ ၁ ဘီလီယံကျော်ဖိုး တင်သွင်းထားကြောင်း သိရှိရပါသည်။
Source : VnExpress
DOCA(ရန်ကုန်)