၂၃.၁.၂၀၂၀ ရက်နေ့တွင် မကွေးတိုင်းဒေသကြီး စားသုံးသူရေးရာဦးစီးဌာန အစည်းအဝေးခန်းမ၌ မုန့်ထုတ်လုပ်သူလုပ်ငန်းရှင်များအား စားသုံးသူကာကွယ်ရေးဥပဒေပါ ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ အသိပေးဆွေးနွေးခဲ့ပါသည်။ အဆိုပါ ဆွေးနွေးပွဲတွင် ၂၀၁၉ ခုနှစ်၊ မတ်လ (၁၅) ရက်နေ့၌ အတည်ပြုပြဌာန်းခဲ့သည့် စားသုံးသူကာကွယ်ရေးဥပဒေပါ အခန်း(၁၈) ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ၂၀၂၀ ခုနှစ်၊ မတ်လ(၁၆) ရက်နေ့မှစ၍ ဥပဒေနှင့်အညီ အရေးယူဆောင်ရွက်တော့မည်ဖြစ်သဖြင့် စီးပွားရေးလုပ်ငန်းရှင်များ သိရှိလိုက်နာနိုင်စေရန် ရည်ရွယ်၍ မုန့်ထုတ်လုပ်သူ လုပ်ငန်းရှင်များအား ဖိတ်ကြားပြီး လုပ်ငန်းရှင်များ၊ အသင်းအဖွဲ့များနှင့် တွေ့ဆုံဆွေးနွေးခြင်းများ ဆောင်ရွက်လျက်ရှိရာ မကွေးတိုင်း မုန့်ထုတ်လုပ်သူ လုပ်ငန်းရှင်များ လက်လီရောင်းချသူများအသင်းမှ တာဝန်ရှိသူများ တက်ရောက်ခဲ့ကြပါသည်။
ရှေးဦးစွာ စားသုံးသူရေးရာဦးစီးဌာနမှာ စားသုံးသူတို့၏ အခွင့်အရေးနှင့် အကျိုးစီးပွားကို ကာကွယ်စောင့်ရှောက်နိုင်ရန်သာမက စီးပွားရေးလုပ်ငန်းရှင်များကိုလည်း ကုန်စည်နှင့်ဝန်ဆောင်မှုလုပ်ငန်းများ ဆောင်ရွက်သည့်အခါ ပိုမိုအဆင်ပြေအောင် ကူညီဆောင်ရွက်ပေးသည့် ဌာနတစ်ခုလည်း ဖြစ်ပါကြောင်း၊ ပြည်တွင်းရှိ လုပ်ငန်းရှင်များအနေဖြင့် အရည်အသွေးပြည့်မီသည့် ကုန်စည်များ ထုတ်လုပ်ပြီး နိုင်ငံခြားသို့ တင်ပို့နိုင်သည်အထိ ကြိုးစားဆောင်ရွက်ရမှာဖြစ်ကြောင်း၊ မိမိတို့ဌာန အနေဖြင့် ၂၀၁၆ ခုနှစ်မှ စတင်ဖွဲ့စည်းခဲ့ပြီး စားသုံးသူကာကွယ်ရေးလုပ်ငန်းများကို ရပ်ကွက်/ ကျေးရွာများ၊ စာသင်ကျောင်းများ၊ တပ်ရင်းတပ်ဖွဲ့များ၊ ဈေးများတွင် အသိပညာပေးမှုများ ဆောင်ရွက်လျက်ရှိပါကြောင်း၊ စားသုံးသူပြည်သူများမှ စားသုံးသူအခွင့်အရေးများကို သိရှိနားလည်ပြီး စီးပွားရေးလုပ်ငန်းရှင်များဘက်မှလည်း မိမိတို့၏ လုပ်ငန်းတာဝန်များ၊ တားမြစ်ချက်များကို သိရှိနားလည်ထားရန် လိုအပ်ကြောင်းဆွေးနွေးခဲ့ပါသည်။
ထို့နောက် တာဝန်ရှိသူတစ်ဦးမှ စားသုံးသူကာကွယ်ရေးဥပဒေနှင့် စပ်လျဉ်း၍ စားသုံးသူကာကွယ်ရေး ဥပဒေအကြောင်း၊ ၎င်းတို့ အနက်မှ အခန်း(၁၈)ပါ ပြဌာန်းချက်များသည် တစ်နှစ်ပြည့်မြောက်ပြီးသည့် နေ့ရက်မှစ၍ စတင် အာဏာတည်မည်ဖြစ်ကြောင်း၊ ကျန်အခန်းများမှာ ဥပဒေထုတ်ပြန်သည့် နေ့ရက်တွင် စတင်အာဏာတည်ပါကြောင်း ဆွေးနွေးခဲ့ပြီး ဥပဒေကို အကောင်အထည်ဖော်မည့် အဖွဲ့အစည်းနှင့် ပုဂ္ဂိုလ်များ၊ စားသုံးသူကာကွယ်ရေးဥပဒေအရ စီးပွားရေးလုပ်ငန်းရှင်များနှင့် တိုက်ရိုက်သက်ဆိုင်သည့် အခန်းကဏ္ဍများ၊ စားသုံးသူအခွင့်အရေး(၈)ချက်၊ ကုန်စည်နှင့်စပ်လျဉ်း၍အာမခံချက်ပေးခြင်း၊ ကုန်အညွှန်း အမှတ်အသား ဖော်ပြခြင်း၊ တားမြစ်ချက်နှင့် ပြစ်မှုပြစ်ဒဏ်များအကြောင်းကို အသေးစိတ် ရှင်းလင်း ဆွေးနွေးခဲ့ပါသည်။
ဆက်လက်၍ တက်ရောက်လာသည့် လုပ်ငန်းရှင်များမှ ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ သိလိုသည်များ မေးမြန်းမှုအပေါ် ပြန်လည်ရှင်းလင်းဆွေးနွေးခဲ့ပြီး အခမ်းအနားကို အောင်မြင်စွာ ရုတ်သိမ်းခဲ့ပါကြောင်း သတင်းရရှိပါသည်။
စန္ဒာစိုးလွင် (မကွေး)