စီးပွားရေးနှင့် ကုန်သွယ်ရေး ဆက်ဆံမှု မြှင့်တင်ရန် နားလည်မှုစာချုပ် လက်မှတ်ရေးထိုးခဲ့သည့် ဗီယက်နမ်–ဘရာဇီး

          ဗီယက်နမ်နှင့် ဘရာဇီးနိုင်ငံတို့သည် နှစ်နိုင်ငံအကြား ကုန်သွယ်ရေးနှင့် စီးပွားရေးဆက်ဆံမှု ပိုမိုခိုင်မာစေရန် ရည်ရွယ်၍ စီးပွားရေးမြှင့်တင်ရေး အဖွဲ့အစည်းကြီး နှစ်ခုအကြား နားလည်မှုစာချုပ် (MoU) တစ်ရပ်ကို လက်မှတ်ရေးထိုးခဲ့ကြောင်း သိရသည်။ ၎င်း MoU ကို Brazil–Vietnam Chamber of Commerce (BVC) နှင့် Brazil–Vietnam Chamber of Commerce and Industry (CCBV) ၏ Espirito Santo ဒေသခွဲ (CCBV-ES) တို့က လက်မှတ်ရေးထိုးခဲ့ခြင်းဖြစ်ပြီး ဘရာဇီးနိုင်ငံဆိုင်ရာဗီယက်နမ်သံရုံး၏ပံ့ပိုးမှုဖြင့် နှစ်နိုင်ငံစီးပွားရေးလုပ်ငန်းများအတွက် ပူးပေါင်း ဆောင်ရွက်မှုများတိုးချဲ့ရန်နှင့် စီးပွားရေးအခွင့်အလမ်းများ ဖန်တီးပေးရန် ရည်ရွယ်ကြောင်း သိရပါသည်။ လက်မှတ်ရေးထိုးပွဲကို ဖေဖော်ဝါရီ ၇ ရက်က ဆာအိုပေါလိုမြို့တွင် ကျင်းပခဲ့ပြီး ဘရာဇီးနိုင်ငံဆိုင်ရာ ဗီယက်နမ်သံအမတ် Bui Van Nghi၊ ဘရာဇီးရှိဗီယက်နမ် ကုန်သွယ်ရေးရုံး အကြီးအကဲ Pham Hong Trang နှင့် အဖွဲ့အစည်းနှစ်ခု၏ ခေါင်းဆောင်များနှင့် အဖွဲ့ဝင်များ တက်ရောက်ခဲ့ကြောင်း သိရပါသည်။ သဘောတူညီချက်အရ နှစ်ဖက်အနေဖြင့် စီးပွားရေးလုပ်ငန်းများကို အထောက်အကူပြုရာတွင် ပူးပေါင်းညှိနှိုင်းမှုများ ခိုင်မာစေရန်၊ ကုန်သွယ်ရေး မြှင့်တင်ရေး ကိုယ်စားလှယ်အဖွဲ့များ အပြန်အလှန်စေလွှတ်ရန်၊ ဈေးကွက်ဆိုင်ရာ မဟာဗျူဟာ အချက်အလက်များမျှဝေရန်နှင့် နှစ်နိုင်ငံစီးပွားရေးဖွံ့ဖြိုးတိုးတက်ရေးကိုရည်ရွယ်သည့် လုပ်ဆောင်ချက် များအကောင်အထည်ဖော်ရန် သဘောတူခဲ့ကြကြောင်း သိရပါသည်။ အခမ်းအနားတွင် သံအမတ် Bui Van Nghi က ကုန်သွယ်ရေးမြှင့်တင်ရေး အဖွဲ့အစည်းများအကြား ပူးပေါင်းဆောင်ရွက်မှု သည် ဗီယက်နမ်–ဘရာဇီး စီးပွားရေးဆက်ဆံရေး တိုးတက်စေရန် အရေးပါသော အခန်းကဏ္ဍ ဖြစ်ကြောင်းနှင့်  ကုန်သည်ကြီးများအသင်းများအကြား ပိုမိုနီးကပ်သော ညှိနှိုင်း ဆောင်ရွက်မှုများက စီးပွားရေးဆက်သွယ်မှုများကို တိုက်ရိုက်လွယ်ကူစေပြီး အမှန်တကယ် အကျိုးရှိသည့် ရလဒ်များကို ဖြစ်ပေါ်စေကာ နှစ်နိုင်ငံအကြား ကုန်သွယ်ရေးနှင့် ရင်းနှီးမြှုပ်နှံမှု တိုးချဲ့ရေးအတွက် အထောက်အကူပြုမည်ဟု ပြောကြားခဲ့ပါသည်။ BVC ဥက္ကဋ္ဌ Victor Key က ၎င်း MoU သည် ကွန်ယက်များချိတ်ဆက်ခြင်း၊ ဗဟုသုတမျှဝေခြင်းနှင့် အခွင့်အလမ်းများကို လက်တွေ့စီမံကိန်းများအဖြစ် ပြောင်းလဲ ဆောင်ရွက်ရန် ရေရှည်ကတိကဝတ်တစ်ရပ်ဖြစ်ကြောင်း ပြောကြားခဲ့ပါသည်။ တစ်ချိန်တည်းမှာပင် CCBV-ES ဥက္ကဋ္ဌ Bernard Vassas ကလည်း ဗီယက်နမ်–ဘရာဇီး ပူးပေါင်းဆောင်ရွက်မှုသည် ကုန်သွယ်ရေးကဏ္ဍတစ်ခုတည်းတွင်သာ မကန့်သတ်ဘဲ ယဉ်ကျေးမှု၊ အားကစားစသည့် ကဏ္ဍများအထိ တိုးချဲ့သင့်ကြောင်း၊ ထိုသို့ လုပ်ဆောင်ခြင်းအားဖြင့် နှစ်နိုင်ငံအကြား အပြန်အလှန် နားလည်မှု မြှင့်တင်နိုင်ပြီး ရေရှည်မိတ်ဖက်ဆက်ဆံရေးအတွက် တည်တံ့ခိုင်မာသော အခြေခံအုတ်မြစ်ကို ဖန်တီးနိုင်မည်ဟု ပြောကြားခဲ့ပါသည်။ လက်မှတ်ရေး ထိုးပြီးနောက် အဖွဲ့အစည်းနှစ်ခုအနေဖြင့် ကုန်သွယ်မှု မြှင့်တင်ရေးလှုပ်ရှားမှုများကို ပူးပေါင်းအကောင်အထည်ဖော်ရန်၊ ပူးတွဲအခမ်းအနားများ စီစဉ်ကျင်းပရန်၊ အဖွဲ့ဝင်များကို အထောက်အကူ ပြုရန်နှင့် ဗီယက်နမ်–ဘရာဇီး စီးပွားရေးနှင့် ကုန်သွယ်မှုဆက်ဆံရေးကို ပိုမိုခိုင် မာနက်ရှိုင်းစေရန် အများပိုင်လုပ်ငန်းအစီအစဉ်တစ်ရပ်ကို ဖန်တီးသွားရန် မျှော်လင့်ထားကြောင်း သိရှိရပါသည်။

Vietnam Plus                                                                            

DOCA (ရန်ကုန်)