နယူးဒေလီနှင့် ဝါရှင်တန်တို့အကြားချုပ်ဆိုထားသည့် ယာယီကုန်သွယ်ရေး သဘောတူညီချက်အရ အိန္ဒိယနိုင်ငံသည် စွမ်းအင်ရရှိရာ အရင်းအမြစ်များကို ခွဲဝေရန်အတွက် အမေရိကန် နိုင်ငံထံမှ ရေနံစိမ်းနှင့်ကျောက်မီးသွေး တင်သွင်းမှုကိုတိုးမြှင့်သင့်ကြောင်း အိန္ဒိယကုန်သွယ်ရေး နှင့် စက်မှုဝန်ကြီးက ပြောကြားခဲ့သည်။ အိန္ဒိယနိုင်ငံသည် အထူးသဖြင့် သတ္တုဗေဒ (သံမဏိချက် လုပ်ခြင်း) လုပ်ငန်းများတွင် အသုံးပြုသည့် အရည်အသွေးမြင့် ကျောက်မီးသွေးကို ပိုမိုတင်သွင်း ရန် အထူးစိတ်ဝင်စားနေကြောင်း ဝန်ကြီး Piyush Goyal ၏ ပြောကြားချက်ကို India’s Telegraph သတင်းစာက ကိုးကားဖော်ပြခဲ့သည်။ ထို့အပြင် အိန္ဒိယအနေဖြင့် AI အတွက် အသုံး ပြုသည့် GPUs (Graphics Processing Units)၊ ဒေတာ စင်တာသုံး ပစ္စည်းကိရိယာများနှင့် စွမ်းဆောင်ရည်မြင့် ကွန်ပျူတာ စနစ်များအပါအဝင် အမေရိကန်ထုတ် နည်းပညာဆိုင်ရာ အစိတ်အပိုင်းများကိုလည်း ပိုမိုအသုံးပြု သွားနိုင်ကြောင်း ဝန်ကြီးက ဆက်လက်ပြောကြားခဲ့သည်။ အိန္ဒိယနှင့် အမေရိကန်တို့သည် ကုန်သွယ်ရေး သဘောတူညီချက်အတွက် ဆက်လက်ညှိနှိုင်းနေဆဲဖြစ်သော်လည်း သိသာသောတိုးတက်မှုများ ရှိနေသည်။ အထူးသဖြင့် ရုရှားနိုင်ငံမှ ရေနံ စိမ်းတင်သွင်းမှုကို လျှော့ချရန် အိန္ဒိယဘက်က အရိပ် အယောင်ပြပြီးနောက်တွင် ယခုကဲ့သို့ တိုးတက်မှုများ ဖြစ်ပေါ်လာခြင်း ဖြစ်သည်။ ယခင်နှစ်က သမ္မတထရမ့်သည် အိန္ဒိယမှ အမေရိကန် သို့ တင်ပို့သော ကုန်စည်များအပေါ် အပိုအခွန် ၂၅ ရာခိုင်နှုန်း (Tariff) ကို ကောက်ခံခဲ့သည်။ အိန္ဒိယ ရေနံချက်စက်ရုံများသည် အခြားသော ရေနံအရင်းအမြစ်များ ဘက်သို့ လှည့်နေပြီဖြစ်ကြောင်း သတင်းများက ဖော်ပြနေသော်လည်း အိန္ဒိယအာဏာပိုင်များက စွမ်းအင် လုံခြုံရေးကို အဓိကထားနေသောကြောင့် တရားဝင် ကတိကဝတ်ပြုမှုများမှာမူ နှေးကွေး နေဆဲ ဖြစ်သည်။ ဤကုန်သွယ်ရေး သဘောတူညီချက်တွင် ရေနံကဏ္ဍကို အဓိကထားနေရခြင်းမှာ ၂၀၂၂ ခုနှစ် နောက်ပိုင်း အိန္ဒိယသည် ရုရှားရေနံကို အများဆုံးဝယ်ယူသူ ဖြစ်လာခဲ့သောကြောင့်ဖြစ်သည်။ ဝါရှင်တန်သည် ဤဆက်ဆံရေး ကို စီးပွားရေးသက်သက်ထက် နိုင်ငံရေးပြဿနာတစ်ခုအဖြစ် ပိုမိုရှုမြင်လာပြီး အိန္ဒိယကို အခြားအရင်းအမြစ်များထံ ပြောင်းလဲဝယ်ယူရန် ကုန်သွယ်ရေးနည်းလမ်းဖြင့် ဖိအားပေးလျက်ရှိသည်။ ကျောက်မီးသွေး ကဏ္ဍတွင်လည်း အိန္ဒိယသည် အဓိက တင်သွင်း သူ ဖြစ်သည်။ ပြီးခဲ့သည့်နှစ်က တိုးတက်လာသော သံမဏိလုပ်ငန်းများ အတွက် ကျောက်မီးသွေး တန်ချိန် ၆၂.၆ သန်းအထိ တင်သွင်းခဲ့ရပြီး ၉.၆ ရာခိုင်နှုန်း တိုးတက်လာခဲ့သည်။ အမေရိကန်ထံမှ ကျောက်မီးသွေး တင်သွင်းမှုမှာလည်း သိသိသာသာ မြင့်တက်လာခဲ့ရာ စုစုပေါင်းတင်သွင်းမှု၏ ၇.၃ ရာခိုင်နှုန်းမှ ၁၅ ရာခိုင် နှုန်းအထိ ဖြစ်လာခဲ့သည်။ ၎င်းသည် အိန္ဒိယ၏ အဓိက ကျောက်မီးသွေး တင်ပို့သူဖြစ်သော သြစတြေးလျ၏ ဈေးကွက်ဝေစုကို လျှော့ချပစ်ခဲ့ကြောင်း သိရှိရပါသည်။
Source : Oilprice.com
DOCA(ရန်ကုန်)