ဖြေရှင်းဆောင်ရွက်ပေးမှုများ

         စစ်ကိုင်းတိုင်းဒေသကြီး၊ စားသုံးသူရေးရာဦးစီးမှ ၁၄.၁၂.၂၀၂၁ ရက်နေ့တွင် ရွှေဘိုခရိုင်၊ ဒီပဲယင်းမြို့နယ်၊ စိုင်ပြင်မြို့နေ စားသုံးသူတစ်ဦး၏ Website Complaint System သို့ Mybus ဝန်ဆောင်မှုနှင့် ပတ်သက်၍တိုင်ကြားမှုအား ဖြေရှင်းဆောင်ရွက်ပေးနိုင်ခဲ့ပါသည်။

       တိုင်ကြားမှုနှင့်ပတ်သက်၍ ရွှေဘိုခရိုင်၊ စားသုံးသူရေးရာဦးစီးဌာန၊ ခရိုင်ဦးစီးမှူးရုံးမှ စားသုံးသူကာကွယ်ရေးဥပဒေအရ တိုင်ကြားသူရေးသားထားသည့် အကြောင်းအရင်းနှင့် ကိုက်ညီမှုရှိ/မရှိ တယ်လီဖုန်းဖြင့် ဆက်သွယ်မေးမြန်းရာတွင် တိုင်ကြားသူသည် ဆက်သွယ်ရေးဝန်ဆောင်မှုတစ်ခုမှ ဆင်းကဒ်နံပါတ် (၀၉-******) ဖြင့် Mybus ဝန်ဆောင်မှုကို (၁၀/၂၀၂၁)လတွင် ရယူထားပြီး လစဉ် ငွေကျပ် ၂၅၀၀ဝိ/-ဖြည့်သွင်း၍ အသုံးပြုလျက်ရှိကြောင်း၊ (၁၄.၁၂.၂၀၂၁)ရက်နေ့တွင် သုံးစွဲ၍မရသဖြင့် ဆက်သွယ်ရေး ဝန်ဆောင်မှု အော်ပရေတာသို့ မေးမြန်းရာရှင်းလင်းပြောဆိုခြင်းမရှိသဖြင့် တိုင်ကြားရကြောင်း၊ ယခုလက်ရှိအခြေ အနေတွင် မိမိတို့ဒေသ၌ လိုင်းများပြတ်တောက်သဖြင့် ယင်းဆင်းကဒ်ကို ဆက်လက်သုံးစွဲ၍ ရ/မရ နှင့် နောင်တွင်လိုင်းများ ကောင်းမွန်ပါက သုံးစွဲ၍ ရ/မရ သိရှိလိုကြောင်း၊ ဌာနအနေဖြင့် ကူညီပေးရန် တယ်လီဖုန်းဖြင့် ဖြေကြားခဲ့ပါသည်။

     စားသုံးသူကာကွယ်ရေးဥပဒေအရ တိုင်ကြားမှုနှင့်ပတ်သက်၍ ညှိနှိုင်းဖြေရှင်းရန်အတွက် နယ်မြေ အခြေအနေအရ တိုင်ကြားသူနှင့် စီးပွားရေးလုပ်ငန်းရှင်အား တွေ့ဆုံ၍ ညှိနှိုင်းဖြေရှင်းရန် အခက်အခဲရှိသဖြင့် တိုင်ကြားသူလက်ခံရယူထားသော ဆက်သွယ်ရေးဝန်ဆောင်မှုနှင့်ပတ်သက်၍ ဌာနအနေဖြင့် ယင်းOperator မှတစ်ဆင့် နံပါတ် “XXX”သို့ ဆက်သွယ်ဆောင်ရွက်ရာတွင် မိမိတို့ အော်ပရေတာ ဆင်းကဒ်အမှတ် (၀၉-*******) မှာMybus ဝန်ဆောင်မှုကို ရယူထားကြောင်း၊ ၎င်းဝန်ဆောင်မှုမှာ ငွေကျပ် ၅၀၀ဝိ/-ဖြည့်သွင်းလျှင် (၂)ရက်၊ ၁၀၀၀ဝိ/- ဖြည့်သွင်းလျှင် (၇)ရက်၊ ငွေကျပ် ၁၅၀၀ဝိ/-မှ ၂၅၀၀ဝိ/-ကြားဖြည့်သွင်းလျှင် (၁၅)ရက်နှင့်ငွေကျပ် ၂၅၀၀ဝိ/- ဖြည့်သွင်းပါက (၁)လ သုံးစွဲ၍ရကြောင်း၊ ယခုဆင်းကဒ်မှာ (၁၃.၁.၂၀၂၂)ရက်နေ့တွင် သက်တမ်း ကုန်ဆုံးနေပြီဖြစ်ကြောင်း၊ ရက်ပေါင်း (၉၀)အတွင်း ငွေထပ်မံမဖြည့်သွင်းပါက ကဒ် အား ပယ်ဖျက်မည်ဖြစ်၍ ငွေဖြည့်သွင်းပါက ငွေဖြည့်သွင်းသည့်ရက်၏ ည (၁၂:၀၀)နာရီကျော်လျှင် ကဒ် ပြန်ပွင့်ပါကြောင်းနှင့် တိုင်ကြားသူအား ဌာနအနေဖြင့် ဆက်သွယ်ပေးစေလိုကြောင်း၊ ယခင်အဆင်မပြေမှုများရှိပါက တောင်းပန်ကြောင်း ဖြေကြားခဲ့ပါသည်။

       ဌာနအနေဖြင့် Mytel ဆက်သွယ်ရေးအော်ပရေတာ၏ ပြန်ကြားချက်ကို တိုင်ကြားသူအား ဆက်သွယ်ဆောင်ရွက်ရာ မိမိအနေဖြင့် ယခုလိုဌာနမှ ကူညီဆောင်ရွက်ပေးသဖြင့် သိရှိလိုသည်များ ကို ပြည့်စုံစွာ သိရှိရကြောင်း၊ စားသုံး သူရေးရာဦးစီးဌာနကိုလည်း ကျေးဇူးတင်ရှိပါကြောင်းနှင့် စိတ်ကျေနပ်မှုရှိပါကြောင်း ပြန်လည်တင်ပြခဲ့သဖြင့် စားသုံးသူနစ်နာ ဆုံးရှုံးမှုများ ဖြေရှင်းဆောင်ရွက် ပေးနိုင်ခဲ့ကြောင်း သိရှိရပါသည်။

DOCA(စစ်ကိုင်း)

ရန်ကုန်တိုင်းဒေသကြီးနေ တိုင်ကြားသူတစ်ဦးသည် xxxx ငွေကြေးဝန်ဆောင်မှု နှင့်ပတ်သက် ၍ App ထဲမှ Point များ ထုတ်ယူခံရသောကြောင့် ဖြေရှင်းဆောင်ရွက်ပေးပါရန် ရန်ကုန်တိုင်းဒေသ ကြီးဦးစီးမှူးရုံးသို့ ၃-၂-၂၀၂၁ ရက်နေ့တွင် ဆက်သွယ်တိုင်ကြားလာပါသည်။
တိုင်ကြားမှုနှင့်ပတ်သက်၍ ရန်ကုန်တိုင်းဒေသကြီးဦးစီးမှူးရုံးမှ တာဝန်ရှိသူများက ၂၅-၁-၂၀၂၁ ရက်နေ့တွင် xxxx သို့ တိုင်ကြားမှုများအား ၂၈-၁-၂၀၂၁ ရက်နေ့ နောက်ဆုံးထားဖြေရှင်း ဆောင် ရွက်ပေးရန် အကြောင်းကြားဆောင်ရွက်ခဲ့သော်လည်း သတ်မှတ်ရက်အတွင်း အကြောင်းပြန်ကြား လာမှုမရှိသဖြင့် ၁၉-၃-၂၀၂၁ ရက်နေ့တွင် တိုင်ကြားစာပါ လိပ်စာသို့ သွားရောက်စုံစမ်းရာတွင် အိမ်တံခါးပိတ်ထားသည်ကို တွေ့ရှိရပြီး ပတ်ဝန်းကျင်သို့ မေးမြန်းရာတွင်လည်း ကုမ္ပဏီမှာ ဖွင့်လှစ် ထားမှုမရှိကြောင်း၊ တိုင်ကြားစာပါ ဖုန်းနံပါတ်သို့ အကြိမ်ကြိမ်ဆက်သွယ်သော်လည်း ဆက်သွယ်၍ မရသောကြောင့် ၂၃-၃-၂၀၂၁ ရက်နှင့် ၃-၅-၂၀၂၁ ရက်နေ့တို့တွင် တိုင်းဒေသကြီးဦးစီးမှူးရုံးမှ တာဝန်ရှိသူများက တိုင်ကြားသူများထံ ဆက်သွယ်၍ ဌာန၏ဆောင်ရွက်ထားရှိမှုနှင့် တိုင်ကြားစာပါ အချက်အလက်များကို စိစစ်ရာတွင်လည်း ငွေကြေးလိမ်လည်မှုဖြစ်သဖြင့် တိုင်ကြားသူများအနေဖြင့် သက်ဆိုင်ရာရဲစခန်းသို့ အမှုဖွင့်တိုင်ကြားသွားရန် လိုအပ်ကြောင်းနှင့် ဌာနမှ Cyber Police ဖြင့် အရေးယူဆောင်ရွက်ပေးမည်ဖြစ်ကြောင်းတို့ကို ရှင်းလင်းပြောကြားရာ တိုင်ကြားသူများက ရဲစခန်း တွင် အမှုဖွင့်တိုင်ကြားလိုမှုမရှိပါကြောင်း၊ Cyber Police ဖြင့် အရေးယူဆောင်ရွက် ပေးမည်ဆိုပါက ကျေနပ်လက်ခံပါကြောင်းနှင့် ပူးပေါင်းဆောင်ရွက်မည်ဖြစ်ကြောင်း အကြောင်းပြန်ကြားလာသဖြင့် ၁၇-၅-၂၀၂၁ ရက်နေ့တွင် လိုအပ်သလို စစ်ဆေးအရေးယူမှုများ ဆောင်ရွက်ပေးနိုင်ရေးအတွက် မှုခင်း ရဲတပ်ဖွဲ့သို့ ညှိနှိုင်းစာပေးပို့ခဲ့ပြီး အမှုပိတ်သိမ်းဆောင်ရွက်ခဲ့ပါသည်။

             မန္တလေးတိုင်းဒေသကြီးနေ တိုင်ကြားသူတစ်ဦးသည် xxxxxx Pre School တွင် တစ်နှစ်စာ ငွေကျပ် (၂၂၅၀၀၀ဝိ/-) ပေးသွင်းပြီး ကျောင်းတက်ခဲ့ရာ Covid-19 ကာလဖြစ်၍ မတ်လမှစ၍ ကျောင်းပိတ်ခဲ့သော်လည်း Home Learning Plan စနစ်တကျ စီစဉ်ပေးနိုင်ခြင်း မရှိသဖြင့် ကျောင်း မတက်ခဲ့ရသည့် (၉) လစာအတွက် ငွေပြန်အမ်းပေးရန် ဖုန်းဖြင့် ဆက်သွယ်ပြောကြားသော်လည်း အဆင်ပြေမှုမရှိသဖြင့် ၂၂-၁၀-၂၀၂၀ ရက်နေ့တွင် မန္တလေးတိုင်းဒေသကြီးဦးစီးမှူးရုံးသို့ တိုင်ကြားခြင်း ဖြစ်ပါသည်။

          အထက်ပါ တိုင်ကြားမှုနှင့်ပတ်သက်၍ မန္တလေးတိုင်းဒေသကြီးဦးစီးမှူးရုံး၏ ညှိနှိုင်းပေးမှုအရ xxxxxx Preschool ကျောင်းမှ တိုင်ကြားသူ ပေးသွင်းထားသည့် တစ်နှစ်စာ ကျောင်းလခမှ သင်တန်း တက်ခဲ့သည့်ကာလ (၃) လစာနှုတ်၍ ကျန်ငွေ (၁၆,၈၇,၅၀၀/-) ကျပ်၏ ၅၀ %  (၈၄၃,၇၅၀/-) ကျပ်ကို ၂၆-၁၁-၂၀၂၀ ရက်နေ့တွင်လည်းကောင်း၊ ကျန်ငွေ (၈၄၃,၇၅၀/-) ကျပ်ကို ၁၂-၃-၂၀၂၁ ရက်နေ့တွင် လည်းကောင်း ပြန်လည်ပေးအပ်ခဲ့ပြီး တိုင်ကြားသူမှလည်း ကျေနပ်မှုရှိသဖြင့် အမှုအားပိတ်သိမ်း ဆောင်ရွက်ခဲ့ပါသည်။

          ရန်ကုန်တိုင်းဒေသကြီးနေ တိုင်ကြားသူတစ်ဦးသည် xxxxxxx Online Shopping မှ Brand ပစ္စည်းအတုများ ရောင်းချနေသောကြောင့် ဖြေရှင်းဆောင်ရွက်ပေးပါရန် ရန်ကုန်တိုင်းဒေသကြီး ဦးစီးမှူးရုံးသို့ ၂၇-၈-၂၀၂၀ရက်နေ့တွင် ဆက်သွယ်တိုင်ကြားလာပါသည်။

          တိုင်ကြားမှုနှင့်ပတ်သက်၍ ရန်ကုန်တိုင်းဒေသကြီးဦးစီးမှူးရုံးမှ တာဝန်ရှိသူများက xxxxxx Online Shopping သို့ ၃-၉-၂၀၂၀ ၊ ၁၈-၁၂-၂၀၂၀ ရက်နှင့် ၁-၃-၂၀၂၁ ရက်နေ့တို့တွင် ဆက်သွယ်ခဲ့ သော်လည်း အကြောင်းပြန်ကြားလာခြင်းမရှိသဖြင့် ၂၆-၅-၂၀၂၁ ရက်နေ့တွင် တိုင်ကြားသူထံ ထပ်မံ ဆက်သွယ်မေးမြန်းရာ၌ ၁၁-၁၀-၂၀၂၀ ရက်နေ့တွင် xxxxxxx Online Shopping မှ တာဝန်ရှိသူက တိုင်ကြားသူသို့ ဆက်သွယ်တောင်းပန်ခဲ့ပြီး ကျသင့်ငွေ ၅၉,၀၀၀/- ကျပ်ကို ပြန်လည်ပေးအပ်ခဲ့ပြီးဖြစ် ကြောင်း၊ ဖြေရှင်းမှုနှင့်ပတ်သက်၍ ကျေနပ်မှုရှိပါကြောင်း ပြောကြားခဲ့သဖြင့် ၂၇-၅-၂၀၂၁ ရက်နေ့ တွင် အမှုအား ပိတ်သိမ်းဆောင် ရွက်ခဲ့ပါသည်။

         ရန်ကုန်တိုင်းဒေသကြီး၊ မြောက်ဒဂုံမြို့နယ်နေ တိုင်ကြားသူတစ်ဦးသည် xxxxxxx ကလေး ဦးနှောက်ဖွံ့ဖြိုးမှုသင်တန်းကျောင်း၏ ပုံမှန်သင်ကြားရေးစနစ်မှ Online Learning Programme အဖြစ် ပြောင်းလဲပို့ချရာတွင် အချက်(၈) ချက်ကို ပြင်ဆင်ထားသည့်အပြင် ကျောင်းအပ်ခမှ ၅၀% ကို ပြန်အမ်းမည့် ဝန်ဆောင်မှုနှင့်ပတ်သက်၍ တိုင်ကြားလာပါသည်။

       တိုင်ကြားမှုနှင့်ပတ်သက်၍ ရန်ကုန်တိုင်းဒေသကြီးဦးစီးမှူးရုံးမှ တာဝန်ရှိသူများက ၁-၁၂-၂၀၂၀ ရက်နေ့တွင် တိုင်ကြားသူနှင့် xxxxxxx သင်တန်းကျောင်းမှ တာဝန်ရှိသူများအား နှစ်ဦးနှစ်ဖက် တွေ့ဆုံညှိနှိုင်းပေးခဲ့ရာ ၂၂-၃-၂၀၂၁ ရက်နေ့တွင် xxxxxxx သင်တန်းကျောင်းက လျော်ကြေးငွေ ၅၀ % ကို ၂၀၂၁ ခုနှစ် မတ်လကုန်တွင် နိုင်ငံတော်မှ ကျောင်းများ ဖွင့်ခွင့်မပြုသည့်အတွက် ဧပြီလ  ၁ ရက်မှ ၁၅ ရက်အတွင်း စာချုပ်ပါစည်းကမ်းအရ ထုတ်ပေးမည်ဖြစ်ကြောင်း သဘောတူညီခဲ့ပြီး ၇-၄-၂၀၂၁ ရက်နေ့တွင် xxxxxxx သင်တန်းကျောင်းမှ တာဝန်ရှိသူနှင့် တိုင်ကြားသူတို့ နှစ်ဦးသဘောတူ ကတိ စာချုပ်ချုပ်ဆိုပြီး တိုင်ကြားသူထံ ငွေကျပ် (၆၆၁,၅၀၀/-) ပြန်လည်ပေးအပ်ခဲ့ပြီးဖြစ်သဖြင့် အမှုအား ပိတ်သိမ်းဆောင်ရွက်ခဲ့ပါသည်။