သတင်းနှင့် လှုပ်ရှားမှုများ

နေပြည်တော်၊ မတ် ၂၂
ပြည်တွင်း ဆန်စပါးဈေးကွက် အခြေအနေနှင့် ဝယ်ယူမှု အခြေအနေများ၊ မြန်မာ့ဆန် ပြည်ပတင်ပို့နေမှု အခြေအနေများနှင့် စပ်လျဉ်းသည့် လုပ်ငန်းညှိနှိုင်းအစည်းအဝေးကို (၂၂-၃ -၂၀၂၁) ရက်နေ့တွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၌ Virtual Meeting စနစ်ဖြင့် ကျင်းပပြုလုပ်ခဲ့ပြီးအစည်းအဝေးသို့ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေး ဝန်ကြီးဌာန ပြည်ထောင်စုဝန်ကြီး ဦးအောင်နိုင်ဦး၊ စိုက်ပျိုးရေး၊ မွေးမြူရေးနှင့် ဆည်မြောင်း ဝန်ကြီးဌာန ပြည်ထောင်စုဝန်ကြီး ဦးတင်ထွဋ်ဦး၊ စီးပွားရေးနှင့် ကူးသန်းရောင်းဝယ်ရေးဝန်ကြီး ဌာန ပြည်ထောင်စုဝန်ကြီး ဒေါက်တာပွင့်ဆန်း၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီး ဦးညွန့်အောင်၊ အမြဲတမ်းအတွင်းဝန်နှင့် ညွှန်ကြားရေးမှူးချုပ်များ၊ မြန်မာနိုင်ငံ ဆန်စပါးအသင်းချုပ်၊ မြန်မာနိုင်ငံဆန်စပါးကုန်သည်များအသင်းနှင့် မြန်မာနိုင်ငံ ဆန်စက် လုပ်ငန်းရှင်များ အသင်းတို့မှ တာဝန်ရှိသူများနှင့် ဆန်စပါးကဏ္ဍတွင် ပါဝင်ဆောင်ရွက် နေကြ သည့် Stakeholder များ တက်ရောက်ဆွေးနွေးကြပါသည်။
အစည်းအဝေးတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ပြည်ထောင်စု ဝန်ကြီးက နိုင်ငံတော်အနေဖြင့် စိုက်ပျိုး၊ မွေးမြူရေးကို အခြေခံ၍ အခြားစီးပွားရေးကဏ္ဍများ တိုးတက်အောင် ဦးတည်ချက်များ ချမှတ်ဆောင်ရွက်လျက်ရှိရာ ဆန်စပါးကဏ္ဍ Supply Chain တလျောက် စဉ်ဆက်မပြတ်တိုးတက်မှုများ ဖြစ်ပေါ်စေရေးအတွက် သက်ဆိုင်ရာဌာနများနှင့် ပုဂ္ဂလိက ကဏ္ဍမှ ပါဝင် ဆောင်ရွက်လျက်ရှိသူများ ဝိုင်းဝန်း၍ ပူးပေါင်းဆောင်ရွက်ကြရမည် ဖြစ်ပါကြောင်း၊ တောင်သူလယ်သမား အခွင့်အရေးကာကွယ်ရေးနှင့် အကျိုးစီးပွားမြှင့်တင်ရေး ဥပဒေအရ ဆောင်ရွက်နေသည့် လုပ်ငန်းများ အောင်မြင်စေရေးအတွက် ဝိုင်းဝန်းဆောင်ရွက်ကြဖို့ လိုပါကြောင်း ပြောကြားပါသည်။
ဆက်လက်၍ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စု ဝန်ကြီးက ပြည်တွင်း၌ မိုးစပါးနှင့် နွေစပါးစိုက်ပျိုးထွက်ရှိမှု အခြေအနေများ၊ ရိတ်သိမ်းမှု အခြေအနေများနှင့် သယ်ယူပို့ဆောင်မှု အခြေအနေများ၊ စပါးအထွက်နှုန်း တိုးတက်လာစေရေး အတွက် စက်မှုလယ်ယာစနစ်သို့ ကူးပြောင်းဆောင်ရွက်နိုင်ရေးနှင့် စိုက်ပျိုးရေ ပိုမိုရရှိစေရေး အတွက် ဆောင်ရွက်သွားမည့် အစီအစဉ်များ၊ ပြည်တွင်း ဆန်စပါး ဈေးကွက် ဖြစ်ပေါ်နေမှု အခြေအနေများနှင့် ဆန် ပြည်ပတင်ပို့ရာတွင် လိုအပ်သည့် အပင်ပိုးမွှား ရောဂါ ကာကွယ်ရေးဆိုင်ရာ ထောက်ခံချက်များ ထုတ်ပေးနေသည့် အစီအစဉ်များကို ဆွေးနွေး ပြောကြားပါသည်။
ဆက်လက်၍ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ပြည်ထောင်စုဝန်ကြီးက မြန်မာနိုင်ငံဆန်စပါးအသင်းချုပ်က ဘင်္ဂလားဒေ့ရှ်နိုင်ငံသို့ G to G အစီအစဉ်ဖြင့် ဆန်တန်ချိန် (၁) သိန်း တင်ပို့ရောင်းချရေးနှင့် ပတ်သက်၍ လုပ်ငန်းများ အဆင်ပြေ ချောမွေ့စေ ရေးအတွက် Export Financing အနေဖြင့် ကျပ်ငွေ (၃၀) ဘီလီယံကို ချေးပေးခဲ့ပါကြောင်း၊ မြန်မာ Exporter များအနေဖြင့် နိုင်ငံတကာဆန်ဈေးကွက်ပြောင်းလဲမှု များကို မျက်ခြေမပြတ် လေ့လာကာ ကြိုတင်ပြင်ဆင်ထားရှိမှုများ ဆောင်ရွက်သင့်ပါကြောင်း၊ မြန်မာ့ဆန် ပြည်ပသို့ အရှိန်အဟုန်မပျက် တင်ပို့နိုင်ရေးအတွက် အစိုးရနှင့်ပုဂ္ဂလိက ပိုမိုပူးပေါင်းဆောင်ရွက်သွားကြရမည်ဖြစ်ပါကြောင်း ပြောကြားပါသည်။
ထို့နောက် တက်ရောက်လာကြသည့် အသင်းအဖွဲ့တာဝန်ရှိသူများ၊ Exporter များနှင့် လုပ်ငန်းရှင်များမှ လုပ်ငန်းများဆောင်ရွက်ရာတွင် တွေ့ကြုံရသည့် အခက်အခဲများကို ရှင်းလင်း တင်ပြကြရာ ပြည်ထောင်စုဝန်ကြီးများနှင့် တာဝန်ရှိသူများက ပေါင်းစပ်ညှိနှိုင်းဖြေရှင်း ဆောင်ရွက်ပေးခဲ့ကြောင်း သတင်းရရှိပါသည်။
ပြည်တွင်း

နေပြည်တော်၊ မတ် ၈
လယ်ယာထုတ်ကုန်စီမံခန့်ခွဲရေးအဖွဲ့၏ ၂၀၂၀-၂၀၂၁ ဘဏ္ဍာနှစ်အတွက် ဆန်စပါး ဝယ်ယူခြင်းဆိုင်ရာညှိနှိုင်းအစည်းအဝေးကို (၈-၃-၂၀၂၁) ရက်နေ့တွင် စီးပွားရေးနှင့် ကူးသန်း ရောင်းဝယ်ရေးဝန်ကြီးဌာန၊ ရုံးအမှတ်(၃)၌ Virtual Meeting စနစ်ဖြင့် ကျင်းပပြုလုပ်ခဲ့ပြီး အစည်းအဝေးသို့ လယ်ယာထုတ်ကုန်စီမံခန့်ခွဲရေးအဖွဲ့ ဥက္ကဋ္ဌ စီးပွားရေးနှင့် ကူးသန်း ရောင်းဝယ်ရေးဝန်ကြီးဌာန၊ ဒုတိယဝန်ကြီးနှင့် အဖွဲ့ဝင်များ တက်ရောက်ဆွေးနွေးကြပါသည်။
အစည်းအဝေးတွင် လယ်ယာထုတ်ကုန်စီမံခန့်ခွဲရေးအဖွဲ့ ဥက္ကဋ္ဌ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီးက နိုင်ငံတော်အနေနဲ့ တောင်သူလယ်သမား အခွင့်အရေး ကာကွယ်ရေးနှင့် အကျိုးစီးပွား မြှင့်တင်ရေးဥပဒေအရ နှစ်စဉ် အခြေခံရည်ညွှန်း စပါးဈေးနှုန်းကို ထုတ်ပြန်ကြေညာပြီး၊ စပါးများ ထွက်ပေါ်ချိန်၌ အခြေခံရည်ညွှန်းစပါးဈေးနှုန်း အောက် ကျရောက်သည့်ဒေသများတွင် တောင်သူလယ်သမားများထံမှ စပါးဝယ်ယူခြင်း လုပ်ငန်းများကို ဆောင်ရွက်ခဲ့မှု အခြေအနေ၊ ယခုနှစ် အခြေခံရည်ညွှန်းစပါးဈေးနှုန်းဖြင့် စပါးဝယ်ယူမှု အခြေအနေများနှင့် ဆန်အိတ်များ ပြန်လည်လက်ခံရရှိမှု အခြေအနေများ၊ လယ်ယာထုတ်ကုန်စီမံခန့်ခွဲရေးအဖွဲ့အနေဖြင့် ရှေ့ဆက်ဆောင်ရွက်သွားမည့် အခြေအနေများကို ရှင်းလင်းပြောကြားပါသည်။
ထို့နောက် အစည်းအဝေးသို့ တက်ရောက်လာကြသူများက လယ်ယာထုတ်ကုန်စီမံ ခန့်ခွဲရေးအဖွဲ့က ဆောင်ရွက်လျက်ရှိသည့် စပါး၊ ဆန် ဝယ်ယူရေး လုပ်ငန်းများ အဆင်ပြေ ချောမွေ့စေရေးကိစ္စရပ်များကို ဝိုင်းဝန်းဆွေးနွေးကြပြီး လိုအပ်သည်များကို ပေါင်းစပ်ညှိနှိုင်း ဆောင်ရွက်ခဲ့ကြကြောင်း သတင်းရရှိပါသည်။

Covid-19 ကူးစက်ရောဂါကာလအတွင်း၌ စားသုံးသူတို့၏ အခွင့်အရေးများ အပြည့်အဝရရှိစေရန်နှင့် အကျိုးစီးပွားများကို ကာကွယ်ရန် စားသုံးသူအသိပညာပေးလုပ်ငန်းများကို တိုင်းဒေသကြီး/ပြည်နယ်အတွင်းရှိ စားသုံးသူရေးရာဦးစီးဌာနနှင့် ပြန်ကြားရေးနှင့် ပြည်သူ့ဆက်ဆံရေးဦးစီးဌာနတို့ ပူးပေါင်း၍ Online Media မှတစ်ဆင့် စားသုံးသူကာကွယ်ရေးအသိပညာပေး Talk Show ဆွေးနွေးပွဲများကို ကျင်းပခဲ့ကြပါသည်။ အဆိုပါဆွေးနွေးပွဲများတွင် စားသုံးသူကာကွယ်ရေးပေါ်ပေါက်လာပုံ၊ စားသုံးသူရေးရာဦးစီးဌာန၏ သမိုင်း၊ စားသုံးသူကာကွယ်ရေးဥပဒေ(၂၀၁၉) ပြဋ္ဌာန်းချက်ပါ စားသုံးသူအခွင့်အရေးနှင့်တာဝန်များ၊ စားသုံးသူနစ်နာဆုံးရှုံးမှုအတွက် တိုင်ကြားနိုင်သည့် နည်းလမ်းများနှင့် ဖြေရှင်းဆောင်ရွက်ပေးနေမှု၊ စားသုံးသူကာကွယ်ရေးဥပဒေပါ အခန်း(၁၈) ကုန်အညွှန်းအမှတ်အသားဖော်ပြခြင်းနှင့်စပ်လျဉ်းသည့် သိကောင်းစရာများ၊ စားသုံးသူကာကွယ်ရေးဥပဒေပါ တားမြစ်ချက်များနှင့် ပြစ်မှုပြစ်ဒဏ်များ၊ အရေးကြီးကုန်စည်နှင့်ဝန်ဆောင်မှုဥပဒေများနှင့်ပတ်သက်သည့် အမိန့်ညွှန်ကြားချက်များနှင့် လိုက်နာဆောင်ရွက်ရမည့် အချက်များ၊ Digital Online စနစ်ဖြင့် ဆောင်ရွက်နေသော ငွေကြေးဝန်ဆောင်မှုလုပ်ငန်းများတွင် စားသုံးသူနစ်နာဆုံးရှုံးမှုများ မဖြစ်ပေါ်စေရေးအတွက် ငွေကြေးဝန်ဆောင်မှုဆိုင်ရာ လုပ်ငန်းစဉ်များကို လိုက်နာဆောင်ရွက်ရန်အချက်များ၊ Online Shopping လုပ်ငန်းများ ကျယ်ပြန့်စွာ ဆောင်ရွက်လာနိုင်သည်နှင့်အမျှ စားသုံးသူများ၏ လေ့လာမှုအားနည်းချက်အပေါ် အခွင့်ကောင်းယူ၍ Online မှတစ်ဆင့် စီးပွားရေးလုပ်ငန်းရှင်အချို့၏ လိမ်လည်မှုများကြောင့် နစ်နာဆုံးရှုံးမှု မရှိစေရေးအတွက် ဆောင်ရန်၊ ရှောင်ရန်အချက်များ၊ အချို့ Online Shopping Page များသည် ကုန်ပစ္စည်းပို့ဆောင်ရေး ဝန်ဆောင်မှုလုပ်ငန်းများ၏ ပစ္စည်းလက်ခံပြေစာများကို အတုအပပြုလုပ်၍ မမှန်မကန်ဆောင်ရွက်နေသည့်အတွက် စားသုံးသူများနစ်နာဆုံးရှုံးမှုမရှိစေရေး လိုက်နာဆောင်ရွက်ရန်အချက်များကို အသေးစိတ်ဆွေးနွေးခဲ့ကြကြောင်း သိရှိရပါသည်။

စားသုံးသူကာကွယ်ရေးဥပဒေ ၂၀၁၉၊ အခန်း(၁၈)တွင် ကုန်အညွှန်းအမှတ်အသား ဖော်ပြ ခြင်းနှင့် စပ်လျဉ်းသည့် အချက်များကို ပြဌာန်းထားပြီး ကုန်အညွှန်းအမှတ်အသားဖော်ပြရာတွင် လိုအပ်သည့် အသေးစိတ်အချက်များကိုလည်း စီးပွားရေးလုပ်ငန်းရှင်များ လိုက်နာနိုင်ရန်အတွက် မြန်မာနိုင်ငံစားသုံးသူကာကွယ်ရေးကော်မရှင်မှ ညွှန်ကြားချက်အမှတ်(၂/၂၀၁၉)ဖြင့် ထုတ်ပြန် ထားပြီးဖြစ်ပါသည်။ ထုတ်ကုန်လုံခြုံစိတ်ချရမှုဌာနခွဲအနေဖြင့် ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသားဖော်ပြထားခြင်းအား ညွှန်ကြားချက်(၂/၂၀၁၉)နှင့်အညီ စိစစ် ဆောင်ရွက်ပေးလျက်ရှိပြီး ၂၀၂၀ ပြည့်နှစ်၊ အောက်တိုဘာလမှ ဒီဇင်ဘာလအတွင်း တိုင်းဒေသ ကြီး/ပြည်နယ်များမှ တင်ပြလာသည့် ကုန်စည်များကို တင်ပြပါပုံအတိုင်း စိစစ်ဆောင်ရွက်ပေးခဲ့ပါသည်။

ထုတ်လုပ်မှုမှသည် ဈေးကွက်ဆီ …

       သီးနှံများ၊ ထွက်ကုန်များ၊ ကုန်စည်များ ထုတ်လုပ်ခြင်း၏ အဓိကပန်းတိုင်သည် စားသုံးရန် ဖြစ် သော်လည်း စားသုံးမှုမှ ပိုလျှံမှုများအတွက် ဈေးကွက်သည် မရှိမဖြစ်လိုအပ်သော အရာပင်ဖြစ်ပါသည်။ နိုင်ငံတော်အနေဖြင့် ပြည်တွင်းထုတ်ကုန်များအား ထုတ်လုပ်မှုတိုးတက်စေရန်၊ ပြည်တွင်းစားသုံးမှု တိုးတက်မြင့်မားရန်၊ စားသုံးမှုမှ ပိုလျှံသည်များကို ပြည်ပသို့တင်ပို့ရန်ဟူသည့် မူဝါဒများကို ကဏ္ဍ အလိုက် ချမှတ်ဆောင်ရွက်လျှက်ရှိပါသည်။ ထို့ပြင် နိုင်ငံတော်၏ စီးပွားရေးမူဝါဒ (၁၂) ရပ်တွင်လည်း "ဘက်စုံဖွံ့ဖြိုးတိုးတက်ရေး၊ စားနပ်ရိက္ခာဖူလုံစေခြင်းနှင့် ပို့ကုန်မြှင့်တင်နိုင်ရေးတို့အတွက် လယ်ယာ ကဏ္ဍ၊ မွေးမြူရေးကဏ္ဍနှင့် စက်မှုကဏ္ဍ ချိန်ခွင်လျှာညီသည့် စီးပွားရေးပုံစံဖော်ထုတ်ရန်" ဟူ၍ ပါရှိ ပါ သည်။ အဆိုပါမူဝါဒကို အကောင်အထည်ဖော်ရာတွင် ပြည်တွင်းထုတ်လုပ်မှုမြှင့်တင်ရေး၊ စားသုံးမှုဖူလုံ စေရေးနှင့် ဈေးကွက်ရရှိရေးတို့ကို ဟန်ချက်ညီညီ ဆောင်ရွက်ရမည်ဆိုသည့်အချက်မှာ ထင်ရှားလျက် ရှိပါသည်။ မြန်မာနိုင်ငံအနေဖြင့်လည်း လယ်ယာကဏ္ဍ၊ မွေးမြူရေးကဏ္ဍတို့အပေါ် အခြေခံ၍ ဘက်စုံ ဖွံ့ဖြိုးတိုးတက်အောင်ဆောင်ရွက်ရန် အခွင့်အလမ်းကောင်းများစွာ ပိုင်ဆိုင်လျှက်ရှိသော နိုင်ငံတစ်နိုင်ငံ ဖြစ်ပါသည်။ ထို့ပြင် သဘာဝတရားက ကောင်းစွာပေးအပ်ထားသည့် စိုက်ပျိုးရေးကဏ္ဍတွင် ကုန်ထုတ် လုပ်မှုတိုးတက်အောင်နှင့် ခေတ်မီအောင်လုပ်ဆောင်နိုင်ပါက အာဆီယံနှင့် အာရှဒေသတွင်းတွင် အဓိက စိုက်ပျိုးရေးအခြေခံ စားသောက်ကုန်ထုတ်လုပ်သည့် ကုန်သွယ်ရေးဗဟိုချက်မဖြစ်လာမည့် အလားအလာ ကောင်းများစွာရှိနေကြောင်း လေ့လာမှုစစ်တမ်းတစ်ခုအရ သိရှိရပါသည်။ ထို့ကြောင့် မြန်မာနိုင်ငံ၌ လယ်ယာလုပ်ငန်းအပါအဝင် စိုက်ပျိုးရေးကဏ္ဍကို ခေတ်မီဖွံ့ဖြိုးသည့် စီးပွားရေးပုံစံအဖြစ် ပေါ်ပေါက် လာစေရန် ဘက်ပေါင်းစုံ၊ ကဏ္ဍပေါင်းစုံက ပူးပေါင်းကြိုးပမ်းဆောင်ရွက်ကြရမည်ဖြစ်ပါသည်။

      ၂၀၂၀ ပြည့်နှစ်စာရင်းအရ မြန်မာနိုင်ငံ၏လူဦးရေသည် (၅၄) သန်းကျော်ရှိပြီး အာဆီယံတွင် ပဉ္စမမြောက် လူဦးရေအများဆုံးနိုင်ငံလည်းဖြစ်ပါသည်။ အဆိုပါအချက်သည် ထုတ်ကုန်များအပေါ် ပြည်တွင်းဈေးကွက်အတွက် အလားအလာကောင်းများစွာ ဖြစ်ပေါ်စေနိုင်သကဲ့သို့ ပြည်တွင်းထုတ်လုပ်မှု ကိုလည်း အားကောင်းစေနိုင်မည့် မောင်းနှင်မှုကို ဖြစ်စေပါသည်။ ထို့ပြင် မြန်မာနိုင်ငံသည် စီးပွားရေး အင်အားကြီးမားပြီး ကမ္ဘာ့လူဦးရေအများဆုံးဖြစ်သည့် တရုတ်နိုင်ငံနှင့် အိန္ဒိယနိုင်ငံတို့နှင့် နယ်နိမိတ်ချင်း ထိစပ်နေခြင်း၊ ကမ္ဘာ့နိုင်ငံများသို့ ရေလမ်းခရီးပါ ဆက်သွယ်သွားလာနိုင်သည့် အခွင့်အရေးများ ရှိနေခြင်း စသည်တို့သည် မြန်မာ့ထုတ်ကုန်များအတွက် ဈေးကွက်ဖော်ဆောင်ရေးတွင် အားသာချက်များဟု ဆိုနိုင် မည်ဖြစ်ပါသည်။ ထို့ကြောင့် ထုတ်လုပ်မှုအား ပြည်တွင်း၊ ပြည်ပဈေးကွက် နှစ်ခုလုံးအတွက် မျှော်မှန်း ဆောင်ရွက်သင့်ပါသည်။ ထုတ်လုပ်မှုနှင့် ဈေးကွက်သည် အပြန်အလှန်သက်ရောက်လျှက်ရှိပြီး ထုတ်ကုန်၏ အရည်အသွေးနှင့် ပမာဏအပေါ်မူတည်၍ ဈေးကွက်ခိုင်မာမှုရှိနိုင်မည်ဖြစ်သကဲ့သို့ ဈေးကွက်၏ အနေ အထားအပေါ် မူတည်၍လည်း ထုတ်လုပ်မှုကို ချိန်ထိုးလုပ်ဆောင်သင့်ပါသည်။ လက်ရှိအခြေအနေ၌ ထုတ်လုပ်မှုနှင့် ကုန်သွယ်မှုလုပ်ငန်းစဉ်များအပေါ် အဓိကသက်ရောက်လျှက်ရှိသောအချက်မှာ ဈေးကွက် ရရှိမှုပင် ဖြစ်ပါသည်။ ကုန်သွယ်မှုဖွံ့ဖြိုးရေးနှင့် ဈေးကွက်ရရှိရေးတို့အတွက် အခြေခံကျသော အချက် များအား ဆက်လက်ဆွေးနွေးသွားမည် ဖြစ်ပါသည်။

ထောက်ပံ့ပို့ဆောင်ရေး (logistics)

       ထောက်ပံ့ပို့ဆောင်ရေး (logistics) သည် ပြည်တွင်း၊ ပြည်ပကုန်သွယ်ရေးလုပ်ငန်းများတွင် အဓိကကျသော ကဏ္ဍတစ်ခုဖြစ်ပါသည်။ ထုတ်ကုန်များ ဈေးကွက်သို့ လွယ်ကူချောမွေ့စွာ ရောက်ရှိ ရန်မှာ logistics ၏ ပါဝင်မှုသည် များစွာဖွံ့ဖြိုးတိုးတက်ရန် လိုအပ်ပါသည်။ ထောက်ပံ့ပို့ဆောင်ရေး လုပ်ငန်းများ၏ အဓိကရည်ရွယ်ချက်မှာ မှန်ကန်သောအရည်အသွေးရှိသည့် ထုတ်ကုန်များ စားသုံးသူ များထံသို့ အချိန်မီရောက်ရှိစေရန်နှင့် စီးပွားရေးလုပ်ငန်းများတွင် ကုန်ကျစရိတ်သက်သာစေရန် ဖြစ်ပါ သည်။ လက်ရှိတွင် မြန်မာနိုင်ငံ၏ စီးပွားရေးဖွံ့ဖြိုးတိုးတက်မှုနှင့် ဈေးကွက်ယှဉ်ပြိုင်နိုင်စွမ်း နည်းပါး နေခြင်း၏ အဓိကအတားအဆီးမှာ ထောက်ပံ့ရေးနှင့် ပို့ဆောင်ရေးစရိတ်စကများ ကြီးမားနေခြင်း ကြောင့် ဖြစ်ကြောင်း သုံးသပ်ကြပါသည်။ မြန်မာနိုင်ငံသည် အာဆီယံနိုင်ငံများအတွင်းတွင် ထောက်ပံ့ ရေးနှင့် ပို့ဆောင်ရေးလုပ်ငန်း ကုန်ကျစရိတ်များ အကြီးမားဆုံးဖြစ်နေကြောင်း သိရှိရပါသည်။ ထိုသို့ ကုန်ကျစရိတ် မြင့်မားခြင်းကြောင့် ထုတ်ကုန်များ ပြည်တွင်း၊ ပြည်ပဈေးကွက်ဝင်ရောက်နိုင်ရန် အခက် အခဲများဖြစ်ပေါ်ကြရပါသည်။ ထို့ကြောင့် ထောက်ပံ့ပို့ဆောင်ရေးကုန်ကျစရိတ်များအပြင် ထုတ်ကုန် များ၏ ထုတ်လုပ်မှုကုန်ကျစရိတ်ကိုပါ လျော့ချနိုင်မှသာလျှင် ဈေးကွက်ဝင်ရောက်နိုင်စွမ်းမှာ တိုးတက် ဖွံ့ဖြိုးလာမည်ဖြစ်ပါသည်။

       ထုတ်ကုန်များ လိုအပ်သည့်နေရာသို့ ရောက်ရှိစေရေးအတွက် ထောက်ပံ့ပို့ဆောင်မှုတွင် အရေး ပါဆုံးလုပ်ငန်းမှာ သယ်ယူပို့ဆောင်ရေးပင်ဖြစ်ပါသည်။ နိုင်ငံတကာနှင့် ချိတ်ဆက်ဆောင်ရွက်ရသည့် ထောက်ပံ့ပို့ဆောင်မှုတွင် သယ်ယူပို့ဆောင်ရေး၏အခန်းကဏ္ဍသည် ပို၍ပင် အရေးပါလာပါသည်။ သယ်ယူပို့ဆောင်ရေးနှင့် ထောက်ပံ့ပို့ဆောင်မှုဆိုင်ရာ လုပ်ငန်းဆောင်တာများသည် လူနေမှုဘဝ အတွက် မရှိမဖြစ်လိုအပ်ချက်များဖြစ်ပြီး အဆိုပါလုပ်ငန်းများမှာ ကုန်စည်များကို တစ်နေရာမှ တစ်နေရာသို့ ရွှေ့ပြောင်းခြင်း၊ ထိမ်းသိမ်းသိုလှောင်ခြင်း၊ ကိုင်တွယ်ဆောင်ရွက်ခြင်းနှင့် သုံးစွဲသူများ လက်ဝယ်သို့ ရောက်ရှိအောင် ပို့ဆောင်ပေးခြင်း စသည်တို့ဖြစ်ပါသည်။ သယ်ယူပို့ဆောင်ရေးကဏ္ဍတွင် လေကြောင်း လိုင်းများ၊ ရထားပို့ဆောင်ရေးလုပ်ငန်းများ၊ သင်္ဘောတင်လုပ်ငန်းများ၊ ဆိပ်ကမ်းလုပ်ငန်းများနှင့် ကုန်းလမ်းပို့ဆောင်ရေးလုပ်ငန်းများပါဝင်ပါသည်။ အဆိုပါလုပ်ငန်းများ ဖွံ့ဖြိုးတိုးတက်မှသာ ကုန်သွယ် ရေးလုပ်ငန်းများအပါအဝင် ထုတ်ကုန်များ၏ ဈေးကွက်ရရှိမှုကို အထောက်အပံ့ဖြစ်စေမည် ဖြစ်ပါသည်။ ထို့ကြောင့် ဒေသအလိုက် ကုန်သွယ်မှုလုပ်ငန်းများ တိုးတက်လာစေရန်နှင့် ထုတ်ကုန်များ ဈေးကွက်ရရှိ စေရန်အတွက် သယ်ယူပို့ဆောင်ရေးနှင့် ထောက်ပံ့ပို့ဆောင်ရေးဆိုင်ရာလုပ်ငန်းများကို လွယ်ကူကောင်း မွန်အောင် ဆောင်ရွက်ကြရမည် ဖြစ်ပါသည်။ ထိုသို့ဆောင်ရွက်ရာတွင် မူဝါဒချမှတ်သူများအနေဖြင့် လုပ်သာကိုင်သာရှိသော အစီအမံများ ချမှတ်ရန်လိုအပ်သကဲ့သို့ လက်တွေ့ အကောင်အထည်ဖော်ကြရ မည့်သူများကလည်း မြေပြင်တွင်ဖြစ်ပေါ်လျှက်ရှိသည့် အခက်အခဲများ၊ ကိစ္စရပ်များအပေါ် စနစ်တကျ လုပ်ကိုင်ဆောင်ရွက်ကြရန် လိုအပ်ပါသည်။ အထူးသဖြင့် ကုန်သွယ်မှုလုပ်ငန်းများ ဖွံ့ဖြိုးရေးအတွက် အဓိကပါဝင်ဆောင်ရွက်ကြရသည့် ထုတ်လုပ်သူများ၊ ကုန်သည်လုပ်ငန်းရှင်များ၊ အသင်းအဖွဲ့များနှင့် သက်ဆိုင်ရာအစိုးရဌာနများသည် "မိမိတို့ဒေသအလိုက် ကုန်သွယ်မှုနှင့်ပတ်သက်၍ logistics နှင့် သယ်ယူပို့ဆောင်ရေးဆိုင်ရာ အခက်အခဲများကို သုံးသပ်ဖော်ထုတ်၍ အထက်တာဝန်ရှိသူ အဆင့်ဆင့်သို့ တင်ပြခြင်း၊ ကုန်ကျစရိတ်ကြီးမြင့်နေမှုများရှိပါက ပေါင်းစပ်ညှိနှိုင်းဖြေရှင်းခြင်း၊ လွယ်ကူချောမွေ့ သည့် ကုန်သွယ်မှုနှင့် သယ်ယူပို့ဆောင်မှုဖြစ်ပေါ်စေရေး ပေါင်းစပ်ဆောင်ရွက်ခြင်း၊ ကုန်စည်စီးဆင်း မှုနှင့် သယ်ယူပို့ဆောင်မှုဆိုင်ရာအခြေအနေများအပေါ် လေ့လာသုံးသပ်ခြင်း" စသည်တို့ကို ပြုလုပ်  ဆောင်ရွက်ခြင်းသည် ပြည်တွင်းကုန်သွယ်ရေးဖွံ့ဖြိုးမှုအတွက် အထောက်အပံ့ကောင်းများပင် ဖြစ်ပါ သည်။

ဆက်လက်ဖော်ပြပါအုံးမည် … ။

  အောင်ဆန်းလင်း(DOCA)