အိန္ဒိယနိုင်ငံ၌ ၂၀၂၃ ခုနှစ် မိုးသီးနှံရာသီကုန်ဆုံးချိန်တွင် စပါး၊ ကြံ၊ ပြောင်း၊ ရာဂီနှံစား ပြောင်း၊ ဘာဂျရာ နှံစားပြောင်းနှင့် ပဲပုတ်တို့အပါအဝင် သီးနှံအများအပြား၏ စိုက်ပျိုးဧရိယာများ တိုးတက်ခဲ့ကြောင်း ၂၉-၉-၂၀၂၃ နေ့၌ အိန္ဒိယအစိုးရက သတင်းထုတ်ပြန်ခဲ့ပါသည်။
အိန္ဒိယ စိုက်ပျိုးရေးဝန်ကြီးဌာန၏ အပတ်စဉ်သတင်းထုတ်ပြန်ချက်တွင် ဖော်ပြချက်အရ ၂၉-၉-၂၀၂၃ နေ့အထိ မိုးသီးနှံစိုက်ဧရိယာ စုစုပေါင်း ဟက်တာ ၁၁၀၇.၁၅ သိန်း စိုက်ပျိုးနိုင်ခဲ့ရာ ယခင်နှစ်ကထက် ၀.၂ ရာခိုင်နှုန်း တိုးတက်မှုရရှိခဲ့ကြောင်း၊ စပါးစိုက်ဧရိယာမှာ ဟက်တာ ၄၁၁.၉၆ သိန်းရှိပြီး ယခင်နှစ်ကာလတူစိုက်ပျိုးနိုင်မှု ဟက်တာ ၄၀၄.၂၇ သိန်းအပေါ် ၁.၉ ရာခိုင်နှုန်း တိုး တက်ခဲ့ကြောင်း၊ ယခုနှစ် မိုးစပါးစိုက်ပျိုးမှုမှ ဆန်တန်ချိန် ၁၁၁ သန်း ထွက်ရှိရန် မျှော်မှန်းထား ကြောင်း သိရှိရသည်။
ပုံမှန်အားဖြင့် သီးနှံစိုက်ပျိုးရာသီ မကုန်ဆုံးမီအချိန်၌ သီးနှံအလိုက်ထွက်ရှိနိုင်မည့် ပမာဏ ခန့်မှန်းချက်ကို ထုတ်ပြန်လေ့ရှိသော်လည်း ယခုနှစ်တွင် ပဲမျိုးစုံနှင့် ဝါသီးနှံတို့ အပါအဝင် အခြား သီးနှံများစွာ၏ အထွက်ပမာဏမှာ လျော့ကျဖွယ်ရှိကြောင်း တွက်ဆပြောဆိုမှုများရှိနေပြီး အိန္ဒိယ အစိုးရသည် ကနဦးကြိုတင်ခန့်မှန်းချက် ထုတ်ပြန်ရန် နှောင့်နှေးလျက်ရှိသည်။ အိန္ဒိယ စိုက်ပျိုးရေး သုတေသနကောင်စီ (ICAR) တွင် စိုက်ပျိုးရေးသိပ္ပံပညာရှင်အဖြစ် တာဝန်ထမ်းဆောင်ခဲ့သော SK Singh က ယခင်နှစ်၌ ဥတ္တာပရာဒေ့ရှ်၊ ဘီဟာနှင့် ဂျားခန် ပြည်နယ်များတွင် မိုးလျော့နည်းမှု ကြောင့် စပါးအထွက် ထိခိုက်နိုင်ခြေရှိသော်လည်း အစိုးရသည် သီးနှံအထွက်ခန့်မှန်းချက်ကို ကြို တင်ထုတ်ပြန်ခဲ့ကြောင်း၊ သို့ရာတွင် ယခုနှစ်၌ အစိုးရ၏ တရားဝင်ခန့်မှန်းချက်များ ထုတ်ပြန်မှု သည် ဈေးကွက်ဈေးနှုန်းများအပေါ် လွှမ်းမိုးမှုရှိမည်ကို စိုးရိမ်မှုများ မြင့်တက်လျက်ရှိကြောင်း ပြော ဆိုပါသည်။
အိန္ဒိယစိုက်ပျိုးရေးဝန်ကြီးဌာန၏ စာရင်းများအရ ယခုနှစ် မိုးသီးနှံရာသီကုန်ဆုံးချိန်တွင် ပြောင်းသီးနှံနှင့် နှံစားပြောင်းများ ပါဝင်သော နှံစားသီးနှံစိုက်ပျိုးမှုမှာ ဟက်တာ ၁၈၈.၀၂ သိန်းရှိပြီး ယခင်နှစ် စိုက်ပျိုးမှု ဟက်တာ ၁၈၄.၇၇ သိန်းအပေါ် ၁.၉ ရာခိုင်နှုန်း တိုးတက်မှုရရှိခဲ့ကြောင်း၊ ကြံ စိုက်ပျိုးမှုမှာ ဟက်တာ ၅၉.၉၁ သိန်းဖြင့် ယခင်နှစ်ကထက် ၇.၆ ရာခိုင်နှုန်း တိုးတက်ခဲ့ကြောင်း၊ ဆီထွက်သီးနှံဖြစ်သော ပဲပုတ်စိုက်ဧရိယာသည် ဟက်တာ ၁၂၅.၆၂ သိန်းဖြင့် ၂၀၂၂ ခုနှစ်၌ စိုက်ပျိုး နိုင်မှု ဟက်တာ ၁၂၄.၇၉ သိန်းအပေါ် ၀.၆၆ ရာခိုင်နှုန်း တိုးတက်မှုရရှိကြောင်း တွေ့ရှိရသည်။
သို့သော် မြေပဲ၊ နှမ်း၊ နေကြာနှင့် ပန်းနှမ်း စသည့် အခြားဆီထွက်သီးနှံများ စိုက်ပျိုးနိုင်မှု လျော့ကျသဖြင့် ဆီထွက်သီးနှံစိုက်ဧရိယာ စုစုပေါင်းမှာ ဟက်တာ ၁၉၃.၂၃ သိန်းသာရှိပြီး ယခင်နှစ် အောက် ၁.၆ ရာခိုင်နှုန်း လျော့နည်းခဲ့ကြောင်း၊ ပဲစင်းငုံ၊ မတ်ပဲနှင့် ပဲတီစိမ်းတို့အပါအဝင် ပဲမျိုးစုံ စိုက်ပျိုးမှုသည်လည်း ဟက်တာ ၁၂၃.၅၇ သိန်းဖြင့် ၂၀၂၂ ခုနှစ်၌ စိုက်ပျိုးနိုင်မှုအောက် ၄.၂ ရာခိုင် နှုန်း ကျဆင်းခဲ့ကြောင်း၊ ဝါသီးနှံအား ဟက်တာ ၁၂၃.၈၇ သိန်း စိုက်ပျိုးနိုင်ခဲ့ရာ ယခင်နှစ် ကာလတူ အောက် ၃.၀၂ ရာခိုင်နှုန်း လျော့နည်းလျက်ရှိကြောင်း သိရှိရသည်။
ယခုနှစ် မိုးရာသီအစောပိုင်းကာလ၌ စိုက်ပျိုးခဲ့သော သီးနှံများမှာ စက်တင်ဘာလလယ်ပိုင်း ကပင် ရိတ်သိမ်းထွက်ရှိပြီး ဈေးကွက်ဝင်ရောက်ခဲ့သော်လည်း အိန္ဒိယနိုင်ငံ နေရာအနှံအပြားတွင် မိုးသည်းထန်စွာ ရွာသွန်းမှုများကြောင့် သီးနှံများ ခြောက်သွေ့မှုရရှိမည့်အချိန်ကို တောင်သူများက စောင့်ဆိုင်းလျက်ရှိကြောင်း၊ သို့ဖြစ်ရာ သီးနှံများအား ရိတ်သိမ်းမှုမှာ Dussehra ပွဲတော်ပြီးဆုံးချိန် အောက်တိုဘာလ စတုတ္ထပတ်ခန့်မှသာ အပြည့်အဝလုပ်ကိုင်နိုင်ဖွယ်ရှိကြောင်း Hindu Business Line သတင်းဌာနက ဖော်ပြပါသည်။
Source: The Hindu Business Line, 29 Sept 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)