နေပြည်တော် ဒီဇင်ဘာ ၁၈
Consumer Complaint Management System သင်တန်းဖွင့်ပွဲအခမ်းအနားကို စားသုံးသူရေးရာဦးစီးဌာန၊ ရုံးချုပ် ရုံးအမှတ်(၅၂) နေပြည်တော်၌ (၁၈.၁၂.၂၀၁၉) ရက်နေ့ နံနက် (၁၀:၀၀) နာရီတွင် ကျင်းပခဲ့ရာ စားသုံးသူရေးရာဦးစီးဌာန၊ ညွှန်ကြားရေးမှူးချုပ်၊ ဦးမြင့်လွင်က အဖွင့်အမှာ စကားပြောကြားပါသည်။
ညွှန်ကြားရေးမှူးချုပ်က အမှာစကားပြောကြားရာတွင် ယခုသင်တန်းသည် Upgrade Consumer Complaint Management System သင်တန်းဖြစ်ကြောင်း၊ စားသုံးသူရေးရာဦးစီးဌာန ၏ Website ဖြစ်သော www.doca.gov.mm ကို ၂၀၁၈ ခုနှစ် မတ်လ ၁၅ ရက်နေ့တွင်လည်းကောင်း DOCA Myanmar Mobile Application ကိုလည်း ၂၀၁၉ ခုနှစ်၊ မတ်လ ၁၅ ရက်နေ့တွင် လည်းကောင်း စတင်အသုံးပြုနိုင်ရန် ကြေငြာနိုင်ခဲ့ပါကြောင်း၊ ကမ္ဘာ့စားသုံးသူအခွင့်အရေးများနေ့ နှင့် တိုက်ဆိုင်ဆောင်ရွက်ခြင်းဖြစ်ပါကြောင်း၊ ဌာန၏ Website မှာ Consumer Complaint System ပါရှိပြီးဖြစ်ကြောင်း၊ ယခုအခါ Consumer Complaint System အဆင့်မြှင့်တင်ဆောင်ရွက်ထားရှိ သောကြောင့် ဒီစနစ်ကို ကျွမ်းကျင်စွာအသုံးပြုနိုင်ရေးသင်တန်းပေးရခြင်းဖြစ်ပါကြောင်း၊ ဝန်ထမ်း များအနေဖြင့် ဌာနတွင်း၊ ဌာနပြင်ပ ဆက်ဆံရေးကောင်းမွန်ရန်လိုအပ်ပါကြောင်း၊ သင်တန်း တက်ရောက်သူများအနေဖြင့် သင်ခန်းစာပို့ချမှုများကို သေချာဂရုစိုက်၍ လေ့လာမှတ်သားကြစေလို ပါကြောင်း ပြောကြားခဲ့ပါသည်။
ဆက်လက်၍ စားသုံးသူရေးရာဦးစီးဌာန၊ သတင်းအချက်အလက်နည်းပညာနှင့် အရည်အသွေးစီမံခန့်ခွဲရေးဌာနခွဲမှ ညွှန်ကြားရေးမှူး ဦးမြင့်ဝေ က Upgrade ပြုလုပ်ထားသော Consumer Complaint System နှင့်ပတ်သက်၍ ရှင်းလင်းပြောကြားရာတွင် လက်ရှိအသုံးပြုလျက်ရှိသော Consumer Complaint System တွင် စားသုံးသူတိုင်ကြားမှုများကို ရုံးချုပ်က Website မှတစ်ဆင့် Download ပြုလုပ်ပြီး သက်ဆိုင်ရာ တိုင်းဒေသကြီး/ ပြည်နယ်ဦးစီးမှူးရုံးများသို့ Hard Copy ပို့ပေးရပါကြောင်း၊ အဆင့်မြှင့်တင်မည့် Consumer Complaint System တွင် စားသုံးသူတိုင်ကြားမှုများကို သက်ဆိုင်ရာ တိုင်းဒေသကြီး/ ပြည်နယ်ဦးစီးမှူးရုံးများက Website မှတစ်ဆင့် တိုက်ရိုက်လက်ခံပြီး ဆက်လက် ဖြေရှင်းဆောင်ရွက်ရမည့်စနစ်ဖြစ်ပါကြောင်း၊ ယခင် Partially Online စနစ်မှ Fully Online စနစ်သို့ အဆင့်မြှင့်တင်ခြင်းဖြစ်ပြီး တိုင်ကြားသည့် စားသုံးသူများကလည်း ၎င်းတို့၏ တိုင်ကြားမှုအား လက်ခံဖြေရှင်းဆောင်ရွက်နေမှုကို ၎င်းတို့ကိုယ်တိုင် Website မှတစ်ဆင့် စစ်ဆေး ကြည့်ရှုနိုင်မည်ဖြစ်ပါကြောင်း၊ တိုင်းဒေသကြီး/ ပြည်နယ်ဦးစီးမှူးရုံးများအနေဖြင့် Consumer Complaint များကို လက်ခံဖြေရှင်းဆောင်ရွက်ရာတွင် စားသုံးသူများနှင့် တိုက်ရိုက် ထိတွေ့ဆက်ဆံ ရမည်ဖြစ်သောကြောင့် အမှားအယွင်းတစ်စုံတစ်ရာ မဖြစ်ပွားစေရေး အထူးဂရုပြု ဆောင်ရွက်ရမည် ဖြစ်သည့်အပြင် ယခုသင်ကြားပေးမည့် Upgrade Consumer Complaint System ကိုလည်း ကျွမ်းကျင်စွာ အသုံးပြုနိုင်ရန်လိုအပ်ပါကြောင်း ပြောကြားခဲ့ပါသည်။
သင်တန်းဖွင့်ပွဲအခမ်းအနားသို့ စားသုံးသူရေးရာဦးစီးဌာန၊ ညွှန်ကြားရေးမှူးချုပ်နှင့် ညွှန်ကြားရေးမှူးများ၊ ဌာနခွဲများမှတာဝန်ရှိသူများ၊ တိုင်းဒေသကြီး/ ပြည်နယ်ဦးစီးမှူးရုံးများမှ သင်တန်းသား (၃၄)ဦး USAID အဖွဲ့မှ နည်းပညာကျွမ်းကျင်သူနှင့် သင်တန်းပို့ချပေးမည့် Information Matrix Co.,Ltd မှ သင်တန်းနည်းပြများ တက်ရောက်ခဲ့ကြပြီး အခမ်းအနားကို နံနက် (၁၁:၀၀)နာရီ တွင် ရုတ်သိမ်းခဲ့ကြောင်း သတင်းရရှိပါသည်။
ITQM, DoCA