ရန်ကုန်တိုင်းဒေသကြီး၊ တောင်ပိုင်းခရိုင်မြို့နယ်များအတွင်း (၂၀၂၃-၂၀၂၄) ခုနှစ်၊ မိုးစပါးများရိတ်သိမ်းနေပြီဖြစ်ရာ သန်လျင်ခရိုင်တွင် မိုးစပါး(၄၈၂၃၂၁)ဧကလျာထားစိုက်ပျိုးခဲ့ပြီး မြို့နယ်များဖြစ်သည့် သန်လျင်၊ သုံးခွ၊ ခရမ်းမြို့နယ်များ၌ စုစုပေါင်းမိုးစပါး (၉၆၈) ဧကရိတ်သိမ်းပြီးဖြစ်ကြောင်းသိရှိရပါသည်။
မိုးစပါးစိုက်ပျိုးခဲ့ရာ၌ ရွှေမန်းသူ၊ GW-11 စပါးမျိုးများစိုက်ပျိုးခဲ့ပြီး တစ်ဧကလျှင် အထွက်နှုန်း (၆၉)တင်းထွက်ရှိကြောင်း၊ ဈေးနှုန်းမှာ (၄၆)ပေါင်ကိုက် စပါးတင်း (၁၀၀) လျှင် ကျပ် (၁၃၀၀၀၀၀-၁၃၅၀၀၀၀)၊ ဆန်ဈေး (၂၄)ပြည်ပါ တစ်အိတ်လျှင် ကျပ် (၅၈၀၀၀-၅၉၀၀၀) ရှိကြောင်း၊ ယခင်နှစ် မိုးစပါးပေါ်ချိန်၌ ကျပ်၁၂၀၀၀၀၀ဈေးနှုန်းရှိခဲ့သဖြင့် ယခင်နှစ်ထက် တောင်သူများမှာ ဈေးနှုန်းပိုမိုရရှိကြသော်လည်း လက်ရှိဈေးကွက်တွင် အဝယ်အေးနေသေးကြောင်းနှင့် မြို့နယ်အားလုံး၌ ရိတ်သိမ်းပြီးပါက ဆန်ဈေးကွက်ပေါ်မူတည်၍ ဈေးနှုန်းအတက်အကျရှိနိုင်ကြောင်းသိရှိရပါသည်။
DOCA(ရန်ကုန်)