အိန္ဒိယနိုင်ငံ၌ ၂၀၂၃ ခုနှစ် မိုးသီးနှံရာသီတွင် ၂၅-၈-၂၀၂၃ နေ့အထိ ပဲမျိုးစုံစိုက်ပျိုးပြီးစီးမှုမှာ ဟက်တာ ၁၁၇.၄၄ သန်းရှိပြီး ယခင်နှစ်ကာလတူ စိုက်ပျိုးမှု ဧရိယာဟက်တာ ၁၂၈.၀၇ သိန်းနှင့် နှိုင်းယှဉ်ပါက ၈.၃% လျော့နည်းလျက်ရှိကြောင်း အိန္ဒိယစိုက်ပျိုးရေးဝန်ကြီးဌာန၏ စာရင်းများအရ သိရှိရပါသည်။
ပဲစင်းငုံ စိုက်ပျိုးပြီးစီးမှုမှာ ဟက်တာ ၄၂.၁၁ သိန်းရှိပြီး ယခင်နှစ်ကာလတူနှင့် နှိုင်းယှဉ်လျှင် ၅.၃% လျော့ကျမှုရှိကြောင်း၊ မတ်ပဲစိုက်ပျိုးမှုမှာ ယခင်နှစ်ကာလတူအောက် ဟက်တာ ၁၃.၈၁% လျော့ကျလျက် ဟက်တာ ၃၁.၁၀ သိန်းသာ စိုက်ပျိုးပြီးစီးကြောင်း၊ ပဲတီစိမ်းမှာ ဧရိယာဟက်တာ ၃၀.၆၄ သိန်း စိုက်ပျိုးပြီးစီးခဲ့ရာ ယခင်နှစ်ကာလတူအောက် ၈.၁% လျော့နည်းလျက်ရှိကြောင်း၊ Kulthi ခေါ် ပဲပိစပ်မှအပ အခြား မိုးပဲမျိုးစုံမှာ ဟက်တာ ၁၃.၃၄ သိန်း စိုက်ပျိုးပြီးဖြစ်၍ ယခင်နှစ် စိုက်ပျိုးနိုင်မှုအောက် ၅% လျော့နည်းမှုရှိကြောင်း သိရှိရသည်။
ရာဂျပ်စတန်ပြည်နယ်၌ ပဲမျိုးစုံစိုက်ပျိုးမှု ဧရိယာမှာ ယခင်နှစ် ကာလတူထက် ဟက်တာ ၁.၃၆ သိန်း ပိုမိုလျက်ရှိသော်လည်း ပဲအဓိကစိုက်ပျိုးရာဒေသများဖြစ်သည့် မဒ္ဒရာပရာဒေ့ရှ်၊ ကာနာတကာ၊ မဟာရဋ္ဌ၊ ဥတ္တာပရာဒေ့ရှ်၊ တဲလန်ဂါနာ၊ အန္တရာပရာဒေ့ရှ်နှင့် ဂူဂျရတ် ပြည်နယ်များတွင် စိုက်ပျိုးမှုဧရိယာ လျော့ကျခဲ့သည်။
အိန္ဒိယမိုးလေဝသဌာန၏ အချက်အလက်များအရ ဩဂုတ်လ ၁ ရက်မှ ၂၅ ရက်နေ့အတွင်း ပုံမှန်မိုးရွာသွန်းမှုအောက် လျော့နည်းရရှိမှုမှာ ရာဂျပ်စတန်၌ ၇၇%၊ ကာနာတကာတွင် ၇၅%၊ မဟာရဋ္ဌ၌ ၅၈% နှင့် မဒ္ဒရာပရာဒေ့ရှ်တွင် ၂၈% အသီးသီးရှိကြောင်း၊ ကာနာတကာနှင့် မဟာရဋ္ဌ ပြည်နယ်များတွင် တောင်သူများအနေဖြင့် စိုက်ပျိုးထားရှိသည့် ပဲစိုက်ခင်းများသို့ ရေပေးသွင်းရန် အခက်အခဲနှင့် ကြုံတွေ့နေရကြောင်းဖြင့် Hindu Business Line သတင်းဌာနက ဖော်ပြပါသည်။
Source: The Hindu Business Line, 25 Aug 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)