![](http://www.doca.gov.mm/sites/default/files/styles/consumer_inner_image__847x424_/public/corn.jpg?itok=SYkNS5kG)
အိန္ဒိယနိုင်ငံတွင် ပြည်တွင်းပြောင်းဈေးနှုန်းများ မြင့်တက်လာမှုက ကမ္ဘာ့ပြောင်းဈေးကွက်အတွင်း ငွေကြေးတန်ဖိုးကျဆင်းမှုကို အသာစီးရယူနေသည့် ပါကစ္စတန်နိုင်ငံနှင့် ဈေးကွက်ယှဉ်ပြိုင်မှုအပေါ် အကျိုးသက်ရောက်ခဲ့သဖြင့် ပြောင်းပို့ကုန်များ တင်ပို့မှုရပ်တန့်ခဲ့ပါသည်။ နယူးဒေလီအခြေစိုက် ပြည်ပပို့ကုန်လုပ်ငန်းရှင်တစ်ဦးဖြစ်သူ Rajesh Paharia Jain က ပါကစ္စတန်နိုင်ငံသည် ဈေးကွက်အတွင်း ပြောင်းဈေးကို အနည်းဆုံးတစ်တန်လျှင် အမေရိကန် ဒေါ်လာ ၃ဝ ထက် ပိုမို နိမ့်ကျသောဈေးနှုန်းဖြင့် ကမ်းလှမ်းရောင်းချလျက်ရှိပြီး အာရှဈေးကွက်ကို လွှမ်းမိုးထားကြောင်း နှင့် အိန္ဒိယနိုင်ငံ၏ပြောင်းဈေးနှုန်းများမှာမူ ကမ္ဘာ့ဈေးကွက်တွင် ယှဉ်ပြိုင်နိုင်စွမ်းမရှိကြောင်း ပြောကြားခဲ့ပါသည်။
မွန်ဘိုင်းအခြေစိုက် MuBala Agro Commodities Pvt Ltd. ၏ ဒါရိုက်တာတစ်ဦးဖြစ်သူ Mukesh Singh က ပါကစ္စတန်နိုင်ငံသည် ယခုရာသီကာလတွင်း အိန္ဒိယနိုင်ငံနှင့် နှိုင်းယှဉ်ပါက ၄င်း၏ငွေကြေးတန်ဖိုးမှာ သိသာစွာအားနည်းကျဆင်းမှုကြောင့် ဈေးကွက်အတွင်း အင်အားကြီးမားသော ယှဉ်ပြိုင်ဖက်နိုင်ငံ တစ်နိုင်ငံဖြစ်ခဲ့ကြောင်း ပြောဆိုပါသည်။
အိန္ဒိယ လယ်ယာထွက်ကုန် တင်ပို့သူ လုပ်ငန်းရှင်များအသင်း၏ ဥက္ကဌဖြစ်သူ M Madan Prakash က ပါကစ္စတန်နိုင်ငံ၌ ပြောင်းဈေးနှုန်းကို Cost and Freight (C&F) တစ်တန်လျှင် ဒေါ်လာ ၂၄ဝ ဖြင့် ကမ်းလှမ်းလျက် ရှိပြီး အိန္ဒိယနိုင်ငံမှာမူ တစ်တန်လျှင် C&F ဈေးနှုန်း ၃ဝ၅ ဒေါ်လာဖြင့် ရောင်းချလျက်ရှိကြောင်း၊ အောက်တိုဘာ ၁ ရက်နေ့ရှိ ငွေလဲနှုန်းမှာ ၁ ဒေါ်လာလျှင် ပါကစ္စတန်ရူပီး ၂၈၇.ဝ၃ ရှိနေချိန်တွင် အိန္ဒိယရူပီးဈေးမှာ ၈၃.၁၉ ရှိခဲ့ကြောင်းနှင့် ဆိပ်ကမ်းသို့ ရောက်ရှိတင်ပို့ချိန်၌ ပြောင်းတစ်တန်၏ တန်ဖိုးသည် ရူပီး ၂၂ဝဝဝ မှ ၂၃ဝဝဝ အတွင်းရှိကြောင်း၊ ပါကစ္စတန်နိုင်ငံမှ ပြောင်းပို့ကုန်ဈေးနှုန်းများမှာ ဈေးကွက်တွင် ယှဉ်ပြိုင်နိုင်စွမ်းရှိသော်လည်း အရည်အသွေးပိုင်းတွင် အခက်အခဲတွေ့လျက်ရှိကြောင်း၊ ဝယ်သူများမှာ ပါကစ္စတန်နိုင်ငံမှ စွန့်စား၍ ဝယ်ယူတင်သွင်းလိုကြကြောင်း ပြောကြားခဲ့ပါသည်။
Jain က အိန္ဒိယပြည်တွင်း၌ ပြောင်းဈေးနှုန်းများမှာ ရိတ်သိမ်းရာသီကာလမှ စတင်၍ မြင့်တက်လျက်ရှိကြောင်း၊ လက်ရှိကာလတွင် ဘီဟာပြည်နယ်ရှိ Purnea စတော့အိတ်ချိန်း၌ ပြောင်းကုန်လက်ကျန်များကို တစ်တန်လျှင် ရူပီး ၁၈ဝဝဝ မှ ၂၁ဝဝဝ အကြား ဈေးခေါ်လျက်ရှိပြီး ပြောင်းဈေးနှုန်းများမှာ ရူပီး ၂၂ဝဝဝ ဝန်းကျင်သို့ရောက်ရှိနေကြောင်း၊ ပြည်ပသို့တင်ပို့ရန် အရောင်း အဝယ် တုံ့ဆိုင်းလျက်ရှိသော်လည်း ပြည်တွင်း၌ အီသနောနှင့် တိရစ္ဆာန်အစားအစာ ထုတ်လုပ် ရောင်းချသူများကြောင့် ပြောင်းဝယ်လိုအားမှာ အခြေအနေကောင်းမွန်လျက်ရှိကြောင်း သို့ရာတွင် ပြောင်းကို ဂျုံနှင့်ဆန်အစား ပြည်သူများသို့ဖြန့်ဖြူးသောစနစ်ဖြင့် ရောင်းချနေခြင်းမှာ စိန်ခေါ်မှု တစ်ရပ်ဖြစ်လျက်ရှိကြောင်း ပြောကြားခဲ့ပါသည်။
MuBala လီမိတက်မှ Singh က ပြောင်းပို့ကုန်များကို ကတိကဝတ်ပြည့်မီမှု မရှိသေးသူ များကသာ ဆက်လက်တင်ပို့လျက်ရှိပြီး ၄င်းတို့အတွက်မှာမူ ယခုရာသီကာလတွင် ပြောင်းတင်ပို့မှု ပြီးဆုံးသွားပြီဖြစ်ကြောင်း ပြောကြားခဲ့ပါသည်။
အိန္ဒိယနိုင်ငံတွင် ၂ဝ၂၃ ခုနှစ်အတွင်း မုတ်သုန်ရာသီရွာသွန်းမှုလျော့နည်းခဲ့ခြင်းကြောင့် ပြောင်းထုတ်လုပ်မှုနိမ့်ကျနိုင်ဖွယ်ရှိကြောင်း၊ ဩဂုတ်လတွင် မိုးရွာသွန်းမှု ၃၆ ရာခိုင်နှုန်းလျော့ နည်းခဲ့သဖြင့် ပြောင်းသီးနှံစိုက်ပျိုးထွက်ရှိမှုအပေါ် ထိခိုက်ခဲ့ကြောင်းနှင့် အိန္ဒိယနိုင်ငံ၏ လယ်ယာ စိုက်ပျိုးရေးကဏ္ဍမှာ အနောက်တောင်မုတ်သုန်ရာသီအပေါ်တွင် တည်မှီနေရပြီး ယခုနှစ်အတွင်း အယ်လ်နီညိုရာသီဥတု ဖြစ်ပေါ်တိုးတက်လာမှုကြောင့် စိုက်ပျိုးရေးကဏ္ဍအပေါ် အကျိုးသက် ရောက်မှုဖြစ်ပေါ်ခဲ့ကြောင်း သိရှိရပါသည်။
ကုန်သွယ်မှုလေ့လာဆန်းစစ်သူတစ်ဦး၏ သုံးသပ်ချက်အရ ဘီဟာပြည်နယ်၊ ကာနာတကာ ပြည်နယ် မြောက်ပိုင်းနှင့် မဟာရဋ္ဌပြည်နယ်များတွင် ပြောင်းစိုက်ခင်းများမှာ မိုးရွာသွန်းမှုအပေါ် အဓိကမှီခိုနေရပြီး အဆိုပါဒေသများ၌ ယခုနှစ်အတွင်း အပူချိန်မြင့်မားလျက်ရှိကာ မိုးရွာသွန်းမှု လျော့နည်းခဲ့ကြောင်း၊ အယ်လ်နီညိုရာသီဥတုကြောင့် ပင်လယ်ရေ အပူချိန်မှာလည်း မြင့်တက် လျက်ရှိပြီး အာရှနိုင်ငံများမှာ မိုးခေါင်ရေရှားမှုနှင့် ကာလကြာရှည်စွာ ခြောက်သွေ့မှုတို့ကို ရင်ဆိုင် တွေ့ကြုံနေရကြောင်းနှင့် ရေရှားပါးမှုမှာ ၂ဝ၂၄ ခုနှစ် ဖေဖော်ဝါရီလ မှ မတ်လအတွင်း ဆက်လက် ဖြစ်ပေါ်နိုင်ကြောင်း သိရှိရပါသည်။ သို့သော် စက်တင်ဘာလအတွင်း အိန္ဒိယသမုဒ္ဒရာအရှေ့ပိုင်းနှင့် အနောက်ပိုင်းဒေသများတွင် ပင်လယ်ရေမျက်နှာပြင် အပူချိန် မညီမျှမှုဖြစ်ပေါ်ခဲ့ပြီးနောက် နိုင်ငံ တစ်ဝှမ်း မိုးများပြည့်လျှံစွာ ရွာသွန်းခဲ့ပြီး ဒီဇင်ဘာလအထိ ဆက်လက်ရွာသွန်းမည်ဟု ခန့်မှန်း ထားသဖြင့် အိန္ဒိယနိုင်ငံတောင်ပိုင်းတွင် မိုးရွာသွန်းမှုကောင်းမွန်မည်ဟု သိရှိရပါသည်။
လယ်ယာထွက်ကုန်တင်ပို့သူလုပ်ငန်းရှင်များအသင်း၏ဥက္ကဌ Prakash က အိန္ဒိယနိုင်ငံ Maharashtra တွင် ပြောင်းပင်များ၏ ပင်စည်များမှာ သေးငယ်ကျုံလှီပြီး အထွက်နှုန်းနည်းပါးနိုင်ကြောင်း၊ ပြောင်းဈေးနှုန်းများမှာ လယ်ယာထွက်ကုန်ဈေးကွက်ကော်မတီ၏ စိုက်ခင်းများတွင် တစ်ကွင်တယ်လျှင် ရူပီး ၂၂ဝဝ မှ ၂၃ဝဝ အကြားရှိနိုင်ပြီး စားသုံးသူများဝယ်ယူရသည့်ဈေးများ မှာ တစ်ကွင်တယ်လျှင် ရူပီး ၂၅ဝဝ မှ ၂၆ဝဝ အထိရှိနိုင်ကြောင်း ပြောကြားခဲ့ပါသည်။
Source: The Hindu Business Line, October 3, 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)