ထိုင်းနိုင်ငံ၏ ၂၀၂၄ခုနှစ်အတွက် ကားထုတ်လုပ်မှုရည်မှန်းချက်လျှော့ချရဖွယ်ရှိပြီး ကားထုတ်လုပ်မှုများကျဆင်းလျက်ရှိကြောင်းနှင့် စီးပွားရေးနှေးကွေးမှုသည် ကားရောင်းချရမှုများကို သက်ရောက်စေခဲ့ကြောင်း ထိုင်းနိုင်ငံစက်မှုလုပ်ငန်းအဖွဲ့ချုပ် (FTI) အဆိုအရသိရပါသည်။ ယခုနှစ်အစောပိုင်းတွင် FTI သည် ပြည်ပသို့တင်ပို့ရန်အတွက် ကားအစီးရေ ၁.၁၅သန်း၊ ပြည်တွင်းရောင်းချရန်အတွက် အစီးရေ ၇၅၀၀၀၀၊ စုစုပေါင်းကားအစီးရေ ၁.၉သန်း၊ ယခင်နှစ်ထုတ်လုပ်မှုပမာဏ၏ ၃.၁၅ရာခိုင်နှုန်းတိုးမြှင့်ထုတ်လုပ်ရန် ရည်မှန်းချက်ထားခဲ့ပါသည်။ သို့သော် ဧပြီလတွင် စုစုပေါင်းကားထုတ်လုပ်မှုပမာဏသည် အစီးရေ ၁၀၄၆၆၇နှင့် ၁၁ရာခိုင်နှုန်းလျော့ကျခဲ့ပါသည်။ အထူးသဖြင့် ပစ်ကပ်ကားထုတ်လုပ်မှုကဏ္ဍတွင် ၄၅.၉ရာခိုင်နှုန်းကျဆင်းခဲ့ခြင်းဖြစ်ကာ ခရီးသည်တင်ကားထုတ်လုပ်မှုကဏ္ဍမှာ ၅ရာခိုင်နှုန်းကျဆင်းခဲ့ကြောင်းသိရပါသည်။ ဇန်နဝါရီလမှ ဧပြီလအထိ ကားထုတ်လုပ်မှုပမာဏမှာ အစီးရေ ၅၁၈၇၉၀သာရှိခဲ့ပြီး လွန်ခဲ့သည့်နှစ် အဆိုပါကာလထက် ၁၇ရာခိုင်နှုန်းကျဆင်းခဲ့ကြောင်းသိရပါသည်။
FTI ၏ ဒုတိယဥက္ကဋ္ဌနှင့် Automotive Industry Club ၏ ပြောခွင့်ရပုဂ္ဂိုလ်ဖြစ်သူ Surapong Paisitpatanapong က စီးပွားရေးနှေးကွေးလျက်ရှိပြီး ဘဏ်များမှာလည်း ချေးငွေများပြန်လည်မရှိနိုင်မှုကိုရှောင်ရှားရန် ကားချေးငွေဖြင့် ဝယ်ယူမှုများကို ဆက်လက်တင်းကြပ်လျက်ရှိသောကြောင့် စားသုံးသူများ၏ ဝယ်ယူနိုင်စွမ်းကိုအားနည်းစေကြောင်း၊ FTI အနေဖြင့်လည်း လာမည့်(၂)လအတွင်း နိုင်ငံ၏စီးပွားရေးတိုးတက်မှုကို စောင့်ကြည့်ရန်အလိုရှိသောကြောင့် ကားထုတ်လုပ်မှုရည်မှန်းချက်အသစ်မချမှတ်သေးကြောင်း၊ အစိုးရအနေဖြင့်လည်း စီးပွားရေးတိုးတက်လာရန်အတွက် အားတက်စေမည့်စီမံချက်အသစ်များကိုထုတ်ပြန်ရန် အကြံပြုကြောင်းပြောကြားခဲ့ပါသည်။ ယခုနှစ်၏ ပထမလေးလတွင် ကားတင်ပို့မှုမှာ အစီးရေ ၃၄၀၆၈၅ဖြင့် လွန်ခဲ့သည့်နှစ် အဆိုပါကာလထက် ၃.၆ရာခိုင်နှုန်းကျဆင်းခဲ့ကြောင်းသိရပါသည်။
Source: Bangkok Post
DOCA(ရန်ကုန်)