ဘင်္ဂလားဒေ့ရှ်နိုင်ငံတွင် အစိုးရသည် ရာမဒန် ဥပုသ်လမြတ် မတိုင်မီ စားနပ်ရိက္ခာ ဖူလုံမှုကို မြှင့်တင်ရန်နှင့် ကုန်စျေးနှုန်းများ တည်ငြိမ်စေရန်အတွက် ဆန်၊ စားသုံးဆီနှင့် ပဲနီလေးများ တင်သွင်း ခြင်း အပါအဝင် အဆိုပြုချက် အများအပြားကို အတည်ပြုလိုက်သည်။
ဒီဇင်ဘာ ၂၃ ရက်နေ့၊ အတွင်းဝန်ရုံးရှိ အစိုးရအဖွဲ့ရုံး အစည်းအဝေးခန်းမ၌ ကျင်းပသည့် ဘဏ္ဍာရေးဆိုင်ရာ အကြံ ပေးပုဂ္ဂိုလ် Dr Salehuddin Ahmed က သဘာပတိအဖြစ် ဆောင်ရွက် သော အစိုးရဝယ်ယူမှုဆိုင်ရာ အကြံပေးကောင်စီ ကော်မတီအစည်းအဝေးတွင် စားနပ်ရိက္ခာဝန်ကြီး ဌာနမှ တင်ပြထားသည့် စုစုပေါင်း ဆန်တန်ချိန် ၁၀၀,၀၀၀ ဝယ်ယူရန် အဆိုပြုချက်နှစ်ခုကို ထောက်ခံ အတည်ပြုခဲ့ခြင်းဖြစ်သည်။
၎င်းအနက် ဘာစမာတီမဟုတ်သည့် ပေါင်းဆန် တန်ချိန် ၅၀,၀၀၀ ကို နိုင်ငံတကာ တင်ဒါ စနစ်ဖြင့် အိန္ဒိယနိုင်ငံထံမှ တင်သွင်းမည်ဖြစ်ပြီး တာကာငွေ ၂၁၇.၅၃ ကုဋေခန့်ကုန်ကျမည် ဖြစ် သည်။ ကျန်တန်ချိန် ၅၀,၀၀၀ ရှိသော ဆန်ဖြူကိုမူ အစိုးရချင်း ချိတ်ဆက်ဆောင်ရွက်သည့် (G2G) အစီအစဉ်ဖြင့် ပါကစ္စတန်နိုင်ငံထံမှ တင်သွင်းမည်ဖြစ်ပြီး တာကာ ၂၄၁.၅၂ ကုဋေခန့် ကျခံသုံးစွဲရ မည်ဖြစ်သည်။
အခြေခံစားသောက်ကုန်များအပေါ် ဝယ်လိုအား သိသာစွာ မြင့်တက်လာလေ့ရှိသည့် ရာမဒန် ဥပုသ်လအတွင်း စျေးကွက်မတည်ငြိမ်မှုကို ထိန်းချုပ်ရန်နှင့် ပြည်သူလူထုအတွက် စားနပ်ရိက္ခာ အလုံအလောက် သိုလှောင်ထားနိုင်ရန် ဤဆန်တင်သွင်းမှုများက အထောက်အကူဖြစ်စေမည်ဟု တာဝန်ရှိသူများက ပြောကြားခဲ့သည်။ တင်သွင်းလာသော ကုန်ပစ္စည်းများ အချိန်မီရောက်ရှိလာစေ ရန်နှင့် အရန်ရိက္ခာသိုလှောင်မှုကို ပိုမိုခိုင်မာစေရန်အတွက် စားနပ်ရိက္ခာညွှန်ကြားမှုဦးစီးဌာနက ဝယ်ယူမှုလုပ်ငန်းစဉ်များကို အကောင်အထည်ဖော် ဆောင်ရွက်သွားမည်ဖြစ်သည်။
ထို့ပြင် စားသုံးဆီစျေးနှုန်းများ တည်ငြိမ်စေရန်အတွက် အဆိုပါအစည်းအဝေးတွင် စားသုံးဆီ လီတာ ၄.၇၅ ကုဋေ ဝယ်ယူရေးကိုလည်း အတည်ပြုခဲ့ရာ ပြည်တွင်းမှ သန့်စင်ပြီး ဖွဲနုဆီ လီတာ ၁ ကုဋေနှင့် ပြည်ပမှ ပဲပုပ်ဆီ လီတာ ၃.၇၅ ကုဋေတို့ကို တိုက်ရိုက်ဝယ်ယူမှုစနစ်များဖြင့် ဝယ်ယူခြင်း တို့ ပါဝင်သည်။ ဘင်္ဂလားဒေ့ရှ် ကုန်သွယ်ရေးကော်ပိုရေးရှင်း (TCB) သည် အဆိုပါစားသုံးဆီများကို တစ်နိုင်ငံလုံး အတိုင်းအတာဖြင့် သက်သာသော စျေးနှုန်းများဖြင့် ရောင်းချကာ ဖြန့်ဖြူးပေးသွားဖွယ် ရှိသည်။
ကော်မတီသည် အမျိုးသားအဆင့် ပွင့်လင်းမြင်သာသော တင်ဒါစနစ်ဖြင့် ပဲနီလေး တန်ချိန် ၁၀,၀၀၀ ဝယ်ယူရန်အတွက်လည်း အတည်ပြုခဲ့ပြီး ခန့်မှန်းကုန်ကျစရိတ်မှာ တာကာငွေ ၇၂.၂၀ ကုဋေ ဖြစ်သည်။ အဆိုပါ ပဲနီလေးများကို ၅၀ ကီလိုဂရမ်ဝင် အိတ်များဖြင့် ဝယ်ယူမည်ဖြစ်ပြီး ဈေးကွက်တည်ငြိမ်စေရန်နှင့် ဝင်ငွေနည်းပါးသော မိသားစုများနှင့် လူလတ်တန်းစား စားသုံးသူများ ကို ထောက်ပံ့ကူညီရန်အတွက် အစိုးရ၏ ဖြန့်ဖြူးရေးလမ်းကြောင်းများမှတစ်ဆင့် ရောင်းချပေးသွား မည်ဖြစ်သည်။
Source: The Business Standard, 23 December 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)