အင်ဒိုနီးရှားနိုင်ငံသည် ဒေသများအကြား ဈေးနှုန်းကွာဟချက်များကို လျှော့ချရန်အတွက် ၂၀၂၆ ခုနှစ်တွင် စတင်မည့် တစ်နိုင်ငံလုံးအတိုင်းအတာဖြင့် ဆန်ဈေးနှုန်းများ တစ်ပြေးညီဖြစ်စေရေးမူဝါဒကို အကောင်အထည်ဖော်ရန် ပြင်ဆင်နေကြောင်း အင်ဒိုနီးရှား စားနပ်ရိက္ခာရေးရာ ညှိနှိုင်းရေးဝန်ကြီး Zulkifli Hasan က ဇန်နဝါရီလ ၁၂ ရက်နေ့တွင် ပြောကြားခဲ့ကြောင်း ဒေသခံမီဒီယာများက ကိုးကားဖော်ပြခဲ့သည်။ ယင်းမူဝါဒသည် အရှေ့ပိုင်းအင်ဒိုနီးရှားအပါအဝင် နိုင်ငံတစ်ဝှမ်းတွင် ဆန်ဈေးနှုန်းများ တစ်ပြေးညီဖြစ်စေရန်ရည်ရွယ်ပြီး အစိုးရမှ ထောက်ပံ့ပို့ဆောင်ရေးဆိုင်ရာ စိန်ခေါ်မှုများကိုဖြေရှင်းရန် ဖြန့်ဖြူးရေးဆိုင်ရာဘဏ္ဍာရေးထောက်ပံ့မှုဖြစ်ကြောင်း သိရသည်။ အင်ဒိုနီးရှားနိုင်ငံရှိ ဆန်ဈေးနှုန်းများကိုပိုမိုမြင့်တင်ပေးခြင်းမဟုတ်ဘဲ ၂၀၂၆ ခုနှစ် တစ်နိုင်ငံလုံးအတိုင်းအတာဖြင့် ဆန်ဈေးနှုန်းတစ်ခုတည်းကို ကျင့်သုံးရန် ဆောင်ရွက်သွားမည်ဖြစ်ကြောင်း စားနပ်ရိက္ခာဆိုင်ရာ ညှိနှိုင်းအစည်းအဝေးတစ်ခုအပြီးတွင် Hasan က ပြောကြားခဲ့သည်။ အဓိကရိတ်သိမ်းရာသီသည် ဖေဖော်ဝါရီလတွင် စတင်၍ ပိုမိုစောစီးစွာ စတင်နိုင်သည်ဟု ခန့်မှန်းထားသော်လည်း ဈေးနှုန်းတည်ငြိမ်မှုကို အထောက်အကူပြုရန် မျှော်လင့်ရသည့်ကြားတွင် အာဏာပိုင်များသည် အမျိုးသားဆန်ထောက်ပံ့မှုအခြေအနေများကိုလည်း ပြန်လည်သုံးသပ်ခဲ့ကြောင်း ထပ်လောင်းပြောကြားခဲ့သည်။ မူဝါဒအတွက် ရည်ညွှန်းအဖြစ် ဆွေးနွေးထားသော ဈေးနှုန်းများတွင် ပရီမီယံဆန်တစ်ကီလိုဂရမ်လျှင် ၁၄၉၀၀ ရူပီးယား (အမေရိကန်ဒေါ်လာ ၀.၉၆ ခန့်) နှင့် အလတ်စားဆန်တစ်ကီလိုဂရမ်လျှင် ၁၃၅၀၀ ရူပီးယားတို့ ပါဝင်သည်။ Bulog ၏ စားနပ်ရိက္ခာထောက်ပံ့မှုနှင့် ဈေးနှုန်းတည်ငြိမ်ရေး အထောက်အပံ့ပေးသည့် အစီအစဉ်အရ ဝင်ငွေနည်း လူတန်းစားအုပ်စုများအတွက် ဆန်ကို တစ်ကီလိုဂရမ်လျှင် ၁၁၀၀၀ မှ ၁၂၀၀၀ ရူပီးယားအကြား ရောင်းချမည်ဖြစ်ကြောင်းသိရသည်။ ထိုဆန်စျေးနှုန်းတည်ငြိမ်စေရေး မူဝါဒသည် ပြင်ဆင်နေဆဲဖြစ်ပြီး ဖြန့်ဖြူးရေး၊ ငွေကြေးထောက်ပံ့မှုနှင့် အခြေခံအဆောက်အအုံများအပါအဝင် နယ်ပယ်များတွင် ညှိနှိုင်းပံ့ပိုးမှုများလည်း လိုအပ်မည်ဖြစ်ကြောင်း Hasan က ပြောကြားခဲ့ကြောင်း သိရှိရပါသည်။
Source: Xinhua
DOCA(ရန်ကုန်)