မလေးရှား စားအုန်းဆီဈေးနှုန်း ၃ လအတွင်း အမြင့်ဆုံးသို့ မြင့်တက်

     မလေးရှားနိုင်ငံ၊ ဘာဆာမလေးရှား ဆင့်ပွားစတော့ဈေးကွက်၌ ဧပြီလတွင်တင်ပို့ရောင်းချ မည့် စားအုန်းဆီ ကြိုတင်အရောင်းစာချုပ်အတွက် စံပြုဈေးနှုန်းသည် ဇန်နဝါရီ ၂၉ ရက်နေ့၌ မက်ထရစ် တစ်တန်လျှင် ယခင်နေ့ထက် ၄၆ ရင်းဂစ် တစ်နည်းအားဖြင့် ၁.၀၈ ရာခိုင်နှုန်း ပိုမိုလျက် ရင်းဂစ်ငွေ ၄၃၁၈ နှုန်း (တစ်တန်လျှင် အမေရိကန်ဒေါ်လာ ၁၁၀၀.၁၃ နှုန်း) သို့ ရောက်ရှိပြီး ၂၀၂၅ ခုနှစ် အောက်တိုဘာလ ၂၇ ရက်နေ့နောက်ပိုင်း အမြင့်ဆုံးဈေးနှုန်းအဖြစ် ဈေးကွက်ပိတ်သိမ်း ခဲ့သည်။

     ထိုကဲ့သို့ ဈေးကွက်ဖွင့်လှစ်ရောင်းချမှု ၄ ကြိမ်ဆက်တိုက် မြင့်တက်လာခြင်းသည် ကုန်စည် ဈေးနှုန်းများဖြစ်သော ရေနံစိမ်းဈေးနှုန်းနှင့် တရုတ်နိုင်ငံ Dalian ဈေးကွက်ရှိ ပဲပုပ်ဆီဈေးနှုန်းများ ခိုင်မာခြင်းကြောင့်ဖြစ်ကြောင်း၊ ကွာလာလမ်ပူမြို့၌ ဖေဖော်ဝါရီ ၉ ရက်မှ ၁၁ ရက်ထိ ကျင်းပမည့် ဈေးကွက်အလားအလာ ညီလာခံဆွေးနွေးပွဲတွင်လည်း ဈေးနှုန်းများ ဆက်လက်မြင့်တက်မည့်  ဈေးကွက်ခန့်မှန်းချက်များ ထွက်ပေါ်ဖွယ်ရှိကြောင်း ကွာလာလမ်ပူအခြေစိုက် ကုန်သည်တစ်ဦးက ပြောဆိုခဲ့သည်။

     Dalian ဈေးကွက်တွင် အရောင်းအဝယ်အသွက်ဆုံးဖြစ်သော ပဲပုပ်ဆီ၏ ကြိုတင်အရောင်း စာချုပ် ဈေးနှုန်းသည် ၀.၈၉ ရာခိုင်နှုန်း မြင့်တက်လာချိန်၌ စားအုန်းဆီ စာချုပ်ဈေးနှုန်းမှာ ၁.၁၅ ရာခိုင်နှုန်းအထိ မြင့်တက်ခဲ့သည်။ ချီကာဂို ကုန်သွယ်မှုဘုတ်အဖွဲ့ စတော့ဈေးကွက်တွင် ပဲပုပ်ဆီ ဈေးနှုန်းများသည် ၀.၄ ရာခိုင်နှုန်း မြင့်တက်ခဲ့သည်။

     အရှေ့အလယ်ပိုင်းဒေသရှိ အဓိကရေနံထုတ်လုပ်သည့် အီရန်နိုင်ငံအပေါ် အမေရိကန်၏  စစ်ရေးအရ တိုက်ခိုက်မှု လုပ်ဆောင်ဖွယ်ရှိပါက အဆိုပါ ဒေသတွင်းမှ ရေနံထုတ်လုပ်ပေးသွင်းမှုကို ထိခိုက်နိုင်ခြေရှိမည့်အရေး စိုးရိမ်မှုများ မြင့်မားလာလျက်ရှိပြီး ရေနံစိမ်းဈေးနှုန်းများသည် တတိယ မြောက်နေ့ရက်အဖြစ် ဇန်နဝါရီ ၂၉ ရက်နေ့၌ ၁.၅ ရာခိုင်နှုန်း ဆက်လက်မြင့်တက်ခဲ့သည်။

     ရေနံစိမ်း ကြိုတင်အရောင်းဈေးနှုန်းများ ခိုင်မာအားကောင်းလာခြင်းက ဇီဝဒီဇယ်ဆီထုတ် လုပ်မှုသို့ ကုန်ကြမ်းပေးသွင်းရန် ရွေးချယ်မှုတစ်ရပ်အဖြစ် စားအုန်းဆီကို ပိုမိုဆွဲဆောင်နိုင်မှု ဖြစ် ပေါ်စေလျက်ရှိသည်။

Source: New Straits Times, 29 Jan 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)