ယခုနှစ်တရုတ်နှစ်သစ်ကူးပွဲတော်ကာလအတွင်း ပြည်တွင်းဝယ်လိုအားကို ဖြည့်ဆည်းနိုင်ရန်အတွက် ထိုင်းနှင့် ဘရာဇီးနိုင်ငံတို့မှ ဝက်သားတင်သွင်းမှုကို မလေးရှားတိရိစ္ဆာန်ဆေးကုသရေးဌာန (DVS) မှအတည်ပြုလိုက်ကြောင်းသိရသည်။ တရုတ်နှစ်သစ်ကူးပွဲတော်ကာလအတွင်း ပြည်တွင်းလိုအပ်ချက်ကို အထောက်အကူပြုနိုင်ရန်လုံလောက်သော ဝက်သားထောက်ပံ့မှုရရှိစေရေးအတွက် မလေးရှားနိုင်ငံအစိုးရအနေဖြင့် အထူးဂရုပြုဆောင်ရွက်လျက်ရှိကြောင်း စိုက်ပျိုးရေးနှင့် စားနပ်ရိက္ခာဖူလုံရေးဝန်ကြီးဌာနက ပြောကြားခဲ့သည်။
ဝန်ကြီးဌာန၏ ထုတ်ပြန်ချက်အရ တင်သွင်းလာသော ဝက်သားအားလုံးသည် ဘေးကင်းစိတ်ချရသော စားနပ်ရိက္ခာထောက်ပံ့မှုကွင်းဆက်ဖြစ်စေရန်နှင့် ရောဂါကူးစက်ပြန့်ပွားမှုအရ အန္တရာယ်ကို လျော့ချနိုင်ရန်အတွက် တင်းကျပ်သော စားနပ်ရိက္ခာ ဘေးကင်းလုံခြုံမှုထိန်းချုပ်မှုများနှင့် တိရိစ္ဆာန်ကျန်မာရေးဆိုင်ရာ လုပ်ထုံးလုပ်နည်းများ (SOPs) နှင့်အညီစစ်ဆေးဆောင်ရွက် သွားမည်ဖြစ်ကြောင်း သိရှိရပါသည်။
မလေးရှားဝက်သားထုတ်ကုန် တင်သွင်း/တင်ပို့သူများအသင်း (Malaysia Association of Pork Products Importers and Exporters) ဥက္ကဌ Datuk Lai Poh Chan က ထိုင်းနိုင်ငံတွင် ပြီးခဲ့သည့် တစ်နှစ်မှ နှစ်နှစ်အတွင်း အာဖရိကဝက်အပြင်းဖျားရောဂါ (ASF) ဖြစ်ပွားမှုများရှိခဲ့ကြောင်း၊ ထိုဝက်များတွင် Streptococcus Suis ဘတ်တီးရီးယားများလည်း တွေ့ရှိခဲ့ရကြောင်း ပြောကြားခဲ့သည်။
မလေးရှားနိုင်ငံသည် ယခင်က ASF ရောဂါဖြစ်ပွားသည့် နိုင်ငံများမှလာသော ဝက်နှင့် ဝက် သားထွက်ပစ္စည်းများ (အသားခြောက်နှင့် စည်သွပ်ဘူးများအပါအဝင်) ကို စီးပွားဖြစ်တင်သွင်း သည်ဖြစ်စေ၊ ခရီးသွားများသယ်ဆောင်လာသည်ဖြစ်စေ တင်းကျပ်စွာ ထိန်းချုပ်ကန့်သတ်ခဲ့ဖူး ကြောင်း၊ မလေးရှားနိုင်ငံ၏ ပြည်တွင်းဝက်မွေးမြူရေးလုပ်ငန်းသည် ASF ရောဂါဒဏ်မှ ပြန်လည် နာလန်ထူစသာရှိသေးပြီး ပြည်ပသွင်းကုန်များ ပိုမိုများပြားလာပါက ဖိအားများ ပိုမိုဖြစ်ပေါ်စေနိုင်ကြောင်း မစ္စတာ Lai ကဆက်လက်ပြောကြားခဲ့သည်။
DOCA(ရန်ကုန်)