အမည်ခံစီးပွားရေးလုပ်ငန်းရှင်များမှ ထိုင်းနိုင်ငံရှိ အုန်းချိုမွှေးဈေးကွက်ကို ကြိုးကိုင်ခြယ်လှယ်

     ထိုင်းနိုင်ငံအစိုးရအနေဖြင့် ဈေးနှုန်းကို ကြိုးကိုင်ခြယ်လှယ်မှုဖြင့် တောင်သူများအပေါ် ထိခိုက်စေသည့် ပြည်ပနောက်ခံစီးပွားရေးလုပ်ငန်းများကို ဖော်ထုတ်၍ စုံစမ်းစစ်ဆေးမှု ပြု လုပ်ပြီး အုန်းချိုမွှေးဈေးကွက် တည်ငြိမ်လာစေရန်အတွက် အစီအမံများကို အရှိန်အဟုန်မြှင့် လုပ် ဆောင်လျက်ရှိကြောင်း သိရသည်။

     စီးပွားရေးဖွံ့ဖြိုးတိုးတက်မှုဦးစီးဌာန (DBD)မှ ညွှန်ကြား‌ရေးမှူးချုပ်ဖြစ်သူ Poonpong Naiyanapakorn အနေဖြင့် အုန်းသီးဈေးနှုန်း ကျဆင်းမှုကို ဖြေရှင်းရန်နှင့် သီးနှံထုပ်ပိုးမှုလုပ်ငန်း တွင် ပြည်ပရင်းနှီးမြှုပ်နှံမှုကို ဆန်းစစ်ရန်အတွက် အစိုးရဌာန (၁၀)ခုနှင့်အတူ ဆွေးနွေးမှုတစ်ခု ကို ပြုလုပ်ခဲ့ကြောင်း သိရသည်။

     စုံစမ်းစစ်ဆေးသူများအနေဖြင့် ပြည်ပရင်းနှီးမြှုပ်နှံသူများကိုယ်စား ထိုင်းနိုင်ငံသားများကို အမည်ခံအစုရှယ်ယာရှင်အဖြစ် အသုံးချ ဖွင့်လှစ်ထားသည်ဟု သံသယရှိသည့် ကုမ္ပဏီ (၁၅) ခုကို ဖော်ထုတ်ခဲ့ကြောင်း၊ ယင်းကုမ္ပဏီ (၁၅) ခုအနက် (၁၁) ခုသည် Ratchaburi မြို့တွင် တည်ရှိပြီး ကျန်ကုမ္ပဏီများမှာ Samut Prakan၊ Pathum Thani၊ Samut Sakhon နှင့် Bangkok မြို့တို့တွင် တည်ရှိကြောင်းနှင့် DBDမှ အဆိုပါကုမ္ပဏီများအား အစုရှယ်ယာရှင်များ (သို့မဟုတ်) ဒါရိုက်တာ များအဖြစ် ကူညီထောက်ပံ့ပေးနေသော ထိုင်းနိုင်ငံသား (၁၀) ဦးကို တွေ့ရှိခဲ့ကြောင်း သိရသည်။

     Mr Poonpong မှ ဥပဒေကြောင်းအရ အရေးယူမှုအတွက် အသေးစိတ် အချက်အလက် များကို ဗဟိုစုံစမ်းစစ်ဆေးရေးအဖွဲ့ (CIB)၊ အထူးစုံစမ်းစစ်ဆေးရေးဦးစီးဌာန (DSI)နှင့် ‌ငွေကြေး ခဝါချမှုတိုက်ဖျက်ရေးရုံး  (Amlo) သို့ ပေးပို့ဆောင်ရွက်ထားပြီးဖြစ်ကြောင်း ပြောကြားခဲ့သည်။ ပြစ်မှုကျူးလွန်သူများသည် နိုင်ငံခြားစီးပွားရေးအက်ဥပဒေအရ ထောင်ဒဏ်(၃)နှစ်နှင့် ဘတ် ၁၀၀,၀၀၀ မှ ဘတ် ၁ သန်းအထိ ငွေဒဏ်ချမှတ်ခံရနိုင်မည်ဖြစ်ကြောင်း သိရသည်။

    အချို့သောကုမ္ပဏီများမှာ အုန်းစိုက်ခင်းများကို ငှားရမ်းပြီး  အုန်းသီးများထုတ်လုပ်ကာ အုန်းသီးထုတ်ကုန်များကို ၎င်းတို့ကိုယ်တိုင် ပြည်ပသို့ တင်ပို့ရောင်းချကြောင်း တွေ့ရှိရကြောင်း၊ ထို့ကဲ့သို့ ကုန်ကြမ်းမှ ကုန်ချောအထိ ကိုယ်တိုင်ဆောင်ရွက်သောလုပ်ငန်းများကြောင့် ကုမ္ပဏီ များအနေဖြင့် တောင်သူများထံမှ ဝယ်ယူသောဈေးနှုန်းကို ချိုးနှိမ်နိုင်ပြီး  ခြံထွက်ဈေးနှုန်းမှာ ပုံမှန်ထက် နိမ့်ကျခြင်းကို ဖြစ်ပေါ်စေနိုင်ကြောင်း သိရှိရပါသည်။

     DBDမှ သီးနှံထုတ်ပိုးမှုလုပ်ငန်းများအပေါ် စည်းမျဉ်းစည်းကမ်းများ ပိုမိုတင်းကျပ်စွာ ချ မှတ်ထားရာတွင် မှတ်ပုံတင်ရန် လိုအပ်ချက်များ၊ အလုပ်သမားဆိုင်ရာ လုပ်ထုံးလုပ်နည်းများကို စစ်ဆေးခြင်းနှင့် အခွန်လိုက်နာမှုအပေါ် စစ်ဆေးခြင်း စသည့်အချက်များအပြင် ပူးပေါင်းညှိနှိုင်း၍ ဈေးနှုန်းများကို လျှော့ချခြင်း (သို့မဟုတ်) ဈေးကွက်အတွင်း မျှတမှုမရှိသော ဈေးနှုန်းဖိနှိပ်မှုများ မှ ကာကွယ်ရန် ဝယ်ယူခြင်းဆိုင်ရာ လုပ်ထုံးလုပ်နည်းများကို အနီးကပ်စောင့်ကြည့်ခြင်း စသည့် အချက်များ ပါဝင်ကြောင်း၊ တာဝန်ရှိသူများအနေဖြင့် စိုက်ပျိုးထုတ်လုပ်မှုမှ ပြည်ပသို့တင်ပို့မှု အဆင့်အထိ ထုတ်လုပ်မှု ကွင်းဆက်တစ်လျှောက် ပွင့်လင်းမြင်သာမှုရှိစေရန်အတွက် စုံစမ်းစစ် ဆေးမှုများကို ပိုပိုထိရောက်စွာ ဆက်လက်လုပ်ဆောင်သွားမည်ဖြစ်ကြောင်း သိရှိရသည်။

    အစိုးရအနေဖြင့် အဆိုပါပြဿနာ၏  တစ်စိတ်တစ်ပိုင်းကို ဖြေရှင်းသည့်အနေဖြင့် ပိုမို ကျယ်ပြန့်လာသော ဈေးကွက်၏ဖွဲ့စည်းပုံပိုင်းကို ဆန်းစစ်လျက်ရှိကြောင်း၊ Mr Poonpong က မကြာသေးမီနှစ်များအတွင်း အုန်းပင်စိုက်ပျိုးသည့် မြေဧရိယာများ သိသိသာသာ တိုးချဲ့လာခဲ့၍ ထုတ်လုပ်မှုပမာဏ တိုးတက်လာပြီး ဈေးနှုန်းများ လျော့ကျသွားခဲ့ကြောင်း၊ ယခင်၄နှစ်ကျော် ကာလတွင် အုန်းပင်စိုက်ပျိုးမြေဧရိယာမှာ ၂၃၅,၉၀၃ ရိုင် မှ ၃၀၅,၇၀၆ ရိုင်အထိ တိုးမြင့်လာခဲ့ ကြောင်း၊ ၂၀၂၅ ခုနှစ်တွင် ထုတ်လုပ်မှုပမာဏသည် ၈၇၇,၆၈၁ တန်ခန့် ရောက်ရှိခဲ့ပြီး ၅၀ ရာခိုင် နှုန်းနီးနီး တိုးမြင့်လာခဲ့ကြောင်း၊ ထုတ်လုပ်မှုတိုးမြင့်လာခဲ့သော်လည်း ပို့ကုန်အခွန်မှာ ၂နှစ်ဆက် တိုက် လျော့ကျခဲ့ပြီး ၂၀၂၃ ခုနှစ်တွင် ဘတ် ၉.၈၈ ဘီလီယံမှ ၂၀၂၅ ခုနှစ်တွင် ဘတ် ၆.၄၆ ဘီလီယံအထိ ကျဆင်းသွားခဲ့ကြောင်း၊ အဆိုပါအချက်မှာ တရုတ်နိုင်ငံ၏ ဈေးကွက်ဝေစု လျော့ နည်းလာခြင်းသည် တစ်စိတ်တစ်ဒေသအနေဖြင့် ပါဝင်ကြောင်း ပြောကြားခဲ့သည်။

    အစိုးရပြောရေးဆိုခွင့်ရှိသူ Siripong Angkasakulkiat ကလည်း ကြားခံကုန်သည်အချို့ သည် အုန်းသီးများကို ဈေးသက်သက်သာသာဖြင့် ဝယ်ယူနိုင်ရန်အတွက် ဈေးနှုန်းများကို ကျ ဆင်းစေရန် ရည်ရွယ်ချက်ရှိရှိ လုပ်ဆောင်နိုင်ကြောင်း၊ အဆိုပါကိစ္စသည် ထိုင်းနိုင်ငံသားများ၏ အမည်ကို အသုံးပြု၍ ပြည်ပရင်းနှီးမြှုပ်နှံသူများနှင့် ဆက်နွယ်မှု ရှိနေနိုင်ကြောင်းလည်း ပြော ကြားခဲ့သည်။ အလားတူ စုံစမ်းစစ်ဆေးမှုများသည် သစ်သီးဝလံကဏ္ဍများတွင်လည်း မျှတသော ယှဉ်ပြိုင်မှု ရရှိစေရန်အတွက် နောက်ပိုင်းတွင် တိုးချဲ့ဆောင်ရွက်သွားနိုင်ကြောင်း အာဏာပိုင် များက မီးမောင်းထိုးပြခဲ့ခြင်း ဖြစ်ကြောင်း သိရှိရပါသည်။

Source : Bangkok Post, 9 March 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)