ဆီမီးကွန်ဒတ်တာ (Semiconductors) ဝယ်လိုအား အလွန်အမင်း မြင့်တက်လာခြင်းကြောင့် တောင်ကိုရီးယားနိုင်ငံ၏ ပို့ကုန်တင်ပို့မှုသည် မတ်လ ပထမ ၁၀ ရက်အတွင်း ဂဏန်းနှစ်လုံးပမာဏ (နှစ်ဆနီးပါး) အထိ တိုးတက်လာကြောင်း အကောက်ခွန်ရုံး၏ မတ်လ ၁၁ ရက်နေ့ ထုတ်ပြန်ချက်အရ သိရသည်။
ကိုရီးယားအကောက်ခွန်ဌာန (Korea Customs Service) ၏ အဆိုအရ အဆိုပါကာလအတွင်း ပြည်ပသို့ ကုန်ပစ္စည်းတင်ပို့မှုမှာ အမေရိကန်ဒေါ်လာ ၂၁.၄၇ ဘီလီယံ ရှိခဲ့ပြီး ယခင်နှစ် အလားတူကာလနှင့် နှိုင်းယှဉ်ပါက ၅၅.၆ ရာခိုင်နှုန်း မြင့်တက်ခဲ့ခြင်းဖြစ်သည်။ ပျမ်းမျှနေ့စဉ် ပို့ကုန်တင်ပို့မှုမှာလည်း ၃၁.၇ ရာခိုင်နှုန်း မြင့်တက်ခဲ့ကာ ဒေါ်လာ ၃.၃၀ ဘီလီယံအထိရှိခဲ့သည်။
အထူးသဖြင့် ဉာဏ်ရည်တု (AI) နည်းပညာတွင် အသုံးပြုသည့် ချစ်ပ်ပြား (Chips) များ ဝယ်လိုအား ကောင်းမွန်နေခြင်းကြောင့် ဆီမီးကွန်ဒတ်တာ တင်ပို့မှုသည် ၁၇၅.၉ ရာခိုင်နှုန်းအထိ အဆမတန် မြင့်တက်ခဲ့သည်။
ရေနံထွက်ပစ္စည်းများ၊ မော်တော်ယာဉ်၊ သံမဏိ၊ မော်တော်ယာဉ်အစိတ်အပိုင်းများ၊ စက်ကိရိယာများနှင့် အိမ်သုံးလျှပ်စစ်ပစ္စည်းများ တင်ပို့မှုမှာလည်း ဂဏန်းနှစ်လုံးအထိ မြင့်တက်ခဲ့သော်လည်း သင်္ဘောတင်ပို့မှုမှာမူ ဂဏန်းနှစ်လုံးအထိ လျော့ကျသွားခဲ့သည်။ သွင်းကုန်တင်သွင်းမှုမှာမူ မတ်လ ပထမ ၁၀ ရက်အတွင်း ပြီးခဲ့သည့်နှစ်ထက် ၂၁.၇ ရာခိုင်နှုန်း မြင့်တက်ကာ ဒေါ်လာ ၁၉.၃၇ ဘီလီယံ ရှိခဲ့သဖြင့် ကုန်သွယ်မှုပိုငွေ ဒေါ်လာ ၂.၁၀ ဘီလီယံ ရရှိခဲ့သည်။
အဆိုပါ ၁၀ ရက်တာအတွင်း ချစ်ပ်ပြားများ၊ ဆီမီးကွန်ဒတ်တာသုံး စက်ကိရိယာများ၊ စက်မှုလုပ်ငန်းသုံးစက်များ၊ ရေနံထွက်ပစ္စည်းများ၊ စက်ကိရိယာများနှင့် ကျောက်မီးသွေး တင်သွင်းမှုမှာလည်း ဂဏန်းနှစ်လုံးအထိ မြင့်တက်ခဲ့ပြီး ရေနံစိမ်းနှင့် သဘာဝဓာတ်ငွေ့ တင်သွင်းမှုမှာမူ ဂဏန်းတစ်လုံးအထိ လျော့ကျခဲ့ကြောင်း သိရှိရပါသည်။
Source : Xinhua
DOCA (ရန်ကုန်)