အရှေ့အလယ်ပိုင်းဒေသတွင် ဖြစ်ပေါ်နေသော တင်းမာမှုများကြောင့် ကမ္ဘာလုံးဆိုင်ရာ စွမ်းအင်မသေချာမှုများ မြင့်တက်လာသည့်အခြေအနေအကြား ဗီယက်နမ်နိုင်ငံသည် ယခုနှစ် ပထမနှစ်လအတွင်း လောင်စာတင်သွင်းမှုများ သိသိသာသာ မြင့်တက်လာခဲ့ကြောင်း သိရပါ သည်။ ဗီယက်နမ်အကောက်ခွန်ဦးစီးဌာန၏ စာရင်းအင်းများအရ ယခုနှစ် ပထမနှစ်လအတွင်း ဗီယက်နမ်နိုင်ငံသည် ရေနံနှင့် ရေနံထွက်ကုန် တန်ချိန် ၂.၁၈ သန်း တင်သွင်းရန် အမေရိကန် ဒေါ်လာ ၁.၄၄ ဘီလီယံကျော် သုံးစွဲခဲ့ပြီး ယင်းပမာဏသည် ယခင်နှစ် တူညီသည့်ကာလနှင့် နှိုင်းယှဉ်ပါက ၃၁.၄ ရာခိုင်နှုန်းနှင့် ၄၃ ရာခိုင်နှုန်းအသီးသီး မြင့်တက်ခဲ့ကြောင်း သိရပါသည်။ ရေနံစိမ်းတင်သွင်းမှုမှာ စုစုပေါင်းတန်ချိန် ၂.၁၆ သန်း ကျော်ရှိပြီး တန်ဖိုးအားဖြင့် အမေရိကန် ဒေါ်လာ ၁.၀၈ ဘီလီယံခန့်ရှိကာ ပမာဏတွင် ၁၀ ရာခိုင်နှုန်းနှင့် တန်ဖိုးတွင် ၂၅ ရာခိုင်နှုန်း အသီးသီးကျဆင်းခဲ့ကြောင်း သိရပါသည်။ ယခုနှစ် ပထမနှစ်လအတွင်း ဗီယက်နမ်နိုင်ငံသည် ရေနံစိမ်းတင်ပို့မှုမှ အမေရိကန်ဒေါ်လာ ၂၀၀.၃ သန်းခန့်နှင့် ရေနံထွက်ကုန်တင်ပို့မှုမှ အမေရိကန် ဒေါ်လာ ၅၅ သန်းနီးပါးရရှိခဲ့ပြီး ယခင်နှစ်တူညီသည့်ကာလနှင့် နှိုင်းယှဉ်ပါက ၁၆.၇ ရာခိုင်နှုန်းနှင့် ၆၂.၃ ရာခိုင်နှုန်း အသီးသီးကျဆင်းခဲ့ကြောင်း သိရပါသည်။ ၂၀၂၅ ခုနှစ်အတွင်း ဗီယက်နမ်နိုင်ငံသည် ရေနံထွက်ကုန်တန်ချိန် ၉.၉ သန်း ခန့်ကို အမေရိကန်ဒေါ်လာ ၆.၈ ဘီလီယံတန်ဖိုးဖြင့် တင်သွင်းခဲ့ပြီး ရေနံစိမ်း တန်ချိန် ၁၄.၁ သန်း ကို အမေရိကန်ဒေါ်လာ ၇.၇ ဘီလီယံတန်ဖိုးဖြင့် တင်သွင်းခဲ့ကြောင်း သိရပါသည်။ ဗီယက်နမ်နိုင်ငံသည် စွမ်းအင်လိုအပ်ချက်များကို ဖြည့်ဆည်းရန်နှင့် စွမ်းအင်ဖူလုံရေးသေချာစေရန်အတွက် ရေနံထွက်ကုန်များကို များသောအားဖြင့် ပြည်ပမှ တင်သွင်းရသော နိုင်ငံတစ်ခုဖြစ်ပြီး စီးပွားရေးကို နှစ်စဉ်ဂဏန်းနှစ်လုံးတိုးတက်မှုရရှိစေရန် ကြိုးပမ်းနေကြောင်း သိရပါသည်။ စက်မှုနှင့် ကုန်သွယ်ရေးဝန်ကြီးဌာန၏ အဆိုအရ အဓိက ဓာတ်ဆီလက်ကားကုန်သည်များသည် တင်သွင်းမှုနှင့် ထောက်ပံ့ပို့ဆောင်ရေးကုန်ကျစရိတ်များ မြင့်တက်နေသော်လည်း ပြည်တွင်းစျေးကွက်ကို ထောက်ပံ့နိုင်ရန် သန့်စင်ပြီး ရေနံထွက်ကုန်များ ကို ဆက်လက်တင်သွင်းနေကြကြောင်း သိရပါသည်။ ၎င်းတို့၏ ကုန်သိုလှောင်ထားမှုများနှင့်အတူ မတ်လအတွင်း ပြည်တွင်းလောင်စာထောက်ပံ့မှုမှာ တည်ငြိမ်နေမည်ဟု ခန့်မှန်းရကြောင်း သိရပါသည်။ သို့သော် အရှေ့အလယ်ပိုင်းဒေသရှိ တင်းမာမှုများ ဆက်လက်ရှည်လျားနေပါက ဧပြီလအတွင်း ပြည်တွင်းစွမ်းအင်စျေးကွက်သည် စိန်ခေါ်မှုများနှင့် ပိုမိုရင်ဆိုင်ရနိုင်ကြောင်း သိရှိရပါသည်။
Vietnam Plus
DOCA (ရန်ကုန်)