ဥရောပသမဂ္ဂ (EU) ၏ ၂၀၂၅/၂၆ ရာသီ စတင်သည့် ဇူလိုင်လမှ မတ်လ ၁၅ ရက်နေ့အထိ ဂျုံတင်ပို့မှုသည် မက်ထရစ်တန် ၁၆.၇၇ သန်းတန်အထိရှိခဲ့ကြောင်းနှင့် အဆိုပါ ပမာဏမှာပြီးခဲ့သည့်အပတ်က တင်ပို့ခဲ့သည့် ၁၆.၅၀ သန်းတန်နှင့် နှိုင်းယှဉ်ပါက တိုးတက်လာခြင်းဖြစ်ပြီး ယခင်နှစ် အလားတူကာလထက် ၈ ရာခိုင်နှုန်း မြင့်တက်လာခြင်းဖြစ်ကြောင်း မတ်လ ၁၇ ရက်နေ့တွင် ဥရောပကော်မရှင်မှ ထုတ်ပြန်သော ထုတ်ပြန်ချက်များအရ သိရပါသည်။ ယခုရာသီ၏ တင်ပို့မှုပမာဏများကို နိုင်ငံအလိုက် ခွဲခြမ်းစိတ်ဖြာကြည့်ပါက ရိုမေးနီးယားနိုင်ငံသည် တန်ချိန် ၅.၅၁ သန်းတန်ဖြင့် အီးယူတွင် ဂျုံအများဆုံးတင်ပို့သည့် နိုင်ငံအဖြစ် ဆက်လက်ရပ်တည်နေပြီး၊ ၎င်းနောက်တွင် ပြင်သစ်က ၄.၅၇ သန်းတန်၊ ပိုလန်က ၁.၉၂ သန်းတန်၊ လစ်သူယေးနီးယားက ၁.၈၁ သန်းတန်နှင့် ဂျာမနီက ၁.၃၁ သန်းတန် တို့ဖြင့် အသီးသီး တင်ပို့ထားကြကြောင်း သိရပါသည်။ သို့သော်လည်း ပြင်သစ်နိုင်ငံ၏ ကောက်ပဲသီးနှံ တင်ပို့မှုအချက်အလက်များသည် ၂၀၂၄ ခုနှစ် နှစ်ဆန်းပိုင်းမှ စတင်ကာ ပျောက်ဆုံးနေပြီး၊ ဘူလ်ဂေးရီးယားနှင့် အိုင်ယာလန်တို့၏ တင်ပို့မှုအချက် အလက်များမှာလည်း ၂၀၂၃/၂၄ ရောင်းဝယ်ရေးရာသီ စတင်ချိန်မှစ၍ ပြည့်စုံမှုမရှိကြောင်း ကော်မရှင်က ပြောကြားခဲ့ပါသည်။ ထို့အပြင် ဂရိနိုင်ငံ၏ တင်ပို့မှုအချက်အလက်များသည်လည်း ၂၀၂၅ ခုနှစ် ဒီဇင်ဘာလလယ်မှစတင်ကာ ပြည့်စုံမှုမရှိသေးကြောင်း ၎င်းကော်မရှင်က ထပ်လောင်းပြောကြားခဲ့ကြောင်း သိရပါသည်။ ၂၀၂၅/၂၆ အတွက် ရိုမေးနီးယားနိုင်ငံမှ တင်ပြထားသည့် ဂျုံမာတင်ပို့မှု ကိန်းဂဏန်းများ ပုံမှန်ထက်များပြားနေခြင်းသည် သတင်းပေးပို့မှုဆိုင်ရာ မှားယွင်းမှုတစ်ခုနှင့် ဆက်စပ်နိုင်ကြောင်း၊ ယင်းကို စစ်ဆေးတွေ့ရှိထားပြီးဖြစ်ကာ ပြုပြင်တည့်မတ်မှုများ ဆောင်ရွက်နေပြီဖြစ်ကြောင်း သိရပါသည်။ အီးယူ၏ မုယောစပါးတင်ပို့မှုမှာ စုစုပေါင်း တန်ချိန် ၆.၈၄ သန်းတန်ခန့်ရှိခဲ့ပြီး၊ ပြီးခဲ့သည့်အပတ်က ၆.၇၅ သန်းတန်ရှိခဲ့ရာမှ တိုးတက်လာခြင်းဖြစ်ကာ ၂၀၂၄/၂၅ ခုနှစ် အလားတူကာလနှင့် နှိုင်းယှဉ်ပါက ၈၂ ရာခိုင်နှုန်းအထိ သိသိသာသာ မြင့်တက်လာခြင်းဖြစ်ကြောင်း သိရှိရပါသည်။
Source: Brecorder
DOCA (ရန်ကုန်)