၂၀.၈.၂၀၂၆ ရက်နေ့တွင် ရန်ကုန်မြို့တွင် နေထိုင်သူ စားသုံးသူတစ်ဦးက မော်လမြိုင်မြို့၊ မြေနီကုန်းရပ်ကွက်ရှိ အဝေးပြေးကားဂိတ်တစ်ခုမှ ရန်ကုန်သို့ ဒေသထွက်အစား အသောက်ပါသည့် ပီနံတစ်အိတ်ပေးပို့သည်ကို တန်ဆာခ ၄၅၀၀၀ အထိ အဆမတန် တောင်းခံခဲ့သည့်အတွက် ကျေနပ်မှုမရှိပါ၍ ဖြေရှင်းပေးပါရန် စားသုံးသူရေးရာ ဦးစီးဌာနသို့ Website Complaint System တိုင်ကြားလာခဲ့ပါသည်။
တိုင်ကြားမှုနှင့်ပတ်သက်၍ ဌာနမှတာဝန်ရှိသူများက ဂိတ်တာဝန်ခံနှင့် တွေ့ဆုံ ညှိနှိုင်းခဲ့ရာ ဂိတ်တာဝန်ခံအနေဖြင့် စားသုံးသူများမှ ကုန်စည်ပို့ဆောင်သည့်အခါတွင် တန်ဆာခကို သင့်တော်သည့်နှုန်းထားဖြင့် ကောက်ခံသွားမည်ဖြစ်ကြောင်းနှင့် နောင်တွင် အလားတူကိစ္စရပ်များမဖြစ်ပေါ်စေရေး အလေးထားဆောင်ရွက်သွားပါမည်ဖြစ်ကြောင်း ဝန်ခံကတိလက်မှတ်ရေးထိုးဆောင်ရွက်ခဲ့ပြီး အမှုအား ပိတ်သိမ်းခဲ့ပါကြောင်း သိရှိရပါသည်။
စားသုံးသူရေးရာဦးစီးဌာနအနေဖြင့် ကုန်စည်/ဝန်ဆောင်မှုများနှင့် စပ်လျဉ်း၍ စားသုံးသူများ နစ်နာမှုရှိပါက တိုင်ကြားမှုများကို စားသုံးသူကာကွယ်ရေးဥပဒေနှင့်အညီ ဖြေရှင်းပေးလျက်ရှိကြောင်း သိရှိရပါသည်။
DOCA (မွန်)