![](http://www.doca.gov.mm/sites/default/files/styles/consumer_inner_image__847x424_/public/၅_0.jpg?itok=gPOL7Qcg)
ပြည်သူများအသုံးပြုနေသည့် သောက်ရေသန့်များသည် အစားအသောက်နှင့်ဆေးဝါးကွပ်ကဲရေး ဦးစီးဌာန(FDA)၏ ထုတ်လုပ်ရောင်းချခွင့် ထောက်ခံချက်ရရှိပြီးမှသာ ထုတ်လုပ်ရောင်းချခွင့်ရှိသဖြင့် ထောက်ခံချက် လျှောက်ထားသည့် သောက်ရေသန့်စက်ရုံများနှင့် လျှောက်ထားမှုမရှိသေးသော စက်ရုံများသို့ ကွင်းဆင်းစစ်ဆေးခြင်းလုပ်ငန်းများ ဆောင်ရွက်လျက်ရှိရာ စားသုံးသူရေးရာဦးစီးဌာန မှ တာဝန်ရှိသူများသည်လည်း လိုက်ပါ၍ စားသုံးသူကာကွယ်ရေးဥပဒေအခန်း(၁၈)အရ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ ဖော်ပြခြင်းရှိ/မရှိ စစ်ဆေးခြင်းနှင့် စားသုံးသူ ကာကွယ်ရေး အသိပညာပေးခြင်းလုပ်ငန်းများကို ပူးပေါင်းဆောင်ရွက်လျက်ရှိပါသည်။
စစ်ကိုင်းတိုင်းဒေသကြီး၊ မုံရွာမြို့နယ်တွင် သောက်ရေသန့်စက်ရုံ(၂၇)ခုခန့်ရှိရာ ၂၀၂၀ ပြည့်နှစ် ဒီဇင်ဘာလ(၂၁)ရက်နေ့တွင် စားသုံးသူရေးရာဦးစီးဌာန မုံရွာခရိုင်မှ တာဝန်ရှိသူများသည် တိုင်းဒေသကြီး အစားအသောက်နှင့်ဆေးဝါးကွပ်ကဲရေးဦးစီးဌာန(FDA)နှင့် ပူးပေါင်း၍ ထုတ်လုပ်ရောင်းချခွင့် ထောက်ခံချက်လျှောက်ထားခြင်းမရှိဘဲ ထုတ်လုပ် ရောင်းချနေသော မုံရွာမြို့၊ ပြည်တော်သာရပ်ကွက်၊ မောင်းခမ်းကျောင်းလမ်းရှိ သောက်ရေသန့် စက်ရုံသို့ ကွင်းဆင်းစစ်ဆေးပြီး၊ လုပ်ထုံးလုပ်နည်းသတ်မှတ်ချက်များနှင့်အညီ (FDA) ထောက်ခံချက် အမြန်ဆုံးလာရောက် လျှောက်ထားရန်နှင့် ခွင့်ပြုချက်ရရှိပြီးမှသာ ထုတ်လုပ်ရောင်းချရန် သတိပေး မှတ်တမ်းတင်လက်မှတ်ရေးထိုးစေခဲ့ပါသည်။ ကုန်အညွှန်းအမှတ်အသားတွင် ဖော်ပြရန်လိုအပ်သော အသားတင်ပါဝင်မှုပမာဏနှင့် ထားသိုသိမ်းဆည်းပုံအညွှန်းကို ဖော်ပြပေးရန် စားသုံးသူရေးရာဦးစီး ဌာနအနေဖြင့် အသိပညာပေးခဲ့ပါသည်။ ပူးပေါင်းလိုက်ပါစစ်ဆေးခဲ့သည့် စည်ပင်သာယာရေးအဖွဲ့မှ တာဝန်ရှိသူကလည်း အခွန်ပေးဆောင်ပြီး စည်ပင်လုပ်ငန်းလိုင်စင် ရရှိမှုရှိ/မရှိနှင့် သတ်မှတ်ထားသည့် စည်းမျဉ်းစည်းကမ်းများလိုက်နာမှုရှိ/မရှိ စစ်ဆေးခဲ့ပါသည်။
စစ်ကိုင်းတိုင်းဒေသကြီး(DOCA)