ပြည်ပကုန်သွယ်မှုသတင်းများ
အိန္ဒိယနိုင်ငံတွင် စားသုံးမှုအများဆုံး ပဲတစ်မျိုးဖြစ်သည့် ပဲစင်းငုံသည် ၁ ကီလိုဂရမ်လျှင် ၁၅၀ ရူပီးနှုန်းဖြင့် ပဲမျိုးစုံလက်လီဈေးကွက်၌ ဈေးနှုန်းအမြင့်ဆုံးသို့ ရောက်ရှိနေသော်လည်း ကောင်းမွန်စွာ အရောင်းအဝယ် ဖြစ်လျက်ရှိပြီး လာမည့် မုတ်သုံရာသီအခြေအနေ ခန့်မှန်းချက်ကို ရှင်းလင်းစွာ သိရှိနိုင်မည့် ဇွန်-ဇူလိုင် လများအထိ ဈေးအမြင့်တန်းတွင် ဆက်လက် တည်ရှိနေမည် ဟု ကုန်သည်များကပြောဆိုကြောင်း Indian Express သတင်းဌာနက ဖော်ပြပါသည်။
အိန္ဒိယနိုင်ငံနှင့် ပါကစ္စတန်နိုင်ငံတို့က ကြက်သွန်နီတင်ပို့မှုကို ပိတ်ပင်တားမြစ်ခဲ့ပြီးနောက် ပြည်တွင်းဈေးကွက်အတွင်း ကြက်သွန်နီဈေးနှုန်း မြင့်တက်လာခဲ့ရာ သီရိလင်္ကာနိုင်ငံအနေဖြင့် ကြက်သွန်နီကို တရုတ်နိုင်ငံမှ တင်သွင်းမည်ဟု သီရိလင်္ကာ ကုန်သွယ်ရေးဝန်ကြီး Mr. Nalin Fernando က ပြောကြားခဲ့ကြောင်း Economy Next သတင်းဌာန၏ ဖော်ပြချက်အရ သိရပါသည်။
အိန္ဒိယနိုင်ငံ၌ ကြက်သွန်နီတင်ပို့မှုကို တားမြစ်ချက်ထုတ်ပြန်ခဲ့ပြီးနောက် သီရိလင်္ကာနိုင်ငံသည် ပြည်တွင်းလုပ်ငန်းများ အကာအကွယ်ပေးမှုအခွန်အဖြစ် ပြည်ပမှ ကြက်သွန်နီတင်သွင်းမှု အပေါ် တစ်ကီလိုဂရမ်လျှင် ရူပီး ၈၀ နှုန်းဖြင့် စည်းကြပ်ကောက်ခံခြင်းကို ၁၀ ရူပီးနှုန်းသို့ လျှော့ချ သတ်မှတ်လိုက်ကြောင်း သိရှိရပါသည်။
ဘင်္ဂလားဒေ့ရှ်နိုင်ငံတွင် အစိုးရသည် သီးနှံရာသီအလိုက် ထုတ်လုပ်မှုကုန်ကျစရိတ်အပေါ် မူတည်၍ ဆန်အမျိုးအစားအလိုက် စျေးနှုန်းများသတ်မှတ်ခြင်းကို ဘင်္ဂါလီပြက္ခဒိန်အရ နှစ်သစ်ကူး ကာလဖြစ်သော ယခုနှစ် ဧပြီလ ၁၄ ရက်နေ့မှစတင်၍ ဆောင်ရွက်မည်ဖြစ်ကြောင်း သိရှိရသည်။
အိန္ဒိယနိုင်ငံသည် ဆန်တင်ပို့မှုကို တားမြစ်ကန့်သတ်ထားချိန်၌ အခြားသော ဆန်တင်ပို့သည့် နိုင်ငံနှစ်ခုသည် အခွန်ဆိုင်ရာ အထူးအခွင့်အရေးများကို ဆုံးရှုံးခဲ့ရသဖြင့် ထိုင်းနိုင်ငံအနေဖြင့် အီတလီဈေးကွက်သို့ စံပယ်ဆန်များ ပိုမိုတင်ပို့နိုင်မည်ဟု ယုံကြည်ကြောင်း ထိုင်းကူးသန်းရောင်း ဝယ်ရေးဝန်ကြီး Phumtham Wechayachai က ပြောကြားခဲ့သည်။
ထိုင်းနိုင်ငံ၌ ၂၀၂၄ ခုနှစ် ပထမသုံးလအတွင်း ဆန်တင်ပို့မှုသည် တန်ချိန် ၂.၅ သန်းရှိပြီး ၂၀၂၃ ခုနှစ် ပထမသုံးလပတ်တွင် မှတ်တမ်းတင်ထားသော အရေအတွက်ထက် တန်ချိန် ၅၀၀,၀၀၀ ပိုမိုခဲ့ကြောင်း၊ ယခုနှစ် ဆန်တင်ပို့မှုမှာ တန်ချိန် ၈ သန်းအထိ ရောက်ရှိနိုင်ဖွယ် အလားအလာရှိမှုနှင့်အတူ ရည်မှန်းထားသည့် ဆန်တန်ချိန် ၇.၅ သန်း တင်ပို့ရန်လျာထားချက်ကို အပြည့်အဝရရှိမည်ဟု ၎င်းအနေဖြင့် ယုံကြည်ကြောင်းနှင့် ပြည်တွင်း ပြည်ပ အခြေအနေ နှစ်ခုလုံးသည် လယ်ယာထွက်ကုန် အထွက်ကောင်းမွန်မှုကို အထောက်အပံ့ပြုလျက်ရှိကြောင်းဖြင့် အစိုးရ၏ ပြောရေးဆိုခွင့်ရှိသူ Chai Watcharonke က ပြောကြားခဲ့သည်။
ဗီယက်နမ်နိုင်ငံသည် ယခုနှစ်အတွင်း မတ်လကုန်အထိ ဆန်တန်ချိန် ၁.၆ သန်းခန့် တင်ပို့ခဲ့ပြီး ယခင်နှစ်ကာလတူနှင့် နှိုင်းယှဉ်ပါက ဝင်ငွေအားဖြင့် ၅၀% တိုးတက်လျက် အမေရိကန် ဒေါ်လာ ၁ ဘီလီယံကျော် ရရှိမည်ဟု ခန့်မှန်းရကြောင်း Vietnam Plus သတင်းဌာနက ဖော်ပြထား သည်။ အဆိုပါရလဒ်က ၂၀၂၄ ခုနှစ် တစ်နှစ်လုံးအတွက် အလားအလာကောင်းမွန်ပြီး ၃၄ နှစ်တာ ကာလအတွင်း ဗီယက်နမ်၏ ဆန်တင်ပို့မှု အမြင့်မားဆုံး အခြေအနေသို့ ရောက်ရှိမည်ကို ညွှန်ပြ လျက်ရှိသည်။
ဖိလစ်ပိုင်အစိုးရသည် ဗီယက်နမ်ဆန်အပေါ် များစွာမှီခိုနေမှုကိုလျှော့ချပြီး အခြားဆန် ရောင်းချနေသည့်နိုင်ငံများမှ ဝယ်ယူသွားရန်ကြိုးပမ်းလျက်ရှိသည်ဟု ဗီယက်နမ် ဝန်ကြီးဌာနများ၊ အဖွဲ့အစည်းများ၊ မူဝါဒချမှတ်သူများနှင့် စီးပွားရေးလုပ်ငန်းရှင်များသို့ ဖိလစ်ပိုင်နိုင်ငံအခြေစိုက် ဗီယက်နမ်ကုန်သွယ်မှုရုံးက သတိပေးပြောကြားခဲ့ပါသည်။
မလေးရှားနိုင်ငံတွင် ပြည်တွင်း၌ စိုက်ပျိုးထုတ်လုပ်သည့်ဆန်များကို ပြည်သူများ ပိုမို ဝယ်ယူရရှိနိုင်စေရေးအတွက် အစိုးရဌာနအဖွဲ့အစည်းများဖြစ်သည့် ကာကွယ်ရေးဝန်ကြီးဌာန၊ ရဲဌာန၊ ကျောင်းများ၊ အဆောင်များနှင့် ဆေးရုံများတွင် ပြည်ပမှတင်သွင်းလာသောဆန်များကိုသာ အသုံးပြုရန် အစိုးရက ဆုံးဖြတ်ခဲ့ကြောင်း သိရှိရသည်။
ကမ္ဘာ့ကော်ဖီဈေးကွက်၌ ရိုဘတ်စတာကော်ဖီစေ့ ဈေးနှုန်းများမြင့်တက်လျက်ရှိမှုနှင့်အတူ ၂၀၂၄ ခုနှစ် မတ်လတွင် ကုန်ဆုံးသည့် ဘဏ္ဍာရေးနှစ်အတွင်း အိန္ဒိယ၏ ကော်ဖီပို့ကုန် တင်ပို့မှု တန်ဖိုးမှာ စံချိန်အသစ်တင်ပြီး မြင့်တက်ခဲ့ကြောင်း သိရှိရသည်။
ဇန်နဝါရီလမှ ဧပြီလအထိ ရိတ်သိမ်းကာလတွင် အင်ဒိုနီးရှားဆန်စပါးအထွက်နှုန်းသည် ခြောက်သွေ့သော ရာသီဥတုအခြေအနေကြောင့် ၁.၃၉ ရာခိုင်နှုန်း အထိကျဆင်းသွားကြောင်း ကိန်းဂဏန်းစာရင်းအင်းဗျူရိုမှ မတ်လ (၁) ရက်တွင် ဖော်ပြထားပါသည်။ ပြီးခဲ့သည်နှစ်ထက် ၁၇.၅၂ ရာခိုင်နှုန်းခန့် ကျဆင်းမည်ဟုလည်း ခန့်မှန်းထားကြသည်။
အရှေ့တောင်အာရှနိုင်ငံသည် ၂၀၂၃ ခုနှစ်တွင် စပါးတန်ချိန် ၃၁.၁သန်း ထုတ်လုပ် ခဲ့ကြောင်း အင်ဒိုနီးရှားစာရင်းအင်းတွင် ဖော်ပြထားသည်။ ဇန်နဝါရီလမှ ဧပြီလအထိ စပါးအထွက်နှုန်းခန့်မှန်းခြေမှာ ၁၀.၇ သန်းခန်ရှိပြီး ယခင်နှစ်ထက် ၁၃ သန်းကျဆင်းခဲ့သည်။
၂၀၂၃ခုနှစ်တွင် ဗီယက်နမ်နိုင်ငံသည် ပုစွန်တင်ပို့မှုအားနည်းချက်ကို ဖော်ထုတ်ခဲ့ပြီးနောက် ၂၀၂၄ခုနှစ်၏ ပထမသုံးလပတ်တွင် ဗီယက်နမ်နိုင်ငံပုစွန်လုပ်ငန်းသည် အဓိကစျေးကွက်များသို့ တင်ပို့မှုတိုးတက်လာခဲ့သည်။
ဗီယက်နမ်အကောက်ခွန်ဦးစီးဌာန၏ စာရင်းဇယားများအရ ပုစွန်တင်ပို့မှုသည် ဇန်နဝါရီလမှ မတ်လအတွင်း အမေရိကန်ဒေါ်လာသန်း ၆၂၀ခန့်ရှိပြီး တစ်နှစ်ထက်တစ်နှစ် ၂၄%မြင့်လာခဲ့သည်။ အမရိကန်နှင့် တရုတ်စျေးကွက်များသို့ တင်ပို့ရောင်းချမှုမှ ဝင်ငွေသည် ၂၆%နှင့် ၁၄၀% အသီးသီးတိုးတက်လာမည်ဟုခန့်မှန်းထားသည်။