ဖြေရှင်းဆောင်ရွက်ပေးမှုများ

        မကွေးတိုင်းဒေသကြီး XXXXXXXX မြို့နေ၊ ဒေါ် XXXX သည်  XXXX မြို့ မှ XXXX ကျေးရွာသို့   XXXX ယာဉ်လိုင်းဖြင့် ယာဉ်စီး ကျပ်(၂၀၀၀)၊ တန်ဆာခ ကျပ်(၁၀၀၀)ပေး၍ စီးနင်းလိုက်ပါခဲ့ရာ XXXX အနီး၌ ဆင်းသွားခဲ့သော ခရီးသည်တစ်ဦးအား ၎င်း၏အိတ် (ဆာလာအိတ်ထုပ်) တန်ဖိုးအားဖြင့် (၁၅၇၅၀ဝိ/-) ကျပ်ကို ကားစပါယ်ယာက မှားယွင်းပေးလိုက်မိသောကြောင့် ယင်းပစ္စည်းထုပ်အား ပြန်လည်ရရှိရန် ဂိတ်သို့ အကြိမ်ကြိမ်ဖုန်းဆက်ပြောကြားခဲ့သော်လည်း တာဝန်ယူမှုမရှိသဖြင့် (၁-၄-၂၀၂၄)ရက်နေ့တွင် မကွေးတိုင်းဒေသကြီး၊ စားသုံးသူရေးရာဦးစီးဌာနသို့ တိုင်ကြားလာခဲ့ပါသည်။

        ဌာနအနေဖြင့် တိုင်ကြားမှုနှင့်ပတ်သက်၍ စားသုံးသူကာကွယ်ရေးဥပဒေအရ စားသုံးသူထိခိုက်နစ်နာမှုရှိ/မရှိစိစစ်ခဲ့ပြီး (၂-၄-၂၀၂၄)ရက်နေ့တွင် တိုင်ကြားခံရသည့် ယာဉ်လိုင်းသို့ လာရောက်ညှိနှိုင်းဖြေရှင်းပေးနိုင်ရေး အကြောင်းကြားစာပေးပို့ခဲ့ပါသည်။ (၄-၄-၂၀၂၄)ရက်နေ့တွင်  ပို့ဆောင်ရေးစီမံကိန်းဦးစီးဌာန၊ မော်တော်ယာဉ်လိုင်းများကြီးရေးကော်မတီမှ တာဝန်ရှိသူများ၊ တိုင်ကြားသူ၊ တိုင်ကြားခံရသူတို့အား ညှိနှိုင်းရန်ခေါ်ယူခဲ့ရာ တိုင်ကြားသူက ယင်းနေ့တွင်ပင် ဖုန်းဖြင့်ဆက်သွယ်၍ တိုင်ကြားမှုနှင့်စပ်လျဉ်းပြီး ဆက်လက်ဆောင်ရွက်လိုခြင်းမရှိပါ၍ အမှုအားပိတ်သိမ်းပါကြောင်းပြောကြားလာခဲ့ပါသည်။ ဌာနအနေဖြင့် XXXX ယာဉ်လိုင်းမှ တာဝန်ရှိသူအား ကုန်စည်များသယ်ယူပို့ဆောင်ရာတွင် လမ်းခရီး၌ မမြင်နိုင်သော သဘာဝဘေးအန္တရာယ်ကြောင့် ဖြစ်ပေါ်လာသော အခြေအနေတစ်ရပ်မှအပ ပစ္စည်းများပျောက်ဆုံးခြင်း၊ ပျက်ဆီးခြင်းမျိုးမဖြစ်ပေါ်စေရေးနှင့် သယ်ဆောင်လာသော ကုန်စည်များကိုလည်း ပစ္စည်းပို့ဆောင်သူ၏ ရှေ့မှောက်တွင် စနစ်တကျဖွင့်ဖောက်စစ်ဆေးပြီးမှသာ ကုန်စည်၏တန်ဖိုးကိုလိုက်၍ တန်ဆာခတောင်းခံကာ သယ်ဆောင်ခြင်းဝန်ဆောင်မှုကို ဆောင်ရွက်ပေးသွားမည်ဖြစ်ကြောင်း၊ ဝန်ဆောင်မှုပေးရာတွင်လည်း တာဝန်ခံမှု၊ တာဝန်ယူမှုအပြည့်ဖြင့် ဆောင်ရွက်သွားမည်ဖြစ်ကြောင်း၊ သက်ဆိုင်ရာဌာနတာဝန်ရှိသူများ၏ ဆက်သွယ်အကြောင်းကြားမှုအပေါ်တွင်လည်း ခြိမ်းခြောက်ခြင်း၊ မချေမငံဆက်ဆံခြင်းမျိုးများ နောက်နောင်မဖြစ်ပေါ်စေရေး ဝန်ခံကတိလက်မှတ်ရေးထိုးစေလျက် အမှုအား ပိတ်သိမ်းနိုင်ခဲ့ကြောင်းသိရှိရပါသည်။

DOCA(မကွေး)

     မကွေးတိုင်းဒေသကြီး၊ မကွေးမြို့နေတိုင်ကြားသူသည် မော်တော်ယာဉ်လိုင်းတစ်ခုဖြင့် ကျောက်ပန်းတောင်းမြို့မှ မကွေးမြို့သို့ လိုက်ပါခဲ့ရာ ကားနောက်ဖုံးထဲ၌ တင်ဆောင်လာသော ကတ္တားခေါင်းတစ်ခု တန်ဖိုးငွေ ကျပ်(၁)သိန်းခန့်၊ Service ကဒ်(၂)ကဒ် တန်ဖိုးငွေကျပ် (၁)သိန်းခန့်၊ ပုဆိုးသစ်(၃)ကွင်း တန်ဖိုး ငွေကျပ်၂၁,၀၀၀/- ၊ ဝမ်းဆက် (၃)စုံ တန်ဖိုးငွေကျပ် ၃၁,၈၀၀/-၊ စောင်တစ်ထည်တန်ဖိုးငွေကျပ် ၁၀,၀၀၀/-၊ စုစုပေါင်းတန်ဖိုးငွေကျပ်၂၆၂,၈၀၀/-အပြင် ငွေသား (၄၃) သိန်းပါသော ခရီးဆောင်အိတ်မှာ ကားနောက်ဖုံးလှပ်၍ ပြုတ်ကျခဲ့ပါ သဖြင့် တိုင်ကြားသူမှ ယာဉ်မောင်းအား မည်ကဲ့သို့ တာဝန်ယူပေးမည်နည်းဟု မေးမြန်းခဲ့ရာ ယာဉ်မောင်းမှ ငွေသား(၄၃)သိန်း အိတ်ထဲပါလာသည်ကို  ခရီးသည်မှပြောကြားမှု မရှိသည့် အတွက် မသိရှိပါကြောင်း၊ တန်ဆာခလည်း ပေးချေထားခြင်းမရှိ၍ လျော်ကြေးပေးရန်မှာလည်း မဖြစ်နိုင်ပါကြောင်း ပြန်လည်ပြောကြားခဲ့သောကြောင့် ခရီးဆောင်အိတ်ပြုတ်ကျခဲ့သည့်အပေါ် ယာဉ်လိုင်းမှ တာဝန်ခံမှု/ တာဝန်ယူမှု မရှိသည့်အတွက် တိုင်ကြားခြင်းဖြစ် ပါသည်။

   ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ ဌာနမှတာဝန်ရှိသူများက စိစစ်၍ အမြန်ယာဉ်အသင်းမှ တာဝန်ရှိသူအား အကြောင်းကြား ဆောင်ရွက်ခဲ့ပြီး ၂၂-၂-၂၀၂၄ ရက်နေ့တွင် တိုင်ကြားသူ၊ တိုင်ကြားခံရသူ၊ ပို့ဆောင်ရေးနှင့်စီမံကိန်းဦးစီးဌာန၊ ယာဉ်လိုင်းကြီးကြပ်ရေး ကော်မတီတို့မှ တာဝန်ရှိသူများအား ဖိတ်ခေါ်၍ စေ့စပ်ညှိနှိုင်းခြင်းများ ဆောင် ရွက်ခဲ့မှုအရ ယာဉ်လိုင်းအနေဖြင့် ခရီးဆောင်အိတ်ပြုတ်ကျခဲ့မှုအပေါ် တာဝန်ရှိသည့်အတွက် ပစ္စည်းတန်ဖိုးငွေကျပ် ၂၆၂,၈၀၀/- အား တာဝန်ယူသွားမည်ဖြစ်သော်လည်း အိတ်ထဲတွင်ပါရှိ သည်ဆိုသော ငွေသား (၄၃)သိန်းမှာ ခရီးသည်မှ ကြိုတင် ပြောဆိုထားခြင်းမရှိသည့်အတွက် တာဝန်မယူနိုင်ပါကြောင်း၊ တိုင်ကြားသူမှလည်း ငွေသား (၄၃) သိန်းအား ပေးလျော်ရန် တောင်းဆိုခြင်းမပြုပါကြောင်း၊ ယာဉ်လိုင်းမှ တိုင်ကြားသူသို့ ငွေကျပ် ၂၆၀,၀၀၀/- အား ပေးလျော်သွားမည်ဖြစ်ကြောင်းကို တိုင်ကြားသူမှ သဘောတူလက်ခံခဲ့ပြီး ၂၆-၂-၂၀၂၄ ရက်နေ့တွင် ပေးလျော်သွားမည်ဖြစ်ကြောင်း ညှိနှိုင်းရရှိခဲ့ပါသည်။ သို့သော် တိုင်ကြားသူမှ ခရီးဆောင်အိတ် ပြုတ်ကျနေခဲ့ကြောင်း လူမှုကွန်ယက်စာမျက်နှာပေါ်တွင် Post တင်ခဲ့သည့် အတွက် ၂၅-၂-၂၀၂၄ ရက်နေ့တွင် ကျောက်ပန်းတောင်းမြို့၊ ဂိတ်ပေါင်းစုံ လက်မှတ်အရောင်း ဌာနခွဲမှ ခရီးဆောင်အိတ်ရထားကြောင်း တိုင်ကြားသူထံသို့ဆက်သွယ်လာသဖြင့် သွားရောက် ယူဆောင်၍ ပစ္စည်းများစစ်ဆေးရာ ငွေသား(၄၃)သိန်းနှင့်အတူ ပါရှိပစ္စည်းများ ပြန်လည်ရရှိ ကြောင်းကို တိုင်ကြားသူက စားသုံးသူရေးရာဦးစီးဌာနသို့ အကြောင်းကြားလာခဲ့ပါသည်။ ဦးစီးဌာနမှတာဝန်ရှိသူများကတိုင်ကြားခံရသည့် ယာဉ်လိုင်းအနေဖြင့်ပစ္စည်းတန်ဖိုးပေးလျော် ရန်မရှိသော်လည်း ခရီးဆောင်အိတ်ပြုတ်ကျခဲ့မှုအပေါ် တာဝန်ရှိသည့်အတွက် နောင်အလား တူဖြစ်စဉ်မျိုး မဖြစ်ပွားစေရန် ယာဉ်မောင်းနှင့် ယာဉ်နောက်လိုက်များအား သေချာစွာ ကြီးကြပ်ကွပ်ကဲဆောင်ရွက်ရန်၊ ဝန်ဆောင်ခရယူ၍ သယ်ယူပို့ဆောင်ရသည့် ကုန်စည်များ ပျောက်ဆုံးမှုမရှိစေရေး ဂရုပြုဆောင်ရွက်ရန် ခံဝန်ကတိပြုလက်မှတ်ရေးထိုးစေခဲ့ပြီး တိုင် ကြားသူမှလည်း ကျေနပ်မှုရှိပါသောကြောင့် တိုင်ကြားမှုအား ပိတ်သိမ်းဆောင်ရွက်ခဲ့ပါသည်။

    မန္တလေးတိုင်းဒေသကြီး၊ မိတ္ထီလာမြို့နယ်နေ တိုင်ကြားသူတစ်ဦးသည် RC နှစ်ထပ်အဆောက်အဦအား ကုန်ကျစရိတ်နှင့်လက်ခအပြီး ငွေကျပ်(၃၄၅)သိန်းဖြင့်  ကန်ထရိုက်လုပ်ငန်းရှင်တစ်ဦးထံ စာချုပ်ချုပ်ဆိုအပ်နှံခဲ့ရာ စာချုပ်ချုပ်ဆိုသည့်နေ့တွင် ငွေကျပ် (၃၂၃) သိန်း ပေးချေခဲ့ပြီး ကျန်ငွေ (၂၂)သိန်းကို ၁၅-၇-၂၀၂၂ ရက်နေ့တွင် အပြီးပေးချေမည်ဖြစ်ကြောင်းနှင့် အဆောက်အဦအား ၅-၈-၂၀၂၃ ရက်နေ့အပြီး ဆောက်လုပ်ပေးမည်ဖြစ်ကြောင်း နှစ်ဦးသဘောတူ စာချုပ်ချုပ်ဆိုခဲ့ကြပြီး ကျန်ငွေ(၂၂)သိန်းပေးချေပြီးသော်လည်း ကန်ထရိုက်မှအဆောက်အဦအပ်နှံရာတွင် တံခါး(၇)ပေါက် တပ်ဆင်ပေးခြင်းမရှိသဖြင့် စားသုံးသူရေးရာဦးစီးဌာန မိတ္ထီလာခရိုင်ဦးစီးမှူးရုံးသို့ လူကိုယ်တိုင်လာရောက် တိုင်ကြားလာပါသည်။

    ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ စားသုံးသူရေးရာဦးစီးဌာန၊ ခရိုင်ဦးစီးမှူးရုံး၏ စေ့စပ်ညှိနှိုင်းပေးမှုအရ ကန်ထရိုက်လုပ်ငန်းရှင်မှ ၂၁-၁-၂၀၂၄ ရက်နေ့မတိုင်မီ တံခါးမကြီး(၃)ပေါက်အပြီးတပ်ဆင်ပေးရန်နှင့် အိပ်ခန်းတံခါးပေါက် (၄) ပေါက်အတွက် ကျသင့်ငွေကျပ် ၅၀၀,၀၀၀/- ကို နှစ်ဦးနှစ်ဖက် တစ်ဝက်စီကျခံသွားမည်ဖြစ်၍ ကန်ထရိုက်အနေဖြင့် ကျခံရမည့် ငွေကျပ် ၂၅၀,၀၀၀/- အား လုပ်ငန်းအပ်နှံသူထံသို့ ၂၀-၁-၂၀၂၄ ရက်နေ့ ညနေပိုင်းတွင် အကျေပေးချေမည်ဖြစ်ကြောင်း နှစ်ဦးနှစ်ဖက် သဘောတူညီမှုရရှိခဲ့ပြီး သဘောတူညီချက်အတိုင်း ဆောင်ရွက်ပေးခဲ့သဖြင့် တိုင်ကြားသူမှ ကျေနပ်မှုရှိပါသောကြောင့် တိုင်ကြားမှုကို ပိတ်သိမ်းဆောင်ရွက်ခဲ့ပါသည်။

     ရန်ကုန်တိုင်းဒေသကြီး၊ ဒဂုံမြို့သစ် (မြောက်ပိုင်း)နေ တိုင်ကြားသူတစ်ဦးသည် အင်တာနက် ဝန်ဆောင်မှု ကုမ္ပဏီတစ်ခုမှ အင်တာနက်စာချုပ် ဖောက်ဖျက်ခြင်းကြောင့် ဖြစ်ပေါ်လာသော နစ်နာမှုများအပေါ် တာဝန်ယူမှု၊ တာဝန်ခံမှုမရှိသောကြောင့် စားသုံးသူရေးရာ ဦးစီးဌာနသို့ Email မှတဆင့် တိုင်ကြားလာပါသည်။

     ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ ဌာနမှ တာဝန်ရှိသူများက တိုင်ကြားသူနှင့် တိုင်ကြားခံရသည့် အင်တာနက်ဝန်ဆောင်မှုကုမ္ပဏီမှ တာဝန်ရှိသူများကို ရန်ကုန်တိုင်းဒေသကြီးဦးစီးမှူးရုံးသို့ ခေါ်ယူ၍ နှစ်ဦးနှစ်ဖက် စေ့စပ်ညှိနှိုင်းပေးမှုများ ဆောင် ရွက်ခဲ့ရာ ပြေလည်မှုများ မရရှိခဲ့ကြသည့်အတွက် ကုမ္ပဏီမှ တာဝန်ရှိသူများအား ဒုတိယအကြိမ် ထပ်မံခေါ်ယူတွေ့ဆုံ၍ ညှိနှိုင်းမှုများဆောင်ရွက်ခဲ့သော်လည်း ပြေလည်မှုမရရှိသောကြောင့် ရန်ကုန်တိုင်းဒေသကြီးဦးစီးမှူးရုံးက ကုမ္ပဏီမှ တိုင်ကြားသူ၏နေအိမ်တွင် တပ်ဆင် ထားသည့်စက်အား ပြန်လည်ဖြုတ်သိမ်းသွားရန်နှင့် အင်တာနက်အသုံးပြုရန် (၃)လစာပေးဆောင်ထားသည့် ငွေကျပ် ၈၅,၅၀၀/-အား အပြည့်အဝ ပြန်လည်ပေးလျော်သွားရန် စီမံခန့်ခွဲရေးဆိုင်ရာအမိန့်ကို ချမှတ်ခဲ့ပါသည်။ ဌာနမှစီမံခန့်ခွဲရေးဆိုင်ရာအမိန့် ချမှတ်ခဲ့မှုအပေါ် ကုမ္ပဏီအနေဖြင့် ဆောင်ရွက်ပေးရန် တိုင်ကြားသူထံဆက်သွယ်၍ ညှိနှိုင်းပြောကြားခဲ့သော်လည်း တိုင်ကြားသူမှ လက်ခံခြင်းမရှိသဖြင့် ထပ်မံညှိနှိုင်းမှုများပြုလုပ်ခဲ့ပြီး နှစ်ဦးနှစ်ဖက် သဘောတူညီချက်အရ ကုမ္ပဏီက တိုင်ကြားသူထံ တစ်နှစ်စာလျော်ကြေးငွေကျပ် ၃၄၂,၀၀၀/- အား ပြန်လည်ပေးအပ်ခဲ့ပြီး တိုင်ကြားသူ၏နေအိမ်တွင် တပ်ဆင်ထားသည့် အင်တာနက်စက်ကို ပြန်လည်ဖြုတ်သိမ်းခဲ့ပါကြောင်း အကြောင်းပြန်ကြားလာခဲ့သဖြင့် တိုင်ကြားသူမှလည်း ကျေနပ်မှုရှိပါသောကြောင့်  တိုင်ကြားမှုကို  ပိတ်သိမ်းဆောင်ရွက်ခဲ့ပါသည်။

   ရန်ကုန်တိုင်းဒေသကြီးနေ တိုင်ကြားသူတစ်ဦးသည် Toyota Crown (White Colour) အား ပြုပြင်ရန်အတွက် ကားဘော်ဒီရုံတစ်ခုတွင် အပ်နှံခဲ့ပါကြောင်း၊ ကားဘော်ဒီရုံမှ မော်တော်ယာဉ်၏ အနောက်ပိုင်းတစ်ခုလုံးအားဖြတ်၍ လဲလှယ်မှုဆောင်ရွက်ခဲ့သောကြောင့် နစ်နာဆုံးရှုံးမှု များဖြစ်ပေါ်ခဲ့သဖြင့် စားသုံးသူကာကွယ်ရေးဥပဒေနှင့်အညီ အရေးယူဆောင်ရွက်ပေးပါရန် စားသုံးသူရေးရာဦးစီးဌာန Website Complaint System သို့ တိုင်ကြားလာပါသည်။

   ဖြေရှင်းဆောင်ရွက်မှုအခြေအနေ။     တိုင်ကြားမှုနှင့်ပတ်သက်၍ ရန်ကုန်တိုင်းဒေသကြီးဦးစီးမှူးရုံးမှ တာဝန်ရှိသူများက တိုင်ကြားသူနှင့် တိုင်ကြားခံရသူတို့အား  ဦးစီးမှူးရုံးသို့ ခေါ်ယူ၍ နှစ်ဦးနှစ်ဖက်စေ့စပ်ညှိနှိုင်းမှုများအရ တိုင်ကြားမှုဖြစ်ပွားခဲ့သည့် Toyota Crown ကားအမျိုးအစားအား တိုင်ကြားသူတောင်းဆိုသည့်အတိုင်း အဖြူရောင် (White Colour)ကို ရက်ပေါင်း (၉၀)အတွင်း အစားထိုးပေးအပ်နိုင်ရေး တိုင်ကြားခံရသည့် ကားဘော်ဒီရုံမှ ဆောင်ရွက်ပေးရန် နှစ်ဦးသဘောတူလက်ခံခဲ့ကြပါသည်။ သဘောတူညီချက်များအတိုင်း တိုင်ကြားခံရသည့် ကားဘော်ဒီရုံမှ မော်တော်ယာဉ်အမျိုးအစားနှင့် အရောင်ပါတူညီစေရန် အနီးစပ်ဆုံး ရှာဖွေ၍ တိုင်ကြားသူထံပြသခဲ့သော်လည်း သဘောကျလက်ခံမှုမရှိသဖြင့် အစားထိုး မော်တော်ယာဉ်ပေးအပ်မှုမှာ အဆင်မပြေမှုများဖြစ်ပေါ်ခဲ့ပါသည်။ တိုင်ကြားမှုအား အမြန်ဆုံး ပြီးပြတ်စေရန်အလို့ငှာ တိုင်ကြားသူနှင့် တိုင်ကြားခံရသူတို့အား ၂၃-၁၁-၂၀၂၃ ရက်နေ့တွင် တိုင်းဒေသကြီးဦးစီးမှူးရုံးတွင် ဒုတိယအကြိမ် ထပ်မံညှိနှိုင်းမှုများ ဆောင်ရွက်ခဲ့ရာတွင်  တိုင်ကြားမှုဖြစ်သည့် မော်တော်ယာဉ်အား ကျပ်သိန်း(၇၀၀)ဖြင့် တန်ဖိုးသင့်ညှိနှိုင်း၍ ကားဘော်ဒီရုံက ပေးချေဝယ်ယူသွားရန် နှစ်ဦးနှစ်ဖက်သဘော တူညီမှုများရရှိခဲ့ကြသဖြင့် တိုင်ကြားခံရသည့် ကားဘော်ဒီရုံမှ တိုင်ကြားသူသို့ တိုင်ကြားမှုဖြစ်ပွားခဲ့သော မော်တော်ယာဉ်အစား ငွေ ကျပ်သိန်း(၇၀၀) ပေးချေခဲ့ပြီး နှစ်ဦးနှစ်ဖက် ကျေအေးပြီးဖြစ်သောကြောင့် တိုင်ကြားမှုကို ပိတ်သိမ်းဆောင်ရွက်ခဲ့ပါသည်။

DOCA(စားသုံးသူရေးရာဌာနခွဲ)