သတင်းနှင့် လှုပ်ရှားမှုများ

      ကရင်ပြည်နယ်၊ ဘားအံမြို့ တွင် ၂၀၂၁ မိုးစပါးအခြေအနေမှာ မိုးလေဝသ အသင့်အတင့်ကောင်းခဲ့သည့်အတွက် အထွက်နှုန်း အနည်းငယ်ပိုမိုထွက်ရှိခဲ့ကြောင်း၊ ယခုနှစ် မိုးစပါးစတင် ရိတ်သိမ်းချိန် နိုဝင်ဘာလတွင် စပါးဈေးနှုန်းမှာ ကွင်းဈေး (၅၈၀၀၀၀)ကျပ် နှင့် ဆန်စက်သို့အရောက်ပေါက်ဈေးမှာ (၆၄၀၀၀၀)ကျပ် ဈေးနှုန်းစတင်ဈေးဖွင့်ခဲ့ပြီး ယခုဒီဇင်ဘာလ စပါးလှိုင်လှိုင်ထွက်ရှိသည့် အချိန်တွင် စပါးဈေးမှာ ကွင်းဈေး (၇၀၀၀၀၀) ကျပ်ခန့်နှင့် စက်အရောက်ဈေး (၇၆၀၀၀၀) ကျပ်ခန့် ရောင်းဝယ်မှုပြုလုပ်နေကြောင်း၊ ယခုကဲ့သို့ စပါးဈေး မြင့်တက်လာမှုကြောင့် တောင်သူများအတွက် အကျိုးအမြတ်ပိုမိုရရှိခဲ့ကြောင်းနှင့် လက်ရှိစပါးဈေးနှုန်းများအတိုင်း ဆက်လက်ဖြစ်ပေါ်နိုင်သည်ဟု တောင်သူများ၏ ဈေးနှုန်းခန့်မှန်းချက်အရ သိရှိရပါသည်။

       ၂၀၂၂ ခုနှစ် နွေစပါးစိုက်ရာသီတွင် ဘားအံမြို့နယ်၊ ထုံးအိုင်ကျေးရွာအုပ်စု တွင် နွေစပါး ရက်(၉၀)စပါးမျိုးများကို ဧက (၁၀၀)ကျော်ခန့် စိုက်ပျိုးရန်ပြင်ဆင်လျက်ရှိကြောင်း ကရင်ပြည်နယ်၊ ဘားအံမြို့နယ်၊ လှိုင်းဘွဲ့ နှင့် ကော့ကရိတ်မြို့နယ်များတွင်လည်း အလားတူ စိုက်ပျိုးရန်ပြင်ဆင်လျက်ရှိကြောင်း၊ ထူးခြားသည်မှာ ယခုနှစ် မိုးစပါးပေါ်ချိန်တွင် ဘားအံမြို့မှ ရန်ကုန်မြို့ရှိ ဆန်ပွဲရုံများဆီသို့ ဒေသထွက် မနောသုခအမျိုးအစားဆန်များအား (၂)ရက်လျှင် (၁)ကြိမ်ခန့် ဆန်အိတ်ရေ (၁၀၀၀)ခန့် နှင့် ဆန်ကွဲအိတ်ရေ (၃၅၀)ခန့်အား တင်ပို့လျက်ရှိကြောင်း ဘားအံမြို့နယ်ဆန်စက်လုပ်ငန်းရှင်များအသင်း ဥက္ကဋ္ဌ ဦးအောင်ဇော်ထက်ထံမှ လေ့လာစုံစမ်း သတင်းရရှိခဲ့ပါသည်။

စားသုံးသူရေးရာဦးစီးဌာန(ကရင်ပြည်နယ်)

          ဧရာဝတီတိုင်းဒေသကြီး၊ ဟင်္သာတကုန်စည်ဒိုင်တွင် ၂၀၂၁ ခုနှစ် ဒီဇင်ဘာ ပထမပတ်မှစ၍ ပဲတီစိမ်းအသစ်များ ဈေးကွက်ဝင်ရောက်လာပြီး ပဲတီစိမ်း(ဝါးခယ်မ) တစ်တင်းလျှင် အရည်အသွေး ပေါ်မူတည်၍ ၄၇၀၀၀ ကျပ်မှ ၅၂၀၀၀ ကျပ်ဈေး ပေါက်လျက် ရှိပါသည်။ ၂၀၂၀ခုနှစ် ဒီဇင်ဘာတွင် ပဲတီစိမ်း(ဝါးခယ်မ) တစ်တင်းလျှင် ၃၉၀၀၀ ကျပ်ဝန်းကျင်ဈေးသာရရှိခဲ့ပြီး၊ ယခု ၂၀၂၁ ခုနှစ်တွင် ၅၀၀၀၀ ကျပ်ဝန်းကျင် ဈေးပေါက်နေသည့်အတွက် တောင်သူများ ဈေးကောင်းရလျက်ရှိပါသည်။ ဟင်္သာတခရိုင်တွင် ပဲတီစိမ်းစိုက်ဧက ၄၉၀၀၀ကျော်ရှိပြီး၊ ယခုဈေးကွက်ဝင်လာသော ပဲတီစိမ်းများသည် ဟင်္သာတခရိုင်၊ မြန်အောင်မြို့နယ် အနောက်ခြမ်း ဘန့်ဘွေးကုန်း၊ ကညင်ငူ ဒေသများတွင်လည်းကောင်း၊ အင်္ဂပူမြို့နယ် ကွင်းကောက်ဒေသနှင့် ပုသိမ်-မုံရွာကားလမ်း ဘေးရှိ တောင်စောင်းများ၊ ကုန်းပြန့်များတွင်လည်းကောင်း၊ ချောင်းရေကျသည့်အခါ ပေါ်လာသည့် သောင်ပြင်များတွင်လည်းကောင်း၊ လေးမျက်နှာမြို့နယ် ပန်းတောကြီးဒေသ နှင့် တောင်စောင်းနှင့် ကုန်းပြန့်များနှင့် ကိုင်းမြေများ၊ ကြံခင်းမြို့နယ်၊ ကြိုးဝိုင်းအတွင်းရှိ စိုက်ခင်းများတွင် စိုက်ပျိုးသော ပဲများဖြစ်ပါသည်။ စက်တင်ဘာလလယ်လောက်မှာ စိုက်ပျိုးပြီး ဒီဇင်ဘာလဆန်းတွင် စတင်ထွက်ရှိ ကာ၊ လကုန်တွင် လှိုင်လှိုင်ထွက်ရှိလာမည့် ဆောင်းသီးနှံလည်းဖြစ်ပါသည်။

        ၂၀၁၇ - ၂၀၁၈ ခုနှစ်မှစ၍ အိန္ဒိယမှ မတ်ပဲဝယ်ယူမှုကို ကိုတာသတ်မှတ်လာသည့်အတွက်၊ အခြား နိုင်ငံများသို့တင်ပို့နိုင်ပြီး၊ စိုက်ပျိုးရက်တိုကာ၊ ပုံမှန်သင့်တင့်သော ဈေးနှုန်းရရှိသည့် မတ်ပဲအစားထိုး စိုက်ပျိုး နိုင်သောပဲတီစိမ်းကို စိုက်ပျိုးလာကြပြီး ယခုနှစ် ၂၀၂၁ ခုနှစ်တွင် အဖွင့်ဈေးမြင့်၍ တောင်သူများ ဈေးကောင်းရလျက်ရှိပါသည်။ တစ်ဧက စိုက်ပျိုးစရိတ်မှာ နှစ်သိန်း ဝန်းကျင်ရှိပြီး အထွက်နှုန်း ၁၅ တင်းခန့်ရှိသည်အတွက် တစ်ဧကကို ငါးသိန်းခန့် အကျိုးအမြတ်ရှိ စေမှာလည်းဖြစ်ပါတယ်။ အရည်အသွေးအလိုက် ဈေးပေးဝယ်ယူလျက်ရှိပြီး နေ့စဉ် ပဲတီစိမ်း (ဝါးခယ်မ) အိတ် ၂၀၀ ခန့် ဝင်ရောက်လျက်ရှိကာ ရန်ကုန်ဈေးကွက်သို့ တင်ပို့လျက်ရှိကြောင်းကို ၊ ပဲမျိုးစုံရောင်းဝယ်သည့် သိန်းသန်းဌေးပွဲရုံ ပိုင်ရှိင်ဦးဒီပထံမှ သိရှိခဲ့ရပြီး ၊ ကုန်စည်ဒိုင်တွင်လည်း နေ့စဉ် အိတ် ၃၀၀ ခန့် အရောင်းအဝယ်ဖြစ်လျက်ရှိကြောင်း သတင်းရရှိခဲ့ပါသည်။

စားသုံးသူရေးရာဦးစီးဌာန(ဧရာဝတီတိုင်းဒေသကြီး)

       ပဲမျိုးစုံစိုက်ပျိုးရာတွင် ကုလားပဲသီးနှံကို နွေ၊ မိုး၊ ဆောင်းဥတုသုံးမျိုးရှိသည့်အနက် ဆောင်းရာသီ ကာလဖြစ်သော အောက်တိုဘာလလယ်မှ နိုဝင်ဘာလအတွင်း ဆောင်းသီးနှံအဖြစ် စိုက်ပျိုးကြပြီး စိုက်ပျိုး သက်တမ်း(၃)လခွဲအကြာတွင် ရိတ်သိမ်းရပါသည်။ ဆောင်းသီးနှံကုလားပဲစိုက်ပျိုးမှုနှင့် ပတ်သက်၍ မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်အတွင်းရှိ ကုလားပဲစိုက်တောင်သူများ၏ ရင်တွင်းစကားသံ များကိုသိရှိနိုင်ရန် (၇.၁၂.၂၀၂၁)ရက်နေ့ (၉:၀၀)နာရီအချိန်တွင် ရွာသစ်ကျေးရွာသို့ ကွင်းဆင်းလေ့လာ မေးမြန်းခဲ့ရာ စိုက်ပျိုးတောင်သူများသည် ဆောင်းသီးနှံကုလားပဲစိုက်ပျိုးဧကများသော်လည်း တစ်ပိုင်တစ်နိုင် စိုက်ပျိုးပြီး ဒေသတွင်းစားသုံးမှုဖူလုံလျက်ရှိပါကြောင်း၊ ဆောင်းသီးနှံကုလားပဲများစိုက်ပျိုးရာတွင် ကုလားပဲ လုံးအဖြူ အလုံးကြီး (V-2)၊ ကုလားပဲဖြူအလုံးသေး(V-1)နှင့် ကုလားပဲနီအလုံးသေး (ဗမာ) ကုလားပဲမျိုးကို အဓိကထားပြီးစိုက်ပျိုးကြပါကြောင်း၊ ယခုနှစ်တွင် ကုလားပဲမျိုးအပေါ်မူတည်ပြီး မျိုးတစ်တင်းလျှင် ငွေကျပ် (၄၀၀၀၀)မှ (၄၅၀၀၀)အတွင်း ပြန်ဝယ်ရကြောင်း၊ တစ်ဧကစိုက်ပျိုးမည်ဆိုလျှင် အလုံးကြီး(၂တင်းခွဲ)၊ အလုံးသေး(၁တင်းခွဲ)ကျဲပက်ရကြောင်း၊ တစ်ဧကအထွက်နှုန်းမှာ (၁၅ တင်း)မှ (၁၈ တင်း)ဝန်းကျင်ထွက်ရှိ နိုင်ပြီး မျိုးထူထူချပြီး ရာသီဥတုကောင်းမွန်ပါက တင်း(၂၀)အထိ ထွက်ရှိနိုင်ပါကြောင်း၊ တစ်ဧကကုန်ကျ စရိတ်မှာ ကျပ်(၂)သိန်းခွဲ ဝန်းကျင်ထိ ကုန်ကျမှုရှိပါကြောင်း ယခုကုလားပဲတစ်တင်းဈေးနှုန်းအနေဖြင့် ကျပ် ၄၀၀၀၀ ခန့်ရှိပါကြောင်း ကုလားပဲစိုက်တောင်သူများမှတစ်ဆင့် သိရှိရပါသည်။

        ယခုနှစ် ဆောင်းကုလားပဲများကို ဆိပ်ဖြူမြို့နယ်အတွင်းရှိ စိုက်ပျိုးတောင်သူများသည် အောက်တို ဘာလအတွင်း မျိုးစေ့ကျဲပက်သူများသည် အပင်ပေါက်စုံပြီး နိုဝင်ဘာလအတွင်း ကျဲပက်သူများသည် ရာသီ ဥတုရုတ်တရက်ပြောင်းလဲမှုကြောင့် မြေအစိုဓာတ်ဟာပြီး အပင်ပေါက်နည်းခြင်း၊ အပင်ပေါက်မစုံခြင်းတို့ကြောင့် ရေသွင်းပြီးစိုက်ပျိုးနေရကြောင်း၊ ရေသွင်းရာတွင် တစ်နာရီလျှင် အလုပ်သမားခ၊ စက်ခ၊ ဒီဇယ်ဆီ ဝယ်ယူခ စုစုပေါင်းငွေကျပ် (၁)သောင်း ဝန်းကျင်ခန့်ကုန်ကျပြီး၊ တစ်ဧကလျှင် (၄)နာရီခန့် ရေသွင်းရပြီး ငွေကျပ်(၄)သောင်း ခန့်ကုန်ကျပါကြောင်း၊ နှစ်စဉ်ထက် ကုန်ကျမှုများပြားလျက်ရှိကြောင်း စိုက်ပျိုး တောင်သူမှတစ်ဆင့် သိရှိရပါသည်။

          စားသုံးသူပြည်သူများသည် ပဲကို အဓိကထား၍ စားသုံးခြင်း၊ ဒေသတွင်းဝယ်လိုအား ရောင်းလိုအားကောင်းခြင်း၊ ပဲဖြင့်ပြုလုပ်သော စားသောက်ကုန်မျိုးစုံ ပြုလုပ်ခြင်းတို့ကြောင့် ယခုနှစ် သီးနှံစိုက်ပျိုးထွက်ရှိမှု ပိုမိုကောင်းပါက အကျိုးအမြတ်များစွာရရှိမည်ဟု မျှော်လင့်ရပါကြောင်း၊ ကုလားပဲစိုက်တောင်သူများမှတစ်ဆင့် သိရှိရပါသည်။

စားသုံးသူရေးရာဦးစီးဌာန(မကွေးတိုင်းဒေသကြီး)

       ပဲခူးတိုင်းဒေသကြီး၊ ပြည်ခရိုင်တွင် ဟင်းသီးဟင်းရွက်စိုက်ဧကမှာ (၅၄၁၉၁)ဧကရှိပြီး သဲကုန်းမြို့နယ်တွင် (၉၈၂၇)ဧက စိုက်ပျိူးလျှက်ရှိသဖြင့် ဟင်းသီးဟင်းရွက် စိုက်ပျိုးထုတ်လုပ်သူများ ပါဝင်သော စိမ်းရောင်စိုကုန်စိမ်း အစုအဖွဲ့ကို အဖွဲ့ဝင်(၁၃)ဦးဖြင့် ဖွဲ့စည်းထားရှိပါသည်။ စိမ်းရောင်စိုကုန်စိမ်းအစုအဖွဲ့မှ ထွက်ရှိသော ဟင်းသီးဟင်းရွက်များမှာ ကျောက်ဖရုံသီး၊ ပဲတောင့်ရှည်သီး၊ ကြက်ဟင်းခါးသီး၊ ရုံးပတီသီး၊ ပန်း‌ဂေါ်ဖီ၊ မုံလာဉ၊ ဆလပ်၊ ခရမ်းသီးနှင့် ခရမ်းကျွတ်သီးများကို(၁၂) ရာသီ စိုက်ပျိုးရောင်းချ လျှက်ရှိပါသည်။ ယခင်ကာလများတွင် ကိုဗစ် ပထမလှိုင်း၊ ဒုတိယလှိုင်း၊တတိယလှိုင်းတို့ဖြစ်နေ၍ ဟင်းသီး ဟင်းရွက်များ(၁၂)လရာသီထွက်ပေါ် နေသော်လည်း လမ်းပန်းခရီးအခက်အခဲကြောင့် ရောင်းဝယ် တင်ပို့မှုများမရှိဘဲ ဒေသတွင်းနှင့် နီးစပ်ရာဒေသများကိုသာ တင်ပို့‌ရောင်းချခဲ့ပါသည်။

        ယခုအခါ ခရီးသွားလာမှုများရှိလာခြင်း၊ ဈေးများပြန်လည်ဖွင့်လှစ်ပြီး ‌ရောင်းဝယ်ဖောက်ကားမှုရှိလာခြင်း တို့ကြောင့် ဟင်းသီးဟင်းရွက်ဈေးကွက်မှာ ပြန်လည်အရောင်းအဝယ်ဖြစ်လာသည့်အတွက် သဲကုန်းမြို့နယ်ရှိ ပုတီးကုန်းနှင့် ဝက်ပုတ်ဒေသတို့မှ ဟင်းသီးဟင်းရွက်များကို ပြည်ဈေးကွက်နှင့် ရန်ကုန်မြို့ရှိ ဒညင်းကုန်း‌ဈေး၊ သီရိမင်္ဂလာဈေးနှင့် ထောက်ကြံ့ဈေးများသို့ ‌နေ့စဉ် (၁၂)ဘီးကားများဖြင့် ပိဿာချိန်(၄၀၀၀-၅၀၀၀)ခန့် တင်ပို့ရောင်းချလျှက်ရှိကြောင်း လေ့လာသိရှိရပါသည်။ ဟင်းသီးဟင်းရွက် ဈေးနှုန်းများအနေဖြင့် ကျောက်ဖရုံသီး တစ်လုံးလျှင်(၈၀၀)ကျပ်၊ ပဲလင်းမြေွသီးတစ်တောင့်လျှင် (၁၀၀) ကျပ်၊ကြက်ဟင်းခါးသီး အကြီးတစ်လုံးလျှင်(၂၀၀)ကျပ်၊ ရုံးပတီသီး(၅) ‌ထောင့်တစ်စည်းလျှင်(၁၀၀) ကျပ်၊ ပန်းဂေါ်ဖီတစ်ထုတ်လျှင်(၃၅၀-၄၀၀) ကျပ် မုံလာဉတစ်တွဲလျှင်(၅၀၀)ကျပ်၊ ခရမ်းသီးတစ်ပိဿာလျှင်(၇၅၀-၁၀၀၀) ကျပ်နှင့် ခရမ်းကျွတ်သီး တစ်ပိဿာလျှင်(၇၅၀-၁၀၀၀) ကျပ်ဖြင့် ‌ရောင်းချလျှက်ရှိပါသည်။ ဟင်းသီးဟင်းရွက် စိုက်‌တောင်သူများအနေဖြင့် မိမိတို့မိသားစု အနေဖြင့် စားသုံးနိုင်သလို နေ့စဉ် ဝင်‌ငေွများပုံ မှန်ရရှိလာပြီဖြစ်ပါကြောင်း လေ့လာသိရှိရပါသည်။

စားသုံးသူရေးရာဦးစီးဌာန(ပဲခူးတိုင်းဒေသကြီး)

      ဧရာဝတီတိုင်းဒေသကြီးအတွင်းရှိ ခရိုင်မြို့နယ်များရှိ ဆီလုပ်ငန်းရှင်များ၊ဆီကုန်သည်များအသင်း(ယာယီ) ဖွဲ့စည်းခြင်းအခမ်းအနားကို တိုင်းဒေသကြီးဦးစီးမှူးရုံးရှိ Trade Center ခန်းမတွင် ၇.၁၂.၂၀၂၁ ရက်နေ့ နံနက်(၁၀:၀၀) နာရီတွင် ကျန်းမာရေးဝန်ကြီးဌာနမှ ညွှန်ကြားထားသော ကိုဗစ်-၁၉ ညွှန်ကြားချက်နှင့်အညီ ကျင်းပပြုလုပ်ခဲ့ပါသည်။ အခမ်းအနားတွင် တိုင်းဒေသကြီးဦးစီးမှူး ညွှန်ကြားရေးမှူး ဦးစိုးအောင်မှ အဖွင့်အမှာစကားပြောကြားပြီး ၊ဒုတိယညွှန်ကြားရေးမှူးဦးမြင့်အောင်မှ အသင်းအဖွဲ့ စည်းမျဉ်းစည်းကမ်းများအား အကျယ်တဝင့် ရှင်းလင်းတင်ပြဆွေးနွေးခဲ့ပါသည်။ တက်ရောက်လာသောခရိုင်မြို့နယ်များမှ ရွေးချယ်ထားရှိသောCEC/ECကိုယ်စားလှယ်(၂၁)ဦးမှ(ယာယီ)အသင်းဥက္ကဋ္ဌ(၁)ဦး၊ ဒုဥက္ကဋ္ဌ(၂)ဦး၊ အတွင်းရေးမှူး(၂)ဦး၊ ဘဏ္ဍာရေးမှူး(၂)တို့အား ဆန္ဒမဲပေးရွေးချယ်ခဲ့ပါသည်။

       ဧရာဝတီတိုင်းဒေသကြီး၊ ဆီကုန်သည်နှင့် ဆီလုပ်ငန်းရှင်များအသင်း (ယာယီ)ဖွဲ့စည်းခြင်း အခမ်းအနားကို နံနက်(၁၁:၃၀)အချိန်တွင် အောင်မြင်စွာပြီးစီးခဲ့ပါကြောင်းသိရှိရပါသည်။

စားသုံးသူရေးရာဦးစီးဌာန ဧရာဝတီတိုင်းဒေသကြီး