မကွေးတိုင်းဒေသကြီး၊ မကွေးခရိုင်၊ မြို့သစ်မြို့နယ်ရှိ တပ်ကုန်းကျေးရွာနှင့် ပုတီးကုန်းကျေးရွာ တို့တွင် တောင်သူများအနေဖြင့် တစ်ဖက်တစ်လမ်းမှ ဝင်ငွေပိုမိုရရှိရေးအတွက် စပျစ်ခြံများ တိုးချဲ့ စိုက်ပျိုးလျက်ရှိကြောင်း သိရှိရပါသည်။
စပျစ်စိုက်တောင်သူများအနေဖြင့် နှစ်ချို့စပျစ်ပင်များကို ရှင်းလင်းပြီး နောက်ထပ် ကိုင်းကူးစပျစ် မျိုးများ ထပ်မံစိုက်ပျိုးလျှက်ရှိရာ စပျစ်ကိုင်းကူးတစ်ပင်လျှင် ကျပ်(၅၀၀)နှုန်းဖြင့် ဝယ်ယူစိုက်ပျိုးလျှက်ရှိ သည်။
ယခင်စိုက်ပျိုးသည့်စပျစ်ပင်များသည် အောင်မြင်ဖြစ်ထွန်းသော်လည်း မျိုးမကြိုက်သည့်အတွက် နောက်ထပ်မျိုးကောင်းများ ထပ်မံစိုက်ပျိုးရခြင်းဖြစ်သည်။ ယခင်စပျစ်ပင် တစ်ပင်လျှင် အသီး(၅)ပိဿာ မှ (၇)ပိဿာအထိ ထွက်ရှိပြီး (၁)ပိဿာလျှင် ကျပ်(၈၀၀၀ မှ ၁၀၀၀၀)အထိ စျေးကွက်အတွင်း ရောင်းချ ရကြောင်း၊ ယခုစိုက်ပျိုးထားသော စပျစ်ပင်များသည် မျိုးကောင်းမျိုးသန့်ဖြစ်သော်လည်း အပွင့် ပွင့်ချိန် အသီးဝင်ချိန်တွင် မိုးများသည်းထန်စွာရွာသွန်းသည့်အတွက် အပွင့်များ အသီးများ ရာသီဥတုဒဏ် ကြောင့် ကြွေကျကာ အထွက်နှုန်းကျဆင်းကြောင်း စပျစ်စိုက်တောင်သူ၏ ပြောကြားချက်အရ သိရှိရပါ သည်။
ဆယ်မောင်(မြို့သစ်)