ပြည်တွင်းကုန်သွယ်မှုသတင်း

           မကွေးတိုင်းဒေသကြီး၊ ပခုက္ကူခရိုင်၊ ရေစကြိုမြို့နယ်အတွင်း မြစ်ရေဝင်ရောက်ရာ ကျေးရွာ များတွင် ဆောင်းသီးနှံကုလားပဲများကို အများအပြား စိုက်ပျိုးလျက်ရှိပါသည်။ ကုလားပဲသီးနှံ စိုက်ပျိုးရန် အတွက် တစ်ဧကကုန်ကျစရိတ်အနေဖြင့် မျိုး၊ထွန်ယက်ခ၊ သွင်းအားစုနှင့် လုပ်အားခများ အပါအဝင် စုစုပေါင်း ကျပ်(၃၅၀၀၀၀)ခန့်ကုန်ကျပြီး အထွက်နှုန်းအနေဖြင့် တစ်ဧကလျှင် (၁၂/ ၁၅)တင်းခန့် ပျှမ်းမျှထွက်ရှိကြောင်း၊ ကုလားပဲစတင်ထွက်ပေါ်ချိန်တွင် ဈေးနှုန်းအနေဖြင့် ဟော်လန် ကျပ်(၈၅၀၀၀)၊ (v2)ကျပ်(၈၈၀၀၀)နှင့် (929)ကျပ်(၈၆၀၀၀)ခန့်များဖြင့် အဖွင့်လှခဲ့ပါသည်။

            လက်ရှိအခြေအနေတွင် ကုလားပဲဟော်လန် တစ်တင်းလျှင် ကျပ်(၈၀၀၀၀)၊ (v2) တစ်တင်း လျှင် ကျပ်(၈၀၀၀၀)နှင့် (929)တစ်တင်းလျှင် ကျပ်(၈၀၆၀၀)ဈေးနှုန်းများဖြင့် အရောင်းအဝယ် ဖြစ်လျက်ရှိကြောင်း၊ အကျိုးအမြတ်အနေဖြင့် တစ်ဧကလျှင် ကျပ်(၄၅၀၀၀၀)ခန့်ရရှိကြောင်း ကုလားပဲစိုက်တောင်သူတစ်ဦး၏ ပြောကြားချက်အရသိရှိရပါသည်။

 DOCA(မကွေး)

          ပဲခူးတိုင်း‌‌ဒေသကြီး သာယာဝတီခရိုင်အတွင်းရှိမြို့နယ်များတွင် မတ်ပဲဈေးနှုန်းမှာ  ၂၀၂၄ခုနှစ် မတ်လနောက်ဆုံးသီတင်းပတ်တွင် ပိဿာ( ၂၀ ) တစ်တင်းလျှင် အနိမ့်ဆုံး( ၉၃၅၀၀) ကျပ်ခန့်နှင့် အမြင့်ဆုံး (၉၃၈၀၀) ကျပ် ထိရှိပြီး ဧပြီလနောက်ဆုံးပတ်  အတွင်းမှာတော့  ပိဿာ(၂၀) တစ်တင်းလျှင် အနိမ့်ဆုံး (၁၀၂၀၀၀)ကျပ်ခန့်မှ အမြင့်ဆုံး (၁၀၃၃၀၀)ကျပ်ခန့်နှင့် အရောင်းအဝယ် ဖြစ်လျက်ရှိပါသည်။  စီးထွက်မှုအနေဖြင့် မတ်လအတွင်း ခရိုင်အတွင်းမှ ရန်ကုန်တိုင်းဒေသကြီး အတွင်းသို့ အိတ်လုံးရေ (၁၄၈၁၀၀) ခန့်ထိတင်ပို့နိုင်ခဲ့ပြီး ယခုဧပြီလနောက်ဆုံးသီတင်းပတ်ထိ တင်ပို့နိုင်မှု အိတ်လုံးရေ (၁၄၄၈၅၀) ခန့်ထိ  တင်ပို့နိုင်ခဲ့ကြောင်း သိရှိရပါသည်။

DOCA(ပဲခူး)

            ပဲခူးတိုင်းဒေသကြီး၊ နတ်တလင်းခရိုင်၊ နတ်တလင်းမြို့နယ်အတွင်း ရောင်းချလျက် ရှိသော   ကုလားပဲနှင့်ပဲခြမ်း၊ ပဲမှုန့်ဈေးနှုန်းများမှာ ၂၀၂၄ခုနှစ် ဧပြီလတစ်လလုံးတွင် ဈေးနှုန်း ပြောင်းလဲမှု မရှိဘဲတည်ငြိမ်လျက် ရှိနေပါသည်။ ၂၀၂၄ခုနှစ်၊ ဧပြီလစတုတ္တပတ်တွင် ကုလားပဲ အလုံး တစ်ပိဿာလျှင်(၅၂၀၀)ကျပ် ၊  ကုလားပဲခွဲခြမ်းစိမ်းတစ်ပိဿာလျှင် (၆၁၀၀)  ကျပ်၊ ပဲမှုန့်စိမ်း တစ်ပိဿာလျှင် (၆၆၀၀)ကျပ်၊ ပဲမှုန့်အကျက်တစ်ပိဿာလျှင် (၆၉၀၀)ကျပ်နှုန်းဖြင့် ရောင်းချနေ ပါသည်။ ယခုရောင်းချသောဈေးနှုန်းမှာ  လက်လီဈေးနှုန်းများသာဖြစ်ပြီး (၅) ပိဿာနှင့်အထက် ဝယ်ယူလျှင်  လက်ကားဈေးမှာ ကုလားပဲ (အလုံး)တစ်ပိဿာလျှင်   (၅၀၀၀)   ကျပ်  ၊  ကုလားပဲ (ခွဲခြမ်းစိမ်း) တစ်ပိဿာလျှင်   (၅၉၀၀)   ကျပ်နှုန်း ၊   ပဲမှုန့်(စိမ်း)  တစ်ပိဿာလျှင်  (၆၄၀၀)  ကျပ် ၊ ပဲမှုန့်(အကျက်) တစ်ပိဿာလျှင် (၆၇၀၀)ကျပ်နှုန်းဖြင့် ရောင်းချနေကြောင်း ကုလားပဲဝယ်ယူ ကြိတ်ခွဲရောင်းချနေသော ပဲခွဲစက်ပိုင်ရှင်တစ်ဦးထံမှသိရှိရပါသည်။

DOCA(ပဲခူး)

           ကျောက်ဖရုံသီး ကုန်ကြမ်းမှ ကုန်ချောသို့ ဆိုသည်မှာ ကျောက်ဖရုံသီးမှ ကျောက်ဖရုံယို ပြုလုပ်ခြင်းကိုဆိုလိုပါသည်။ အချို့ဒေသများတွင် ကျောက်ဖရုံသီးကို အရောင်းအဝယ် ဈေးကွက်မရှိ ပါက စွန့်ပစ်ရသည့် အခြေအနေရှိပါသည်။ ပဲခူးတိုင်းဒေသကြီး၊ နတ်တလင်းခရိုင်၊ သဲကုန်းမြို့နယ် ဝက်ပုတ်ရွာတွင် ကျောက်ဖရုံယိုလုပ်ငန်းရှိသည့်အတွက် ထိုကဲ့သို့စွန့်ပစ်ရသည်ဟူ၍မရှိပါ။ ကျောက်ဖရုံသီးကို မိုးတွင်းကာလတွင် စိုက်ပျိုးသူများပြားသော်လည်း ယခုလို နွေရာသီတွင် စိုက်ပျိုးသူ နည်းပါး၍ ရှားပါးလှပါသည်။

           ယခုလိုနွေရာသီတွင် ကျောက်ဖရုံသီးကို ပိဿာချိန်ဖြင့် ဝယ်ယူရပြီး တစ်ပိဿာလျှင်  (၅၅၀)ကျပ် ပေး၍ဝယ်ယူရကြောင်း ကျောက်ဖရုံယိုလုပ်ငန်းရှင်ထံမှသိရပါသည်။ ကျောက်ဖရုံယို ပြုလုပ်ရန် အတွက် ကျောက်ဖရုံသီးကို အခွံခွာ အစေ့ထုတ်ပြီး အတုံးဖြတ်စက် အသုံးပြု၍ အတုံးကလေးများရရှိအောင် ပြုလုပ်ပေးရပါသည်။ ထို့နောက်ကန်ထဲတွင် ထုံးကျက်တက်ရေဖြင့် (၁)ရက်စိမ်၊ (၁)ရက်ရေဆေးပြီး အနည်းငယ်နူးသွားအောင် ပြုတ်ပြီး ရေစစ်ကာ သကြားနယ်၍ တစ်ရက်ခန့်နှပ်ကာ နောက်ဆုံးမှ ယိုထိုးပြီးသည့်အဆင့်ကို ရောက်ရှိပါသည်။

        ကျောက်ဖရုံယိုကို အများအပြားစားသုံးရန် မသင့်သော်လည်း ရေနွေးကြမ်းဖြင့် အချို တည်းရန် သွားရေစာအဖြစ် စားသုံးကြပါသည်။ ၂၀၂၄ခုနှစ် ဧပြီလနောက်ဆုံးပတ်တွင်‌ ရောင်းချ သောဈေးနှုန်းအနေဖြင့် ကျောက်ဖရုံယိုကို (၁၇)ကျပ်သားတစ်ဗူးလျှင် ရောင်းဈေး(၁၇၀၀)ကျပ်ဖြင့် ရောင်းချနေကြောင်း သိရှိရပါသည်။

DOCA(ပဲခူး)

           နတ်တလင်းခရိုင်၊ ပေါင်းတည်မြို့နယ် ဈေးကွက်အတွင်းရှိ သစ်သီးဝလံများမှာ  ၂၀၂၄ခုနှစ် ဧပြီလနောက်ဆုံးပတ်တွင်ရောင်းချသော ဈေးနှုန်းများအရ ဒူးရင်းသီးတစ်လုံး (၇၅၀၀) ကျပ်၊ မင်းကွက်သီး (၁၀)လုံး (၅၀၀၀) ကျပ်၊  စိန်တစ်လုံးသရက်သီး (မှည့်) (၁၀)လုံး (၁၀၀၀၀) ကျပ်၊ ပန်းသီးအကြွပ်သီး (၁၀)လုံး (၁၀၀၀၀) ကျပ်၊ ပျားလိမ္မော် တစ်ပိဿာ(၈၅၀၀) ကျပ်၊ စပျစ်သီး (အဝိုင်)သီး တစ်ပိဿာ(၁၂၀၀၀) ကျပ်၊ ရွှေသခွားမွှေးသီး ၁လုံး (၃၅၀၀) ကျပ်၊ ဖရဲသီး ၁လုံး(၅၅၀၀) ကျပ်၊ စတော်ဘယ်ရီသီး တစ်ပိဿာ   (၈၅၀၀) ကျပ်ဖြင့် ရောင်းချလျက်ရှိကြောင်း သိရပါသည်။

DOCA(ပဲခူး)