မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့၊ ကြက်သွန်နီဈေးကွက်၌ ၂၀၂၄ခုနှစ်၊ ဧပြီလ အစောပိုင်းကာလတွင် ကြက်သွန်နီအမြင့်ဈေးတစ်ပိဿာလျှင် ကျပ်(၁၇၅၀ - ၁၈၀၀)ဖြင့် ဈေးကျဆင်းပြီး အရောင်းအဝယ်ဖြစ်ခဲ့ရာမှာ သင်္ကြန်ပြီးကာလ ဧပြီလ(စတုတ္ထပတ်)တွင် ဈေးနှုန်းမြင့်တက်လာပြီး အမြင့်ဈေးတစ်ပိဿာလျှင် ကျပ်(၂၁၀၀)ဖြင့် အရောင်းအဝယ်ဖြစ်ကြောင်းသိရှိရသည်။ ဧပြီလအတွင်း ကြက်သွန်နီတစ်ပိဿာလျှင် ကျပ်(၃၅၀)ခန့် ဈေးမြင့် အရောင်းအဝယ်ဖြစ်ကြောင်း၊ ပြည်ပအဝယ်လိုက် ၍ ဈေးနှုန်းမြင့်တက်လာကြောင်းသိရှိရပါသည်။
အရောင်းအဝယ်ဖြစ်မှုအနေဖြင့် ၂၀၂၄ခုနှစ်၊ ဧပြီ(ပထမပတ်)တွင် ဆိပ်ဖြူကြက်သွန်နီကုန်စည်ဒိုင်ဈေးကွက်၌ နေ့စဉ်ပိဿာ (၅၀၀၀၀မှ ၁၀၀၀၀၀ထိ)ဝင်ရောက်အရောင်းအဝယ်ဖြစ်ပြီး သင်္ကြန်ပြီးကာလနောက်ပိုင်း ဧပြီလ(စတုတ္တပတ်)တွင် နယ်မြေအခြေအနေအရ ကုန်စည်ဒိုင်ဈေးကွက်သို့ နယ်ဒေသများမှ ကြက်သွန်နီဝင်ရောက်အရောင်းအဝယ်မဖြစ်ကြောင်း၊ မြို့ပေါ်ရှိ ကြက်သွန်နီရောင်းဝယ်ရေးပွဲစား လှောင်လက်သမားများက ကြက်သွန်နီစိုက်ပျိုးထွက်ရှိရာ ကျေးရွာများသို့ဆင်း၍ ဝယ်ယူသိုလှောင်ကြောင်း၊ မြို့ပေါ်ရှိ ကြက်သွန်နီပွဲရုံများသို့ နေ့စဉ်ကုန်ချိန်ပိဿာ (၁၀၀၀၀၀မှ ၂၀၀၀၀၀ထိ) ဝင်ရောက်ကြောင်း၊ ကုန်စည်စီးဆင်းမှုနည်းပြီး သိုလှောင်မှုများကြောင်း၊ ပြည်ပအဝယ်လိုက်၍ ဈေးနှုန်းဈေးကွက်မြင့်တက်မှုကြောင့် ကုန်စည်ဝင်ရောက်မှုများပြီး ဧပြီလအတွင်း ဆိပ်ဖြူကြက်သွန်နီဈေးကွက်သို့ ကုန်ချိန်ပိဿာ သိန်း(၂၀)ခန့်ဝင်ရောက်အရောင်းအဝယ်ဖြစ်ကြောင်း၊ ကုန်စည်စီးဆင်းမှုအနေဖြင့် ကြက်သွန်နီပိဿာ (၁၅)သိန်းခန့် ကုန်စည်စီးဆင်းခဲ့ကြောင်း ဈေးကွက်မှသိရှိရပါသည်။
ပြည်တွင်းဈေးကွက်အနေဖြင့် ဆိပ်ဖြူမြို့နယ်မှထွက်ရှိသည့် ကြက်သွန်နီများကို ရန်ကုန်တိုင်းဒေသကြီးရှိ ဘုရင့်နောင်ကုန်စည်ဒိုင်၊ ပြည်၊ ပုသိမ်မြို့များနှင့် ပြည်ပဈေးကွက်အနေဖြင့် တရုတ်၊ ထိုင်း၊ ဗီယက်နမ်နိုင်ငံများသို့ မြဝတီ၊ မော်လမြိုင်မြို့များမှတစ်ဆင့် တင်ပို့လျက်ရှိကြောင်းသိရှိရသည်။ ဧပြီလအတွင်း ကုန်စည်စီးဆင်းမှုအနေဖြင့် ရန်ကုန်ဘုရင့်နောင်ကုန်စည်ဒိုင်ဈေးကွက်သို့ (၁၂)ဘီကား (၅၄)စီး၊ ပိဿာချိန် (၆)သိန်း၊ မြဝတီမြို့သို့ တွဲကား(၄၅)စီး၊ ပိဿာချိန်(၈)သိန်း၊ မော်လမြိုင်မြို့သို့ တွဲကား(၁)စီး၊ ပိဿာချိန် (၂)သောင်း၊ ပြည်မြို့သို့ (၆)ဘီးကား (၁၁)စီး၊ ပိဿာချိန် (၇)သောင်း၊ ပုသိမ်မြို့သို့ (၆)ဘီးကား (၁၁)စီး၊ ပိဿာချိန် (၇)သောင်း၊ စုစုပေါင်းပျမ်းမျှပိဿာ (၁၅)သိန်းခန့်၊ တန်ချိန်အားဖြင့် (၂၄၄၉)တန်ခန့် ကုန်စည်စီးဆင်းခဲ့ကြောင်းသိရှိရသည်။
DOCA(မကွေး)