သတင်းနှင့် လှုပ်ရှားမှုများ

         ၂၀၂၀ ပြည့်နှစ် သြဂုတ် ၂၇ ရက်နေ့ တွင် တနင်္သာရီတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံးမှ ဝန်ထမ်းများသည် တိုင်းဒေသကြီး အစားအသောက်နှင့်ဆေးဝါးကွပ်ကဲရေးဦးစီးဌာန၊ ပြည်သူ့ကျန်းမာရေးဦးစီးဌာန၊ စည်ပင်သာယာရေးအဖွဲ့၊ တိုင်းဒေသကြီး ဥပဒေချုပ်ရုံး၊ မြန်မာနိုင်ငံရဲတပ်ဖွဲ့တို့နှင့်ပူးပေါင်း၍ ထားဝယ်မြို့ပေါ်ရှိဆေးဆိုင်များသို့ သွားရောက်၍ COVID-19 ကာကွယ်၊ ထိန်းချုပ်၊ ကုသရေးဆိုင်ရာ အထောက်အကူပြုပစ္စည်းများကို အများပြည်သူများထံ စျေးနှုန်းမြှင့်တင်ရောင်းချနေမှုရှိ/မရှိ ကွင်းဆင်းစိစစ်ဆောင်ရွက်ခဲ့ပါသည်။

          ကွင်းဆင်းစိစစ်ရေးအဖွဲ့သည် ထားဝယ်မြို့ပေါ်ရှိ ဆေးဆိုင်များတွင် COVID-19 ကာကွယ်၊ ထိန်းချုပ်၊ ကုသရေးဆိုင်ရာအထောက်အကူပြုပစ္စည်းများ၊ ဆေးဝါးများ၊ Mask နှင့်  Hand Gel များ စျေးကွက်အတွင်း စျေးနှုန်းမြှင့်တင်ရောင်းချခြင်း၊ စျေးနှုန်းမြှင့်တင်ဖြန့်ဖြူးခြင်း သို့မဟုတ် စျေးကစားရန်ရည်ရွယ်ချက်ဖြင့် သိုလှောင်ခြင်းတို့ ရှိ/မရှိစိစစ်ခဲ့ပါသည်။ ဆေးဆိုင်များအနက်အချို့ သောဆေးဆိုင်များတွင် Mask နှင့်  Hand Gel ပြတ်လပ်နေပြီး အချို့ဆိုင်များတွင် သင့်တင့်မျှတ သောစျေးနှုန်းဖြင့် ရောင်းချနေကြောင်း စိစစ်တွေ့ရှိရပါသည်။ ဆိုင်ရှင်များအနေဖြင့် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ အမိန့်ကြော်ငြာစာအမှတ်(၂၁/၂၀၂၀)နှင့်အညီ လိုက်နာ ကြရန်နှင့် ဖောက်ဖျက်ကျူးလွန်ခြင်းရှိပါက အရေးကြီးကုန်စည်နှင့် ဝန်ဆောင်မှုဥပဒေ   ပုဒ်မ ၅ အရ အရေးယူခံရမည်ဖြစ်ကြောင်းတို့ကို အသိပေးရှင်းလင်းခဲ့ပြီး လက်ကမ်းစာစောင်များဖြန့်ဝေပေးခဲ့ ကြောင်းသိရသည်။

တနင်္သာရီတိုင်းဒေသကြီး

စားသုံးသူရေးရာဦးစီးဌာန

           အရေးကြီး ကုန်စည်နှင့် ဝန်ဆောင်မှုဥပဒေဖြင့် သတ်မှတ်ထုတ်ပြန်ထားသည့် Covid -19 ရောဂါကာကွယ်ရေးပစ္စည်းများ၊ ဆေးဝါးများ၊ စားသောက်ကုန်များ ဈေးနှုန်းမြှင့်တင်ရောင်းချမှု မရှိစေရေး ဆွေးနွေးပွဲကို စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ တိုင်းဒေသကြီးဦးစီးမှူးရုံးတွင် သြဂုတ်လ ၂၅ ရက်နေ့ နေ့လည် ၂ နာရီအချိန်တွင် ကျင်းပပြုလုပ်ရာ  မုံရွာကုန်စည်ဒိုင် ဥက္ကဌနှင့် အဖွဲ့၊ တိုင်းဒေသကြီးရေသန့်အသင်းဥက္ကဌနှင့်အဖွဲ့၊ တိုင်းမုန့်လုပ်ငန်းရှင်အသင်း ဥက္ကဌနှင့်အဖွဲ့၊ တိုင်းဆီစက် အသင်းဥက္ကဌ၊ မုံရွာခရိုင် စားသောက်ကုန်အသင်း၊ ရေချမ်းဆေးဆိုင်နှင့် မုံရွာမြို့ပေါ်ရှိ ဆေးဆိုင် ပိုင်ရှင်များ မြနဂါးစတိုးနှင့်  မုံရွာမြို့ပေါ်ရှိ  စတိုးဆိုင်ပိုင်ရှင်များ တက်ရောက်ခဲ့ပါသည်။

         ဆွေးနွေးပွဲတွင် တိုင်းဒေသကြီးဦးစီးမှူး ဦးခင်မောင်လှိုင်က ထုတ်ပြန်ထားသည့် ဥပဒေနှင့် အမိန့်ညွှန်ကြားချက်များကို ရှင်းလင်းပြောကြားပြီး လုပ်ငန်းရှင်များအား သက်ဆိုင်ရာ ဌာန၏ ထောက်ခံချက်ရရှိရေးနှင့် စဉ်ဆက်မပြတ် တိုးတက်စေရေး ကူညီဆောင် ရွက်ပေးမည်ဖြစ်ကြောင်း၊ ထောက်ခံချက်များကို လုပ်ငန်းရှင်များ၏ ထင်သာမြင်သာရှိတဲ့ နေရာတွင် ချိတ်ဆွဲထားရန်လိုအပ် ကြောင်း၊  အရေးကြီးကုန်စည်များကို ကုန်ဈေးနှုန်းမြှင့်တင်ရောင်းချရန် ရည်ရွယ်ချက်ဖြင့် သိုလှောင် ခြင်း၊ ဖြန့်ဖြူးခြင်းနှင့်ရောင်းချခြင်းတို့ကို စိစစ်တွေ့ရှိပါက အရေးကြီးကုန်စည်နှင့် ဝန်ဆောင်မှု ဥပဒေပုဒ်မ ၅ အရ အရေးယူဆောင်ရွက်သွားမည်ဖြစ်ကြောင်း  ဆွေးနွေးပြောကြားခဲ့ပါသည်။

       အဆိုပါ ဆွေးနွေးပွဲသို့  တက်ရောက်လာသည့် လုပ်ငန်းရှင်များက ပြန်လည် ဆွေးနွေးခဲ့ရာ မုံရွာမြို့ပေါ်ရှိ လုပ်ငန်းရှင်များအနေဖြင့်  လမ်းဘေးဆိုင်များတွင်သာ Mask  ဈေးနှုန်းယာယီတက်ခဲ့ပြီး ယခုအချိန်တွင် ဈေးနှုန်းများ ပြန်လည်ကျဈေးဖြင့်ရောင်းချနေ ပါကြောင်း၊ ပူးပေါင်းဆောင်ရွက် သွားမည်ဖြစ်ပါကြောင်းနှင့် လုပ်ငန်းရှင်များ၏ မေးမြန်းမှုများကို တိုင်းဒေသကြီးဦးစီးမှူးက ပြန်လည်ရှင်းလင်း  ဆွေးနွေးခဲ့ကြောင်း သတင်းရရှိပါသည်။

စစ်ကိုင်းတိုင်းဒေသကြီး

စားသုံးသူရေးရာဦးစီးဌာန

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စစ်ကိုင်းခရိုင်စားသုံးသူရေးရာဦးစီးဌာနမှ  စစ်ဆေးရေးအရာရှိ စစ်ကိုင်းမြို့နယ်တာဝန်ခံ ဦးခင်မောင်ဝင်း ဦးဆောင်သောအဖွဲ့သည် ၂၀.၈.၂၀၂၀ ရက်နေ့(၁၀:ဝ၀) နာရီတွင် ဆားတောင်မြို့မဈေး အတွင်း/အပြင်ရှိ ကုန်စုံဆိုင်များအား  မြို့နယ်အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့ မြို့နယ်စည်ပင်၊ မြို့နယ်ကျန်းမာရေးဦးစီးဌာန၊ ရပ်ကွက်အုပ်ချုပ်ရေးမှူး၊နှင့်ပူးပေါင်း၍  ရှောင်တခင် စစ်ဆေးခဲ့သည်။

   ကွင်းဆင်းစစ်ဆေးရာတွင် စားသုံးသူကာကွယ်ရေးဥပဒေအခန်း (၁၈)ပါ ကုန်အညွှန်းအမှတ်အသားနှင့်ပတ်သက်၍ ကုန်အညွှန်းအမှတ်အသားများတွင် ပါဝင်ရမည့်အချက်များဖြစ်သည့် ကုန်စည်၏ အမျိုးအမည်၊ အရွယ်အစား၊ အရေအတွက်နှင့်အသားတင်ပမာဏ၊ ထားသိုသိမ်းဆည်းပုံအညွှန်း၊ သုံးစွဲပုံ သုံးစွဲနည်းလမ်းနှင့် ကျန်းမာရေးဆိုင်ရာ ဘေးထွက်ဆိုးကျိုး သို့မဟုတ် ဓာတ်မတည့်ကြောင်း ဖေါ်ပြချက်၊ ကြိုတင်သတိပေးချက်များကို မြန်မာဘာသာဖြင့်ဖြစ်စေ၊ မြန်မာဘာသာနှင့်အခြားဘာသာ တွဲလျှက်ဖြစ်စေ ဖေါ်ပြရမှာဖြစ်ကြောင်း အသိပညာပေးရှင်းလင်းခဲ့ပြီး၊ အရေးကြီးကုန်စည်နှင့် ဝန်ဆောင်မှုဥပဒေအရ အရေးကြီးကုန်စည်များအဖြစ်  (Coronavius Disease 2020 Covid-19) ကာကွယ်ထိန်းချုပ်၊ ကုသရေး၊ ဆိုင်ရာ အထာက်အကူပြုပစ္စည်းများ၊ ဆေးဝါးများ၊ စားသုံးကုန်များ၊ ဈေးကွက်အတွင်း ဈေးနှုန်းတင်ရောင်းချခြင်း၊ ဖြန့်ဖြူးခြင်း (သို့မဟုက်) ဈေးကစားရန် ရည်ရွယ်၍ သိုလှောင်ခြင်းများမရှိစေရေး ရှောင်တခင်စစ်ဆေးခဲ့ပါပြီး စစ်ဆေးတွေ့ရှိပါက အရေးကြီးကုန်စည်နှင့် ဝန်ဆောင်မှုဥပဒေပုဒ်မ-၅ ဖြင့်အရေးယူဆောင်ရွက်သွားမှာဖြစ်ကြောင်း အသိပညာပေးခဲ့ပြီး စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ အမိန့်ကြော်ငြာစာအမှတ် (၂၁/၂၀၂၀)ကို ဖြန့်ဝေပေးခဲ့ကြောင်း သတင်းရရှိပါသည်။

စစ်ကိုင်းတိုင်းဒေသကြီး

စားသုံးသူရေးရာဦးစီးဌာန

ဦးစွာအသုံးပြုသူကို အခွင့်အရေးပေးသော စနစ် (First to Use System) မှ ဦးစွာလျှောက်ထားသူကို အခွင့်အရေးပေးသောစနစ် (First to File System) သို့ ကူးပြောင်းရာတွင် အဆင်ပြေချောမွေ့စေရန်အလို့ငှာ ကုန်အမှတ်တံဆိပ်မူပိုင်ခွင့်ဥပဒေ ပုဒ်မ ၉၃၊ ပုဒ်မခွဲ (က) ပါ အမှတ်တံဆိပ်ပိုင်ရှင်များအတွက် ကုန်အမှတ်တံဆိပ်မူပိုင်ခွင့်ဥပဒေနှင့်အညီ မှတ်ပုံတင်လျှောက်ထားရန် အမိန့် ကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်လိုက်ပါသည်။ အောက်ပါ (.pdf) file မှတဆင့် ဝင်ရောက်ဖတ်ရှုနိုင်ပါသည်-

      စစ်ကိုင်းတိုင်းဒေသကြီး စားသုံးသူရေးရာကော်မတီ၏ တတိယအကြိမ်မြောက် လုပ်ငန်းညှိနှိုင်းအစည်းအဝေးကို ဩဂုတ်လ ၁၉ ရက်နေ့ နေ့လယ် ၂ နာရီ အချိန်တွင် စစ်ကိုင်းတိုင်းဒေသကြီး၊ တိုင်းဒေသကြီးအစိုးရအဖွဲ့၊ စီမံကိန်းနှင့်ဘဏ္ဍာရေးဝန်ကြီးရုံး အစည်းအဝေးခန်းမ၌ ကျင်းပခဲ့ရာ  စားသုံးသူရေးရာကော်မတီဥက္ကဌနှင့်တကွ ကော်မတီဝင်များ၊ မိတ်ဖက်ဌာနဆိုင်ရာများ၊ တိုင်းဒေသကြီး စားသုံးသူရေးရာဦးစီးဌာနမှ တာဝန်ရှိသူများ တက်ရောက်ခဲ့ကြပါသည်။

        အဆိုပါအစည်းအဝေးတွင် တိုင်းဒေသကြီး စားသုံးသူရေးရာကော်မတီဥက္ကဌ၊ စီမံကိန်းနှင့် ဘဏ္ဍာရေးဝန်ကြီး ဦးစိုးဦးက အဖွင့်အမှာစကားပြောကြားပြီးနောက် ကော်မတီအတွင်းရေးမှူး ဦးခင်မောင်လှိုင် (ညွှန်ကြားရေးမှူး) က စစ်ကိုင်းတိုင်းဒေသကြီး စားသုံးသူရေးရာကော်မတီ ဖွဲ့စည်းထားရှိမှု အခြေအနေများ၊ မိတ်ဖက်ဌာနဆိုင်ရာများ နှင့်ပူးပေါင်းညှိနှိုင်းပြီး စားသုံးသူကာကွယ်ရေးလုပ်ငန်းများ ဆောင်ရွက်နိုင်ခဲ့မှု အခြေအနေများကို ရှင်းလင်းဆွေးနွေးတင်ပြခဲ့ပါသည်။ ဆက်လက်၍ အတွင်းရေးမှူးက ကုန်စည်များတွင် ကုန်အညွှန်းအမှတ်အသားများ ပြည့်စုံစွာပါရှိစေရေး၊ စစ်ကိုင်းတိုင်း‌ဒေသကြီး၏ တစ်နှစ်တာကာလအတွင်း ဦးစားပေးဆောင်ရွက်ရမည့် ကုန်စည်အမယ်(၁၀)မျိုးနှင့်ပတ်သက်၍ မိမိတိုင်းဒေသကြီးအတွင်းသို့ အခြားတိုင်းဒေသကြီး/ပြည်နယ်များမှ ကုန်အညွှန်းအမှတ်အသား မပြည့်စုံသည့် ကုန်စည်များ ဝင်ရောက်လာပါက အရေးယူဆောင်ရွက်နိုင်ရေးအတွက် တိုင်းဒေသကြီးကော်မတီ အချင်းချင်းချိတ်ဆက်ဆောင်ရွက်သွားမည့် အစီအမံများအား ရှင်းလင်းဆွေးနွေး တင်ပြခဲ့ပါသည်။  

    ထို့နောက် တိုင်းဒေသကြီးစားသောက်ကုန် ထုတ်လုပ်တင်ပို့ ရောင်းချသူများအသင်း ဖွဲ့စည်းနိုင်ရေးကိစ္စရပ်များ ၂၀၁၉-၂၀၂၀ ဘဏ္ဍာရေးနှစ် အောက်တိုဘာလမှ ဩဂုတ်လအတွင်း စားသုံးသူကာကွယ်ရေးလုပ်ငန်းများ ဆောင်ရွက်နိုင်မှုအခြေအနေများကို ရှင်းလင်းဆွေးနွေးကာ တိုင်ကြားမှုများနှင့်ပတ်သက်၍ ဥပဒေနှင့်အညီ ညှိနှိုင်းဖြေရှင်းဆောင်ရွက်ခဲ့မှုများအား ကော်မတီမှ အတည်ပြုမှတ်တမ်းတင်ရန်ဆုံးဖြတ်ခဲ့ကြပါသည်။

          ဆက်လက်၍ ကော်မတီဥက္ကဌ စီမံကိန်းနှင့်ဘဏ္ဍာရေးဝန်ကြီး ဦးစိုးဦးက ယနေ့အချိန် သည် နိုင်ငံနှင့်အဝှမ်း ခေတ်မီဖွံ့ဖြိုးတိုးတက်လာသည်နှင့်အမျှ ပြည်သူများ၏ နေထိုင် စားသောက်မှုပုံစံများကလည်း ခေတ်နဲ့အညီလျှင်မြန်စွာ ပြောင်းလဲလာပါကြောင်း၊ လုံခြုံစိတ်ချရမှုမရှိသော စားသောက်ကုန်၊ လူသုံးကုန်ပစ္စည်းများလည်း ပေါများလာသောကြောင့် ပြည်သူများအနေဖြင့် မိမိတို့အခွင့်အရေးများအား သိရှိကာ ဘေးဥပဒ်အန္တရာယ်ကင်းရှင်းသော ကုန်စည်များကို ရွေးချယ်ဝယ်ယူတတ်ရန်လိုအပ်ပါကြောင်း၊ စားသုံးသူပြည်သူများ၏ အခွင့်အရေးများ အပြည့်အဝရရှိစေရေး လုံခြုံစိတ်ချရမှုမရှိသော ကုန်စည်နှင့် တာဝန်ယူမှု မရှိသော ဝန်ဆောင်မှုများ လျော့နည်းပပျောက်သွားစေရေးအတွက် မိမိတို့ အစိုးရအဖွဲ့နှင့် တက်ရောက်လာကြသော ကော်မတီအဖွဲ့ဝင်များက အမျိုးသားရေးတာဝန်တစ်ရပ်အနေဖြင့် ဝိုင်းဝန်းပူးပေါင်း ဆောင်ရွက်သွားကြရမည်ဖြစ်ကြောင်း တိုက်တွန်းပြောကြားခဲ့ပါသည်။

 စစ်ကိုင်းတိုင်းဒေသကြီး

စားသုံးသူရေးရာဦးစီးဌာန