သတင်းနှင့် လှုပ်ရှားမှုများ

         ရန်ကုန်တိုင်းဒေသကြီး၊ တွံတေးခရိုင် တွံတေးမြို့နယ်၌ ဆောင်းသီးနှံစိုက်ပျိုးရာသီတွင် နွေစပါး စိုက်ဧက(၄၀၂၆၅)ဧကအား အောင်မြင်စွာစိုက်ပျိုးနိုင်ခဲ့ပြီး ဧပြီလဆန်းပိုင်းတွင် စတင်၍ ရိတ်သိမ်း ချွေလှေ့နိုင်ခဲ့ပြီး ဧပြီလ(၂၂)ရက်နေ့၊ နံနက်(၁၀၀၀)နာရီအချိန်တွင် ကွင်းအမှတ်(၁၂၁-C)၊ ဦးပိုင်အမှတ် (၁/၂)ဦးညီညီလွင်ပိုင်(၅)ဧက ဘုရားငုတ္တိုမြောက်ကျေးရွာတွင် တိုက်ရိုက်မျိုးစေ့ချကိရိယာ(Seeder) စနစ်ဖြင့် ဆောင်းသီးနှံ နွေစပါးစံပြကွက် ရိတ်သိမ်းခြင်းကို ဆောင်ရွက်ခဲ့ကြောင်း သိရှိရပါသည်။

       အဆိုပါနွေစပါးစံပြကွက်ရိတ်သိမ်းခြင်းအခမ်းအနားသို့ တွံတေးမြို့နယ် အထွေထွေအုပ်ချုပ်ရေး မှူး၊ မြို့နယ်မြေစာရင်းမှူး၊ မြို့နယ်စိုက်ပျိုးရေးမန်နေဂျာနှင့် ဝန်ထမ်းများ၊ ဌာနဆိုင်ရာအကြီးအကဲများ၊ ကျေးရွာအုပ်ချုပ်ရေးမှူးများနှင့် ရပ်ကျေးစာရေးများ တောင်သူများ စုစုပေါင်း(၆၅)ဦးခန့်တက်ရောက်ခဲ့ပြီး တိုက်ရိုက်မျိုးစေ့ချကိရိယာ(Seeder) စနစ်ဖြင့် စိုက်ပျိုးသည့် အထွက်တိုးနွေစပါးစံပြကွက်ရိတ်သိမ်းခဲ့ရာ တစ်ဧကလျှင် စပါးတင်း(၁၀၉.၃၇)တင်း ထွက်ရှိခဲ့ကြောင်း သိရသည်။

DOCA(ရန်ကုန်)

    တနင်္သာရီတိုင်းဒေသကြီး၊ မြိတ်ခရိုင် စားသုံးသူရေးရာဦးစီးဌာနမှ တာဝန်ရှိသူများသည် ၂၀၂၄ခုနှစ်၊ ဧပြီလ(၂၃) ရက်နေ့၊ မွန်းလွဲပိုင်းတွင် မြိတ်မြို့၊ အိမ်တော်ရာလမ်း၊ အထက်ရေပုန်းရပ်ရှိ  ဘုရင်မဟင်းခတ်အမွေးအကြိုင်မာဆလာလုပ်ငန်းသို့ သွားရောက်၍ လုပ်ငန်းရှင်အား ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ တွေ့ဆုံဆွေးနွေးခဲ့ကြပါသည်။

   ထို့သို့တွေ့ဆုံဆွေးနွေးရာတွင် ဘေးအန္တရာယ်ကင်းသော စားသောက်ကုန်များဦးစားပေးထုတ် လုပ်နိုင်ရေးနှင့် သန့်ရှင်းလတ်ဆတ်သောထုတ်ကုန်များ ထုတ်လုပ်နိုင်ရေး၊ သက်တမ်းလွန်ထုတ်ကုန် ပစ္စည်းများမရှိစေရေးအတွက် အထူးဂရုပြုဆောင်ရွက်နိုင်ရေး၊ ကုန်အညွှန်းအမှတ်အသားပြည့်စုံစွာ ဖော်ပြနိုင်ရေးတို့ကို ဆွေးနွေးပြောကြားခဲ့ပြီး လက်ကမ်းစာစောင်များ ဖြန့်ဝေပေးခဲ့ပါသည်။

DOCA(တနင်္သာရီ)

    ကော့သောင်းခရိုင် ကုန်ဈေးနှုန်းတည်ငြိမ်ရေးလုပ်ငန်းအဖွဲ့ဖြင့် ၂၀၂၄ခုနှစ်၊ ဧပြီ လ ၂၄ ရက်နေ့၊ နံနက်(၁၁:၀၀)နာရီတွင် ခရိုင်စီမံအုပ်ချုပ်ရေးအဖွဲ့၏ လမ်းညွှန်ချက်အရ ကော့သောင်းမြို့ပေါ်ရှိ ဆန်နှင့် ဆီအရောင်းဆိုင်(၅)ဆိုင်အား ကွင်းဆင်းစစ်ဆေးကြပ်မတ်ဆောင်ရွက်ခဲ့ပါသည်။

    အဆိုပါ ကွင်းဆင်းစစ်ဆေးခြင်းတွင် ကော့သောင်းခရိုင် စားသုံးသူရေးရာဦးစီးဌာန၊ အထူးစုံစမ်းစစ်ဆေးရေးဦးစီးဌာန၊ မြို့နယ်အထွေထွေအုပ်ချူပ်ရေးဦးစီးဌာန၊ ခရိုင်ပြည်သူ့ကျန်းမာရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍ ပြည်သူများ၏ နေ့စဉ် စားဝတ်နေရေး သက်သာချောင်ချိမှုရှိစေရေး ပြည်သူများအတွက် ရောင်းချလျက်ရှိသည့် အခြေခံစားကုန်များဖြစ်သည့် ဆန်နှင့် စားသုံးဆီဈေးနှုန်းများသည် ဒေသအတွင်းဖြစ်သင့်ဖြစ်ထိုက်သည့် ဈေးနှုန်းများဖြင့် ရောင်းဝယ် ဖောက်ကားခြင်း ရှိ/မရှိ ကွင်းဆင်းစစ်ဆေးခြင်းများ ဆောင်ရွက်ခဲ့ကြောင်း သိရှိရပါသည်။

DOCA(တနင်္သာရီ)

     ရန်ကုန်မြို့တော်စည်ပင်သာယာရေးကော်မတီ၏ ကြီးကြပ်မှုအောက်ရှိ ရန်ကုန်အရှေ့ပိုင်းခရိုင်၊ အထက်ပုဇွန်တောင်လမ်း၊ မင်္ဂလာတောင်ညွန့်မြို့နယ်ရှိ ကြက်/ဘဲဈေးဒိုင်အနေဖြင့် စားသုံးသူပြည်သူများသို့ နေ့စဉ် ကြက်/ဘဲများကို လက်လီ/လက်ကား ရောင်းချပေးလျက်ရှိကြောင်းသိရှိရပါသည်။

    ရန်ကုန်အရှေ့ပိုင်းခရိုင်၊ စားသုံးသူရေးရာဦးစီးမှူးရုံးမှ ဝန်ထမ်းများသည် (၂၂-၄-၂၀၂၄) ရက်နေ့တွင် မင်္ဂလာတောင်ညွန့်မြို့နယ်ရှိ ကြက်/ ဘဲဈေးဒိုင်သို့သွားရောက်၍ ရောင်းချလျက်ရှိသော ကြက်/ဘဲဈေးနှုန်းများကို ဈေးကွက်ဈေးနှုန်းစုံစမ်းခြင်းများပြုလုပ်ခဲ့ရာ ရန်ကုန်တိုင်းဒေသကြီးအတွင်းရှိ မြို့နယ်များမှ ခြံဖမ်းဈေးစနစ်ဖြင့်လည်းကောင်း၊ အခြားတိုင်းနှင့် ပြည်နယ်များမှ အရောက်ပို့စနစ်ဖြင့်လည်းကောင်း တင်ပို့ရောင်းချလျက်ရှိပါသည်။

        ထိုသို့ပြန်လည်ရောင်းချလျက်ရှိသော ကြက်/ ဘဲဈေးနှုန်းများမှာ အိမ်မွေးကြက် ၁ပိဿာလျှင် (၁၃၀၀၀-၁၇၀၀၀)ကျပ်၊ အသားတိုးကြက် ၁ပိဿာလျှင် (၇၅၀၀-၇၇၀၀) ကျပ်၊ မွေးမြူ ရေးကြက် (ထီး/မ) ၁ပိဿာလျှင် (၈၅၀၀-၁၂၀၀၀) ကျပ်၊ ဘဲ ၁ပိဿာလျှင် (၆၀၀၀-၉၀၀၀) ကျပ်၊ ချယ်ရီဘယ်ရီဘဲ ၁ပိဿာလျှင် (၉၄၀၀-၉၅၀၀) ကျပ်တို့ဖြင့် ‌တစ်ရက်လျှင် ကုန်ချိန် (၆၄၁၇၀) ပိဿာခန့်ရောင်းချရကြောင်းနှင့် ဈေးအတက်အကျမရှိကြောင်းသိရှိရပါသည်။

DOCA(ရန်ကုန်)

        ၂၀၂၄ ခုနှစ်၊ ဧပြီလ ၂၄ ရက်နေ့၊ နံနက် (၁ဝးဝဝ) နာရီ အချိန်တွင် စီးပွားရေးနှင့်ကူးသန်း ရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး၏ ဝန်ထမ်းများနှင့်တွေဆုံပွဲအား  တနင်္သာရီတိုင်း ဒေသကြီးဦးစီးမှူးရုံးနှင့် မြိတ်/ကော့သောင်းခရိုင်မှဝန်ထမ်းများမှ Virtual စနစ်ဖြင့် တက်ရောက်ပြီး ဝန်ကြီး၏ လမ်းညွှန်မှုများကို ခံယူခဲ့ပါသည်။

         တွေ့ဆုံပွဲတွင် ဝန်ကြီးမှ နှစ်သစ်အခါ၌ ဝန်ထမ်းများအား အားသစ်၊ မာန်သစ်၊ စွမ်းအား သစ်များဖြင့်  အားအပြည့်၊  မာန်အပြည့်၊  စွမ်းအားအပြည့်ဆောင်ရွက်ကြရန်၊   စားသုံးသူရေးရာ လုပ်ငန်းတာဝန်  (၁၀)  ချက်ကို   လိုက်နာ‌ဆောင်ရွက်ရန်၊   ခေါင်းဆောင်ကောင်း/  နောက်လိုက် ကောင်းများအဖြစ်  ဆောင်ရွက်ရန်၊   စည်းကမ်းများအား ပေါင်းထည့်၍   လိုက်နာဆောင်ရွက်ရန် ပြောကြားခဲ့ပါသည်။

          ဆက်လက်၍ ဒုဝန်ကြီး၊ အတွင်းဝန်၊ ညွှန်ကြားရေးမှူးချုပ်များမှ ဝန်ထမ်းများအား    နှစ်သစ်လမ်းညွှန်မှာကြားချက်များကို အသီးသီးပြောကြားခဲ့ပြီး တွေ့ဆုံပွဲအား နေ့လယ် (၁၂း၀၀) အချိန် တွင်ပြီးမြောက်ခဲ့ပါသည်။

DOCA(တနင်္သာရီ)