သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ကရင်ပြည်နယ်ဦးစီးမှူးရုံးမှ ဦးမျိုုးဝင်းနိုင် (ဦးစီးအရာရှိ)ပါ ဝန်ထမ်းများသည် ဆက်စပ်အဖွဲ့များဖြစ်သော ကရင်ပြည်နယ်ဆန်ကုန်သည်များအသင်း၊ ကရင်ပြည်နယ် ဆန်စက်လုပ်ငန်းရှင်များအသင်းနှင့် ပေါင်းစပ်၍ ၉.၅.၂၀၂၄ ရက်နေ့၊နံနက်(၁၀:၀၀) နာရီအချိန်တွင် ဘားအံမြို့ပေါ်ရှိ ဆန်ဆိုင်ကြီးများအား ကွင်းဆင်းစစ်ဆေးခဲ့ကြောင်း သိရသည်။

      ထိုသို့ကွင်းဆင်းစစ်ဆေးဆောင်ရွက်ရာတွင် လက်လီ/လက်ကား ရောင်းချလျက်ရှိသော ဆန်ဆိုင်ကြီးများ၏ ဆန်စီးဝင်စီးထွက်မှုအခြေအနေ၊ ရောင်းဝယ်ဖောက်ကားမှု၊ သိုလှောင်ရောင်းချမှု ၊ ဈေးနှုန်း/ ဈေးကွက်ဖြစ်ပေါ်မှု၊ ဝယ်လိုအား၊ဈေးကွက်လက်ကျန်၊ တွက်ခြေကိုက်မှု အကျိုးအမြတ်အခြေအနေများကို  ကွင်းဆင်းစိစစ်ခဲ့ကြသည်။

       စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် ဆန်အပါအဝင် အခြေခံစားကုန်ပစ္စည်းများ ဈေးကွက်ပြတ်လပ်မှုမရှိစေရေး၊ ဈေးနှုန်းကြီးမြင့်မှုမရှိစေရေးနှင့် ဈေးနှုန်းတည်ငြိမ်စေရေးအတွက် ကြပ်မတ်ဆောင်ရွက်လျက်ရှိကြောင်း သိရသည်။

DOCA(ကရင်)

        ၂၀၂၄ခုနှစ်၊ မေလ(၁၄)ရက်နေ့၊ နံနက် (၈း၃၀)အချိန်တွင် ခရိုင်စားသုံးသူရေးရာဦးစီးဌာန၊  ခရိုင်အထူးစုံစမ်းစစ်ဆေးရေးအဖွဲ့၊ ဗဟိုစာရင်းအင်းဦးစီးဌာန၊ မြို့နယ်စည်ပင်သာယာရေးအဖွဲ့တို့ ပါဝင်သော မြိတ်ခရိုင်ကုန်စျေးနှုန်းတည်ငြိမ်ရေးအဖွဲ့ဝင်များသည် မြိတ်မြို့၊ တပ်ပြင်ရပ်၊ စည်ပင် သာယာစျေးရှိ ဟင်းသီးဟင်းရွက်၊ အသားငါး အရောင်းဆိုင်များသို့သွားရောက်၍ စျေးနှုန်းမြှင့်တင် ရောင်းချမှုမရှိစေရေး ကွင်းဆင်းစစ်ဆေးခဲ့ကြပါသည်။

       ဟင်းသီးဟင်းရွက်၊ အသားငါးအရောင်းဆိုင်များအား ကွင်းဆင်းစစ်ဆေးရာတွင် သန့်ရှင်းလတ်ဆတ်မှုနှင့် အလေးချိန်မှန်ကန်စွာဖြင့်ရောင်းချစေရေးနှင့် ဒေသတွင်းဖြစ်သင့်ဖြစ်ထိုက်သော စျေးနှုန်း များဖြင့် ရောင်းချစေရေး ပြောကြားခဲ့ကြောင်း သတင်းရရှိခဲ့ပါသည်။

DOCA(တနင်္သာရီ)

    မွန်ပြည်နယ်၊ မော်လမြိုင်ခရိုင်၊ မုဒုံမြို့နယ်တွင် ပြည်သူများ ပဋိဇီဝဆေးယဉ်ပါးမှုအန္တရာယ်ကာကွယ်နိုင်ရေးအတွက် ဆေးဝါးအရောင်းဆိုင်များတွင် ဆရာဝန်ဆေးညွှန်းစာဖြင့် ရောင်းချရန် လိုအပ်သည့်(POM)ဆေးဝါးများကို ဆေးညွှန်းစာမပါပဲ ရောင်းချနေမှု ရှိ/မရှိအား မြို့နယ်ကျန်းမာရေးဦးစီးဌာန၊ အထွေထွေအုပ်ချုပ်ရေးဦးစီးဌာန၊ မွေးမြူရေးနှင့်ကုသရေးဦးစီးဌာန၊ စားသုံးသူရေးရာဦးစီးဌာန၊ စည်ပင်သာယာရေးအဖွဲ့တို့ ပူးပေါင်း၍ ၁၃.၅.၂၀၂၄ ရက်နေ့တွင် လိုက်လံကွင်းဆင်းစစ်ဆေးခဲ့ကြောင်း သိရှိရပါသည်။

      ထိုသို့ ကွင်းဆင်းစစ်ဆေးရာတွင် မြို့နယ်ကျန်းမာရေးဦးစီးမှူးမှ မုဒုံမြို့နယ်ရှိ ဆေးဝါးဆိုင်များ၌ သတ်မှတ်လိုင်စင် စည်းကမ်းများနှင့်အညီ ရောင်းချရန်နှင့် ဆရာဝန်ဆေးညွှန်းစာပါမှသာ ရောင်းချရမည့် (POM)ဆေးဝါးများအား ဆေးညွှန်းစာမပါပဲ ရောင်းချနေခြင်းရှိ/မရှိကို လိုက်လံစစ်ဆေးခဲ့ရာ မုဒုံမြို့နယ်ရှိ ဆေးဝါးဆိုင်များတွင် အဆိုပါ (POM)ဆေးဝါးများအား ဆရာဝန်ဆေးညွှန်းစာမပါပဲ ရောင်းချနေခြင်း မရှိကြောင်း သိရှိရသည်။

DOCA(မွန်)

     စားသုံးသူရေးရာဦးစီးဌာန၊ ကျိုက်ထိုခရိုင်ဦးစီးမှူးနှင့် ကျိုက်ထိုမြို့နယ်တာဝန်ခံတို့သည် ၁၃.၅.၂၀၂၄ ရက်နေ့တွင် ကျိုက်ထိုမြို့နယ်ရှိ ဆီစက်လုပ်ငန်းရှင်နှင့် တွေ့ဆုံဆွေးနွေးခဲ့သည်။

    ထိုသို့ တွေ့ဆုံဆွေးနွေးရာတွင် စားသုံးသူရေးရာဦးစီးဌာန ကျိုက်ထိုခရိုင်ဦးစီးမှူး ဦးစီးအရာရှိ  ဦးအောင်ကျော်မင်းနှင့် မြို့နယ်တာဝန်ခံ ဦးဇော်ဦးတို့က စားသုံးဆီ ထုတ်လုပ်သည့် လုပ်ငန်းရှင်များ၏ ကိုယ်စားလှယ်များနှင့်တွေ့ဆုံကာ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ်၊ ၂/၂၀၁၉နှင့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ညွှန်ကြားချက်အမှတ်၊ ၁/၂၀၂၁ များကို လိုက်နာဆောင်ရွက်ရမည့်အပြင် မြန်မာနိုင်ငံအစားအသောက်နှင့် ဆေးဝါးအာဏာပိုင်အဖွဲ့မှ ထုတ်ပြန်ထားသည့် ဟင်းသီးဟင်းရွက်ဆီများကို ရောနှောဆီအဖြစ်ရောစပ်ရာတွင် အရည်အသွေးအာမခံချက်နှင့် အမှတ်တံဆိပ်ကပ်ခြင်းဆိုင်ရာ သတ်မှတ်သည့်အမိန့် (၂/၂၀၂၄) ကိုပါ လိုက်နာဆောင်ရွက်ရန် ရှင်းလင်းဆွေးနွေးခဲ့သည်။

     ယင်းနောက် ဆီကြိတ်ခွဲစက်များသို့ သွားရောက်၍ တစ်နေ့ကြိတ်ခွဲနှုန်းပိဿာချိန်နှင့် ဆီထွက်ရှိနှုန်းများကို ကြည့်ရှုစစ်ဆေးခဲ့ကြောင်း သိရသည်။

DOCA(မွန်)

    ၁၃.၅.၂၀၂၄ ရက်နေ့တွင် စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးသည် ပြည်နယ်ဦးစီးမှူးရုံးခန်း၌ ဆီလုပ်ငန်းရှင်များနှင့် တွေ့ဆုံဆွေးနွေးခဲ့သည်။

    ထိုသို့ တွေ့ဆုံဆွေးနွေးရာတွင် ပြည်နယ်ဦးစီးမှူးက စားသုံးဆီထုတ်လုပ်သော လုပ်ငန်းရှင်များအနေဖြင့် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ်၊ ၂/၂၀၁၉နှင့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ ညွှန်ကြားချက်အမှတ်၊ ၁/၂၀၂၁ များကို လိုက်နာရမည့်အပြင် မြန်မာနိုင်ငံအစားအသောက်နှင့်ဆေးဝါးအာဏာပိုင်အဖွဲ့က ထုတ်ပြန်ထားသည့် ဟင်းသီးဟင်းရွက်ဆီများကို ရောနှောဆီအဖြစ်ရောစပ်ရာတွင် အရည်အသွေးအာမခံချက်နှင့် အမှတ်တံဆိပ်ကပ်ခြင်းဆိုင်ရာ သတ်မှတ်သည့်အမိန့် (၂/၂၀၂၄) ကိုပါ လိုက်နာဆောင်ရွက်ရမည်ဖြစ်ကြောင်း၊ လိုက်နာဆောင်ရွက်ခြင်းမရှိပါက သက်ဆိုင်ရာဥပဒေများနှင့် အရေးယူဆောင်ရွက်သွားမည်ဖြစ်ကြောင်း ရှင်းလင်းဆွေးနွေးခဲ့ကြောင်း သိရှိရပါသည်။

DOCA(မွန်)