နိုင်ငံတော်မှ MSME လုပ်ငန်းများဖွံ့ဖြိုးတိုးတက်လာစေရေး ရည်ရွယ်ပြီး အသေးစား၊ အလတ်စား၊ အငယ်စားစီးပွားရေးလုပ်ငန်းရှင်များအား လုပ်ငန်းပိုမိုတိုးတက်ထုတ်လုပ်လာနိုင်ရေးအတွက် နိုင်ငံစီးပွားမြှင့်တင်ရန်ပုံငွေမှ ချေးငွေများထုတ်ချေးပေးလျက်ရှိရာ စားသုံးသူရေးရာဦးစီးဌာနအနေဖြင့်လည်း MSME ထုတ်ကုန်များ ဈေးကွက်ရရှိရေးအတွက် ပူးပေါင်းပါဝင်ဆောင်ရွက်ပေးလျက်ရှိပါ သည်။
ပြည်ခရိုင်၊ ပြည်မြို့၊ မှော်ဇာကျေးရွာမှ ကမ္ဘာဦးသဘာဝဓါတ်မြေဩဇာထုတ်လုပ်သည့် လုပ်ငန်းမှာလည်း နိုင်ငံစီးပွားမြှင့်တင်ရန်ပုံငွေမှ ချေးငွေများထုတ်ချေးပြီး လုပ်ငန်းများပိုမိုဖွံ့ဖြိုး တိုးတက်လာစေရေးအတွက် ဆောင်ရွက်လျက်ရှိပါသည်။ ကမ္ဘာဦးသဘာဝဓါတ်မြေဩဇာလုပ်ငန်း အား ဈေးကွက်ရှာဖွေနိုင်ရေးအတွက် စားသုံးသူရေးရာဦးစီးဌာနအနေဖြင့် ရာသီအလိုက် ဟင်းသီးဟင်းရွက်များ စိုက်ပျိုးပြီး တိုင်းတွင်းနှင့် အခြားတိုင်းဖြစ်သော ရန်ကုန်တိုင်းဒေသကြီးသို့ တင်ပို့ရောင်းချလျက်ရှိသော ပဲခူးတိုင်းဒေသကြီး(အနောက်ခြမ်း) သဲကုန်းမြို့နယ်ရှိ ပုတီးကုန်းမြို့မှ ဟင်းသီးဟင်းရွက် စိုက်ပျိုးသူ တောင်သူများနှင့် ၂၇.၄.၂၀၂၄ ရက်နေ့တွင် ချိတ်ဆက်ဆောင်ရွက်ပေးခဲ့ပါသည်။
ပဲခူးတိုင်းဒေသကြီး(အနောက်ခြမ်း) သဲကုန်းမြို့နယ်၊ ပုတီးကုန်းမှ တောင်သူများအနေဖြင့် ဟင်းသီးဟင်းရွက်များကို ရာသီအလိုက် စိုက်ပျိုးလျက်ရှိပြီး မိုးဦးကာလတွင် ခဝဲ၊ ပြောင်း၊ ငြုပ်သီး (ကျောက်စိမ်း) ၊ မြင်းခွာ၊ ကျောက်ဖရုံ၊ ရွှေဖရုံ၊ ခရမ်းကျွတ်သီး၊ ခရမ်းပြုတ်သီး၊ ခရမ်းသီး၊ပဲသီး၊ ကြောင်လျာစသည့် ဟင်းသီးဟင်းရွက်များကို စိုက်ပျိုးပြီး ဆောင်းကာလတွင် နိုကိုဥ၊ ဂေါ်ဖီ၊ ဂေါ်ဖီထုတ်များကို အများဆုံးစိုက်ပျိုးကြသည့်အတွက် ဟင်းသီးဟင်းရွက်များ အများအပြားထွက်ရှိရာ ဒေသတွင်းရောင်းချသည့်အပြင် ရန်ကုန်တိုင်းဒေသကြီး သီရိမင်္ဂလာဈေး၊ ဒညင်းကုန်းဈေး၊ ထောက်ကြန့်၊ တိုက်ကြီးနှင့် ဥက္ကံမြို့များသို့ သီးနှံလှိုင်ချိန်တွင် နေ့စဉ် တန်ချိန် ၁၀၀၀၀ ခန့် ပါဝင် သော (၁၂)ဘီးကား (၄)စီးခန့် တင်ပို့နိုင်သည့်အပြင် ပြည်နှင့်ပေါက်ခေါင်းမြို့နယ်များသို့ ကုန်ချိန် ၉၀၀ - ၁၀၀၀ ခန့်ပါသော Light Truck ကား(၃)စီးခန့် တင်ပို့ရောင်းချကြောင်း သိရှိရပါသည်။
တွေ့ဆုံဆွေးနွေးပွဲတွင် စားသုံးသူရေးရာဦးစီးဌာန၊ ပြည်ခရိုင်ဦးစီးမှူးမှ ဟင်းသီးဟင်းရွက် စိုက်ပျိုးထုတ်လုပ်သူ တောင်သူများအား စားသုံးသူအတွက် ကျန်းမာရေးနှင့်ညီညွတ်သော စိုက်ပျိုးရေးထုတ်ကုန်သီးနှံများဖြစ်ရေးနှင့် MSME ထုတ်ကုန်ဖြစ်သည့် သဘာဝမြေဩဇာသုံးစွဲခြင်းဖြင့် နှစ်ဦးနှစ်ဖက် အဆင်ပြေပြီး Win - Win ဖြစ်လာမည်ဖြစ်ကြောင်း၊ ကမ္ဘာဦး သဘာဝဓါတ်မြေဩဇာလုပ်ငန်းမှ ဦးနေဦးမှလည်း သဘာဝဓါတ်မြေဩဇာထုတ်လုပ်ပုံနှင့် သုံးစွဲပုံနည်းလမ်းများကို အကျယ်တဝင့် ရှင်းလင်းဆွေးနွေးခဲ့ပြီး တက်ရောက်လာသော တောင်သူများသို့ စမ်းသပ်အသုံးပြုနိုင်ရန် လက်ဆောင်အဖြစ် ကမ္ဘာဦး သဘာဝဓါတ်မြေဩဇာများကို ပေးအပ်ခဲ့ပါကြောင်း သိရှိရပါသည်။
DOCA(ပဲခူး)