“ကျန်းမာရေးနှင့်ညီညွတ်သောဆေးဖက်ဝင်တမာအားစားသုံးကြပါစို့”

          ကျွန်တော်တို့မြန်မာနိုင်ငံတွင် တမာပင်ကို လူတိုင်းလိုလို သိရှိကြပါသည် ။ ရှေးဘုရင်များ လက်ထက်ကပင် တမာရိုးနှင့်သွားတိုက်ပါက သွားပိုးစားခြင်း ၊ သွားကိုက် ၊ သွားနာများမဖြစ်ဟု ယုံကြည်ကြပြီး ယနေ့ထက်တိုင် တမာခက်ကိုချိုး၍ သွားတိုက်နေသည်ကို တွေ့ရှိရပါသည် ။  မြန်မာ စကားပုံတစ်ခုတွင် တမာတစ်ခက်သွားတစ်သက်ဟူ၍ ဆိုရိုးစကားရှိခဲ့ပါသည် ။ တမာပင်ကို မြန်မာပြည်အနှံ့အပြားတွင် ပေါက်ရောက်သည်ကို တွေ့ရှိရသော်လည်း မြန်မာပြည်အလယ်ပိုင်း အပူးပိုင်းဒေသများတွင်သာနေရာအနှံ့သဘာဝအတိုင်းပေါက်ရောက်နေသည်ကိုတွေ့ရှိရပြီးကားလမ်း ဘေးဝဲယာတို့တွင်လည်းစနစ်တကျစိုက်ပျိုးထားသည်ကိုလည်းတွေ့ရှိရပါသည်။ တမာကို အရပ်ဒေသ အလိုက်၊နေရာအလိုက် အမျိုးမျိုးခေါ်ဆိုကြပြီး ကုလားတမာ ၊ မြန်မာတမာ၊ တောင်တမာ၊ ရေတမာ၊ ပန်းတမာ၊တမာချို နှင့် သင်္ဘောတမာဟူ၍ရှိပါသည် ။ တမာပင်သည် စားသုံးသူများအတွင် တန်ဖိုး မဖြတ်နိုင်သော အပင်တစ်ပင်ဖြစ်ပါသည် ။ တမာပင်မှထွက်ရှိလာသော တမာစေ့ကိုကြိတ်ပြီး တမာ ပိုးသတ်ဆေး၊ တမာစေ့ကြိတ်မှုန့်ကို မြေသြဇာအဖြစ်စိုက်ပျိုးရေးတွင် အသုံးပြုနိုင်ကြောင်းသိရှိရပါ သည်။ မြန်မာတမာသည် ကုလားတမာထက်အရွက်ကြီးပြီး ၄င်းတမာရွက်နုကို ဆီးသီး၊မကျည်းသီး မှည့်တို့ဖြင့်ရေနွေးဖျောပြီး စားသုံးနိုင်သည့် စားတမာအမျိုးအစားဖြစ်ပါသည်။ တမာပင်သည် အစေး ထွက်သောအပင်မျိုးဖြစ်ပြီး ထွက်ရှိလာသောအစေးကို ဆေးဝါးဖော်စပ်ရာတွင်လည်းကောင်း ၊ အထည်အလိပ်လုပ်ငန်းများ၌ အဝတ်အထည်များကို ကော်တင်သောအခါတွင်လည်း ထည့်သွင်း အသုံးပြုကြပါသည် ။ မြန်မာနိုင်ငံတွင် တမာပင်ကို ဆေးဖက်ဝင်သဖြင့် စိုက်ပျိုးကြောင်းသိရှိရပြီး တမာခေါက်ကို အားတိုးဆေးဖော်စပ်ရာတွင်လည်းကောင်း ၊ တမာသီး၊ တမာရွက်၊ တမာဆီကိုသီးနှံ စိုက်ခင်းများတွင် ပိုးသတ်ဆေးအဖြစ်အသုံးပြုရန်လည်းကောင်း ၊ တမာပွင့် နှင့် တမာစေးကို အနာအကင်းသေစေသောဆေး နှင့် အစာကြေဆေးဖော်စပ်ရာ၌လည်းကောင်းအသုံးပြုကြပါသည် ။ တမာဆီကိုသန်ကျဆေးအဖြစ်အသုံးပြုပြီးတမာရွက်ကိုကြိတ်၍အုံလျှင် ဝဲခြောက်နှင့်ပြည်တည်သော အဖုအပိန့်တို့ကိုပျောက်ကင်းစေနိုင်ကြောင်း၊အရည်ပြားယားယံမှုကိုလည်းသက်သာစေကြောင်းသိရှိ ရပါသည်။တမာအရွက်မှာ ပိုးမွှားအတော်များများကိုနိုင်သည့် အာနိသင်ရှိသောကြောင့် အနာဖြစ် သည့်အခါ တမာရွက်ပြုတ်ရည်နှင့်အနာကိုဖန်ရည်ဆေးပေးခြင်း၊တမာရွက်ပြုတ်ရည်ဖြင့်ရေချိုးပေးပါ ကအရည်ပြားယားယံမှုကို ပျောက်ကင်းသက်သာကြောင်း သိရှိရပါသည်။ တမာရွက်နုကို တစ်နှစ် တစ်ခါစားသုံးပေးခြင်းဖြင့်လည်း အူမကြီးကင်ဆာရောဂါကို ကာကွယ်ပေးကြောင်းသိရှိရပါသည် ။ ယခုအခါ ရာသီပေါ်တမာရွက်နုများဖြိုင်ဖြိုင်ပေါ်နေပြီဖြစ်သည့်အတွက် အညာဒေသနေပြည်သူများ အနေဖြင့် တမာရွက်နုများကိုခူးဆွတ်ပြီး ဆီးသီးခြောက်၊မကျည်းသီးမှည့်နှင့်နနွင်းမှုန့်အနည်းငယ် ထည့်၍  ရေနွေးနှင့်ဖျောကာ  တမာရွက်နုများကို (၁)ပိဿာ (၁၅၀၀၀)ကျပ်နှုန်းဖြင့်  ရောင်းချနေပြီး

မိသားစုအပိုဝင်ငွေရရှိနေကြောင်းသိရှိရပါသည် ။ အညာဒေသမှထွက်ရှိလာသော တမာရွက်နုကို ခရမ်းချဉ်သီးငါးပိချက်ဟင်းဖြင့်တွဲဖက်၍ စားသုံးပေးခြင်းဖြင့် အစာလည်းဆေး ၊ ဆေးလည်းအစာ အဖြစ်တစ်နှစ်တစ်ခါဝယ်ယူစားသုံးခြင်းဖြင့် ကျန်းမာရေးအတွက် အထောက်အကူဖြစ်စေသော တမာရွက်နုကိုဝယ်ယူစားသုံးပေးသင့်ပါကြောင်း ၊ တမာပင်သည် တစ်ပင်လုံးအသုံးဝင်သည့်အပင် ဖြစ်ကြောင်းရေးသားတင်ပြအပ်ပါသည်။

DOCA(မန္တလေး)