မြေပဲ

မြေပဲတွင် ပင်ထောင်မြေပဲနှင့်ပင်ပြန့်မြေပဲဟူ၍ အဓိကအားဖြင့်နှစ်မျိုးရှိပြီး ပင်ထောင်မြေပဲမှာ ပင်စည်နှင့်အကိုင်းများမှာ ထောင်မတ်၍ ပေါက်လေ့ရှိပြီး အသီးမှာ အပင်၏အောက်ခြေ၌စုပုံ၍သီးပြီး များသောအားဖြင့်သေးငယ်လေ့ရှိပါသည်။ ပင်ထောင်မြေပဲ၏ အတောင့်မှာပါး၍ပျော့ပြီး အစေ့အဆန် ပြည့်ဝပါသည်။ ပင်ပြန့်မြေပဲသည် ပင်စည်သာထောင်မတ်ပြီး အကိုင်းများမှာမြေပေါ်တွင် ဝပ်တွားလေ့ရှိ ပြီး အသီးများမှာအကိုင်းများတစ်လျှောက် မြေနှင့်ထိသောနေရာများတွင် သီးလေ့ရှိပါသည်။အတောင့်ခွံမာ ပြီး အစေ့အဆန်မပြည့်ဝတတ်ပါ။

          ပင်ထောင်မြေပဲကို မိုးရာသီ နှင့် ဆောင်းရာသီ၊ ရာသီနစ်မျိုးစလုံးတွင်စိုက်ပျိုးနိုင်ပြီး ပင်ပြန့်မြေပဲကို မိုးရာသီတွင်သာစိုက်ပျိုးနိုင်ပါသည်။ မြေပဲစိုက်ပျိုးရန် မိုးရေချိန်လိုအပ်ချက်မှာ သုံးဆယ့်ငါးလက်မမှ လေးဆယ့်ငါးလက်မအထိမှာအကောင်းဆုံးဖြစ်ပါသည်။ ပင်ထောင်မြေပဲသည် အစေ့ငုပ်ချိန်တိုတောင်း သောကြောင့် မိုးရာသီတွင်စိုက်ပျိုး၍ရရှိလာသော မျိုးစေ့များကို ဆောင်းရာသီတွင် ဆက်လက်စိုက်ပျိုး နိုင်ပါသည်။ ပင်ပြန့်မြေပဲမှာ အစေ့ငုပ်ချိန်ကြာရှည်သောကြောင့် မိုးရာသီတွင်စိုက်ပျိုး၍ ရရှိလာသော မျိုးစေ့များကို နောင်နှစ်မိုးရာသီရောက်မှသာ ပြန်လည်စိုက်ပျိုးရလေ့ရှိပါသည်။ အကယ်၍ ပင်ပြန့်မြေပဲမျိုး ကိုဆောင်းတွင်စိုက်ပျိုးလိုပါက အစေ့ငုပ်ခြင်းကိုဖျက်ပေးရန်လိုအပ်ပြီး ယင်းသို့ပြုလုပ်ပေးရန်အတွက် ၃၀ ဒီဂရီစင်တီဂရိတ်ရှိသော အခန်းအတွင်း၌ မျိုးစေ့များကို ရက်သုံးဆယ်ကြာ သိုလှောင်ထားခြင်းဖြင့် အစေ့ငုပ်ခြင်းကိုဖျက်ပစ်နိုင်ပြီး ဆောင်းရာသီတွင်ဆက်လက်စိုက်ပျိုးနိုင်ပါသည်။

          မြေပဲစိုက်ပျိုးရာတွင် ရေမဝပ်၍ သဲဆန်သောမြေအမျိုးအစားမျိုးတွင်စိုက်ပျိုးပါက အသင့်တော်ဆုံး ဖြစ်ပြီး သစ်ဆွေးဓါတ်များလွန်းသောမြေတွင် မြေပဲအရောင်မှာမည်းလေ့ရှိပါသည်။ မြေစေးတွင် စိုက်ပျိုး လိုပါက မြေမွစေရန်အတွက် ထုံး၊ ဖွဲ၊ စပါးခွံ၊ သဲ၊ မြေဆွေး စသည်တို့ကို အရင်ထည့်ပေးပြီးမှ ထွန်ယက် စိုက်ပျိုးနိုင်ပါသည်။ မြေပဲမစိုက်မီ မြေကို ထွန်ရေးနက်နက်နှင့် ညက်နေအောင်ဦးစွာပြုပြင်ရန်လိုအပ်ပြီး ပေါင်းမြတ်များပြောင်စင်အောင် ရှင်းလင်းရန်အထူးသတိထားလုပ်ဆောင်ရန်လိုအပ်ပါသည်။ ပင်ထောင် မြေပဲစိုက်ပျိုးရာတွင် တစ်တန်းနှင့်တစ်တန်း ဆယ့်ငါးလက်မမှ ဆယ့်ရှစ်လက်မ၊ တစ်ပင်နှင့်တစ်ပင် နှစ်လက်မမှ သုံးလက်မခြား၍ စိုက်ပျိုးရပါသည်။ ပင်ပြန့်မြေပဲကို တစ်တန်းနှင့်တစ်တန်း ဆယ့်ရှစ်လက်မ တစ်ပင်နှင့် တစ်ပင် ခြောက်လက်မခန့်ခြား၍ စိုက်ပျိုးရပါသည်။

          စိုက်ပျိုးသည့်အခါ ပင်ထောင်မြေပဲကို အတောင့်လိုက်စိုက်ပျိုးနိုင်ပြီး အခွံချွတ်၍လည်းစိုက်ပျိုးနိုင် ပါသည်။ အတောင့်လိုက်စိုက်ပျိုးလိုပါက ရေအေးအေးတွင် ဆယ့်နှစ်နာရီမှ နှစ်ဆယ့်လေးနာရီအထိစိမ်ပြီး နောက် တစ်နာရီ နှစ်နာရီခန့် အခြောက်ခံထားပြီး စိုက်ပျိုးပါကအသင့်တော်ဆုံးဖြစ်ပါသည်။ အစေ့လိုက် စိုက်ပျိုးပါက မြေအစိုတွင် အစေ့ (၁၀၀) ခန့်မြုပ်၍ ဂုန်နီအိတ်ဖြင့် ဖုံးပေးထားကာ ခြောက်ရက်အကြာ ၈၀ ရာခိုင်နှုန်းခန့် အပင်ပေါက်လာပါက စိုက်ပျိုးရန်အသင့်တော်ဆုံးဖြစ်ပါသည်။

          ပင်ထောင်မြေပဲကို စိုက်ပျိုးရာတွင် မျိုးစေ့နှုန်းမှာ မြေအခြေအနေပေါ်မူတည်၍ တစ်တင်းခွဲမှ နှစ် တင်းခွဲအထိလိုအပ်ပြီး ပင်ပြန့်မြေပဲမှာတစ်တင်းမှတစ်တင်းခွဲအထိလိုအပ်ပါသည်။ စိုက်ပျိုးပြီး ၄ရက်မှ ၅ ရက်ကြာသည့်အခါ အပင်များပေါက်လာပြီး၊ ညှောင့်ပေါက်စတွင် ထွန်ဖြင့်ကြောင်းပေးပါက အညှောင့် ပေါက်နှုန်းပိုမိုကောင်းမွန်မည်ဖြစ်ပါသည်။  စိုက်ပျိုးပြီး (၂၂) ရက်ကြာသည့်အခါ ပန်းများစတင်ပွင့်လာပြီး နောက် ၄ရက် ၅ရက် ဆက်တိုက်အပွင့်များဖြိုင်ဖြိုင်ပွင့်လာတတ်ပါသည်။

          မြေပဲတွင် ကျရောက်တတ်သော ပိုးအမျိုးအစားများမှာ ရွက်လိပ်ပိုး၊ ဖိုးလမင်းကျိုင်း၊ မြေပဲပင်ဖြတ် ပိုးနှင့် ပျပိုးတို့ဖြစ်ကြပြီး ကျရောက်တတ်သောရောဂါများမှာ မြေပဲရွက်ပြောက်ရောဂါ၊ မြေပဲပုပ်ရောဂါ၊ မြေ ပဲပင်နာကျရောဂါ၊ မြေပဲသံချေးရောဂါ၊ မြေပဲအမြစ်ပုပ်ရောဂါ၊ မြေပဲမြစ်ရောဂါ၊ မြေပဲစုံတံမြတ်စည်းရောဂါ တို့ဖြစ်ပါသည်။

          မြေပဲ၏ ပင်စည်များညှိုးလာပြီး အရွက်ဝါ၍ ကြွေကျလာပါက မြေပဲပင်ကိုနုတ်ကြည့်ပြီးနောက် အတောင့်ခွံ ခွဲကြည့်လျှင် အခွံအတွင်းသား အညိုရောင်ဖြစ်နေပါက နုတ်သိမ်းချိန်၊ ရိတ်သိမ်းချိန်ရောက်ပြီ ဖြစ်ပါသည်။ အကယ်၍ မြေပဲအားနုတ်သိမ်းချိန်နောက်ကျပါက နုတ်ရခက်မည်ဖြစ်ပြီး အတောင့်များမှာ ပြတ်၍ကျန်နေခဲ့တတ်ပါသည်။ မြေပဲနုတ်သိမ်းချိန်စောပါက အတောင့်ထဲ၌ ရေများနေသဖြင့် နေကြာကြာ လှန်းရသည့်အတွက် ဆီထွက်နှုန်းမှာ နည်းပါးသွားမည်ဖြစ်ပါသည်။ မြေပဲအားနုတ်သိမ်းပြီးနောက် ငါးကြိမ် ခြောက်ကြိမ်ခန့်နေလှန်းပြီးမှ သိုလှောင်ရပါသည်။  ပင်ပြန့်မြေပဲကို ကောက်သိမ်းယူရာတွင် အကျယ် နှစ်ပေခွဲ သုံးပေခန့်ရှိသော ဓါးကွင်းတပ်ထားသည့်ထွန်ကို အတန်းကြားထွန်ပေးပြီး အမြစ်များကို ဦးစွာ ဖြတ်ပစ်ရပါသည်။ အမြစ်များပြတ်၍ ကျွတ်ထွက်လာသော မြေပဲပင်များကို ကောက်ယူစုပုံပြီး အတောင့် များကို လက်ဖြင့်သော်လည်းကောင်း တုတ်ဖြင့်သော်လည်းကောင်းရိုက်၍ခြွေယူရပါသည်။

          အထက်ပါကဲသို့ မြေပဲအား စနစ်တစ်ကျလေ့လာ၍ စိုက်ပျိုးပါက မြေပဲအထွက်နှုန်း ပိုမိုကောင်းမွန် ပြီး ဆီထွက်နှုန်းများပြားမည်ဖြစ်ပါသည်။ ၎င်းအပြင် အထွက်နှုန်းပိုမိုကောင်းမွန်စေရန်အတွက် လိုအပ် သောအခြေခံသဘောတရားများမှာ တစ်ဧကလျှင် စိုက်ပျိုးရမည့်အပင်အရေအတွက်များ သင့်တင့်မျှတစွာ စိုက်ပျိုးခြင်း၊ အသီးအတင်ဆုံးဖြစ်အောင် ဆောင်ရွက်ခြင်း၊ ကျရောက်တတ်သောပိုးများနှင့် ရောဂါများ အတွက် ကြိုတင်ပြင်ဆင်၍ ကာကွယ်နှိမ်နင်းခြင်း၊ အလေအလွင့်နည်းပါးအောင် နုတ်သိမ်းခြင်း၊ အစေ့ အဆန် အောင်မြင်မှုများပြားအောင်စိုက်ပျိုးခြင်းနှင့်အစေ့အလေးချိန်စီးအောင်ဆောင်ရွက်ခြင်းဖြင့် တစ်ဧက အထွက်နှုန်းပိုမိုများပြားမည်ဖြစ်ပါကြောင်း ရေးသားတင်ပြလိုက်ပါသည်။

DOCA(ရှမ်း)