ရှားစောင်းပင်၏အကျိုးအာနိသင်နှင့်ကျန်းမာရေးဗဟုသုတ

ရှားစောင်းလက်ပတ်ကို အင်္ဂလိပ်နာမည်အနေဖြင့် Aloes သို့မဟုတ်  Aloevera လို့ ခေါ်ကြ ပါသည်။ရုက္ခဗေဒနာမည်ကတော့ Aloe veraLinn ဖြစ်ပါသည်။ မျိုးရင်းကတော့ Aloeaceae ဖြစ်ပါသည်။ ရှားစောင်းလတ်ပတ်ပင်သည် မိုးနည်းပြီးခြောက်သွေ့တဲ့နေရာဒေသ တွေမှာ ရှင်သန် ကြီးထွားကြပါသည်။အထူးသဖြင့်အာဖရိက၊အိန္ဒိယနဲ့တခြားသော ပူပြင်းခြောက်သွေ့သော နေရာ ဒေသတွင် ရှားစောင်းလက်ပတ်ပင်များ ကိုအများဆုံးတွေ့ရှိရပါသည်။ ရှားစောင်းလက်ပတ် ပင်ကို မြန်မာနိုင်ငံတွင် သဘာဝပေါက်ပင်အနေနှင့်လည်းတွေ့နိုင်သကဲ့သို့ စိုက်ပျိုးပင်အနေနှင့်လည်း တွေ့ရှိနိုင်ပါသည်။ရှားစောင်းပင်၏ အရည်ရွှမ်းသော အရွက်လက်တံများသည် အပင်အရင်းမှ စုပြုံပြီး ဖြာထွက်ပါသည်။ရှားစောင်းလက်ပတ်၏ အပေါ်မျက်နှာပြင်သည် အနည်းငယ်ခွက်ပြီး ရွက်ထိပ်ပိုင်းသည် ချွန်သွားကာ ရွက်အနားလေးတွင် ဆူးကလေးများ ရှိပါသည်။ ရှားစောင်း လက်ပတ်၏ အရွက်လက်တံများသည် ရေဓာတ်ကို စုပ်ယူထားသောကြောင့် စိမ်းစိုပြီးတာရှည် ခံပါသည်။ ရှားစောင်းလက်ပတ်သည် အပြင်မှာအစိမ်းရောင်ရှိပြီး အတွင်းထဲတွင် ဖြူချွဲပြီး အသား များပြည့်လျက်ရှိပါသည်။ရှားစောင်းလက်ပတ်ပင်ထဲတွင် Aloin, Barbaloin, aloe emodin, resins, tannis and polysaccharides စသည့်ဗီတာမင်ဓာတ်ပေါင်း များပြားစွာ ပါဝင်ပါ သည်။ရှားစောင်းပင်တွင် ဗီတာမင်ဓာတ်ပေါင်းများပြားစွာ ပါသောကြောင့် အနာများနှင့်အပူ လောင်ခြင်းကိုလည်းသက်သာပျောက်ကင်းစေနိုင်ပြီး အရေပြားပိုးဝင်တာကိုလည်း သက်သာ စေကြောင်းလေ့လာတွေ့ရှိရသည့် အပြင် သွေးထဲတွင်ရှိသော သွေးတွင်းအဆီဓာတ်ကိုလည်း

ကျဆင်းစေနိုင်ကြောင်းသိရှိရပါသည်။ရှားစောင်းလက်ပတ်များတွင် ဗီတာမင်နှင့်သတ္ထုဓာတ် များစွာ ပါဝင်သောကြောင့် ယိုထိုးကာနေ့စဉ်စားပေးလျှင် ကိုယ်ခံအားကိုလည်း မြင့်တက်စေပြီး အသားအရေစိုပြေကာ နေလောင်ဒဏ်ကြောင့် အသားအရေပျက်စီးခြင်းကိုလည်း ပျောက်ကင်း သက်သာစေနိုင်သည့်အပြင် အကောင် တစ်ခုခုကိုက်၍ ရောင်ရမ်းတာ၊ယားယံတာတို့ကိုလည်း ရှားစောင်းလက်ပတ်၏အဖြူသားအချွဲများနှင့် လိမ်းပေးခြင်းဖြင့် သက်သာစေနိုင်ကြောင်းလေ့လာ ချက်များအရသိရှိရပါသည်။မြန်မာ့တိုင်းရင်းဆေးအဘိဓာန်ထဲတွင်လည်း ရှားစောင်းလက်ပတ်၏ အရသာသည် အေးပြီးခါးသောအရသာရှိသည်ဟု ဆိုထားကြပါသည်။အမျိုးသမီးများ၏ မီးယပ် သွေးကို မှန်စေသောကြောင့် ရှားစောင်းလက်ပတ်ကိုစားပေး သင့်ကြောင်းအကြံပြုအပ်ပါသည်။ထို့ အပြင်အလှအပနှင့်ဆိုင်သော ထုတ်ကုန်များဖြစ်သည့် ခေါင်းလျှော်ရည်ထဲတွင်လည်း ထည့်သွင်းပြီး ထုတ်လုပ်နိုင်ကြသည့်အပြင်အသားအရေအတွက် လည်းကောင်းမွန်ပြီး ပိုးဝင်တာကို လည်း ကာကွယ်ပေးနိုင်သောကြောင့် စနိုးတာဝါနှင့်တစ်ရှုးအစို Wet tissue တွင်လည်း ရှားစောင်းလက်ပတ်ကို ထည့်သွင်းပြီး ထုတ်လုပ်လာကြ ကြောင်းသိရှိရပါသည်။ ရှားစောင်း လက်ပတ်ပင်သည် နေအိမ်တွင် နေရာမယူဘဲ အလှဆင်ပန်းအိုးနှင့် အလွယ်တကူ စိုက်ပျိုးနိုင်သည့် အပင်ဖြစ်ပါသည်။အိမ်တွင် ရှားစောင်းလက်ပတ်ပင်များကို စိုက်ပျိုးထားခြင်းဖြင့် အိမ်နေရင်းနှင့် လည်း ရှားစောင်းလက်ပတ်ကိုသုံးပြီး အသားအရေ ပေါင်းတင်ခြင်၊ဆံပင်ပေါင်းတင်ခြင်းများကို မိမိဘာသာလုပ်နိုင်သလို ကွန်ပျူတာအသုံးများ၍ မျက်စိညောင်းကိုက်ခြင်း၊ အကောင်ကိုက်၍ အသားအရေ နီရဲရောင်ရမ်းတာတွေကိုလည်း ရှားစောင်းလက်ပတ်ရဲ့ အတွင်းသားလေးကိုခြစ်ယူ ကာကပ်ထားပေးခြင်းဖြင့် သက်သာနိုင်စေကြောင်း လေ့လာတွေ့ရှိခဲ့ပါသည်။ ရှားစောင်းလက်ပတ် အပင်တွင်ရေဓာတ်များစွာသိုလှောင်ထားသလို အစိုဓာတ်ကိုထိန်းပေးနိုင်တဲ့ ဒြပ်ပေါင်းတွေလည်း ပါဝင်သောကြောင့်အရေပြားပေါ် မှန်မှန်လိမ်းပေးလျှင် collagen (ကော်လာဂျင်) ပိုထွက်ရှိအောင် အားပေးတာကြောင့် အရေပြားပေါ်က အရေးအကြောင်းတွေကို လျော့နည်းသွားစေနိုင်ကြောင်း လေ့လာချက်များအရသိရှိခဲ့ပါသည်။အပန်းမကြီးဘဲ အသုံးလည်း ဝင်တဲ့ ရှားစောင်းလက်ပတ်ပင် ကို အိမ်တွင် စိုက်ပျိုးကြဖို့အကြံပြုအပ်ပါသည်။

DOCA(မန္တလေး)