သင်္ဘောပင်ကို ကမ္ဘာ့အပူပိုင်းဇုံဒေသနိုင်ငံများ၌ အတွေ့ရများသော်လည်း စင်စစ် သင်္ဘောပင်သည် မြောက်အမေရိကတိုက်တောင်ပိုင်း၊ အပူပိုင်းဒေသနှင့် အနောက်အိန္ဒိယ ကျွန်းစုတို့တွင် မူလပေါက်ရောက်ခဲ့သော အပင်မျိုးဖြစ်ပြီး အိန္ဒိယ၊ သီဟိုဠ်ကျွန်း စသော ကမ္ဘာ့အပူပိုင်းဒေသများသို့ တစ်စတစ်စမျိုး ပျံ့ခဲ့ရာမှ မြန်မာနိုင်ငံသို့လည်း ရောက်ရှိ ခဲ့ကြောင်း လေ့လာမှုများအရသိရှိရပါသည်။ သင်္ဘောပင်ကို ရုက္ခဗေဒအမည်အားဖြင့် ကာရိကာပါပယာဟု ခေါ်ပါသည်။ သင်္ဘောပင်ကို မြန်မာနိုင်ငံအနှံ့အပြားရှိ ဒေသအများ အပြားတွင် စီးပွားဖြစ်ရောင်းချရန်သော်လည်းကောင်း၊ မိသားစုစားသုံးရန်အတွက် သော် လည်းကောင်း စိုက်ပျိုးလေ့ရှိကြသည်။ သင်္ဘောပင်များသည်ဆယ်လခန့်ကြာလျှင်အပွင့် ပွင့်၍ အသီးများသီးစပြုလေသည်။
သင်္ဘောရွက်နုနုများကို လက်ဖက်နှင့်တွဲ၍ စားတတ်ကြသကဲ့သို့ ပြုတ်၍သော် လည်းကောင်း၊ မီးအုံး၍သော်လည်းကောင်း တို့စားကြသည်။ သင်္ဘောရွက်သည်ခါးသည့် အရသာရှိသဖြင် လေနာတတ်သူများအတွက် ဆေးတစ်မျိုးဖြစ်စေသည်။ ထို့ပြင်ဝမ်းချုပ် သူများလည်း သင်္ဘောပင်မှအရွက်နုလေးများကို ထမင်းဟင်းတို့စရာအဖြစ်စားသုံးပါက ဝမ်းမှန်စေကြောင်း လူကြီးမိဘများထံမှ မှတ်သားရပါသည်။ အကြောအခြင်နာကြင်သော ဝေဒနာများနှင့် ဆင်ခြေထောက် ရောဂါများအတွက် သင်္ဘောရွက်သည် ဆေးဖက်ဝင် သည်ဟုသိရသည်။
သင်္ဘောသီးအစိမ်းများကို အသုတ်သုတ်စားခြင်း၊ ဟင်းလျာအဖြစ် အသား၊ ငါးများဖြင့် တွဲဖက်ချက်ပြုတ်စားသုံးခြင်း၊ ထန်းလျက်/သကြားတို့ဖြင့် သင်္ဘောယိုထိုး၍ အချိုပွဲများတွင် တည်ခင်းစားသုံးခြင်းများအပြင် သင်္ဘောသီးအစိမ်းများအား အတုံးငယ်များ ပြုလုပ်ပြီး ထုံးရေစိမ်ကာ သင့်တော်သောအပူချိန်တွင် ပြုတ်ပြီးအခြောက်ခံ၍ ဆေးရောင် စုံ(Food Color) များဆိုးပြီး ဒံပေါက်၊ ထောပတ်ထမင်းများတွင် ထည့်သွင်းချက်ပြုတ်ရန် လည်းကောင်း၊ သင်္ဘောသီးအမှည့်ကို ဖျော်ရည်ပြုလုပ်၍လည်းကောင်း၊ အချိုပွဲအသီး အဖြစ် လည်းကောင်းစားသုံးကြသည့်အပြင် အရေပြားကျန်းမာရေး အတွက်အထောက် အကူပြု Antioxidants များပါဝင်ခြင်းကြောင့် အလှကုန်ပစ္စည်းများ(Moisturizer, Lotion, Scrub, Lip Balm etc)ကို တန်ဖိုးမြှင့်ထုတ်ကုန် (Value Added Product) အဖြစ်ထုတ်လုပ်လာကြသည်ကိုလည်း တွေ့ရှိရပါသည်။
သင်္ဘောသီးမှည့်များကို ရာသီမရွေး တွေ့ရသော် လည်း နိုဝင်ဘာလ၊ ဒီဇင်ဘာလ၊ မတ်လနှင့်ဧပြီလများတွင်သာ ပေါပေါများများ ရရှိပါသည်။ ရှေးလူကြီးများ၏ ဆိုရိုးစကားဖြစ်သည့် “မနက်သင်္ဘော ညငှက်ပျော” ဆိုသည့်အတိုင်း သင်္ဘောသီးမှည့်ကို မနက်စောစောအချိန်တွင် စားသုံးခြင်းဖြင့် ဝမ်းမှန်စေပြီး လန်းဆန်းစေပါသည်။
သင်္ဘောသီးတွင် ကယ်လိုရီ၊ကာဘိုဟိုက်ဒရိတ်၊အမျှင်ဓာတ်၊ပရိုတိန်း၊ဗီတာမင် C၊ ဗီတာမင် A၊ ပိုတက်ဆီယမ်၊ ကယ်လ်ဆီယမ်၊ မဂ္ဂနီဆီယမ်၊ ဗီတာမင် B1 B3 B5၊ ဗီတာမင် E၊ ဗီတာမင် K နှင့် Antioxidants များပါဝင်ပါသည်။ သင်္ဘောသီးတွင် ဓာတ်တိုးဆန့်ကျင်ဂုဏ်သတ္တိရှိခြင်း၊ နှလုံးကျန်းမာရေးကောင်းစေခြင်း၊ ကင်ဆာ ဆန့်ကျင်ဂုဏ်သတ္တိရှိခြင်း၊ အစာချေဖျက်အား ကောင်းစေခြင်းနှင့် အရေပြားပျက်စီး ခြင်းကို ကာကွယ်နိုင်ခြင်းစသည့် အကျိုးကျေးဇူးများရှိသဖြင့် စားသုံးသင့်ပါသည်။
သင်္ဘောသီးသည်အထက်ဖော်ပြပါ ကောင်းကျိုးများရှိသော်လည်း သင်္ဘောသီး တွင် ပါဝင်သည့် papain အင်ဇိုင်းသည် ကိုယ်ဝန်ဆောင် အမျိုးသမီးများအတွက် သားအိမ်ကျုံ့ခြင်းကို ဖြစ်ပေါ်စေနိုင်ပြီး ကလေးပျက်ကျသည်အထိ ဖြစ်စေနိုင်သဖြင့် သင်္ဘောသီးအစိမ်းအား စားသုံးပါက သတိပြုစားသုံးရန်လိုအပ်ပါကြောင်း လေ့လာ သိရှိရသည်များကို မျှဝေလိုက်ရပါသည်။
DOCA(မန္တလေး)