မျောက်ငိုသီးမှာ အစိမ်းရောင်ရှိပြီး ပဲကြီးစေ့အရွယ်နီးပါးရှိကြသည်။ ပဲမျိုးရင်းဝင်အုပ်စုဖြစ်ပြီး အင်္ဂလိပ်လို 'Stink bean or Bitter bean' ဟုခေါ်ဆိုကြသည်။ မျောက်ငိုသီးကို တချို့ဒေသတွင် 'သစ်လိမ်သီး၊ သစ်ကဇော်' စသဖြင့်လည်း အမျိုးမျိုးခေါ်ဝေါ်ကြပါသည်။
မျောက်ငိုသီး၏ အနံ့၊ အရသာမှာ ဒညင်းသီးစားရသလို အနံ့၊ အရသာနှင့်တူပြီး ၊ တချို့ ဒညင်းသီးနှင့် မတည့်သောသူများက ဒညင်းသီးအစားထိုးအနေဖြင့် စားသုံးကြပြီး အရသာမှာ ဒညင်းသီးနုနုလေးကို စားရသလို ထုတ်ထုတ်လေးဖြစ်ကြောင်း သိရှိရသည်။
မျောက်ငိုသီးကို ဒညင်းသီးကဲ့သို့ ကြော်စား၊ ဆားရည်စိမ်တို့စရာအနေဖြင့် စားကြသလို ဝက်သားနဲ့ကြော်စားခြင်း၊ ခရမ်းချဉ်သီး၊ ငါးပိတို့ဖြင့် ရောနှောချက်စားခြင်းသာမက မျောက်ငိုသီး ထမင်းကြော်ပြုလုပ်၍လည်း စားသုံးကြပါသည်။ မျောက်ငိုပင်သည် စစ်ကိုင်းတိုင်းအထက်ပိုင်းနှင့် ချင်းပြည်နယ်တွင် အများအပြားပေါက်ရောက်ကြသည်။ ဈေးနှုန်းအနေဖြင့် မျောက်ငိုသီးအတောင့် တစ်စီးလျှင်(၃၀၀၀-3500)ကျပ်၊ အစေ့ထုတ်ပီး နို့စီတစ်ဘူးလျှင်(၃၀၀၀-3500)ကျပ်၊ အသင့်ချက် နို့ဆီတစ်ဘူး (၄0၀၀-4500) ကျပ်ဖြင့် Online ဈေးကွက်တွင် ရောင်းချကြောင်း သိရပါသည်။
မျောက်ငိုသီးတွင် ပရိုတင်းဓါတ်၊ အမျှင်ဓါတ်၊ သံဓါတ်၊ ကယ်လ်စီယမ်ဓါတ်နှင့်အစရှိသဖြင့် အာဟာရဓါတ်များစွာ ပါဝင်သည့်အတွက် မျောက်ငိုသီးကို စားသုံးပါက ကျန်းမာရေးကောင်းကျိုး များစွာကို ရရှိနိုင်မှာဖြစ်ပါသည်။
အသားဓါတ်(Protein) ကြွယ်ဝစွာပါဝင်တာကြောင့် လူ့ခန္ဓာကိုယ်ထဲရှိ မကောင်းသည့် ကိုလက်စထရော (Cholestrol) ဓါတ်များကို လျော့နည်းစေနိုင်ခြင်း၊ သံဓါတ်(Iron) ကြွယ်ဝစွာ ပါဝင်သဖြင့် သွေးအားကောင်းစေပြီး သံဓါတ်မလုံလောက်ရာတွင် ဖြစ်ပေါ်တတ်သော သွေးအားနည်း ခြင်း၊ မောပန်းလွယ်ခြင်းများ ကာကွယ်ပေးနိုင်ခြင်း၊ အမျှင်ဓါတ်(fiber) ကြွယ်ဝစွာပါဝင်သဖြင့် အစာချေစနစ်ကို ကောင်းမွန်စေပြီး ဝမ်းချုပ်ခြင်းမှ ကာကွယ်ပေးခြင်း စသည်ဖြင့် ကျန်းမာရေး အတွက် ကောင်းကျိုးများစွာ ရရှိနိုင်ကြောင်း သိရှိရပါသည်။
DOCA(ရှမ်း)