အင်ဥဆိုသည်မှာ အင်ပင်၏ ဥမဟုတ်ဘဲ ကြွေကျနေသော အင်ရွက်များ မိုးရေနှင့်ထိသောအခါ ပေါက်လာသည့် မှိုအမျိုးအစားတစ်မျိုးဖြစ်ပြီး စားသုံး၍ရသော မြေအောင်းမှိုတစ်မျိုးဖြစ်ပါသည်။ မိုးဦးကျကာလမှာ နေရာင်ခြည်နဲ့ မိုးပေါက်လေးများကျရာမှ အင်ရွက်များနှင့်မြေဆွေးများကနေ အင်ဥလေးများ ဖြစ်ပေါ်လာပါသည်။
ထိုအင်ဥလေးများကို သဘာဝသစ်ဥသစ်ဖုတစ်မျိုးဟုပင်မှတ်ယူလို့ရပါသည်။ အင်ဥမှာ အပြင်ခွံ မဲမဲလေးဖြစ်ပြီး အထဲကို ခွဲလိုက်သည့်အခါ ဖြူဖြူလေးဖြစ်နေလျှင် လတ်ဆတ်ပြီး အရသာရှိပါသည်။ အလယ်မှာ အမဲရောင်ဆိုလျှင် အင်ဥက ရင့်နေပါသည်။ ကောက်ရိုးမှိုကဲ့သို့ ခပ်တောင့်တောင့်လေးရှိ သည့် အင်ဥမှာ ကျန်းမာရေးအတွက် အကျိုးပြုသော ဗီတာမင်B,D၊ copper၊ ပိုတက်ဆီယမ်၊ Selenium၊ ပရိုတင်း၊ အမျှင်ဓာတ်၊ အမိုင်နိုအက်ဆစ်၊ သံဓာတ်နှင့် ဓာတ်တိုးဆန့်ကျင်သော အာနိသင်များပါဝင်နေပါသည်။ ပရိုတင်းဓာတ်များကြွယ်ဝသောကြောင့် ကိုယ်ခံအားကောင်းစေပြီး အရိုးနှင့်ကြွက်သားများကိုသန်မာစေပါသည်။ ဓာတ်တိုးဆန့်ကျင်အာနိသင်က အသားအရေကို ကျန်းမာစေပြီးနေ့စဉ်ထိတွေ့နေရသည့် ဓာတ်တိုးပစ္စည်းများကြောင့် ခန္ဓာကိုယ်မှာ ကင်ဆာ၊ ဆီးချို၊ နှလုံးစသော နာတာရှည်ရောဂါများမဖြစ်အောင် ကာကွယ်ပေးပါသည်။ အမျှင်ဓာတ်ကြွယ်ဝမှုက အစာခြေစနစ်ကိုကောင်းမွန်စေ၍ ဝမ်းမှန်စေကာ အူများကို လှုပ်ရှားမှုကောင်းစေပြီး အူမကြီး ကင်ဆာမဖြစ်အောင်လည်း ကာကွယ်ပေးပါသည်။ သွေးတွင်းကိုလက်စထရောကိုပင် ကျဆင်းစေပြီး နှလုံးကိုလည်း ကျန်းမာစေပါသည်။ ပိုတက်ဆီယမ် နှင့် ဗီတာမင် B ပါဝင်နေမှုကြောင့် သွေးပေါင်ချိန်ကိုလည်း အကောင်းဆုံးထိန်းညှိပေးပြီး သွေးနီဥဆဲလ်များကို အားဖြည့်ပေးခြင်း၊ သံဓာတ်ပါဝင်နေမှုကြောင့် သွေးအားနည်းခြင်းရောဂါများကိုပင် ကာကွယ်ပေးခြင်းစသည့် ကျန်းမာရေး အတွက် ကောင်းကျိုးများစွာရရှိကြောင်းသိရှိရပါသည်။
DOCA(ရှမ်း)