ဒိန်ချဉ်ဆိုသည်မှာ တိရစ္ဆာန်တို့၏ နို့ကို ဘက်တီးရီးယားပိုးမွှားကောင်လေးများဖြင့် အချဉ် ဖောက်ထားသော အရည်တစ်မျိုးဖြစ်သည်။ နွား၏နို့ဖြင့် အများဆုံးသုံး၍ ပြုလုပ်သော်လည်း ကျွဲ၊ ဆိတ်၊ သိုး၊ နွားနောက်စသည့် တိရစ္ဆာန်တို့၏နို့များဖြင့်လည်း အသုံးပြုကြ၍ အရသာမှာ ကွဲပြား ပါသည်။ ဒိန်ချဉ်အမျိုးအစားအနေဖြင့် အဆီပြည့်ဒိန်ချဉ်၊ အဆီထုတ်ဒိန်ချဉ်၊ အဆီမပါဒိန်ချဉ်၊ ဂရိဒိန်ချဉ် စသည်ဖြင့်ရှိကြပြီး ဒိန်ချဉ်အမျိုးအစားပေါ်မူတည်၍ အရသာကွဲပြားခြားနားပါသည်။ ဒိန်ချဉ်ကို သဘာဝအတိုင်း စား၍ရသလို ပျားရည်၊ သကြား၊ ထန်းလျက်ဖြင့်သော်လည်းကောင်း၊ သစ်သီးဝလံများဖြင့်သော်လည်းကောင်း တွဲဖက်စားသုံး၍လည်းရပါသည်။
ဒိန်ချဉ်တွင် အရွယ်တင်နုပျိုလှပစေသည့် ဓာတ်တိုးဆန့်ကျင်ပစ္စည်းများ ပါဝင်နေသောကြောင့် အသားအရေကို စိုပြည်လှပစေပြီး အရွယ်တင်နုပျိုစေပါသည်။ ဒိန်ချဉ်သည် အစာအိမ်နှင့်အူလမ်းကြောင်း ကျန်းမာရေးအတွက် ကောင်းမွန်သည့် ဘက်တီးရီးယား အမြောက်အများပါဝင်သောကြောင့် ဝမ်းမှန်စေပြီး ခံတွင်းပျက်ခြင်း၊ အစားအသောက်ပျက်ခြင်းတို့ကို ပျောက်ကင်းစေပါသည်။ ဒိန်ချဉ်ကို စားသုံးခြင်းဖြင့် အစာအိမ်ကို ပြည့်စေပြီး အဆာခံသောကြောင့် ကိုယ်ခန္ဓာအလေးချိန်လျော့ချရာတွင် အထောက်အကူပြု ပါသည်။ ဒိန်ချဉ်တွင် ကယ်စီယမ်နှင့် ဗီတာမင်D ပါဝင်ခြင်းကြောင့် အရိုးများကို ကြံ့ခိုင်သန်မာစေပါသည်။
ဒိန်ချဉ်သည် သွေးပေါင်ချိန်ကို ထိန်းပေးနိုင်သောကြောင့် နှလုံးသွေးကြောကျဉ်းရောဂါ ဖြစ်ခြင်းမှ ကာကွယ်ပေးပါသည်။ ဒိန်ချဉ်သောက်သုံးခြင်းအားဖြင့် ခန္ဓာကိုယ်ရောင်ရမ်းနာကျင်ခြင်းများကို လျော့နည်း သက်သာစေသည့်အပြင် lactic acid ပါဝင်ခြင်းကြောင့် သွားဖုံးများ၌ ဖြစ်ပေါ်တတ်သော ရောဂါများကို ကာကွယ်ပေးပြီး သွားများပျက်စီးခြင်း၊ ခံတွင်းနံ့ဆိုးရွားခြင်းကို ကာကွယ်ပေးနိုင်ပါသည်။ ဒိန်ချဉ်တွင်ပါဝင်သည့် Probiotics များက ခန္ဓာကိုယ်တွင် ဓာတ်မတည့်မှုကိုဖြစ်စေနိုင်သည့် အညစ်အကြေးများ၊ ပိုးမွှားများ၏ တုံ့ပြန်မှုကိုလည်း လျော့ကျစေပါသည်။ ရာသီအကူးအပြောင်းတွင်ဖြစ်တတ်သည့် ဖျားနာခြင်း ကိုလည်း ကာကွယ်ဖို့ကူညီပေးပါသည်။ အမျိုးသမီးများအနေဖြင့် ဒိန်ချဉ်ကိုစားသုံးပေးမည်ဆိုပါက အမျိုးသမီး များတွင်ဖြစ်တတ်သည့် ရောဂါများကို ကာကွယ်နိုင်သည့်အပြင် ဘက်တီးရီးယားများကို တိုက်ဖျက် ပေးပြီး pH ပမာဏကို အကောင်းဆုံးထိန်းညှိပေးနိုင်ပါသည်။
ဒိန်ချဉ်သည် လူတို့၏ ကျန်းမာရေးအတွက်အကျိုးကျေးဇူးများစွာရှိသလို “တန်ဆေး လွန်ဘေး” ဟူသော ဆိုရိုးစကားကဲ့သို့ တစ်ရက်လျှင် ၂ ကြိမ် ၃ ကြိမ်ထက်ပို၍ မစားသုံးသင့်ပါကြောင်းနှင့် ဒိန်ချဉ်အမျိုးအစား၊ ပါဝင်မှုပမာဏ အပေါ်မူတည်၍ ဈေးနှုန်းများကွာခြားမှုရှိကြောင်း လေ့လာသိရှိမိ သည်များကို တင်ပြလိုက်ရပါသည်။
DOCA(မန္တလေး)