HighLight News

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့် စားသုံးသူပြည်သူများအတွက် ကုန်စည်နှင့်ဝန်ဆောင်မှုများကိုအသုံးပြုရာတွင် ဘေးအန္တရာယ်ကင်းရှင်းစေရေး၊ လုံခြုံစိတ်ချရမှုရှိစေရေးအတွက် အစဉ်ဆောင်ရွက်လျက်ရှိပါသည်။ စားသုံးသူများအတွက် လုံခြုံစိတ်ချရမှုမရှိသောကုန်စည်များ၊ စားသုံးသူကာကွယ်ရေးဥပဒေ (၂၀၁၉)၊ အခန်း(၁၈)၊ ပုဒ်မ ၄၁ပါ ကုန်အညွှန်းအမှတ်အသားများပြည့်စုံမှုမရှိသော ကုန်စည်များထုတ်လုပ်ဖြန့်ဖြူးခြင်း၊  ဈေးကွက်အတွင်း တင်သွင်းရောင်းချခြင်းမရှိစေရန်ရည်ရွယ်၍ မုံရွာခရိုင်ဦးစီးမှူးရုံးမှ ဒု-ခရိုင်ဦးစီးမှူး ချောင်းဦးမြို့နယ်တာဝန်ခံနှင့် ဝန်ထမ်း (၁) ဦး တို့ဦးဆောင်၍ ခရိုင်တိုင်းရင်ဆေးပညာဦးစီးဌာနမှ ဝန်ထမ်း(၁)ဦး၊ မြို့နယ်စည်ပင်သာယာရေးအဖွဲ့မှ ဝန်ထမ်း(၁)ဦးတို့သည် (၈-၅-၂၀၂၄) ရက်နေ့၊ နံနက် (၁၀:၀၀) နာရီအချိန်တွင် မုံရွာမြိုပေါ်ရှိ တိုင်းရင်းဆေးအရောင်းဆိုင်များသို့သွားရောက်ကာ ဈေးကွက်စောင့်ကြည့်စစ်ဆေးခဲ့ကြောင်း သတင်းရရှိပါသည်။

       ထိုသို့ဆောင်ရွက်ရာ မုံရွာမြို့ပေါ်ရှိ တိုင်းရင်းဆေးအရောင်းဆိုင်များတွင်  ကုန်အညွှန်းအမှတ်အသားပြည့်စုံမှုမရှိသော ကုန်စည်များရောင်းချနေခြင်းရှိ/မရှိ စစ်ဆေးခဲ့ကြပြီး ဆိုင်ပိုင်ရှင်များအား  စီးပွားရေးလုပ်ငန်းရှင်၏တာဝန်များနှင့် ကုန်အညွှန်းအမှတ်အသားပြည့်စုံမှုမရှိသော ကုန်စည်များအား တင်သွင်းရောင်းချခြင်းမပြုကြရန်ပြောကြားခဲ့ပြီး ကုန်အညွှန်အမှတ်အသားဖော်ပြချက်ဆိုင်ရာ အသိပညာပေးလက်ကမ်းစာစောင်များပေးဝေခဲ့ကြောင်း သတင်းရရှိပါသည်။

DOCA(စစ်ကိုင်း)

    စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူး၊ ဒု-ခရိုင်ဦးစီးမှူးနှင့် ဝန်ထမ်း(၃)ဦးတို့သည် ခရိုင်အထူးစုံစမ်းစစ်ဆေးရေးဦးစီးဌာန၊  ခရိုင်ကျန်းမာရေးဦးစီးဌာနနှင့် မြို့နယ်စည်ပင်သာယာရေးအဖွဲ့တို့မှ တာဝန်ရှိသူများနှင့်အတူ ၂၀၂၄ခုနှစ်၊ မေလ ၈ရက်နေ့၊ နံနက် (၁၀း၀၀) နာရီအချိန်တွင် စစ်ကိုင်းမြို့ပေါ်ရှိ ဆန်၊ ဆီအရောင်းဆိုင်များဖြစ်သော တော်ဝင်၊ မြနှင်းဆီနှင့် မေတ္တာရှင်ဆိုင်များသို့သွားရောက်ကွင်းဆင်း၍ ဈေးနှုန်းမြှင့်တင်ရောင်းချခြင်းအလို့ငှာ သိုလှောင်ခြင်း၊ ဖြန့်ဖြူးရောင်းချမှုများရှိ/ မရှိကို ကွင်းဆင်းစစ်ဆေးခဲ့ပါသည်။ ထိုသို့ဆောင်ရွက်ရာတွင် စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူးဦးဆောင်သော ပူးပေါင်းအဖွဲ့သည် ဈေးနှုန်းမြှင့်တင်ရောင်းချခြင်း၊ ဈေးနှုန်းမြှင့်တင်ရန် သိုလှောင်ထားခြင်းများမပြုလုပ်ရန်၊ ဈေးနှုန်းမြှင့်တင်ဖြန့်ဖြူးရောင်းချခြင်း၊ ဈေးကစားရန်ရည်ရွယ်ချက်ဖြင့် သိုလှောင်ထားခြင်းများရှိပါက အရေးကြီးဝန်ဆောင်မှုဥပဒေအရ အရေးယူမည်ဖြစ်ကြောင်း အသိပညာပေးဆွေးနွေးခြင်းများ ဆောင်ရွက်ခဲ့ပါသည်။ စစ်ကိုင်းမြို့ပေါ်ရှိ ဆန်၊ ဆီအရောင်းဆိုင်များဖြစ်သော တော်ဝင်၊ မြနှင်းဆီနှင့် မေတ္တာရှင်ဆန်၊ ဆီအရောင်းဆိုင်များအနေဖြင့် ဆန်များကို ရွှေဘိုမြို့မှ အများဆုံးဝယ်ယူရောင်းချကြောင်း၊ ရွှေဘိုမြို့သို့ သွားရောက်ဝယ်ယူ၍သော်လည်းကောင်း၊ မိမိတို့ဆိုင်များသို့ အရောက်ပို့၍သော်လည်းကောင်း ဝယ်ယူကြောင်း၊ ရောင်းလိုအားရှိသလောက် ဝယ်ယူကြောင်း၊  စစ်ကိုင်းမြို့ပေါ်ရှိ ပြည်သူများ ကြိုက်နှစ်သက်စွာဝယ်ယူသုံးစွဲသော အများဆုံးဆန်မှာ ရွှေဘိုပေါ်ဆန်း၊ ဧရာမင်းနှင့် မနောသုခဆန်များဖြစ်ပြီး၊ ဆန်အမျိုးအစားအလိုက် (၂၄) ပြည်ပါ တစ်အိတ်ဈေးနှုန်းများမှာ ရွှေဘိုပေါ်ဆန်း   ကျပ်(၁၅၅၀၀၀ မှ ၁၆၀၀၀၀)၊ ဧရာမင်း ကျပ်( ၁၃၀၀၀၀ မှ ၁၆၀၀၀၀) နှင့် မနောသုခ ကျပ် (၉၆၀၀၀ မှ ၁၀၀၀၀၀)  ဈေးနှုန်းအသီးသီးဖြင့် ရောင်းချကြကြောင်း၊ ဆန်များကို သိုလှောင်ထားခြင်းမရှိဘဲ ရောင်းအားရှိသလောက် မှာယူရောင်းချသောကြောင့် ဆန်သိုလှောင်သော ဆန်ဂိုဒေါင်များမရှိပါကြောင်း၊ အရောင်းဆိုင်များတွင်သာ လိုသလောက် ဝယ်ယူရောင်းချနေသည်ကို စစ်ဆေးတွေ့ရှိခဲ့ကြောင်း သတင်းရရှိပါသည်။
DOCA(စစ်ကိုင်း)

     ရန်ကုန်တိုင်းဒေသကြီး၊ စားသုံးသူရေးရာဦးစီးမှူးရုံး၏ ညွှန်ကြားချက်အရ ခရမ်းမြို့နယ်အတွင်းရှိ ဒေသခံပြည်သူများ စားသောက်ကုန်ပစ္စည်းအမျိုးမျိုးကိုဝယ်ယူစားသုံးရာ၌ အစားအစာဘေးကင်းလုံခြုံမှုရှိစေရန်နှင့် စနစ်တကျဝယ်ယူစားသုံးတတ်စေရန်ရည်ရွယ်၍ ထုတ်ကုန်များလုံခြုံစိတ်ချရမှုရှိစေရေးတို့အတွက် ၂၀၂၄ခုနှစ်၊ မေလ(၆)ရက်နေ့၊ နံနက်(၁၀:၃၀)နာရီအချိန်၌စည်ပင်သာယာမြို့မဈေး ပြင်ပရပ်ကွက်များတွင် ရောင်းချလျက်ရှိသော အအေးနှင့်မုန့်မျိုးစုံစတိုးဆိုင်များသို့သွားရောက်ကာ အသင့်သောက်အချိုရည်အမျိုးမျိုးတို့တွင် သတ်မှတ်ထားသော ကုန်အညွှန်းအမှတ်အသား ပြည့်စုံစွာဖော်ပြထားခြင်းရှိ/ မရှိ ကွင်းဆင်းစစ်ဆေးခဲ့ကြောင်းသိရသည်။

      ထိုသို့ကွင်းဆင်းစစ်ဆေးခဲ့ရာတွင် မြို့နယ်စည်ပင်သာယာရေးဦးစီးဌာနမှ ဈေးတာဝန်ခံနှင့်ဝန်ထမ်းများ၊ စားသုံးသူရေးရာဦးစီးဌာနမှ မြို့နယ်တာဝန်ခံတို့ ပူးပေါင်းအဖွဲ့သည် ခရမ်းမြို့နယ်၊ စည်ပင်သာယာမြို့မဈေး၏ အရှေ့ခြမ်း၊ အမှတ်(၄)ရပ်ကွက်ရှိ လန်းဆန်းစတိုးဆိုင်၊ အမှတ် (၆) ရပ်ကွက်ရှိ မင်းကြီးစတိုးဆိုင်၊ အမှတ်(၇)ရပ်ကွက်ရှိ ချောစုကုန်မျိုးစုံအရောင်းဆိုင်များသို့သွားရောက်ခဲ့ပြီး စတိုးဆိုင်ပိုင်ရှင်လုပ်ငန်းရှင်များနှင့်တွေ့ဆုံကာ အသင့်သောက်အချိုရည်အမျိုးမျိုးတို့အား ဖြန့်ဖြူးရောင်းချရာတွင် သက်ဆိုင်ရာဌာနများမှ ညွှန်ကြားထားသော ကုန်အညွှန်းအမှတ်အသားဆိုင်ရာ လိုက်နာရမည့်အချက်များ၊ မြန်မာဘာသာဖြင့်သော်လည်းကောင်း၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍တွဲလျက် ရေးသားဖော်ပြရမည့်အချက်များ၊ စားသုံးသူပြည်သူများ ဘေးအန္တရာယ်ကင်းရှင်းစေရေးတို့အတွက် စံချိန်၊ စံညွှန်းများနှင့်ကိုက်ညီမှုမရှိသော စားသောက်ကုန်ပစ္စည်းများ၊ ကုန်အညွှန်းအမှတ်အသားဖော်ပြချက်ပြည့်စုံစွာ မပါရှိသော အသင့်သောက်အချိုရည်များ၊ အစားအသောက်နှင့်ဆေးဝါးကွပ်ကဲရေးဦးစီးဌာန (FDA) ၏ ခွင့်ပြုချက်မပါရှိသော သက်တမ်းကုန်နေသည့် အသင့်သောက်အချိုရည်အမျိုးမျိုးနှင့် စားသောက်ကုန်ပစ္စည်းများဖြန့်ဖြူးရောင်းချခြင်းများမပြုလုပ်စေရန် စားသုံးသူကာကွယ်ရေးဆိုင်ရာ သိကောင်းစရာများကို အကြံပြုဆွေးနွေးခဲ့ပြီး အသင့်သောက်အချိုရည်အမျိုးမျိုးတို့တွင် ကုန်အညွှန်းအမှတ်အသားပြည့်စုံစွာဖော်ပြထားခြင်းရှိ/ မရှိ ဈေးကွက်အတွင်း ကွင်းဆင်းစစ်ဆေးခဲ့ကြောင်းသိရှိရပါသည်။

DOCA(ရန်ကုန်)        

     စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံး၏ လမ်းညွှန်မှာကြားချက်အရ မြောက်ပိုင်းခရိုင်အတွင်းရှိ စက်မှုဇုန်များတွင် စီးပွားရေးလုပ်ကိုင်ဆောင်ရွက်နေသော လုပ်ငန်းရှင်များ၏ လုပ်ငန်းဆောင်ရွက်မှုအခက်အခဲများကိုသိရှိနိုင်ရန် မြောက်ပိုင်းခရိုင်ဦးစီးမှူးရုံးမှ ခရိုင်ဦးစီးမှူး၊ ဦးအောင်တင်စိုးနှင့်ဝန်ထမ်းများသည် အမှတ်(၆၈/၆၉)၊ လှသိင်္ဂီလမ်း၊ ဇုန်(၃)၊ ရွှေပြည်သာမြို့နယ်ရှိ Myanmar Jack Way Packaging ပလတ်စတစ်ဆေးရိုက်စက်ရုံသို့ သွားရောက်စစ်ဆေးခဲ့ရာ လုပ်ငန်းမှာ အပြီးပိတ်သိမ်းထားရှိပြီးဖြစ်ပါသည်။ မြေပြင်တွင် Multi Pack Plastic လုပ်ငန်းလုပ်ကိုင်ရန် ပြင်ဆင်နေသည်ကို စစ်ဆေးတွေ့ရှိရပါသည်။

DOCA(ရန်ကုန်)

      ရန်ကုန်တိုင်းဒေသကြီး၊ တိုက်ကြီးမြို့နယ်အတွင်း စားအုန်းဆီကိုယ်စားလှယ် (၈)ဦးသည် မြို့နယ်ခွဲများနှင့် ဈေးများသို့ နေ့စဉ်ဖြန့်ဖြူးရောင်းချပေးလျက်ရှိရာ (၃-၅-၂၀၂၄) ရက်နေ့တွင် ကျင်းပပြုလုပ်သော ပြည်သူများအား စားအုန်းဆီဈေးနှုန်းများကို မှန်ကန်စွာရောင်းချပေးရေးနှင့် ဈေးနှုန်းကျဆင်းရေးအတွက် ရန်ကုန်တိုင်းဒေသကြီးအစိုးရအဖွဲ့၏ ညွှန်ကြားချက်များအား မြို့နယ်စီမံအုပ်ချုပ်ရေးအစည်းအဝေးခန်း၌ (၅-၅-၂၀၂၄)ရက်နေ့နှင့် (၆-၅-၂၀၂၄) ရက်နေ့တို့တွင် ကျင်းပပြုလုပ်ခဲ့ရာ မြို့နယ်စီမံအုပ်ချုပ်ရေးမှူး ဦးအောင်ကျော်စိုး၊ ဒုတိယညွှန်ကြားရေးမှူး ဦးမျိုးထိုက်ဝင်း၊ ဈေးတာဝန်ခံ ဦးအောင်မင်းသိန်းနှင့် စားသုံးသူရေးရာဦးစီးဌာနမှ ဒေါ်တင်တင်ဌေး၊ ရုံးအုပ်တို့ဦးဆောင်၍ ဈေးကိုယ်စားလှယ်၊ ဈေးအတွင်း ဆီရောင်းချသော စီးပွားရေးလုပ်ငန်းရှင်များ၊ တိုက်ကြီးမြို့နယ်မှ စားသောက်ဆိုင်ကိုယ်စားလှယ်နှင့် ဥက္ကံ၊ အဖျောက်မြို့များမှ စားသောက်ဆိုင်ကိုယ်စားလှယ်များအား စားအုန်းဆီများအရေအတွက်အပြည့်အဝရရှိရန်၊ သတ်မှတ်နေရာများသို့ရောက်ရှိရန်၊ သတ်မှတ်ရည်ညွှန်းဈေးအတိုင်းရောင်းချရန်နှင့် ဈေးနှုန်းမြှင့်တင်၍ တစ်ဆင့်ပြန်လည်ရောင်းချခြင်း၊ သိုလှောင်ခြင်းများရှိပါက အချိန်နှင့်တပြေးညီ အရေးကြီးကုန်စည်နှင့်ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း သိရှိစေရန် ရှင်းလင်းဆွေးနွေးခဲ့မှုကိုသိရှိရပါသည်။

DOCA(ရန်ကုန်)