မြင်းခြံခရိုင်တွင် နွေကြက်သွန်နီ(ခေါ်)ဆောင်းကြက်သွန်နီကို နိုဝင်ဘာလနှင့်ဒီဇင်ဘာလ တို့တွင် စတင်စိုက်ပျိုးပြီး မတ်လနှင့်ဧပြီလတို့တွင် ရိတ်သိမ်းထွက်ပေါ်လေ့ရှိပါသည်။ ၂၀၂၄ ခုနှစ်၊ မြင်းခြံခရိုင်ချုပ်အနေဖြင့် ဆောင်းကြက်သွန်နီ ယခုနှစ်စိုက်ပျိုးဧက ၁၉၆၇၄ ဧက၊ ရိတ်သိမ်းဧက ၁၈၀၀၀ ဧကနှင့် တစ်ဧကအထွက်နှုန်း ၃၄၂၉ ပိဿာနှုန်းဖြင့် အထွက်ပိဿာချိန်ပေါင်း ၆၁၇၂၂၀၀၀ ပိဿာထွက်ရှိခဲ့ပြီး ကျန်ဧကများ ဆက်လက်ရိတ်သိမ်းလျက်ရှိပါသည်။ ယခင်နှစ်ခရိုင်ချုပ်အနေဖြင့် ကြက်သွန်နီစိုက်ဧက ၁၉၄၇၈ ဧကတွင် ၁၀၀% ရိတ်သိမ်းခဲ့ပြီး ၃၄၂၀ ပိဿာနှုန်းဖြင့် အထွက်ပိဿာ ချိန်ပေါင်း ၆၆၆၁၄၇၆၀ ပိဿာထွက်ရှိ ခဲ့ကြောင်းလေ့လာသိရှိရပါသည်။ ယခင်နှစ်နှင့် နှိုင်းယှဉ်ပါက ယခုနှစ်တွင် ဆောင်းကြက်သွန်နီ စိုက်ဧက ၁၉၆ ဧကကျော် ပိုမိုစိုက်ပျိုးနိုင်ခဲ့ပြီး အထွက်နှုန်းနှင့် အထွက်ပိဿာချိန်လည်း ပိုမိုထွက်ရှိခဲ့ပါသည်။
မြင်းခြံခရိုင်၏ ဆောင်းကြက်သွန်နီ တစ်ဧကစိုက်ပျိုးထုတ်လုပ်မှုမှာ မိသားစု လုပ်အားခ အပါအဝင် စုစုပေါင်း ကုန်ကျစရိတ် ၁၉၉၄၀၀၀ ကျပ်ကုန်ကျခဲ့ပြီး တစ်ဧကတွင် ပျမ်းမျှအထွက် ပိဿာချိန် ၃၄၂၉ ပိဿာထွက်ရှိပြီး ထွက်ပေါ်ချိန်ရောင်းဈေးမှာ တစ်ပိဿာလျှင် ၁၃၀၀ ကျပ် အဖွင့်ဈေးဖြင့် မတ်လ စတုတ္ထပတ်အတွင်း ဈေးကွက်သို့ စတင်ဝင်ရောက်ခဲ့ပါသည်။ တစ်ဧက ဝင်ငွေမှာ ၄၄၅၇၇၀၀ ကျပ်ဖြစ်သဖြင့် တစ်ဧကတွင် ၂၄၆၃၇၀၀ ကျပ် အကျိုးအမြတ်ရရှိပြီး တောင်သူများအနေဖြင့် စီးပွားရေးတွက်ချေကိုက်ကြောင်း ကြက်သွန်စိုက်တောင်သူတစ်ဦး၏ ပြောပြချက်အရ သိရှိရပါသည်။
ယခင်နှစ်ဆောင်းကြက်သွန်နီ ထွက်ပေါ်ချိန် ရောင်းဈေးမှာ တစ်ပိဿာလျှင်(၈၀၀)ကျပ်ဖြင့် အရောင်းအဝယ်ဖြစ်ခဲ့ပြီး ယခင်နှစ်ဈေးနှုန်းဖြင့် နှိုင်းယှဉ်ပါက ယခုနှစ်တွင် တစ်ပိဿာလျှင်(၅၀၀) ကျပ် ပိုမိုရရှိပါသည်။
ယခုအချိန်တွင် ဆောင်းကြက်သွန်နီမှာ သိုလှောင်ရန် ကောင်းသောအချိန် ဖြစ်ပြီး အမြိတ်ခြောက်၍ မာပြီး အရည်အသွေးကောင်းသော ကြက်သွန်နီများမှာ ကြာရှည်အထားခံသလို ဈေးကောင်းလည်း ရရှိကြောင်း လေ့လာသိရှိရပါသည်။
ယခုဧပြီစတုတ္ထပတ် ဆောင်းကြက်သွန်နီ အကြီးစတစ်ပိဿာလျှင် ၁၉၀၀ ကျပ်မှ ၂၁၀၀ ကျပ်ဖြင့် လည်းကောင်း၊ အလတ်စတစ်ပိဿာလျှင် ၁၆၀၀ ကျပ်မှ ၁၈၀၀ ကျပ်ဖြင့်လည်းကောင်း၊ အသေးစတစ်ပိဿာလျှင် ၁၃၀၀ ကျပ်မှ ၁၅၀၀ ကျပ်ဖြင့်လည်းကောင်း ရောင်းချရပါကြောင်း ကြက်သွန်နီကုန်သည်တစ်ဦး၏ ပြောကြားချက်အရ သိရှိရပါသည်။
DOCA(မန္တလေး)