မွန်ပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူးရုံးတွင် စစ်ဆေးရေးအရာရှိ များ၏ လုပ်ငန်းကျွမ်းကျင်မှုဆိုင်ရာသင်တန်းကို ၁၂.၈.၂၀၂၀ ရက်နေ့နှင့် ၁၃.၈.၂၀၂၀ ရက်နေ့ တို့တွင် ဖွင့်လှစ်ပို့ချခဲ့ရာ ပြည်နယ်ဦးစီးမှူးရုံး၊ မော်လမြိုင်ခရိုင်၊ သထုံခရိုင်တို့မှ စစ်ဆေးရေး အရာရှိတာဝန်ပေးအပ်ထားသော အရာထမ်း၊ အမှုထမ်းများနှင့် ဌာနခွဲတာဝန်ခံများ၊ စုစုပေါင်း သင်တန်းသား/သင်တန်းသူ (၂၁) ဦး တက်ရောက်ခဲ့ကြသည်။
အဆိုပါသင်တန်းတွင်မွန်ပြည်နယ်စားသုံးသူရေးရာဦးစီးဌာန၊ပြည်နယ်ဦးစီးမှူးကသင်တန်း ဖွင့်လှစ်ရခြင်း၏ ရည်ရွယ်ချက်နှင့် ပြည်နယ်စားသုံးသူရေးရာကော်မတီဖြင့် ဆောင်ရွက်မည့် အစီအစဉ်များအား ဦးဆောင်ဆွေးနွေးပြီး မိတ်ဖက်ဌာနများဖြစ်သော မွန်ပြည်နယ် အစား အသောက်နှင့်ဆေးဝါးကွပ်ကဲရေးဦးစီးဌာန၊ ပြည်နယ်ဦးစီးမှူး ဒေါက်တာစိုးနိုင်က ၎င်းတို့၏ လုပ်ထုံးလုပ်နည်းများနှင့် လုပ်ငန်းဆောင်ရွက်ချက်များအားလည်းကောင်း၊ မွန်ပြည်နယ် စိုက်ပျိုးရေးဦးစီးဌာန၊ လက်ထောက်ညွှန်ကြားရေးမှူး ဒေါ်မြမော် က ဓါတ်မြေဩဇာနှင့် ပတ်သက်၍လည်းကောင်း၊ မွန်ပြည်နယ်စိုက်ပျိုးရေးဦးစီးဌာန၊ လက်ထောက်ညွှန်ကြားရေးမှူး ဒေါ်သန်းသန်းလွင် က ပိုးသတ်ဆေးနှင့်ပတ်သက်၍ လည်းကောင်း၊ စက်မှုကြီးကြပ်ရေးနှင့် စစ်ဆေးရေးဦးစီးဌာန၊ ဒုတိယညွှန်ကြားရေးမှူး ဦးအောင်ကျော်ဇင် က အိမ်သုံးလျှပ်စစ်ပစ္စည်း များနှင့်ပတ်သက်၍ လုပ်ထုံးလုပ်နည်းနှင့် အမိန့်ညွှန်ကြားချက်များနှင့် ပတ်သက်၍ လည်းကောင်း ရှင်းလင်းဆွေးနွေးခဲ့ပါသည်။
ထို့ပြင်မွန်ပြည်နယ် စားသုံးသူရေးရာဦးစီးဌာနမှ တာဝန်ရှိသူများက စားသုံးသူကာကွယ် ရေးဥပဒေနှင့်တိုင်ကြားမှုလက်ခံဆောင်ရွက်ရေးကိစ္စရပ်များ၊ စစ်ဆေးရေးအရာရှိ၏ လုပ်ငန်း တာဝန်များ၊ Market Serveillance (Recall and Ban) ဆိုင်ရာဆောင်ရွက်မှုများတို့ကို ရှင်းလင်းဆွေးနွေးခဲ့ကြကြောင်း သိရှိရပါသည်။
မွန်ပြည်နယ်
စားသုံးသူရေးရာဦးစီးဌာန