သတင်းနှင့် လှုပ်ရှားမှုများ

        ရွှေဘိုခရိုင်အနေဖြင့် ဆီထွက်သီးနှံများကို နှစ်စဉ် နွေ၊ မိုး၊ ဆောင်းသုံးရာသီလုံးစိုက်ပျိုးလျက်ရှိသော်လည်း ဒေသထွက်ဆီထွက်သီးနှံများအားလုံးကို ဆီကြိတ်ခွဲမှုမရှိဘဲ ကုန်ကြမ်းဈေးနှုန်းများ ကောင်းသည့်အတွက်  ကုန်ကြမ်းအဖြစ်ရောင်းချခြင်းများရှိသည့်အပြင် စားသုံးဆီဈေးနှုန်းသည် ဒေသထွက် မြေပဲဆီ၊ နှမ်းဆီနှင့် နေကြာဆီများထက် ဈေးနှုန်းချိုသာသဖြင့် ဒေသတွင်းဆီစားသုံးရန် လိုအပ်သော ဆီအတွက် ပြည်ပမှတင်သွင်းသည့်စားသုံးဆီများကို မှာယူ၍ ရောင်းချလျက်ရှိသောကြောင့် ပြည်ပမှ စားသုံးဆီတင်သွင်းမှုလျော့ချစေရေး၊ ပြည်တွင်းစားသုံးဆီဖူလုံစေရေးနှင့် ဆီတိုးမြှင့်ထုတ်လုပ်နိုင်ရေးအတွက် ရွှေဘိုမြို့နယ်အတွင်း ဆီထွက်သီးနှံများ တိုးချဲ့စိုက်ပျိုးရေး စီမံကိန်းလုပ်ငန်းများ အကောင်အထည်ဖော် ဆောင်ရွက်နိုင်ရန် မြို့နယ်အဆင့်လုပ်ငန်းအကောင်အထည်ဖော်ရေးအဖွဲ့  ဖွဲ့စည်းဆောင်ရွက်လျက်ရှိကြောင်း သက်ဆိုင်ရာဌာနမှ သိရှိရပါသည်။

       အဆိုပါအဖွဲ့၏ လုပ်ငန်းတာဝန်များမှာ ရွှေဘိုခရိုင်အတွင်း ဆီထွက်သီးနှံစိုက်ဧကတိုးချဲ့ရေး၊ လျာထားချက်အတိုင်း အကောင်အထည်ဖော်ဆောင်ရွက်နိုင်ရေးအတွက် ဒေသနှင့်ကိုက်ညီပြီး အထွက်နှုန်း ကောင်းမွန်သည့် မျိုးစေ့များရရှိရေးနှင့် အမှန်တကယ်စိုက်ပျိုးသူများထံ စိုက်ပျိုးစရိတ်ချေးငွေရရှိရေးအတွက် သက်ဆိုင်ရာမြို့နယ်အဆင့်ဌာနများ၊ ပုဂ္ဂလိကလုပ်ငန်းရှင်များ၊ ဒေသဆိုင်ရာ အုပ်ချုပ်ရေး အဖွဲ့အစည်းများ၊ တောင်သူများနှင့် ပေါင်းစပ်ညှိနှိုင်းဆောင်ရွက်ပေးရန်၊ မိမိမြို့နယ်အတွင်း စိုက်ပျိုး ထုတ်လုပ်မှုအပါအဝင် ဆောင်ရွက်ပြီးစီးမှုများအား စိုက်ပျိုးရာသီးအပြီး အချိန်နှင့်တစ်ပြေးညီ စုစည်းစိစစ်၍ ခရိုင်အဆင့်လုပ်ငန်း အကောင်အထည်ဖော်ရေးအဖွဲ့သို့ တင်ပြသွားရန်၊ တိုင်းဒေသကြီး အကောင်အထည်ဖော်ရေးအဖွဲ့နှင့် ခရိုင်အဆင့် လုပ်ငန်းအကောင်အထည်ဖော်ရေးအဖွဲ့များ၏ ညွှန်ကြားချက်များကို သက်ဆိုင်ရာကျေးရွာများ၌ အကောင်အထည်ဖော်ရာတွင် အဆင်ပြေချောမွေ့စေရေး ပေါင်းစပ်ညှိနှိုင်း ဆောင်ရွက်ပေးရန်တို့ဖြစ်ကြောင်းနှင့် အဆိုပါမြို့နယ်အဆင့်လုပ်ငန်း အကောင်အထည်ဖော်ရေးအဖွဲ့တွင် သက်ဆိုင်သည့် မြို့နယ်အဆင့်ဌာနဆိုင်ရာ (၉)ခုပါဝင်ပြီး စားသုံးသူရေးရာဦးစီးဌာန၊ မြို့နယ်တာဝန်ခံမှလည်း အဖွဲ့ဝင်အဖြစ် ပါဝင်ဖွဲ့စည်းထားကြောင်း သတင်းရရှိပါသည်။

DOCA(စစ်ကိုင်း)

          New Magnate Co;Ltd မှ ဆေးဝါးတစ်မျိုးဖြစ်သော Diclon-M Tablet ဆေးဝါးများကို အတုပြုလုပ်၍ ရောင်းချခြင်း ရှိ /မရှိ စစ်ဆေးသွားရန် ညွှန်ကြားချက်အရ စစ်ကိုင်းခရိုင်အနေဖြင့် စားသုံးသူပြည်သူများ ထုတ်ကုန်လုံခြုံစိတ်ချရမှုရှိစေရန် ရည်ရွယ်၍ စားသုံးသူရေးရာဦးစီးဌာန၊ ခရိုင်ဦးစီးမှူးနှင့် ဝန်ထမ်းများ၊ ခရိုင်ပြည်သူ့ကျန်းမာရေးဦးစီးဌာနမှ တာဝန်ရှိသူများနှင့်အတူ ဇန်နဝါရီလ (၁၇)ရက်နေ့တွင် စစ်ကိုင်းမြို့ပေါ်ရှိ ဆေးဆိုင်များသို့ ကွင်းဆင်းစစ်ဆေးခဲ့ပါသည်။

        မင်းမင်း၊ စွယ်စုံ၊ အောင်ဇမ္ဗူ၊ မြန်မာဦး၊ ဗိုလ်ဗိုလ်ဆေးဝါးအရောင်းဆိုင် (၅)ဆိုင်တွင် တရားမဝင် မှတ်ပုံတင်ထားခြင်းမရှိသော ဆေးဝါးများ ရောင်းချခြင်းမရှိကြောင်း စစ်ဆေးတွေ့ရှိရပါသည်။ ဆေးဆိုင်ပိုင်ရှင်များအား ဆေးဝါးမှတ်ပုံတင်ထားခြင်းမရှိသော ပုံစံတူဆေးဝါးများအား ဈေးကွက်အတွင်း ရောင်းချခြင်းမပြုရန်၊ သက်တမ်းလွန်ဆေးဝါးများနှင့် စံမညီဆေးဝါးများ မရောင်းချရန်၊ ဆေးနှင့် ဆေးပစ္စည်းများရောင်းချရာတွင် သက်ဆိုင်ရာဌာန၏ လိုင်စင်ပါသတ်မှတ်ထားသည့် စည်းမျဉ်း စည်းကမ်းများကို လိုက်နာဆောင်ရွက်ရန်နှင့် စားသုံးသူကာကွယ်ရေးဥပဒေအခန်း(၁၀)ပါ စီးပွားရေးလုပ်ငန်းရှင်၏ တာဝန်များကို သိရှိလိုက်နာဆောင်ရွက်စေရန် စားသုံးသူရေးရာဦးစီးဌာန၊ ခရိုင်ဦးစီးမှူးက အသိပညာပေးဆွေးနွေးခဲ့ကြောင်း သတင်းရရှိပါသည်။

DOCA(စစ်ကိုင်း)

         စစ်ကိုင်းတိုင်းဒေသကြီး၊ ဟုမ္မလင်းမြို့၊ နောင်ပကျစ်ရပ်ကွက်အတွင်းရှိ ဆေးနှင့် ဆေးပစ္စည်းအရောင်းဆိုင်များသို့ စားသုံးသူရေးရာဦးစီးဌာန၊ ကျန်းမာရေးဦးစီးဌာန၊ ပြန်ကြားရေးနှင့် ပြည်သူ့ ဆက်ဆံရေးဦးစီးဌာနတို့ ပူးပေါင်း၍ ( ၁၉.၁.၂၀၂၃ ) ရက်နေ့တွင် ဈေးကွက်စောင့်ကြည့်စစ်ဆေးခြင်း လုပ်ငန်းများ ဆောင်ရွက်ခဲ့ကြောင်း သိရသည်။ အဆိုပါဈေးကွက်စောင့်ကြည့်စစ်ဆေးရာတွင်  Diclon – M ( Diclofenac Sodium 50mg, Paracetamol 500 g ) အမှတ်တံဆိပ်ပုံစံကို တုပ၍ ‌ရောင်းချနေသော ဆေးဝါးများ  ရှိ/မရှိ သွားရောက်စစ်ဆေးခဲ့ကြောင်း သိရှိရပါသည်။

      ဆေးနှင့် ဆေးပစ္စည်းရောင်းချသူများအနေဖြင့် မိမိတို့ရောင်းချနေသော ဆေးနှင့် ဆေးပစ္စည်းများကို သက်ဆိုင်ရာဌာနများမှ တားမြစ်ထားသည့်ဆေးဝါးများ၊ သက်တမ်းလွန်ဆေးဝါးများ ရောင်းချခြင်း မပြုရန်နှင့် ( ၂/၂၀၁၉ ) ညွှန်ကြားချက်ပါ ဆေးဝါးနှင့် ဖြည့်စွက်စာများတွင် မဖြစ်မနေဖော်ပြပါရှိရမည့် ကုန်အညွှန်းအမှတ်အသားများနှင့် ကိုက်ညီမှုရှိသော ဆေးနှင့် ဆေးပစ္စည်းများကိုသာ ဖြန့်ဖြူး ရောင်းချရန် အသိပညာပေးဆွေးနွေးခဲ့ကြောင်း သတင်းရရှိပါသည်။

DOCA(စစ်ကိုင်း)

        စားသုံးသူရေးရာဦးစီးဌာန၊ မိုးညှင်းခရိုင်ဦးစီးမှူးရုံးမှ ဦးကျော်မိုးလွင် (ဌာနခွဲစာရေး) သည် ၁၉.၁.၂၀၂၃ ရက်နေ့ နေ့လယ် ၁၀း၀၀နာရီအချိန်တွင် မိုးညှင်းမြို့နယ်၊ ပင်းဟဲကျေးရွာအတွင်းရှိ စားသုံးသူများအား စားသုံးသူအသိပညာပေးဟောပြောပွဲ ဆောင်ရွက်ခဲ့ပါသည်။

       စားသုံးသူကာကွယ်ရေး အသိပညာပေးဟောပြောရာတွင် စားသုံးသူဆိုသည်မှာ ကုန်စည် သို့မဟုတ် ဝန်ဆောင်မှုကို ကုန်သွယ်ရောင်းဝယ်မှုပြုရန် သို့မဟုတ် အသက်မွေးဝမ်းကျောင်းပြုရန် မဟုတ်ဘဲ ကိုယ်တိုင်သုံးစွဲမှုအတွက်သော်လည်းကောင်း၊ အခြားသူအတွက်သော်လည်းကောင်း ရည်ရွယ်၍ဝယ်ယူခြင်း၊ အသုံးပြုခြင်း၊ ရယူခြင်း၊ ကုန်စည်ချေးငှားခြင်း ပြုလုပ်သူများ သို့မဟုတ် ပေးကမ်းထောက်ပံ့ခြင်းခံရသူများကို ဆိုလိုကြောင်း၊စားသုံးသူအခွင့်အရေးများဖြစ်သော စားသုံးသူများအတွက် ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ အခြေခံလိုအပ်ချက်များအပေါ်တွင် စိတ်ကျေနပ်မှုရှိစေခြင်း၊ ကုန်စည် သို့မဟုတ် ဝန်ဆောင်မှုကို ဘေးအန္တရာယ်ကင်းရှင်းစွာအသုံးပြုခွင့်ရှိခြင်း၊ကုန်စည် သို့မဟုတ်ဝန်ဆောင်မှုအပေါ်ရွေးချယ်ဝယ်ယူအသုံးပြုရာတွင် လိုအပ်သောသတင်းအချက်အလက်များ ပြည့်စုံမှန်ကန်စွာသိရှိခွင့်နှင့် ပြေစာ သို့မဟုတ် အထောက်အထားများရယူခွင့်ရှိခြင်း၊ ဈေးကွက်အတွင်းရှိ ကုန်စည် သို့မဟုတ်ဝန်ဆောင်မှုနှင့်စပ်လျဉ်း၍ စားသုံးသူစိတ်ကြိုက်ရွေးချယ်ဝယ်ယူနိုင်ခွင့်ရှိခြင်း၊ စားသုံးသူနစ်နာဆုံးရှုံးမှုနှင့်စပ်လျဉ်းသည့်ကိစ္စရပ်များတွင် ရှင်းလင်းတင်ပြခွင့်နှင့် တိုင်ကြားခွင့်ရရှိနိုင် စေခြင်း၊ ကုန်စည်သို့မဟုတ်ဝန်ဆောင်မှုကို  ဝယ်ယူအသုံးပြုခြင်းကြောင့် ဖြစ်ပေါ်လာသည့် နစ်နာ ဆုံးရှုံးမှုများနှင့်စပ်လျဉ်း၍ကုစားခွင့်ရရှိခြင်း၊ ကုန်စည်သို့မဟုတ်ဝန်ဆောင်မှုနှင့်စပ်လျဉ်းသည့် အသိ ပညာဗဟုသုတများ၊ အခွင့်အရေးနှင့်လိုအပ်သောအချက်အလက်များကို သိရှိလေ့လာနိုင်ခွင့်ရှိခြင်း၊ ပစ္စုပ္ပန်တွင်သာမက အနာဂတ်မျိုးဆက်များအတွက်ပါ ကောင်းမွန်သာယာသော လူနေမှုအဆင့်အတန်းနှင့် ပတ်ဝန်းကျင်တွင်နေထိုင်နိုင်ခွင့်ရရှိစေခြင်းစသဖြင့် အသိပညာပေးဟောပြောခဲ့ပြီး  စားသုံးသူများအား စားသုံးသူကာကွယ်ရေးဆိုင်ရာ လက်ကမ်းစာစောင်များ ဖြန့်ဝေပေးခဲ့ပါသည်။

DOCA(ကချင်)

         ဧရာဝတီတိုင်းဒေသကြီး၊ ဖျာပုံခရိုင်ဘိုကလေးမြို့နယ်၊ စားသုံးသူရေးရာဦးစီးဌာနမှ မြို့နယ် တာဝန်ခံနှင့် ဝန်ထမ်းတို့သည်(၁၆.၁.၂၀၂၃)ရက်နေ့၊ နံနက်(၁၀:၀၀)နာရီအချိန်တွင် ဘိုကလေးမြို့ (၉)ရပ်ကွက်၊ ဦးမြင့်ရွှေ၏ “မင်းသားပေါင်မုန့်”လုပ်ငန်းနေ့အိမ်၌ မုန့်မျိုးစုံဖြန့်ဖြူးရောင်းချသူ လုပ်ငန်းရှင်များကို စားသုံးသူကာကွယ်ရေးအသိပညာပေး ဟောပြောပွဲကို ကျင်းပပြုလုပ်ခဲ့ပါသည်။

          အဆိုပါ စားသုံးသူကာကွယ်ရေး အသိပညာပေးဟောပြောပွဲတွင် မြို့နယ်တာဝန်ခံ၊ ဒေါ်ခင်စန်း‌အေးက စားသုံးသူကာကွယ်ရေးဥပဒေပါလုပ်ငန်းရှင်များ၏တာဝန်များ၊ သတ်မှတ်ထားသော ကုန်အညွှန်းအမှတ်အသား ဖော်ပြချက်များပြည့်စုံစွာ ဖော်ပြထားရှိရေးနှင့် ကုန်အညွှန်းပြည့်စုံသော ကုန်စည်များကိုသာ ရောင်းချကြရန်၊ သက်ဆိုင်ရာဌာနများမှ စားသုံးရန်မသင့်ဟူ၍တားမြစ်ထားသော ကုန်စည်များကို ရောင်းချခြင်းမပြုကြရန်၊ စားသုံးသူကာကွယ်ရေးဥပဒေပြဌာန်းချက်များကို လိုက်နာမူမရှိပါက အရေးယူဆောင်ရွက်သွားမည်ဖြစ်ကြောင်း အသိပညာပေးဟောပြောခဲ့ကြောင်း သတင်းရရှိပါသည်။

DOCA(ဧရာဝတီ)