သတင်းနှင့် လှုပ်ရှားမှုများ

• Online Shopping လုပ်ငန်းများ ကျယ်ပြန့်စွာ ဆောင်ရွက်လာနိုင်သည်နှင့်အမျှ စားသုံးသူတို့သည်လည်း Online မှတစ်ဆင့် ကုန်စည် နှင့် ဝန်ဆောင်မှုများကို နည်းပညာ အကူအညီဖြင့် အလွယ်တကူ ဝယ်ယူမှု ပြုနိုင်လျက်ရှိပါသည်။
• သို့ရာတွင် စားသုံးသူ၏ အင်တာနက် အခြေခံ ဝယ်ယူမှုစနစ် (Online Shopping Technique) ဆိုင်ရာ အသိပညာ ဗဟုသုတ အားနည်းမှုတို့ကို အခွင့်ကောင်းယူ၍ သော်လည်းကောင်း၊ မမှန်ကန်သော ရောင်းချခြင်း နည်းလမ်းများ အသုံးပြု၍သော် လည်းကောင်း Online Shopping လုပ်ငန်းများက စားသုံးသူများကို လိမ်လည်မှုများ ပြုလုပ်လျက် ရှိပါသည်။
• Online Shopping Page များသည် ကုန်ပစ္စည်းများ ရောင်းချရာတွင် အများယုံကြည်စိတ်ချမှု ရရှိနေသည့် အစိုးရ နှင့် ပုဂ္ဂလိက ကုန်ပစ္စည်းပို့ဆောင်ရေး ဝန်ဆောင်မှု လုပ်ငန်းများ၏ ကုန်ပစ္စည်းလက်ခံပြေစာကို အတုပြုလုပ်ခြင်း၊ ပြေစာ အတုပုံ ပေးပို့၍ မှာယူထားသည့်ပစ္စည်း ပေးပို့လိုက်ပြီ ဖြစ်ကြောင်း စားသုံးသူ၏ ယုံကြည်မှု ရရှိစေခြင်းဖြင့် ဝယ်ယူထားသည့် ကုန်ပစ္စည်းအတွက် ငွေကြိုတင် လွှဲခိုင်းခြင်း၊ ငွေလွှဲခိုင်းပြီးနောက် ကုန်ပစ္စည်းများ ပေးပို့ခြင်း မပြုဘဲ လိမ်လည်မှု ပြုကြ ကြောင်း စိစစ်တွေ့ရှိရပါသည်။
• သို့ဖြစ်ပါ၍ စားသုံးသူများအနေဖြင့် အွန်လိုင်းမှတဆင့် ကုန်ပစ္စည်းများ ဝယ်ယူရာတွင် ကုန်ပစ္စည်း လက်ခံ ပြေစာများကို အတုပြုလုပ်၍ လိမ်လည်မှုပြုနေသည့် Online Shopping လုပ်ငန်းများကို အထူးသတိထား ဂရုပြုနိုင်ပါရန် အသိပေး တင်ပြအပ် ပါသည်။

            မြန်မာ့သဘာဝရော်ဘာထုတ်ကုန် အရည်အသွေးပိုမိုကောင်းမွန်ရေးနှင့် နိုင်ငံတကာဈေးကွက် နှင့် ဈေးနှုန်းရရှိစေရေးအတွက် မြန်မာ့ရော်ဘာအရည်အသွေးမြှင့်တင်ရေးနှင့် ပြည်ပတင်ပို့မှု တိုးတက် ရေးနှီးနှောဖလှယ်ပွဲကို ၃၀.၉.၂၀၂၀ ရက်နေ့တွင် Online စနစ် ဖြင့် ကျင်းပခဲ့ပါသည်။

            မြန်မာ့သဘာဝရော်ဘာထုတ်ကုန်များ အရည်အသွေး ပိုမိုကောင်းမွန်စေရေးအတွက် သက်ဆိုင်ရာဌာနများ၊ အသင်းအဖွဲ့များ၊ စိုက်ပျိုးသူတောင်သူများ၊ ကုန်သည်များ၊ စက်ရုံပိုင်ရှင်များ စသည်ဖြင့် Supply Chain တစ်လျှောက် ပါဝင်ပတ်သက်သူများအားလုံး ကဏ္ဍအလိုက် ပူးပေါင်း အဖြေရှာပြီး အကောင်အထည်ဖော်ဆောင်ရွက်သွားကြရမှာဖြစ်ကြောင်း၊ မြန်မာနိုင်ငံရဲ့ ပြည်ပပို့ကုန် များ ဖွံ့ဖြိုးတိုးတက်ရေး၊ ကမ္ဘာ့စျေးကွက်တွင် ယှဉ်ပြိုင်နိုင်မှု မြင့်မားလာစေရေးအတွက် အမျိုးသား အဆင့် ပို့ကုန်မဟာဗျူဟာ (NES) လုပ်ငန်းစီမံချက်ကို ဦးစားပေးကဏ္ဍ ကုန်စည် (၁၁) ခု၊ ဝန်ဆောင်မှု (၂)ခုနဲ့ အထောက်အကူပြုကဏ္ဍ (၅) ခု စုစုပေါင်း (၁၈) ခု သတ်မှတ်အကောင်အထည်ဖော်ဆောင်ရွက် လျက်ရှိရာမှာ ရော်ဘာကဏ္ဍဟာလည်း ဦးစားပေးကဏ္ဍတစ်ရပ်အနေနဲ့ ပါဝင်ပါကြောင်း၊ မြန်မာ့ ရော်ဘာစံအရည်အသွေး သတ်မှတ်ချက်များ၊ စံချိန်စံညွှန်းများနှင့်အညီ ထုတ်လုပ်တင်ပို့နိုင်မှသာ ပြည်ပဈေးကွက်သို့ ယှဉ်ပြိုင် ရောင်းချနိုင်မည်ဖြစ်ပါကြောင်း၊  မြန်မာ့ရော်ဘာ ထုတ်လုပ်တင်ပို့ရာတွင် ကြုံတွေ့နေရသည့် အခက်အခဲ၊ အတားအဆီးများကို Supply Chain တစ်လျှောက်ပါဝင်ပတ်သက်သူ များအားလုံး တက်ကြွစွာ ပူးပေါင်းပါဝင်ဆောင်ရွက်ခြင်းဖြင့် နိုင်ငံတော်၏ပို့ကုန်ကဏ္ဍကို မြှင့်တင်ပေး နိုင်မည်ဖြစ်ပါကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဒေါက်တာသန်းမြင့်က ဆွေးနွေးပြောကြားခဲ့ပါသည်။

            ဆက်လက်၍ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီး ဦးအောင်ထူးက ဘဏ္ဍာနှစ်အလိုက် ရော်ဘာတင်ပို့နိုင်မှု၊ နိုင်ငံအလိုက်ဈေးကွက်ရရှိမှုနှင့် ရော်ဘာကဏ္ဍ တိုးတက်ရေးအတွက် ဝန်ကြီးဌာနမှ ပံ့ပိုးကူညီဆောင်ရွက်ပေးလျက်ရှိသည့် အခြေအနေများနှင့် ပတ်သက်၍ ရှင်းလင်းပြောကြားပါသည်။

            ထို့နောက် သက်ဆိုင်ရာဌာနများအလိုက် ပညာရှင်များက စာတမ်းဖတ်ကြားခြင်း၊ ရော်ဘာ စိုက်ပျိုးတောင်သူများ၊ စက်ရုံပိုင်ရှင်များ၊ ကုန်သည်လုပ်ငန်းရှင်များက ဆွေးနွေးတင်ပြခြင်းတို့ကို ဆောင်ရွက်ခဲ့ကြပြီး ပြည်ထောင်စုဝန်ကြီးက သက်ဆိုင်ရာ ဌာနအဖွဲ့အစည်းများအလိုက် ရေတိုရေရှည် ဆောင်ရွက်သွားရမည့် လုပ်ငန်းစဉ်များ နှင့်ပတ်သက်၍ ပေါင်းစပ်ဆောင်ရွက်ပေးခဲ့ကြောင်း သိရှိရပါ သည်။

ITQM

         ၂၀၁၉-၂၀၂၀ ဘဏ္ဍာနှစ်၊ ပြည်ထောင်စုငွေလုံးငွေရင်း(မူလ) ခွင့်ပြုရန်ပုံငွေဖြင့် ကချင်ပြည်နယ်၊ စားသုံးသူရေးရာဦးစီးဌာန၊ မြစ်ကြီးနားခရိုင်၊ ခရိုင်ဦစီးမှူးရုံး (၅၀'×၃၅'×၂၄') RC (၂) ထပ် (အတွင်းရေ၊ မီး၊ မိလ္လာ)(Apron& Drain)အပါ  အဆောက်အဦ ဆောက်လုပ်ခြင်းလုပ်ငန်း အား လုပ်ထုံးလုပ်နည်းနှင့်အညီဆောင်ရွက်ခဲ့ရာ ၁၁.၉.၂၀၂၀ ရက်နေ့တွင် အဆောက်အအုံ တခါးပေါက်များ သံပန်းတပ်ဆင်ခြင်းနှင့် ရုံးဝင်းခြံစည်းရိုးကာရံခြင်းလုပ်ငန်းများအပါအဝင် လုပ်ငန်းပမာဏ၏ ၁၀၀% ပြီးစီးပြီဖြစ်ကြောင်း သတင်းရရှိပါသည်။

စားသုံးသူရေးရာဦးစီးဌာန

ကချင်ပြည်နယ်

COVID-19 ရောဂါကူးစက်ပြန့်ပွားမှုမရှိစေရေးအတွက် ပဲခူးတိုင်းဒေသကြီး၊ ပြည်ခရိုင် စားသုံးသူရေးရာဦးစီးဌာနမှ ဝန်ထမ်းများ၊ ပြည်ခရိုင်အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့၊ မီးသတ်ဦးစီးဌာန၊ အခြားဌာနဆိုင်ရာများနှင့် တာဝန်ရှိပုဂ္ဂိုလ်များသည် ၁၉.၉.၂၀၂၀ ရက်နေ့ တွင် ပြည်မြို့၊ နဝဒေးတံတားစစ်ဆေးရေးဂိတ်တွင် မြို့နယ် Coronaviurs Disease (COVID-19) ထိန်းချုပ်ရေးနှင့် အရေးပေါ်တုံ့ပြန်ရေးကော်မတီမှ ထုတ်ပြန်ထားသော ညွှန်ကြားချက်များအတိုင်း  စောင့်ကြည့်စစ်ဆေးခဲ့ကြောင်း သတင်းရရှိပါသည်။

       စားသုံးသူရေးရာဦးစီးဌာန၏ Website ဖြစ်သော www.doca.gov.mm တွင် ပါဝင်သည့် စားသုံးသူတိုင်ကြားမှု လက်ခံဆောင်ရွက်ရေးစနစ်အသစ် (upgrade consumer complaint system) အား ၂၀၂၀ပြည့်နှစ်စက်တင်ဘာလ ၁ရက်နေ့မှ စတင်၍ အသုံးပြုလျက်ရှိပါသည်။

     ဌာန၏mobile application ဖြစ်သော DOCA Myanmar mobile application ကိုလည်း ဖော်ပြပါစနစ်အသစ်ဖြင့် အသုံးပြုနိုင်ရေး version အသစ်ရေးဆွဲထားရှိပါသည်။ သို့ပါ၍ စားသုံးသူပြည်သူများအနေဖြင့် version အသစ်ရေးဆွဲထားသော DOCA Myanmar mobile application ကို အသုံးပြုကြပါရန် လေးစားစွာဖြင့် မေတ္တာရပ်ခံအသိပေး အပ်ပါသည်။

          version အသစ်ဖြင့်ရေးဆွဲထားသော DOCA Myanmar mobile application အား https://www.doca.gov.mm/ Website တွင် လည်းကောင်း၊ google play store တွင် လည်းကောင်း အခမဲ့ download ရယူနိုင်ပါသည်။

စားသုံးသူရေးရာဦးစီးဌာန