သတင်းနှင့် လှုပ်ရှားမှုများ

မုဒုံမြို့နယ်၊ မေတ္တာဆန်သောက်ရေသန့်လုပ်ငန်း၌ ဈေးကွက်စောင့်ကြည့်လေ့လာခြင်း

၄.၃.၂၀၂၀ ရက်နေ့တွင် မွန်ပြည်နယ်စားသုံးသူရေးရာဦးစီးဌာနမှ ဦးစီးအရာရှိ ဒေါ်ဝါဝါမြိုင် နှင့် အဖွဲ့သည် ပြည်နယ် FDA နှင့် ပူးပေါင်း၍ မုဒုံမြို့နယ်၊ မေတ္တာဆန်သောက်ရေသန့် လုပ်ငန်းသို့ ဈေးကွက်စောင့်ကြည့်လေ့လာခြင်းများကို ဆောင်ရွက်ခဲ့ပြီး ရေသန့်လုပ်ငန်းရှင်အား FDA ၏ ခွင့်ပြု ထောက်ခံချက်ရရှိမှသာ ထုတ်လုပ်ဖြန့်ဖြူးရောင်းချရန်၊ သက်ဆိုင်ရာဌာနများ၏ ခွင့်ပြုချက်နှင့်အညီ ဆောင်ရွက်ရန်၊ ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ စားသုံးသူကာကွယ်ရေးဥပဒေ ၂၀၁၉ အခန်း (၁၈) ပြဌာန်းချက်နှင့်အညီ လိုက်နာ ဆောင်ရွက်သွားရန် အသိပညာပေးဆွေးနွေးခဲ့ပြီး မြန်မာနိုင်ငံစားသုံးသူကာကွယ်ရေးကော်မရှင်၏ညွှန်ကြားချက်အမှတ် (၂/၂၀၁၉) လက်ကမ်းစာစောင်များအား ဖြန့်ဝေပေးခဲ့ပါသည်။

မွန်ပြည်နယ်

စားသုံးသူရေးရာဦးစီးဌာန

တောင်ကြီးမြို့တွင် World Consumer Rights Day အထိမ်းအမှတ်လှုပ်ရှားမှုများဆောင်ရွက်

သတင်းနှင့် လှုပ်ရှားမှုများ

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရှမ်းပြည်နယ် ဦးစီးမှူးရုံးမှ ဝန်ထမ်းများသည် ၁၅.၃.၂ဝ၂ဝ ရက်နေ့တွင်ကျရောက်သည့် World Consumer Rights Day အထိမ်းအမှတ်အဖြစ် လမ်းဖြတ်ဆိုင်းဘုတ်များအား တောင်ကြီးမြို့၊ ရေအေးကွင်းရပ် အရှေ့မြို့ပတ်လမ်းတွင်လည်းကောင်း၊ ကျောင်းကြီးစုရပ် အနောက်မြို့ပတ်လမ်းတွင်လည်းကောင်း၊ မြို့အတက်လမ်းတွင်လည်းကောင်းတပ်ဆင်ခဲ့ပြီး ၂ဝ၁၉ စားသုံးသူကာကွယ်ရေးဥပဒေတွင်ပါဝင် သောစားသုံးသူအခွင့်အရေးများအကြောင်းနှင့် ကုန်အညွှန်းအမှတ်အသားဖော်ပြမှုဆိုင်ရာအချက် အလက်များကို မြန်မာဘာသာဖြင့်ဖြစ်စေ၊ မြန်မာဘာသာနှင့်အခြားဘာသာ တွဲလျက်ဖြစ်စေ ဖော်ပြရမည့်အချက်အလက်များပါဝင်သည့် နံရံကပ်စတေကာများ၊ လက်ကမ်းစာစောင်များ၊ World Consumer Rights Day အထိမ်းအမှတ်စတေကာများကို မြို့ပေါ်ရှိစတိုးဆိုင်များ၊ ဆေးဆိုင်များနှင့် အများပြည်သူများမြင်တွေ့နိုင်သည့်နေရာများတွင်ဖြန့်ဝေခြင်းများကို ကျယ်ကျယ်ပြန့်ပြန့် ဆောင်ရွက်ခဲ့တယ်လို့ သတင်းရရှိပါတယ်။

တောင်ကြီးခရိုင်

စားသုံးသူရေးရာဦးစီးဌာန

စားသုံးသူကာကွယ်ရေးဥပဒေအခန်း(၁၈)အရ ကုန်အညွှန်းအမှတ်အသား ဖော်ပြခြင်းနှင့် စပ်လျဉ်း၍ ရှင်းလင်းဆွေးနွေးခြင်းနှင့် တိုင်းဒေသကြီးအတွင်းရှိ အရာထမ်း/ အမှုထမ်းများနှင့် စစ်ဆေးရေးအရာရှိများအား ရှေ့ဆက်လက်ဆောင်ရွက်မည့် အစီအစဉ်နှင့် နည်းဥပဒေ(မူကြမ်း) ရှင်းလင်းဆွေးနွေး

သတင်းနှင့် လှုပ်ရှားမှုများ

မကွေးတိုင်းဒေသကြီး၊ စားသုံးသူရေးရာဦးစီးဌာနရုံး အစည်းအဝေးခန်းမတွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ထုတ်ကုန်လုံခြုံစိတ်ချရမှုဌာနခွဲမှ ညွှန်ကြားရေးမှူး ဦရဲထွဋ်နိုင် ဦးဆောင်သော အဖွဲ့က ၂၀၂၀ ပြည့်နှစ်၊ မတ်လ(၁၁) ရက်နေ့တွင် စားသုံးသူကာကွယ်ရေးဥပဒေအရ ကုန်စည်အမျိုးအစားအလိုက် ကုန်အညွှန်းအမှတ်အသားဖော်ပြ ခြင်းနှင့် စပ်လျဉ်း၍ စီးပွားရေးလုပ်ငန်းရှင်များအား ရှင်းလင်ဆွေးနွေးပွဲနှင့် တိုင်းဒေသကြီးအတွင်းရှိ အရာထမ်း/ အမှုထမ်းများ၊ စစ်ဆေးရေးအရာရှိများကို စားသုံးသူကာကွယ်ရေးနည်းဥပဒေ (မူကြမ်း) အား ရှင်းလင်းဆွေးနွေးပွဲ အခမ်းအနားကို မနက်ပိုင်းနှင့် နေ့လည်ပိုင်းခွဲ၍ ကျင်းပပြုလုပ်ခဲ့ရာ ရေသန့်လုပ်ငန်းရှင်များအသင်း၊ လက်လီရောင်းချသူများအသင်း၊ ဒေသတွင်း မုန့်ထုတ်လုပ်သူ လုပ်ငန်းရှင်းများ၊ ကုန်သည်ကြီးများအသင်း၊ ဆီစက်နှင့် လက်လီရောင်းချသူများ၊ တင်သွင်း/ ထုတ်လုပ်/ ဖြန့်ဖြူးရောင်းချသူ လုပ်ငန်းရှင်များ စုစုပေါင်း (၉၀)ဦးခန့်နှင့် သတင်းမီဒီယာများ၊ အရာထမ်း/အမှုထမ်းများ/ စစ်ဆေးရေးအရာရှိများ တက်ရောက်ခဲ့ကြပါသည်။

ရှေးဦးစွာ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးမှ နှုတ်ခွန်းဆက်စကား ပြောကြားရာတွင် ယခုလို စီးပွားရေးလုပ်ငန်းရှင်များ စုံညီစွာ တက်ရောက်လာကြတဲ့အတွက် အထူး ကျေးဇူးတင်ကြောင်း၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ထုတ်ကုန်လုံခြုံစိတ်ချရမှုဌာနခွဲမှ ညွှန်ကြားရေးမှူး ဦးရဲထွဋ်နိုင်နှင့်အဖွဲ့က တိုင်းဒေသကြီးအလိုက် စားသုံးသူကာကွယ်ရေးဥပဒေအခန်း(၁၈)အရ ကုန်စည်အမျိုးအစားအလိုက် ကုန်အညွှန်း အမှတ် အသား ဖော်ပြခြင်းနှင့် စပ်လျဉ်း၍ စီးပွားရေးလုပ်ငန်းရှင်များအား သိရှိအောင် လာရောက်ဆွေးနွေး ပေးနေခြင်းဖြစ်ပါကြောင်း၊ စားသုံးသူကာကွယ်ရေးဥပဒေသစ်နှင့် ပတ်သက်၍ အခန်းအားလုံးသည် ဥပဒေထွက်ရှိသည့်နေ့မှစ၍ အကျုံးဝင်သော်လည်း အခန်း (၁၈)၊ ကုန်အညွှန်းအမှတ်အသားဖော်ပြ မှုနှင့် စပ်လျဉ်း၍ ၂၀၂၀ ပြည့်နှစ်၊ မတ်လ (၁၆) ရက်မှစ၍ စတင်အာဏာသက်ရောက်မည်ဖြစ်သဖြင့် စီးပွားရေးလုပ်ငန်းရှင်များအားလုံး သိရှိလိုက်နာနိုင်ရေး လာရောက်ဆွေးနွေးပေးတာဖြစ်ပါကြောင်း၊ လုပ်ငန်းရှင်များအနေဖြင့်လည်း အလွန်အကျိုးရှိပါကြောင်း၊ ကုန်အညွှန်းအမှတ်အသား ဖော်ပြခြင်း နှင့်ပတ်သက်၍ ရေသန့်လုပ်ငန်းရှင်များ၊ ဆီစက်လုပ်ငန်းရှင်များ၊ မုန့်လုပ်ငန်းရှင်များ၏ ကုန်စည် များတွင် ကုန်အညွှန်းအမှတ်အသားဖော်ပြမှုနှင့် ပတ်သက်၍ တိုင်းမှ စိစစ်ပြီး ရုံးချုပ်သို့ အတည်ပြု ပေးလျက်ရှိပါကြောင်း၊ ၂၀၂၀ ပြည့်နှစ်၊ မတ်လ (၁၅) ရက်နေ့တွင် World Consumer Rights Days အခမ်းအနားကို The Sutainable Consumer (စားသုံးသူအရေး စဉ်ဆက်မပြတ်ဆောင်ရွက်ပေး) ဆောင်ပုဒ်ဖြင့် မိမိတို့ တိုင်း/ခရိုင်/မြို့နယ်အလိုက် အများပြည်သူသွားလာလှုပ်ရှားသည့် လမ်းမများ တွင် ကမ္ဘာ့စားသုံးသူအခွင့်အရေးများနေ့ သီချင်းများဖွင့်ခြင်း၊စားသုံးသူအခွင့်အရေးနှင့်ကာကွယ်ရေး ဆိုင်ရာ ဗီနိုင်း၊ ပိုစတာများစိုက်ထူခြင်း၊ လက်ကမ်းစာစောင်များ ဖြန့်ဝေခြင်း၊ မီဒီယာကမ်ပိန်းများကို တစ်ပြိုင်နက် ကျင်းပပြုလုပ်သွားမည်ဖြစ်ပါကြောင်း၊ ကုန်အညွှန်းအမှတ်အသားများ ပြည့်စုံစွာ ဖော်ပြခြင်းဖြင့် စားသုံးသူများဘက်မှလည်း စီးပွားရေးလုပ်ငန်းရှင်များ၏ ကုန်စည်များအပေါ်တွင် စိတ်ချယုံကြည်မှုများတိုးလာစေပြီး လုပ်ငန်းရှင်များဘက်မှလည်း မိမိတို့၏ ထုတ်ကုန်တန်ဖိုးများ မြင့်တက်လာစေမည်ဖြစ်သည့်အတွက် အကျိုးရှိလာစေမည်ဖြစ်ပါကြောင်း ဆွေးနွေးခဲ့ပါသည်။

ဆက်လက်၍ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ထုတ်ကုန်လုံခြုံစိတ်ချရမှုဌာနခွဲမှ ညွှန်ကြားရေးမှူး ဦးရဲထွဋ်နိုင်မှ စားသုံးသူကာကွယ်ရေးဥပဒေနှင့် အညီ ကုန်စည် အမျိုးအစားအလိုက် ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ရှင်းလင်း ဆွေးနွေးရာတွင် ၂၀၂၀ ပြည့်နှစ်၊ မတ်လ (၁၅) ရက်နေ့ နောက်ပိုင်း မြန်မာလိုဖော်ပြရမည့်ကိစ္စမှာ လုပ်ငန်းရှင် အခက်အခဲများစွာရှိမည်ကို သိရှိပါကြောင်း၊ မိမိတို့အနေဖြင့် လုပ်ငန်းရှင်များ၏ အခက်အခဲတွေကို ဝိုင်းဝန်းဖြေရှင်းပေးရန်အတွက် လာရောက်ခြင်းဖြစ်ပါကြောင်း၊ မတ်လ(၁၆)ရက် နောက်ပိုင်း ဈေးကွက်တွင် စစ်ဆေးသွားမည့် အခြေအနေတွေကိုလည်း လုပ်ငန်းရှင်များကို အကြမ်းဖျင်းရှင်းလင်းတင်ပြလိုပါကြောင်း၊ ကုန်စည်များတွင် မြန်မာလိုဖော်ပြရန်နှင့် စပ်လျဉ်း၍ ၂၀၁၄ ခုနှစ်၊ စားသုံးသူအကာအကွယ်ပေးရေးဥပဒေတွင် မြန်မာစာသားဖြင့် ဖော်ပြလာရေး စားသုံးသူအကာအကွယ်ပေးရေးဗဟိုကော်မတီမှ အမိန့်ကြော်ငြာစာ ထုတ်ပြန်ရမည်ဖြစ်ကြောင်း၊ မိမိတို့အနေဖြင့် ကုန်စည်များတွင် ကုန်အညွှန်းအမှတ်အသားများကို မြန်မာစာသားဖြင့် ဖော်ပြရေး စားသုံးသူအကာအကွယ်ပေးရေးဗဟိုကော်မတီမှ ၂၀၁၈ တွင် အမိန့်ကြော်ငြာစာ ထုတ်ပြန်၍ (၆)လ အချိန်ပေးခဲ့ပါကြောင်း၊ အမိန့်ကြော်ငြာစာမထုတ်ခင် လုပ်ငန်းရှင်များ၏ အခက်အခဲကို သိ၍ (၃)လ ကြိုတင်၍ ကုန်စည်များတွင် မြန်မာစာသားဖြင့် ထည့်သွင်းဖော်ပြရမည်ဖြစ်ကြောင်းကို နိုင်ငံပိုင် သတင်းစာများမှ အသိပေးခဲ့ပါကြောင်း၊ ဗဟိုကော်မတီမှ မြန်မာလိုဖော်ပြရမည့် ရက်ကိုသတ်မှတ် ပေးဖြစ်ပြီး စီးပွားရေးလုပ်ငန်းရှင်တို့အား တဖြည်းဖြည်းစောင့်ဆိုင်းပေးနေရာမှ ၂၀၁၆ ခုနှစ်တွင် မန္တလေးတိုင်းဘက်မှာ တရုတ်မှလာသည့် ခွေးကျွေးသည့် ဇူကာဗင်အားဆေးကို ကျောင်းမုန့်ဈေး တန်းတွင် ရောင်းချလျက်ရှိရာ မိမိတို့လို စစ်ဆေးသည့် ဌာနဆိုင်ရာများပင် နိုင်ငံခြားဘာသာဖြင့် ဖော်ပြထားသည့်အတွက် မသိရှိသော်လည်း နားလည်သည့် ကျောင်းသားမိဘတစ်ဦးမှ ခွေးကျွေး သည့် အားဆေးကို ကလေးများ စားသုံးနေရသည်ဟု တိုင်ကြားမှုများရှိလာသည့်အတွက် ဌာနဆိုင်ရာ များဖြင့် သွားရောက်စစ်ဆေးရာ ၎င်းတို့ဘာသာဖြင့် ခွေးများစားသုံးရန်အတွက်ဟု ရေးသားထား သည်ကို တွေ့ရှိခဲ့ရပါကြောင်း၊ ၎င်းဖြစ်စဉ်ဖြစ်ပွားပြီးနောက် ကုန်စည်များတွင် မြန်မာစာသားဖြင့် ထည့်သွင်းဖော်ပြရန် အမိန့်ကြော်ငြာစာ ထုတ်ပြန်ခဲ့ရပါကြောင်း၊ ထိုအတောအတွင်း လွှတ်တော်တွင် ဥပဒေကို ပြင်ဆင်ခဲ့ရာ ၂၀၁၉ ခုနှစ်၊ မတ်လ (၁၅) ရက်နေ့တွင် စားသုံးသူကာကွယ်ရေးဥပဒေကို ထုတ်ပြန်ခဲ့ပါကြောင်း၊ ဥပဒေရေးဆွဲရာတွင် စီးပွားရေးလုပ်ငန်းရှင်များကိုလည်း ဖိတ်ကြား၍ ချပြရှင်းလင်းဆောင်ရွက်ခဲ့ရာ ပြည်တွင်းထုတ်လုပ်သည့် လုပ်ငန်းရှင်များမှ (၆)လအတွင်း မြန်မာ စားသားဖြင့် ထည့်သွင်းနိုင်ရေး ဆောင်ရွက်နိုင်သော်လည်း နိုင်ငံခြားမှ တင်သွင်းသည့် ကုန်စည်များ မှာ အဆင်သင့်မဖြစ်သည့်အတွက် ဥပဒေထုတ်ပြန်ပြီး ထပ်မံ၍ အချိန်(၁)နှစ်ပေးခဲ့ပါကြောင်း၊ သတင်းမီဒီယာများမှတဆင့် အားလုံးသိရှိအောင်ကြော်ငြာခဲ့သော်လည်း အားလုံးကျယ်ကျယ်ပြန့်ပြန့် သိရှိလာနိုင်ရေး ရှေးဦးစွာ ကုန်စည်အုပ်စုအလိုက် ထုတ်ပြန်ပေးခဲ့ပါကြောင်း၊ စားသုံးသူသိရှိအောင် ဆောင်ရွက်တာဖြစ်သည့်အတွက် အရောင်သတ်မှတ်ချက်၊ ဖောင့်ဆိုဒ် သတ်မှတ်ချက်မရှိပါကြောင်း၊ နိုင်ငံခြားမှတင်သွင်းသည့် ကုန်စည်များတွင် မြန်မာစာသားဖြင့် ဖော်ပြလာရေး စတစ်ကာပဲကပ်ကပ်၊ ပန်းဖလက်ပဲပေးပေး၊ လက်ကမ်းစာစောင်နဲ့ပဲဖြစ်ဖြစ် ဆောင်ရွက်ခွင့်ပြုပါကြောင်း၊ ဥပမာ- ရေသန့် ဆိုလျှင် FDA မှ အင်္ဂလိပ်စာသားဖြင့် ဖော်ပြရေးခွင့်ပြုထားသော်လည်း စားသုံးသူကာကွယ်ရေး ဥပဒေအရ မြန်မာလိုလည်း ထပ်မံဖော်ပြရမှာဖြစ်ပါကြောင်း၊ စားသုံးသူကာကွယ်ရေးဥပဒေအခန်း (၁၈)၊ ပုဒ်မ ၄၁ (ခ)နှင့် (ဆ)မှာ မြန်မာလို မဖြစ်မနေ ဖော်ပြရမည့် အချက်တွေဖြစ်ပြီး ၎င်းတို့ အနက်မှ အမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ ထားသိုသိမ်းဆည်းပုံ အညွှန်း၊ သုံးစွဲပုံနည်းလမ်း၊ ကျန်းမာရေးဆိုင်ရာဓါတ်မတည့်ကြောင်းဖော်ပြချက်၊ ကြိုတင် သတိပေး ချက်တို့မှ မဖြစ်မနေထည့်ရမည့် အချက်များကို ကုန်စည်အုပ်စုအလိုက် စားသုံးသူ ကာကွယ်ရေး ကော်မရှင်မှ ထုတ်ပြန်ကြေညာပေးထားပါကြောင်း၊ စားသုံးသူဘက်မှ တိုင်ကြားမှု ရှိလာရင်တော့ လုပ်ငန်းရှင်ဘက်မှာ ဖြေရှင်းရမည့်တာဝန်ရှိပါကြောင်း၊ ပြစ်မှုပြစ်ဒဏ်အရ အမြင့်ဆုံး ထောင်ဒဏ် (၂)နှစ်၊ ငွေသိန်း (၂၀၀)ထက်မပိုသော ငွေဒဏ်ဟုပါသော်လည်း တရားရုံးမှ ချမှတ်သည့်အတိုင်း လိုက်နာရမှာဖြစ်ကြောင်း၊ ဌာနအနေဖြင့် စီမံခန့်ခွဲမှုနည်းလမ်းအရ အရေးယူဆောင်ရွက်လို့ ရသော် လည်း နောက်တစ်ဆင့်မှာ ရဲအရေးပိုင်ဖြစ်၍ အမှုဖွင့်ပါက တရားရုံးမှ ကိုင်တွယ်သွားမှာဖြစ်ကြောင်း၊ လုပ်ငန်းရှင်များ အခက်အခဲရှိပါက မိမိတို့ဌာန၏ E-mail, Website နှင့် မိုဘိုင်းဖုန်းနံပါတ်များသို့ ဆက်သွယ်မေးမြန်း နိုင်ပါကြောင်း၊ ၂၀၂၀ ပြည့်နှစ်၊ မတ်လ (၁၆) ရက်မှာ အလွန်နီးကပ် လာပြီဖြစ်သည့် အတွက် အခက်အခဲ တွေ့ရှိရင် ဌာနကို တင်ပြဆွေးနွေးလို့ရပါကြောင်း၊ ပထမအဆင့် အနေဖြင့် ကုန်စည်များတွင် ကုန်အညွှန်း အမှတ်အသားများ၌ မြန်မာစာသားများ ထည့်သွင်း လာအောင် လုပ်ဆောင်သွားမှာဖြစ်ကြောင်း၊ ဒုတိယအဆင့်အနေဖြင့် ကုန်အညွှန်းအမှတ်အသားတွင် ဖော်ပြထားသည့်အတိုင်း မှန်ကန်အောင်ဆောင်ရွက်သွားမှာဖြစ်ကြောင်း၊ စတစ်ကာကပ်ဖို့ကိုလည်း အချို့ကုန်စည်တွေကိုကပ်ဖို့ ခွင့်ပြုနိုင်သော်လည်း အချို့ကုန်စည်တွေကို ခွင့်မပြုနိုင်တာတွေလည်း ရှိပါကြောင်း၊ ၂၀၂၀ ပြည့်နှစ်၊ မတ်လ (၁၆) ရက်နောက်ပိုင်းမှာလည်း ကုန်စည်အားလုံးကို ချက်ချင်း အရေးယူသွားတာမျိုးမဟုတ်ဘဲ ကုန်ပစ္စည်း အမယ်တစ်မျိုးချင်းအလိုက် တိုင်းဒေသကြီးအစိုးရအဖွဲ့ မှ သတ်မှတ်ပေးထားသည့် ကုန်ပစ္စည်း အမယ်တစ်မျိုး (သို့) နှစ်မျိုးကို ဈေးကွက်မှ စတင်ဖယ်ရှား သွားမှာဖြစ်ကြောင်း၊ ဥပဒေအသစ်မှာ ဥပဒေပါ အခန်းအားလုံးသည် ဥပဒေစတင်ပြဌာန်းသည့်နေ့မှ အာဏာတည်ပြီး ကုန်အညွှန်းအမှတ်အသားဖော်ပြမှုနှင့် စပ်လျဉ်းသည့် ဥပဒေအခန်း(၁၈)မှာ ဥပဒေ ပြဌာန်းပြီး တစ်နှစ်ပြည့်မြောက်မှသာ အာဏာတည်မည်ဟု သမ္မတမှ လက်မှတ်ရေးထိုး ထုတ်ပြန် ထားသည့်အတွက် မြန်မာစာသားဖြင့် ဖော်ပြလာရေး ထပ်မံ၍ ရက်တိုးပေး၍ရမည်မဟုတ် ပါကြောင်း၊ လုပ်ငန်းရှင်တို့အနေဖြင့်လည်း သိလိုသမျှ ပွင့်လင်းစွာ မေးမြန်းနိုင်ပါကြောင်း ဆွေးနွေး ခဲ့ပါသည်။

ထို့နောက် တက်ရောက်လာသည့် စီးပွားရေးလုပ်ငန်းရှင်များ၊ လက်လီအသင်းအဖွဲ့အစည်း များ၊ သတင်းမီဒီယာများမှ သိလိုသည်များ မေးမြန်းမှုအပေါ် အသေးစိတ် ရှင်းလင်းဆွေးနွေး ခဲ့ပါကြောင်း သိရှိရပါသည်။ နေ့လည်ပိုင်းတွင် အရာထမ်း/ အမှုထမ်းနှင့် စစ်ဆေးရေးအရာရှိများကို စားသုံးသူကာကွယ် ရေးနည်းဥပဒေ (မူကြမ်း)နှင့် စပ်လျဉ်း၍ ရှင်းလင်းဆွေးနွေးခဲ့ရာ စားသုံးသူကာကွယ်ရေးဥပဒေ၊ ကုန်အညွှန်းအမှတ်အသား ဖော်ပြခြင်းဆိုင်ရာ ပြဌာန်းချက်များနှင့် စပ်လျဉ်း၍ ဆက်လက်ဆောင် ရွက်မည့် လုပ်ငန်းစဉ်များကို စားသုံးသူရေးရာဦးစီးဌာန (ရုံးချုပ်)မှ ညွှန်ကြားရေးမှူး ဦးရဲထွဋ်နိုင်မှ လည်းကောင်း၊ ဈေးကွက်စုံစမ်းစစ်ဆေးခြင်းလုပ်ငန်းများနှင့် စပ်လျဉ်း၍ စားသုံးသူရေးရာဦးစီးဌာန (ရုံးချုပ်)မှ ဦးစီးအရာရှိ ဒေါ်ကေဇင်ယုမှလည်းကောင်း၊ စားသုံးသူကာကွယ်ရေးနည်းဥပဒေ (မူကြမ်း)နှင့် စပ်လျဉ်း၍ စားသုံးသူရေးရာဦးစီးဌာန (ရုံးချုပ်)မှ လက်ထောက်ညွှန်ကြားရေးမှူး ဦးထက်ဝင်းအောင်မှလည်းကောင်း ရှင်းလင်းဆွေးနွေးခဲ့ပါကြောင်း သတင်းရရှိပါသည်။

မကွေးတိုင်းဒေသကြီး

စားသုံးသူရေးရာဦးစီးဌာန

စားသုံးသူရေးရာဦးစီးဌာန၊ မကွေးတိုင်းဒေသကြီး၊ ဂန့်ဂေါခရိုင်ဦးစီးမှူးရုံးဆောက်လုပ်ခြင်း

သတင်းနှင့် လှုပ်ရှားမှုများ

လုပ်ငန်းအမည် - ဂန့်ဂေါခရိုင်ဦးစီးမှူးရုံး

(၅၀'×၃၅'×၂၄') RC (၂)ထပ်

(အတွင်း ရေ၊ မီး၊ မိလ္လာ)(Apron & Drain အပါ)

လုပ်ငန်းတည်နေရာ - မကွေးတိုင်းဒေသကြီး၊ ဂန့်ဂေါခရိုင်

ဂန့်ဂေါမြို့၊ မြောက်ကုန်းရပ်

ရင်းနှီးမြုပ်နှံမှု - (၉၅.၀၀၀) သန်း(ကျပ်-သန်း)

တင်ဒါအောင်ဈေးနှုန်း - (၉၂.၄၀၀) သန်း(ကျပ်-သန်း)

၂၀၁၉-၂၀၂၀ ဘဏ္ဍာနှစ်၊ ငွေလုံးငွေရင်း (မူလ) ခွင့်ပြုရန်ပုံငွေဖြင့် ဆောင်ရွက်ခွင့်ရရှိခဲ့သည့် စားသုံးသူရေးရာဦးစီးဌာန၊ မကွေးတိုင်းဒေသကြီး၊ ဂန့်ဂေါခရိုင်ဦးစီးမှူးရုံး (၅၀'×၃၅'×၂၄') RC (၂)ထပ် (အတွင်းရေ၊ မီး၊ မိလ္လာ) (Apron & Drain အပါ)တည်ဆောက်ခြင်းလုပ်ငန်းအား တိုင်းဒေသကြီးအစိုးရအဖွဲ့သို့ လွှဲပြောင်းလက်ခံခဲ့ခြင်းအပေါ် မကွေးတိုင်းဒေသကြီးအစိုးရအဖွဲ့၏ (၁၄.၁၁.၂၀၁၉) ရက်နေ့ ကျင်းပသော အစည်းအဝေးမှတ်တမ်း အမှတ်စဉ် (၄၃/၂၀၁၉) ဆုံးဖြတ်ချက် အပိုဒ်(၁၃)အရ လုပ်ငန်းနှင့် ရန်ပုံငွေလွှဲပြောင်း အပ်နှံရန် သဘောတူညီခဲ့ပါသောကြောင့် နိုင်ငံတော် သမ္မတရုံး၏ (၁/၂၀၁၇) ညွှန်ကြားချက်များနှင့်အညီ တိုင်းဒေသကြီးအစိုးရအဖွဲ့မှ ဖွဲ့စည်းပေးသော တင်ဒါကော်မတီအဖွဲ့၊ တင်ဒါလက်ခံရေးနှင့်စိစစ်ရေးကော်မတီအဖွဲ့၊ ကြမ်းခင်းဈေးတွက်ချက်ရေး ကော်မတီအဖွဲ့နှင့် အရည်အသွေးစစ်ဆေးရေးနှင့် လက်ခံရေးကော်မတီအဖွဲ့များ ဖွဲ့စည်းတာဝန် ပေးအပ်ခဲ့ပါသည်။

စားသုံးသူရေးရာဦးစီးဌာန၊ မကွေးတိုင်းဒေသကြီး၊ ဂန့်ဂေါခရိုင်ဦးစီးမှူးရုံး (၅၀'×၃၅'×၂၄') RC (၂)ထပ် (အတွင်းရေ၊ မီး၊ မိလ္လာ) (Apron & Drain အပါ) ဆောက်လုပ်ရန်အတွက် (၇.၁၁.၂၀၁၉) ရက်နေ့မှ (၆.၁၂.၂၀၁၉) ရက်နေ့ နေ့လည် (၁၃:၀၀)နာရီထိ တင်ဒါခေါ်ယူဆောင်ရွက်ရာတွင် (၈.၁၁.၂၀၁၉) ရက်နေ့ ထုတ် နိုင်ငံပိုင်မြန်မာ့အလင်းသတင်းစာ စာမျက်နှာ (၂၂)တွင် အိတ်ဖွင့် တင်ဒါကြော်ငြာထည့်သွင်းခေါ်ယူခဲ့ရာ ကုမ္ပဏီ(၇)ခုတို့မှ တင်ဒါလျှောက်လွှာပုံစံများ ဝယ်ယူခဲ့ပြီး အိတ်ဖွင့်တင်ဒါပြန်လည်တင်သွင်းရာတွင် ကုမ္ပဏီ (၃)ခုမှသာ ပြန်လည်တင်သွင်းခဲ့ပါသည်။

ဂန့်ဂေါခရိုင်ဦးစီးမှူးရုံး တည်ဆောက်ရေးလုပ်ငန်းဆောင်ရွက်ရန် အိတ်ဖွင့်တင်ဒါ တင်သွင်း ခဲ့သော ဂရုဏာမိုးကုမ္ပဏီ၊ ယောညီကိုကုမ္ပဏီ၊ မြတ်ဂေဟာကုမ္ပဏီ (၃)ခုအနက်မှ လုပ်ငန်းအဆိုပြု တန်ဘိုးငွေ ကျပ်သန်း (၉၂.၄)သန်းနှင့် Technical Proposal ရမှတ်(၇၆)ရရှိခဲ့သော ယောညီကို ကုမ္ပဏီအား မကွေးတိုင်း ဒေသကြီးအစိုးရအဖွဲ့ အစည်းအဝေးမှတ်တမ်း အမှတ်စဉ် (၂/၂၀၂၀) ဆုံးဖြတ်ချက်အပိုဒ် (၂၅)အရ အတည်ပြု ရွေးချယ်ခဲ့ပါသည်။

အဆိုပါတင်ဒါအောင်မြင်ခဲ့သော ယောညီကိုကုမ္ပဏီနှင့် လုပ်ငန်းအပ်နှံခြင်း သဘောတူ စာချုပ်အား (၆.၂.၂၀၂၀) ရက်နေ့တွင် စာချုပ်ချုပ်ဆိုခဲ့ပြီး လုပ်ငန်းလက်ခံသည့် ကုမ္ပဏီမှ စာချုပ် တန်ဖိုး၏ (၅%)နှင့် ညီမျှသော Performance Guarantee ငွေကျပ် (၄၆၂၀၀၀ဝိ/-) ကို Bank Guarantee ပြုလုပ်၍ သတ်မှတ် နည်းလမ်းအတိုင်း ပေးသွင်းဆောင်ရွက်ခဲ့ပါသည်။

သို့ဖြစ်ပါ၍ စားသုံးသူရေးရာဦးစီးဌာန၊ မကွေးတိုင်းဒေသကြီး၊ ဂန့်ဂေါခရိုင်ဦးစီးမှူးရုံး (၅၀'×၃၅'×၂၄') RC (၂)ထပ် (အတွင်းရေ၊ မီး၊ မိလ္လာ) (Apron & Drain အပါ) တည်ဆောက်ရေး လုပ်ငန်းကို (၂၀.၂.၂၀၂၀) ရက်နေ့မှစတင်၍ Drawing Structure Design ပါ အတိုင်းဆောင်ရွက် လျက်ရှိရာ (၁၈.၃.၂၀၂၀)နေ့ အထိ စုစုပေါင်းလုပ်ငန်းပမာဏ၏ (၁၈ %)ပြီးစီးပြီဖြစ်ပါသည်။

စားသုံးသူရေးရာဦးစီးဌာန

မကွေးတိုင်းဒေသကြီး

လယ်ယာထုတ်ကုန်စီမံခန့်ခွဲရေးအဖွဲ့၏ လုပ်ငန်းညှိနှိုင်းအစည်းအဝေးသို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနဒုတိယဝန်ကြီးတက်ရောက် အမှာစကားပြောကြား

သတင်းနှင့် လှုပ်ရှားမှုများ

၂၀၂၀ ပြည့်နှစ် မတ်လ ၁၆ ရက်နေ့တွင် လယ်ယာထုတ်ကုန်စီမံခန့်ခွဲရေးအဖွဲ့၏ ညှိနှိုင်းအစည်းအဝေးကို နေပြည်တော်၊ ရုံးအမှတ်(၃) စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဝန်ကြီးရုံးခန်းမ၌ ကျင်းပပြုလုပ်ရာ လယ်ယာထုတ်ကုန်စီမံခန့်ခွဲရေးအဖွဲ့ ဥက္ကဌ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီး ဦးအောင်ထူး၊ ပဲခူးတိုင်းဒေသကြီး စီမံဘဏ္ဍာဝန်ကြီး၊ စပါး၊ ဆန် ဝယ်ယူရေးကြီးကြပ်မှုလုပ်ငန်းအဖွဲ့များ၊ ဌာနဆိုင်ရာအသီးသီးမှ တာဝန်ရှိသူများနှင့် မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်၊ မြန်မာနိုင်ငံဆန်စပါးအသင်းချုပ်၊ မွေးမြူရေးည်းအဝေး ဌာနများသို့ အစည်းအဝေးဖိတ်ကြားစာများ ပေးပို့ပြီးဖြစ်ပါကြောင်းနှင့် အစည်းအဝေးကျင်းပပြုလုပ်နိုင်ရေးအတွက် လုပ်ငန်းအဖွဲ့ချုပ်၊ မြန်မာ နိုင်ငံဆန်စက်လုပ်ငန်းရှင်များအသင်း၊ မြန်မာ့ကုန်ပစ္စည်းစစ်ဆေးရေးနှင့် စမ်းသပ်မှုလုပ်ငန်းလီမိတက်တို့မှ တာဝန်ရှိ သူများ တက်ရောက်ခဲ့ကြပြီး ၂၀၁၉-၂၀၂၀ခုနှစ်အတွက် ရန်ကုန်တိုင်းဒေသကြီး၊ ပဲခူးတိုင်းဒေသကြီးနှင့် ဧရာဝတီ တိုင်းဒေသကြီးတို့တွင် အခြေခံရည်ညွှန်းစပါးစျေးနှုန်းဖြင့် မိုးစပါးဝယ်ယူရေးဆောင်ရွက်ပြီးစီးမှု အခြေအနေများအား အသေးစိတ်ညှိနှိုင်းဆွေးနွေး ခဲ့ကြောင်း သတင်းရရှိပါသည်။

လယ်ယာထုတ်ကုန်စီမံခန့်ခွဲရေးအဖွဲ့ ဥက္ကဌ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဒုတိယ ဝန်ကြီး ဦးအောင်ထူးက အမှာစကားပြောကြားရာတွင် လယ်ယာထုတ်ကုန်စီမံခန့်ခွဲရေးအဖွဲ့အနေဖြင့် မိုးစပါး တင်းပေါင်း (၁၇၄,၀၀၀) ဝယ်ယူရန် စီစဉ်ဆောင်ရွက်ခဲ့ပါကြောင်း၊ ဝယ်ယူပြီးစပါးများမှ ကြိတ်ခွဲထားသည့် ဆန်များကို ရန်ကုန်တိုင်းဒေသကြီး၊ ဒဂုံဆိပ်ကမ်းမြို့နယ်နှင့် ရွှေပြည်သာမြို့နယ်ရှိ သိုလှောင်ရုံများသို့ ဆန်ပြန် လည်အပ်နှံမှုများ ဆောင်ရွက်လျက်ရှိရာ ကြိတ်ခွဲထားသည့်ဆန်များ၏ ၁၇.၂၄ % ခန့် ပြန်လည်ပေးသွင်းခဲ့ပြီး ဖြစ်ပါကြောင်း၊ သက်ဆိုင်ရာ စပါး၊ ဆန် ဝယ်ယူရေးကြီးကြပ်မှုလုပ်ငန်းအဖွဲ့များအနေဖြင့် ၃၁-၃-၂၀၂၀ ရက်နေ့ မတိုင်မီ အမြန်ဆုံးပြန်လည်အပ်နှံနိုင်ရေး ကြီးကြပ်ဆောင်ရွက်ပေးရန် လိုအပ်ကြောင်း၊ အပ်နှံရရှိသည့်ဆန်များ ကိုလည်း တင်ဒါစနစ်ဖြင့် ပြန်လည်ရောင်းချနိုင်ရေး ဝိုင်းဝန်းဆွေးနွေး ပေးစေလိုကြောင်း၊ ဝယ်ယူထားသည့် ဆန်များအနက် တရုတ်ပြည်သူ့သမ္မတနိုင်ငံသို့ ဆန်တန်ချိန် (၂၀၀) လှူဒါန်းနိုင်ခဲ့ပါကြောင်း၊ အဖွဲ့မှ ဆန်ဝယ်ယူ ထားနိုင်ခဲ့သည့်အတွက် ဈေးကွက်တည်ငြိမ်မှုကို ဖော်ဆောင်နိုင်ခဲ့ပါကြေင်း၊ နွေစပါးကိုလည်း အခြေခံဈေးနှုန်း ဖြင့်ဝယ်ယူနိုင်ရေးဆက်လက်ညှိနှိုင်းဆောင်ရွက်သွားမည်ဖြစ်ကြောင်း၊ မိမိတို့အဖွဲ့၏ စပါးဝယ်ယူသည့် အစီ အစဉ်သည် စားသုံးသူနှင့် တောင်သူများ ကိုလည်း အကျိုးရှိစေသည့်အပြင် တရုတ်ပြည်သူ့သမ္မတနိုင်ငံသို့လည်း ကူညီထောက်ပံ့နိုင်ခဲ့သည့်အတွက် အောင်မြင်မှုများရရှိခဲ့ပါကြောင်း၊ အခြားတစ်ဖက်ကလည်း လက်ရှိစပါး ဈေးသည် အခြေခံဈေးနှုန်းထက် ပိုမို မြင့်မားလာသည့်အတွက် လုပ်ငန်းစဉ်အောင်မြင်သည်ဟု ယူဆပါကြောင်း ပြောကြားပါသည်။

ထို့နောက် အစည်းအဝေးသို့ တက်ရောက်လာသည့် တိုင်းဒေသကြီး စပါးဆန်ဝယ်ယူရေး ကြီးကြပ်မှု လုပ်ငန်းအဖွဲ့ဝင်များက မိုးစပါးဝယ်ယူရေး ဆောင်ရွက်ပြီးစီးမှုအခြေအနေများနှင့် ပတ်သက်၍ လည်းကောင်း၊ အသင်းအဖွဲ့များနှင့် ဌာနဆိုင်ရာတာဝန်ရှိသူများက တင်ဒါစနစ်ဖြင့် ဆန်ပြန်လည်ရောင်းချရေးအတွက် တင်ဒါ စည်းမျဉ်းစည်းကမ်းများ သတ်မှတ်နိုင်ရေးနှင့်ပတ်သက်၍လည်းကောင်း ဝိုင်းဝန်းအကြံပြုဆွေးနွေးတင်ပြခဲ့ကြောင်း သတင်းရရှိပါသည်။

မူဝါဒ

သထုံမြို့နယ်စိုက်ပျိုးရေးသိပ္ပံကျောင်း၌ စားသုံးသူကာကွယ်ရေး အသိပညာပေးဆွေးနွေးခြင်းနှင့် ကျောင်းမုန့်ဈေးတန်း၌ ဈေးကွက်စောင့်ကြည့်စစ်ဆေးခြင်း ဆောင်ရွက်

သတင်းနှင့် လှုပ်ရှားမှုများ

သထုံခရိုင် စားသုံးသူရေးရာဦးစီးဌာနမှ ဝန်ထမ်းများသည် အစားအသောက်နှင့်ဆေးဝါးကွပ်ကဲရေး ဦးစီးဌာနတို့နှင့်ပူးပေါင်း၍ (၄.၂.၂၀၂၀) ရက်နေ့ နံနက်ပိုင်းတွင် သထုံမြို့ စိုက်ပျိုးရေးသိပ္ပံကျောင်းရှိ ဆရာ/ဆရာမ၊ ကျောင်းသား/ကျောင်းသူ (၁၆၇) ဦးအား စားသုံးသူကာကွယ်ရေးအသိပညာပေးဆွေးနွေး ခဲ့ရာ စားသုံးသူရေးရာဦးစီးဌာနမှ ဦးစီးမှူး ဦးအောင်ကျော်မင်း က စားသုံးသူအခွင့်အရေး (၈) ချက်နှင့် စားသုံးသူနစ်နာမှုအတွက် တိုင်ကြားနိုင်သည့်အခြေအနေများအားလည်းကောင်း၊ မွန်ပြည်နယ်အစား အသောက်နှင့် ဆေးဝါးကွပ်ကဲရေးဦးစီးဌာနမှ ဦးစီအရာရှိ ဦးမျိုးမင်းဦး က အစားအသောက်၊ ဆေးဝါး၊ အလှကုန်နှင့်ပတ်သက်၍ ဆောင်ရန်/ရှောင်ရန် အချက်များအားလည်းကောင်း ဟောပြောဆွေးနွေးခဲ့ပြီး ကျောင်းသား/ကျောင်းသူများ စားသုံးလျှက်ရှိကြသည့် ကျောင်းဝင်းအတွင်းရှိ မုန့်ဈေးဆိုင်များအား ဈေးကွက်စောင့်ကြည့်စစ်ဆေးခြင်းလုပ်ငန်းများ ဆောင်ရွက်ခဲ့ကြကြောင်း သိရှိရပါသည်။

မွန်ပြည်နယ်

စားသုံးသူရေးရာဦးစီးဌာန

မွန်ပြည်နယ်တွင် အရည်အသွေးကောင်းမွန်သော ဆားနှင့်ဆားထွက်ပစ္စည်းများ ပိုမိုထုတ်လုပ် နိုင်စေရေး၊ ဈေးကွက်ခိုင်မာမှုရရှိစေရေး ပညာပေးသင်တန်းနှင့် အလုပ်ရုံဆွေးနွေးပွဲကျင်းပ

သတင်းနှင့် လှုပ်ရှားမှုများ

ဆားလုပ်ငန်းတန်ဖိုးမြှင့်ထုတ်လုပ်မှုနည်းပညာ ပံ့ပိုးပေးနိုင်ရန်၊ ဈေးကွက်ခိုင်မာမှုရရှိစေရန်၊ အရည် အသွေးကောင်းမွန်သော ဆားနှင့်ဆားထွက်ပစ္စည်းများ ပိုမိထုတ်လုပ်ဖြန့်ဖြူးရောင်းချနိုင်ရန် ရည်ရွယ်၍ မွန်ပြည်နယ်အစိုးရအဖွဲ့၏ လမ်းညွှန်မှုဖြင့် မွန်ပြည်နယ်အတွင်းရှိ ဆားလုပ်ငန်းကော်မတီ၊ ဆားလုပ်ငန်း ဖွံ့ဖြိုးတိုးတက်ရေးကော်မတီ၊ ဆားလုပ်ငန်းရှင်အသင်း၊ မော်လမြိုင်ကုန်စည်ဒိုင်အသင်းတို့ ပူးပေါင်း၍ “မွန်ပြည်နယ်တွင် အရည်အသွေးကောင်းမွန်သော ဆားနှင့်ဆားထွက်ပစ္စည်းများ ပိုမိုထုတ်လုပ် နိုင်စေရေး၊ ဈေးကွက်ခိုင်မာမှုရရှိစေရေး ပညာပေးသင်တန်းနှင့် အလုပ်ရုံဆွေးနွေးပွဲ” ကို 21 Paradise Hotel (စက်စဲ ကမ်းခြေ) ၌ မတ်လ ၅ ရက်မှ (၇) ထိ (၃) ရက်ကြာ ကျင်းပပြုလုပ်ခဲ့သည်။

အဆိုပါ သင်တန်းနှင့်ဆွေးနွေးပွဲသို့ မွန်ပြည်နယ် သယံဇာတနှင့်သဘာဝပတ်ဝန်းကျင်ထိန်းသိမ်းရေး ဝန်ကြီးဒေါက်တာမင်းကြည်ဝင်း၊ မွန်ပြည်နယ်ဆားလုပ်ငန်းရုံးမှ ပြည်နယ်ဦးစီးမှူး ဦးခင်စိုးနှင့် ဝန်ထမ်းများ၊ တိုင်းဒေသကြီး/ပြည်နယ်ဦးစီးမှူးများ၊ ပြည်နယ်အဆင့် ဌာနဆိုင်ရာများ၊ မွန်ပြည်နယ်ဆားလုပ်ငန်း ကော်မတီမှ အဖွဲ့ဝင်များ၊ ဆားလုပ်ငန်းဖွံ့ဖြိုးတိုးတက်ရေး ကော်မတီဝင်များ၊ မွန်ပြည်နယ်ဆားလုပ်ငန်းရှင် အသင်းဥက္ကဌ ဦးဝင်းထိန်နှင့် အသင်းဝင်များ၊ ပြည်နယ်အတွင်း ဆားလုပ်ငန်းရှင်များ၊ မွန်ပြည်နယ် ကုန်စည်ဒိုင်အသင်း ဥက္ကဌနှင့် အသင်းဝင်များ စုစုပေါင်း လူဦးရေ (၉၀) ကျော်ခန့် တက်ရောက်ခဲ့ကြကြောင်း သိရှိရပါသည်။

မွန်ပြည်နယ်

စားသုံးသူရေးရာဦးစီးဌာန

ကုန်အညွှန်းအမှတ်အသား ဆောင်ရွက်ပေးနိုင်မှု အခြေအနေ

သတင်းနှင့် လှုပ်ရှားမှုများ

မွန်ပြည်နယ်၊ စားသုံးသူရေးရာဦးစီးဌာနသည် မြန်မာနိုင်ငံစားသုံးသူကာကွယ်ရေး ကော်မရှင် (၂/၂၀၁၉) ညွှန်ကြားချက်နှင့် စားသုံးသူကာကွယ်ရေးဥပဒေ (၂၀၁၉) ၊ အခန်း(၁၈) ပြဌာန်းချက်ပါ စီးပွားရေးလုပ်ငန်းရှင်များမှ မိမိတို့ထုတ်လုပ်သော ကုန်စည်များအပေါ်တွင် မြန်မာဘာသာဖြင့် ကုန်အညွှန်းအမှတ်အသား ဖော်ပြချက်များအား လိုက်နာဆောင်ရွက်သွား နိုင်ရေးတို့အတွက် မွန်ပြည်နယ်ဦးစီးမှူးရုံးအနေဖြင့် (၃.၃.၂၀၂၀)ရက်နေ့မှ (၁၁.၃.၂၀၂၀) ရက်နေ့အတွင်း ရေသန့်လုပ်ငန်း(၅)ခု၊ ရှောက်သီးဆေးပြား(၂) ခု ၊ မုန့်လုပ်ငန်း(၁၂)ခု၊ အချိုရည်/ ဂျယ်လီ(၂)ခု၊ ဘာလချောင်ကြော်(၁) ခု စုစုပေါင်းလုပ်ငန်း(၂၂)ခုတို့အား ဆောင်ရွက် ပေးနိုင်ခဲ့ ပါသည်။စီးပွားရေးလုပ်ငန်းရှင်များမှ ကုန်အညွှန်းအမှတ်အသားများ ဆောင်ရွက်ရာတွင် အဆင်ပြေချောမွေ့စေရေးအတွက် ပိတ်ရက်မရှိ ဆောင်ရွက်ပေးလျှက်ရှိပါသည်။

မွန်ပြည်နယ်

စားသုံးသူရေးရာဦးစီးဌာန

စျေးကွက်စောင့်ကြည့်စစ်ဆေးခြင်း

သတင်းနှင့် လှုပ်ရှားမှုများ

ကယားပြည်နယ်၊ လွိုင်ကော်ခရိုင် စားသုံးသူရေးရာဦးစီးဌာနမှ လွိုင်ကော်မြို့ပေါ်ရှိ နောင်ယားဈေးအတွင်း ဈေးဆိုင်များအား အစားအသောက်နှင့်ဆေးဝါးကွပ်ကဲရေးဉီးစီးဌာနမှ ဉီးဆောင်ပြီး မြို့နယ်စည်ပင်သာယာရေးအဖွဲ့နှင့် ပူးပေါင်း၍ ၂၀၂၀ ခုနှစ်၊ မတ်လ (၁၂) ရက်နေ့ နံနက် (၀၈၀၀) နာရီအချိန်တွင် စျေးကွက်စောင့်ကြည့် ကွင်းဆင်းစစ်ဆေးဆောင်ရွက်ခဲ့ပါသည်။

ထိုသို့ စျေးကွက်စောင့်ကြည့်စစ်ဆေးဆောင်ရွက်ရာတွင် စားသောက်ကုန်များ လက်လီ/ လက္ကား ထုတ်လုပ်ဖြန့်ဖြူးရောင်းချနေသော လုပ်ငန်းရှင်များအနေဖြင့် ဘေးအန္တရာယ် ကင်းရှင်းပြီး လုံခြုံစိတ်ချရသည့် စားသောက်ကုန်များကိုသာ ထုတ်လုပ်ဖြန့်ဖြူးရောင်းချကြရန်နှင့် ၂၀၁၉ စားသုံးသူကာကွယ်ရေး ဥပဒေပါ ကုန်အညွှန်းအမှတ်အသားများတွင် မြန်မာဘာသာဖြင့် ဖော်ပြြခင်းနှင့် စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်၏ ၂/၂၀၁၉ ညွှန်ကြား ချက်အား သိရှိလိုက်နာနိုင်ရေး အတွက် အသိပညာပေးခြင်းများ၊ လက်ကမ်းစာစောင်များ ဖြန့်ဝေခြင်းများနှင့် သိလိုသည်များ မေးမြန်းလာသည့်အပေါ် ဖြေကြားဆောင်ရွက်ခဲ့ကြောင်း သတင်းရရှိပါသည်။

ကယားပြည်နယ်

စားသုံးသူရေးရာဦးစီးဌာန

“စားသုံးသူအရေး စဉ်ဆက်မပြတ်ဆောင်ရွက်ပေး”ဟူသော ဆောင်ပုဒ်ဖြင့် ကမ္ဘာ့စားသုံးသူအခွင့်အရေးများနေ့အထိမ်းအမှတ် အသိပညာပေးလှုပ်ရှားမှုများကို မြန်မာနိုင်ငံတစ်ဝှမ်း၌ကျင်းပ

သတင်းနှင့် လှုပ်ရှားမှုများ

၂၀၂၀ ပြည့်နှစ်၊ မတ်လ (၁၅)ရက်နေ့တွင် ကျရောက်သော ကမ္ဘာ့စားသုံးသူအခွင့် အရေးများနေ့တွင် “စားသုံးသူအရေး စဉ်ဆက်မပြတ်ဆောင်ရွက်ပေး” ဟူသော ဆောင်ပုဒ် ဖြင့် အသိပညာပေးလှုပ်ရှားမှုများကို မြန်မာနိုင်ငံတစ်ဝှမ်းရှိ စားသုံးသူရေးရာဦးစီးဌာန၊ တိုင်းဒေသကြီး/ပြည်နယ်ဦးစီးမှူးရုံးစိုက်ရာ မြို့ကြီးများနှင့် ခရိုင်ဦးစီးမှူးရုံးစိုက်ရာ မြို့ကြီး အချို့တွင် (၁၅.၃.၂၀၂၀)နေ့က တပြိုင်တည်းဆောင်ရွက်ခဲ့ကြပါသည်။

ထိုသို့ဆောင်ရွက်ရခြင်း၏ အဓိကရည်ရွယ်ချက်များမှာ စားသုံးသူတိုင်းတွင် စားသုံးသူအခွင့်အရေးများရှိကြောင်း၊ စားသုံးသူရေးရာဦးစီးဌာနသည် စားသုံးသူများ၏ အခွင့်အရေးနှင့် အကျိုးစီးပွားကို အကာအကွယ်ပေးလျက်ရှိကြောင်း၊ စားသုံးသူများအနေဖြင့် ၎င်းတို့၏နစ်နာမှုများကို စားသုံးသူရေးရာဦးစီးဌာနသို့ ဆက်သွယ်တိုင်ကြားနိုင်ကြောင်း၊ ဌာနသို့ ဆက်သွယ်တိုင်ကြားနိုင်မည့်နည်းလမ်းများနှင့် ဌာန၏ လုပ်ငန်းဆောင်ရွက်မှုများကို ပြည်သူများက ကျယ်ကျယ်ပြန့်ပြန့်သိရှိစေရန်ဖြစ်ပါသည်။

အသိပညာပေးလှုပ်ရှားမှုများဆောင်ရွက်ရာတွင် စားသုံးသူအခွင့်အရေးများ၊ ဌာနသို့ ဆက်သွယ်ဆောင်ရွက်နိုင်မည့်နည်းလမ်းများ၊ စားသုံးသူကာကွယ်ရေးဥပဒေပါ အကြောင်း အချက်များ၊ ကုန်အညွှန်းအမှတ်အသားဖော်ပြခြင်းနှင့် ပတ်သက်သောအချက်များအား ပြည်သူအများစု တွေ့မြင်နိုင်မည့်နေရာများတွင် ဗီနိုင်းပိုစတာများဖြင့်ပြသခြင်း၊ ပြည်သူများထံသို့ အသိပညာပေးလက်ကမ်းစာစောင်များ ဖြန့်ဝေခြင်းများကို ဆောင်ရွက်ခဲ့ကြပါသည်။

ထို့အပြင် “ကုန်စည်လုံခြုံစိတ်ချရမှုအစ၊ ကုန်အညွှန်းအမှတ်အသားက”ဟူသော မီဒီယာကမ်ပိန်းကိုလည်း (၁၅.၃.၂၀၂၀)နေ့တွင် တနိုင်ငံလုံးအတိုင်းအတာဖြင့် စတင်ဆောင်ရွက်ခဲ့ရာ မီဒီယာများနှင့် စားသုံးသူရေးရာဦးစီးဌာန ရုံးချုပ် အပါအဝင် တိုင်းဒေသကြီး/ ပြည်နယ်ဦးစီးမှူးရုံးများ၏ လူမှုကွန်ယက်စာမျက်နှာများတွင် ကုန်အညွှန်းအမှတ်အသား ဖော်ပြခြင်းနှင့်ပတ်သက်သော အသိပညာပေးရုပ်သံဇာတ်လမ်းတိုအား ဖော်ပြခဲ့ပါသည်။ အသိပညာပေးရုပ်သံဇာတ်လမ်းတိုအား စီးပွားရေးလုပ်ငန်းရှင်များ၊ စားသုံးသူပြည်သူများက စိတ်ဝင်တစားလေ့လာကြည့်ရှုကြပါသည်။ ဖော်ပြပါမီဒီယာကမ်ပိန်းအား (၁၅.၃.၂၀၂၀)နေ့မှစ၍ (၂၇.၄.၂၀၂၀)နေ့ထိ ဆောင်ရွက်သွားမည်ဖြစ်ရာ စားသုံးသူရေးရာဦးစီဌာန ရုံးချုပ်နှင့် တိုင်းဒေသကြီး/ပြည်နယ် ဦးစီးမှူးရုံးတို့၏ လူမှုကွန်ယက်စာမျက်နှာများ(Facebook Page)တွင် အသိပညာပေး Post များ တင်ပြသွားမည်ဖြစ်ကြောင်း သတင်းရရှိပါသည်။

ITQM – DOCA