ပြည်တွင်းကုန်သွယ်မှုသတင်း

              ဧရာဝတီတိုင်းဒေသကြီး၊စားသုံးသူရေးရာဦးစီးဌာန၊  ဟင်္သာတခရိုင်ဦးစီးမှူးနှင့်အဖွဲ့သည်၊ ဟင်္သာတမြို့၊ ဟင်္သာတစက်မှုဇုန်ရှိ ဦးလှိုင်စိုး၏ စပါးခွံလောင်စာတောင့်လုပ်ငန်းသို့၊ (၂၃.၃.၂၀၂၂) နေ့တွင် သွားရောက်လေ့လာခဲ့ပါသည်။ စပါးခွံမှ လောင်စာတောင့်ထုတ်လုပ်ခြင်းကို ပြည်တွင်းဖြစ်စက်များဖြင့်ထုတ်လုပ်ခြင်းဖြစ်ပြီး တရက်လျှင် လောင်စာတောင့် တစ်တန်ခွဲမှ နှစ်တန်ကျ စက် (၂၃) လုံးတပ်ဆင်ထားပြီး စပါးခွံလောင်စာ တောင့်များ ထုတ်လုပ်လျက်ရှိပါသည်။

     စပါးခွံသည် စပါးကို ဆန်ကြိတ်ခွဲရာမှ ထွက်ရှိလာသော ဘေးထွက်ပစ္စည်းဖြစ်ပြီး၊ စပါးခွံတွင်  ကာဗွန်ပါဝင်မှု ၃၀ ရာခိုင်နှုန်းမှ ၅၀ ရာခိုင်နှုန်းပါဝင်ကာ အပူကိန်း (Heat Value) 13-16 MJ per kg ရှိပါသည်။ ၎င်းကို အဆောက်အဦသုံးပစ္စည်းများ၊ ဓာတ်မြေဩဇာများ၊ ပစ္စည်းအကာများ၊ လောင်စာများ ထုတ်လုပ်ရာတွင် အသုံးပြုနိုင်ပါသည်။

     စပါးခွံမှ မီးသွေးတောင့် ပြုလုပ်သည့် နည်းနှစ်နည်းရှိပြီး၊ တနည်းမှာ စပါးခွံကို ဦးစွာမီးရှို့၍ မီးသွေးမှုန့်(Carbon) အဖြစ်ပြောင်းလဲပြီး၊ ၎င်းကို ဖိအားဖြင့် လောင်စာတောင့်ပြုလုပ်ခြင်းနှင့် အခြားတစ်နည်းမှာ စပါးခွံကို သတ်မှတ် ထုထည်ပမာဏ(Biomass) အဖြစ်သို့ ပြုလုပ်ပြီး ၎င်းကို ကာဗွန်ဓာတ်အဖြစ်သို့ပြောင်းလဲ၍ လောင်စာတောင့်ပြုလုပ်ခြင်းနည်းတို့ဖြစ်ပါသည်။ ဟင်္သာတစက်မှုဇုန်တွင် ပြုလုပ်နေသော စပါးခွံလောင်စာတောင့်မှာ ဒုတိယနည်းဖြစ်သော Biomass မှ လောင်စာတောင့်ပြုလုပ်သည့်နည်းကို အသုံးပြုထားပါသည်။

      စပါးခွံလောင်စာစက်တစ်လုံးမှ တစ်နေ့လျှင် လောင်စာတောင့် ပျမ်းမျှ တတန်ခွဲ မှ နှစ်တန်အထိထွက်ရှိနိုင်ပြီး၊ မြင်းကောင်ရေ (၁၅) ကောင်ရှိ လျှပ်စစ်မော်တာနှင့် ၃၈၀ V ရှိ Heater Coil ကို အသုံးပြုထားပါသည်။ Cast Iron (သွန်းသံ)ဖြင့်ပြုလုပ်ထားသော လွန်သွားဖြင့် စပါးခွံကိုအနည်းငယ်ချေ၍ Heater Coil တပ်ထားသော ပြောင်းအတွင်း ဖိအားပေးခြင်းဖြင့် စပါးခွံလောင်စာတောင့်ကို ရရှိစေပါသည်။

      စက်တလုံးတန်ဘိုးမှာ ကျပ်သိန်း ၅၀ ခန့်ရှိပြီး၊ မီတာခမှာ ပိဿာ ၂၀တစ်အိတ်ကို ၇၀၀ ကျပ်ခန့်ကျသင့်ပါသည်။ စပါးခွံ ငါးတင်းဝင် အိတ် (၁၅၀) ပါကားတစ်စီးကို ကျပ်နှစ်သောင်းခွဲ ကျသင့်ပြီး၊ စပါးခွံလောင်စာတောင့် တပိဿာ ကုန်ကျစရိတ်မှ ၁၁၀ ကျပ်မှ ၁၂၀ ကျပ်ဝန်းကျင်ရှိပြီး ၁၅ ပိဿာတစ်အိတ်လျှင် စက်အထိုင်ဈေး ၂၀၀၀ ကျပ်ဖြင့် ရောင်းချလျှက်ရှိပါသည်။ စပါးခွံသယ်ယူရရှိမှုပေါ်မူတည်၍ နေ့စဉ်စပါးခွံ ငါးတင်းဝင် အိတ် (၁၅၀) ပါ၊ ကားခုနှစ်စီးခန့် ရှိသော ကုန်ကြမ်း စုဆောင်းရပါသည်။ ကုန်ကြမ်း ၁၀ပိဿာလျှင် ကုန်ချော ၉ ပိဿာခန့်ရရှိပါသည်။

        ဒေသတွင်းရှိ စားသောက်ဆိုင်များ၊ ဧရာဝတီတိုင်း၊ မြန်အောင်မြို့နယ်ရှိ ရေနံချက်ဖိုများ၊ စက်မှုဇုန်များနှင့် ရခိုင်ပြည်နယ်သို့တင်ပို့ရောင်းချပါသည်။ ယခုအခါ မီးသွေး ပိဿာ (၁၀) ပါ တစ်အိတ်လျှင် ၆၅၀၀ကျပ်ခန့်ရှိပြီး၊ စပါးခွံလောင်စာတောင့် (၁၅) ပိဿာ တစ်အိတ်လျှင် ၂၀၀၀ ကျပ် သာကျသင့်ပြီး ကုန်ကျစရိတ်မှာ လေးဆခန့်ကွာခြားပါသည်။ စပါးခွံလောင်စာတောင့်မှာ မီးမွှေးရခက်သော်လည်း မီးတောက်ရှိသည့်အတွက် မီးအားပိုကောင်းခြင်း၊ အိုးအနည်းငယ်မည်းသည်မှ လွဲ၍ စီးပွားရေးတွက်ချေကိုက်သော  ထင်းအစားထိုး၊ မီးသွေးအစားထိုး လောင်စာတောင့် ဖြစ်ပြီး ၊ ဆန်စပါး ဘေးထွက်ပစ္စည်းမှ ထုတ်လုပ်ခြင်းဖြစ်သောကြောင့် သဘာဝပတ်ဝန်းကျင်နှင့် သစ်တောပြုန်းတီးမှုကိုလည်း ကာကွယ်ရာရောက်ခြင်း၊ စပါးခွံလောင်စာတောင့်မှ ထွက်ရှိသော ပြာတွင် ပိုတက်ဆီယမ် ဓာတ်များစွာပါဝင်သဖြင့် မြေဩဇာအဖြစ်အသုံးပြုနိုင်ခြင်းတို့ကြောင့် ပြည်သူများ သုံးစွဲသင့်သော လောင်စာတောင့်ဖြစ်ကြောင်း လေ့လာတင်ပြအပ်ပါသည်။

DOCA(ဧရာဝတီ)

               ကယားပြည်နယ်တွင် တည်ဆောက်ရေးလုပ်ငန်း ပြန်လည်စတင်လာကြသဖြင့် ယခုမတ်လ တတိယပတ်အတွင်း ဘိလပ်မြေဈေးနှုန်းများမှာ ကမ္ဘောဇဘိလပ်မြေတစ်အိတ်လျှင် (၈၁၀၀)ကျပ်၊ အာပါချီဘိလပ်မြေတစ်အိတ်လျှင် (၈၂၀၀)ကျပ် နှင့် နဂါးဘိလပ်မြေ တစ်အိတ်လျှင်(၈၂၀၀)ကျပ် တို့ဖြင့် အရောင်းအဝယ်ဖြစ်လျှက်ရှိပြီး ယခင် မတ်လ ဒုတိယပတ်အတွင်း ကမ္ဘောဇဘိလပ်မြေတစ်အိတ်လျှင်(၇၇၀၀)ကျပ်၊ အာပါချီ ဘိလပ်မြေတစ်အိတ်လျှင် (၇၈၀၀)ကျပ်နှင့် နဂါးဘိလပ်မြေ တစ်အိတ်လျှင် (၇၈၀၀)ကျပ် တို့ဖြင့်သာရှိခဲ့ပြီး ယခင်အပတ်နှင့် ယခုအပတ် နှိုုင်းယှဉ်ကြည့်လျှင် ကမ္ဘောဇ ဘိလပ်မြေတစ်အိတ်လျှင် (၄၀၀)ကျပ်နှင့် အာပါချီဘိလပ်မြေ တစ်အိတ်လျှင် (၄၀၀)ကျပ် နှင့် နဂါးဘိလပ်မြေ တစ်အိတ်လျှင်(၄၀၀)ကျပ်ခန့် ဈေးနှုန်းမြင့်တက်လျှက်ရှိကြောင်း၊ ဈေးနှုန်းမြှင့်တက်ရခြင်းမှာ စက်သုံးဆီဈေးနှုန်းမြင့်တက်လာသဖြင့် သယ်ယူစရိတ်ကြီးမြင့်လာခြင်းကြောင့်ဖြစ်သည်ဟု  အိမ်ဆောက်ပစ္စည်းအရောင်းဆိုင်မှ သိရှိရပါတယ်။

DOCA(ကယား)

          ချင်းပြည်နယ်သည် ဝေးလံခေါင်သီသော တောင်ပေါ်ဒေသဖြစ်ခြင်းကြောင့် ကုန်ပစ္စည်းများ သယ်ယူရေးစရိတ်မြင့်မား၍ အခြားတိုင်းဒေသကြီး/ပြည်နယ်များထက် စက်သုံးဆီဈေးနှုန်းများ ကြီးမြင့်နေသည်ကို တွေ့ရှိရပါသည်။ လက်ရှိအခြေအနေတွင် စက်သုံးဆီများကို များသောအား ဖြင့် မန္တလေးမြို့မှ လက္ကားဈေးနှုန်းဖြင့် ဝယ်ယူရရှိပြီး ဟားခါးမြို့အတွင်းရှိ စက်သုံးဆီ ဈေးနှုန်း မြင့်တက်/ကျဆင်းခြင်းသည် မန္တလေးမြို့၏ စက်သုံးဆီဈေးနှုန်းမြင့်တက်/ကျဆင်းခြင်းနှင့် တိုက်ရိုက်ဆက်စပ်နေပါကြောင်း စက်သုံးဆီအရောင်းဆိုင်ရှင်တစ်ဦးထံမှ စုံစမ်းသိရှိရပါသည်။

          ဟားခါးမြို့ရှိ စက်သုံးဆီဈေးကွက်အခြေအနေအား လေ့လာကြည့်ရာတွင် ၂၀၂၂ခုနှစ် အတွင်း ဖေဖော်ဝါရီလမှာ ဈေးနှုန်းတည်ငြိမ်ခဲ့သော်လည်း မတ်လတွင် စက်သုံးဆီဈေးနှုန်း သိသိသာသာ မြင့်တက်လာသည်ကို သိရှိရပါသည်။ ဖေဖော်ဝါရီလနှင့် မတ်လ(၂၁ရက်နေ့အထိ) စက်သုံးဆီတစ်လီတာ ဈေးနှုန်းနှိုင်းယှဉ်ချက်အရ ဓါတ်ဆီအောက်တိန်း(95) ၃၁ ရာခိုင်းနှုန်း၊ ဓါတ်ဆီအောက်တိန်း(92) ၃၀ ရာခိုင်နှုန်း၊ ပရီမီယံဒီဇယ် ၂၈ ရာခိုင်နှုန်း၊ ဒီဇယ်(ရိုးရိုး) ၂၉ ရာခိုင် နှုန်း အသီးသီး ဈေးနှုန်းမြင့်တက်ခဲ့ပြီး မတ်လ(၂၂)ရက်နေ့တွင် စက်သုံးဆီဈေးနှုန်း အနည်းငယ် ကျဆင်းလာသည်ကို လေ့လာသိရှိရပါသည်။ ဟားခါးမြို့၏ ၂၀၂၂ ခုနှစ်၊ ဖေဖော်ဝါရီလနှင့် မတ်လ တွင် ဖြစ်ပေါ်နေသော စက်သုံးဆီတစ်လီတာဈေးနှုန်းများ နှိုင်းယှဉ်ချက်ကို အောက်ပါဇယားဖြင့် ဖော်ပြအပ်ပါသည်-

ဒေါ်ကြယ်(ဟားခါး)

         ချင်းပြည်နယ်တွင်    လူမှုအကျိုးစီးပွား   တိုးတက်လာစေရန်အတွက်    သော်လည်းကောင်း၊ အလုပ်အကိုင်နှင့် အခွင့်အလမ်းရှားပါးမှု ပြဿနာများကို လျော့နည်းလာစေရန် အတွက်သော် လည်းကောင်း စသည့်ရည်ရွယ်ချက်များဖြင့် ဤဆောင်းပါးကို ရေးသားတင်ပြရခြင်းဖြစ်ပါသည်။

          မြန်မာနိုင်ငံတွင် ဝဥပင်သည် နေရာအနှံ့တွင် သဘာဝပေါက်ပင်အဖြစ် ပေါက်ရောက် လျက်ရှိပါသည်။  ဝဥ၏ မူရင်းဒေသသည် အရှေ့တောင်အာရှနိုင်ငံများနှင့် အာဖရိကဒေသ များတွင် သဘာဝအလျောက် ပေါက်ရောက်လာရခြင်းဖြစ်ပါသည်။ ကမ္ဘာပေါ်တွင် ဝဥမျိုးပေါင်း (၁၃၀)ကျော် ခန့်ရှိပြီး(၁၂)မျိုးခန့်သာ ထုတ်ဖော်သုံးစွဲလျက်ရှိကြောင်း တွေ့ရှိရပါသည်။  ဝဥ၏ ရုက္ခဗေဒအမည်မှာ (Amorphophallus Companuatus)ဖြစ်ပြီး အင်္ဂလိပ်အမည်မှာ (Element Foot Yam, White Yam or Telingo)ဟု ခေါ်ဝေါ်ကြပါသည်။ မြန်မာနိုင်ငံတွင် အဓိက စိုက်ပျိုးလျက်ရှိသော ဝဥမျိုး(၃)မျိုးရှိ ပါသည်။ ဝဥအနီ၊ အဝါ၊ အဖြူဟူ၍ ရှိရာ အနီဥသည် ဈေးကွက်တွင် အကောင်းဆုံး မျိုးစေ့ဖြစ်ပါသည်။ ဝဥပင်သည် မိုးများပြီး  ပင်လယ်ရေ အမြင့်ပေ (၅၀၀၀)ခန့်မြင့်မားသော  မြေနေရာများတွင် ပိုမိုဖြစ် ထွန်းလျက်ရှိကြောင်း  လေ့လာတွေ့ရှိရပါသည်။ ဝဥစိုက်ပျိုးရာတွင် မျိုးပွားနည်း(၄)မျိုးရှိပါသည်။ ပထမနည်းမှာ (၃၀)ကျပ်သားမျိုးဥကို စိုက်ပျိုးပါက နှစ်ချင်းအသုံးပြုနိုင်သည့် ရောင်းတန်းဝင် ဝဥရ မည်ဖြစ်ပါသည်။  ဒုတိယမျိုးပွားနည်းမှာ အရွက်မှအသီးများကို စိုက်ပျိုးခြင်း၊ ဝဥ ပန်းခိုင်မှ ရရှိသော အစေ့ငယ်များကို စိုက်ပျိုးခြင်း၊ ဝဥအလုံးကြီးမှ ခွဲယူပြီး မျိုးအဖြစ်လည်း စိုက်ပျိုးနိုင်ပါသည်။ ဝဥကို စတင်စိုက်ပျိုးမည်ဆိုပါက ချုံနွယ်၊ ပေါင်းမြက်များ ခုတ်ထွင် ရှင်းလင်းပြီး မီးရှို့ကာ စိုက်ခင်းအား မြေဆွခြင်း၊ ဘောင်ခတ်ခြင်းများပြုလုပ်ပြီး ဧပြီလနှင့် မေလတွင် စိုက်ပျိုးနိုင်ပါသည်။  တန်းကြား (၂)ပေ၊ ပင်ကြား (၁)ပေနှုန်းဖြင့် စိုက်ပျိုးမည် ဆိုပါက တစ်ဧကလျှင် ဝဥမျိုးပေါင်း(၅၄၅၅)ပင်အထိ ဆံ့အောင် စိုက်ပျိုးနိုင်ပါသည်။ (၂၀၁၈ - ၂၀၂၀)ခုနှစ်များတွင်  သုံးနှစ်အတွင်း တစ်ဧကလျှင် ကုန်ကျစရိတ်စုစုပေါင်း ကျပ်သိန်း (၅၀)ခန့်ကုန်ကျပြီး အကျိုးအမြတ်အနေဖြင့် ကျပ်သိန်း (၁၀၀) အထိရရှိကြောင်း ဝဥစိုက်ပျိုး သူတောင်သူများထံမှ သိရပါသည်။ ပျှမ်းမျှအပူချိန်(၂၅) ဒီဂရီမှ(၃၅) ဒီဂရီ စင်ဒီဂရိတ်အကြား ပူနွေးစွတ်စိုသော ရာသီဥတုကို နှစ်သက်ပါသည်။  ဝဥစိုက်ပျိုးရာတွင်  မြေဆီလွှာ PH (5.5) မှ (7.2) နေရာများတွင် ပိုမိုဖြစ်ထွန်းသည်ကိုတွေ့ရပါသည်။

        ၂၀၂၀-၂၀၂၁ခုနှစ်တွင် ချင်းပြည်နယ် တစ်ပြည်နယ်လုံး၌ ဝဥစိုက်ဧကပေါင်း(၁၆၉၂၁) ဧက အထိရှိပါသည်။ မင်းတပ်(၄၃၁၀)ဧက၊ မတူပီ(၂၅၅၇)ဧက၊  ရေဇွာ(၂၇၅၆)ဧက၊ ကန်ပက်လက် (၉၉၀)ဧက၊ ပလက်ဝ(၂၁၉)ဧက၊ ဆမီး(၆၁)ဧက၊ ဟားခါး(၁၄၉၇)ဧက၊ ထန်တလန်(၂၂၈၇)ဧက၊ တီးတိန်(၈၆၀)ဧက၊ တွန်းဇံ(၁၁၇)ဧက၊ ကျီခါး(၅)ဧက၊ ဖလမ်း (၁၂၄၇)ဧက၊ ရိခေါဒါရ်(၁၅)ဧကအထိ အသီးသီး စိုက်ပျိုးလာခဲ့ကြပါသည်။ မင်းတပ်မြို့ နယ်တွင် ဝဥကို(၂၀၀၅)ခုနှစ် ခန့်ကစပြီး စီးပွား အဖြစ် အစပျိုး စိုက်ပျိုးလာခဲ့ကြပါသည်။ ဝဥစိုက်ပျိုးရာတွင် တောင်ကမ်းပါး၊ တောင်စောင်းများ၊ ဆင်ခြေလျှောနေရာများတွင် ဖြစ်ထွန်းလျက်ရှိပါသည်။ ထို့ကြောင့် နောက်ပိုင်းတွင် ရွှေ့ပြောင်း တောင်ယာလုပ်ကိုင်သူ နည်း ပါးလာပြီး ဝဥစိုက်ခင်းများကို အဓိက လုပ်ကိုင်လာကြပါသည်။ (၂၀၀၅မှ၂၀၀၉)ခုနှစ်များတွင် ဈေးနှုန်းနေဖြင့် ဝဥအစို (၁)ပိဿာလျှင် (၅၀မှ၁၀၀)ကျပ်အထိ၊ အခြောက်(၁)ပိဿာ လျှင်(၂၀၀၀ မှ ၃၀၀၀)ကျပ်အထိ၊ (၂၀၁၀ မှ၂၀၁၄)ခုနှစ်များတွင် အစို(၁)ပိဿာ လျှင်(၂၀၀မှ ၆၀၀)ကျပ်အထိ၊ အခြောက်(၁)ပိဿာလျှင်(၄၀၀၀မှ၈၀၀၀)ကျပ်အထိ၊ (၂၀၁၅မှ၂၀၁၇) ခုနှစ် များတွင် အစို(၁)ပိဿာလျှင်(၇၀၀ မှ ၁၅၀၀)ကျပ်အထိ၊ အခြောက်(၁)ပိဿာလျှင်( ၉၀၀၀ မှ ၁၂၀၀၀)ကျပ်အထိ၊ (၂၀၁၈မှ၂၀၂၀)ခုနှစ်များတွင် အစို(၁၆၀၀မှ၂၅၀၀)ကျပ်အထိ၊ အခြောက်  (၁)ပိဿာလျှင်(၁၃၀၀၀မှ၁၈၀၀၀)ကျပ်အထိ ဈေးနှုန်းများ အသီးသီး မြင့်တက်လာခဲ့ပါသည်။ (၂၀၂၁-၂၀၂၂)ခုနှစ်တွင် အစို(၁)ပိဿာလျှင်(၅၀၀ မှ ၇၀၀)ကျပ်အထိ၊ အခြောက်(၁) ပိဿာလျှင် (၅၀၀၀ မှ ၆၅၀၀)ကျပ်အထိ ဈေးနှုန်းများ လျော့ကျလာခဲ့ပါသည်။ အကြောင်းမှာ ကမ္ဘာ့ကပ်ရောဂါ (COVID-19)ကြောင့် တရုတ်-မြန်မာ နယ်စပ်ဂိတ်များ အကန့်အသတ်ဖြင့် ပိတ်ထားခြင်း၊ နယ်မြေဒေသလုံခြုံမှုမရှိခြင်း စသည့်အခြေအနေတို့ကြောင့် ဝဥဈေးနှုန်းများ လျော့ကျလာရခြင်း ဖြစ်ပါသည်။

       ဝဥကို တရုတ်နိုင်ငံသို့ အဓိက တင်ပို့ရောင်းချလျက်ရှိပါသည်။  ယခင်က ဝဥအစိုလိုက် တင်ပို့ ရောင်းချခဲ့ရာမှ (၂၀၁၇) ခုနှစ်ကစပြီး အစိုးရ ဌာနဆိုင်ရာများ၊ မြန်မာနိုင်ငံသစ်သီး ဝလံပန်းမန် နှင့်ဟင်းသီးဟင်းရွက် စိုက်ပျိုးထုတ်လုပ် တင်ပို့ရောင်းချသူများအသင်း(MFPV)၊ ဓန(Facility)INGO အဖွဲ့အစည်းနှင့် ပုဂ္ဂလိကလုပ်ငန်းရှင်များ ပူးပေါင်းပြီး ဝဥအခြောက် ထုတ်လုပ်နိုင်ရန် ကြိုးပမ်း ဆောင်ရွက်ခဲ့ပါသည်။ ထို့ကြောင့် ချင်းပြည်နယ်၊ မင်းတပ်မြို့နယ်၊ ထင်ချောင်းကျေးရွာတွင် တစ်ရက် ကို ဝဥ အခြောက် တန်ချိန်(၂၀)အထိ ထုတ်လုပ်နိုင်သော ဝဥစက်ရုံကို ချင်းပြည်နယ်တွင် ပထမဆုံး ဖွင့်လှစ်နိုင်ခဲ့ပါသည်။  ထိုသို့ ဝဥအခြောက် ထုတ်လုပ်နိုင်သည့် စက်ရုံတည်ဆောက်ခြင်းကြောင့် ဒေသခံပြည်သူများ ဝင်ငွေအခွင့်အလမ်း ပိုမိုရရှိလာခဲ့ပါသည်။  ဝဥကို ခေါက်ဆွဲ၊ ကြာဇံ၊ အသားတု၊ ပေါင်ဒါ၊ အခြောက်ကြော်စသည့် ကျန်းမားရေးနှင့် ညီညွတ်သော ကုန်ချောများစွာရရှိပါသည်။ အခြားအစားအစာ ကုန်ပစ္စည်းများစွာကိုလည်း ကုန်အမှတ်တံဆိပ်အမျိုးမျိုးဖြင့် ဈေးကွက်တွင် ရောင်းချလျက်ရှိပါသည်။ ထိုကြောင့် ပြည်တွင်း၌ ကုန်ချောပစ္စည်းများကို ထုတ်လုပ်နိုင်မှသာလျှင် ပြည်သူများ ဝင်ငွေအကျိုးအမြတ် ပိုမိုရရှိလာမည်ဖြစ်ပါသည်။ ဝဥကို ကုန်ချောအဖြစ် ထုတ်လုပ် နိုင်ရန်အတွက် နိုင်ငံတော်အစိုး၊ အစိုးရမဟုတ်သော အဖွဲ့အစည်းများ၊ ပုဂ္ဂလိကအသင်းအဖွဲ့များ ဆက်လက် ပူးပေါင်းဆောင်ရွက်မှသာလျှင် လုပ်ငန်းများ အကောင်အထည်ဖော်ဆောင်ရာတွင် ပိုမို မြန်ဆန်ပြီး လွယ်ကူချောမွေ့လာမည်ဖြစ်ပါသည်။

        သို့ဖြစ်ပါ၍ ဝဥစိုက်တောင်သူများ၏ဘဝ အဆင်ပြေချောမွေ့မှုရှိစေရန် နိုင်ငံတော်အစိုးရ အနေဖြင့်(COVID-19)စည်းကမ်းချက်များနှင့်အညီ တရုတ်-မြန်မာ နှစ်နိုင်ငံနယ်စပ်ဂိတ်များ အမြန် ဆုံးပြန်လည်ဖွင့်လှစ်နိုင်ရေး  ဆောင်ရွက်ပေးပါရန် ဝဥစိုက် တောင်သူများအနေဖြင့် ဆန္ဒရှိကြကြောင်း ရေးသားတင်ပြလိုက်ရပါသည်။

Sources; Google, Local News, Department of Agriculture

Written by U Kee Aung Ling (DOCA,Chin State)

စားသုံးဆီတင်သွင်း သိုလှောင် ဖြန့်ဖြူးခြင်းလုပ်ငန်း ကြီးကြပ်ရေးကော်မတီ၏ အပတ်စဉ် ရည်ညွှန်းဈေးနှုန်း(၂၈.၃.၂၀၂၂ ရက်နေ့မှ  ၃.၄.၂၀၂၂) ရက်နေ့အထိ) အား အောက်ပါ .pdf file တွင် ဝင်ရောက်ကြည့်ရှုနိုင်ပါသည်-