ပြည်တွင်းကုန်သွယ်မှုသတင်း

          မော်လမြိုင်မြို့၌ ယခုမတ်လစတုတ္ထအပတ်တွင်ဘိလပ်မြေဈေးကွက်မှာ အရောင်းအဝယ်ကောင်းလာပြီး ဈေးနှုန်းတည်ငြိမ်နေကြောင်းသိရှိရသည်။ ဈေးကွက်ထဲအရောင်းအဝယ်ပုံမှန်ဖြစ်နေတဲ့ဈေးမှာ ယခုအပတ်တွင် ကြံ့နှစ်ကောင်(အနီ) ကျပ်၁၀၃၀၀၊ ဆင်(ထိုင်း) ကျပ် ၁၀၅၀၀၊ ကြံ့တံဆိပ်(အဝါ) ကျပ်၉၅၀၀ ဖြင့် အရောင်းအဝယ်ဖြစ်နေပြီး၊ မော်လမြိုင်မြို့၌ ဓါတ်မြေဩဇာမှာ ဈေးနှုန်းအနည်းငယ်တက်လာပြီး အရောင်းပုံမှန်ရှိနေကြောင်း သိရှိရသည်။

             အရောင်းအဝယ်ဖြစ်နေသောဈေးမှာ ယခင်အပတ်တွင် ကွန်ပေါင်း (မြန်မာ့ဩဘာ ရွှေကောမက်) ၁၅:၁၅:၁၅ 50kg ပါ တစ်အိတ်မှာ ကျပ် ၈၆၅၀၀၊ကွန်ပေါင်း ၂၀:၁၂:၁၂ 50kg ပါ တစ်အိတ်မှာ ကျပ် ၈၅၀၀၀၊ ကွန်ပေါင်း(Thai Grow How) ၁၅:၁၅:၁၅ 50kg ပါ တစ်အိတ်မှာ ကျပ် ၈၈၅၀၀၊ ပုလဲ(အသေး) ၄၆%  မြန်မာ (MPE) 50kg ပါ တစ်အိတ် မှာ ကျပ်၅၂၀၀၀၊ ပုလဲ (အသေး) ၄၆%  တရုတ် (ရွှေတောင်) 50kg ပါ တစ်အိတ်မှာ ကျပ် ၆၁၅၀၀၊ ပုလဲ(အကြီး) ၄၆% ထိုင်း(မြင်းပျံ) 50kg ပါ တစ်အိတ်မှာ ကျပ်၉၃၀၀၀၊ တီစူပါ တရုတ် (သံကွင်း) 50kg ပါ တစ်အိတ်မှာ ကျပ် ၅၅၀၀၀၊ ရှိခဲ့ပြီး ကွန်ပေါင်း (မြန်မာ့ဩဘာ ရွှေကောမက်) ၁၅:၁၅:၁၅ 50kg ပါ တစ်အိတ်မှာ ကျပ် ၈၅၁၀၀၊ကွန်ပေါင်း ၂၀:၁၂:၁၂ 50kg ပါ တစ်အိတ်မှာ ကျပ် ၈၃၂၀၀၊ ကွန်ပေါင်း(Thai Grow How) ၁၅:၁၅:၁၅ 50kg ပါ တစ်အိတ်မှာ ကျပ် ၉၀၀၀၀၊ ပုလဲ(အသေး) ၄၆%  မြန်မာ (MPE) 50kg ပါ တစ်အိတ် မှာ ကျပ် ၅၅၀၀၀၊ ပုလဲ (အသေး) ၄၆%  တရုတ် (ရွှေတောင်) 50kg ပါ တစ်အိတ်မှာ ကျပ် ၆၁၅၀၀၊ ပုလဲ(အကြီး) ၄၆% ထိုင်း(မြင်းပျံ) 50kg ပါ တစ်အိတ်မှာ ကျပ်၉၈၀၀၀၊ တီစူပါ တရုတ် (သံကွင်း) 50kg ပါ တစ်အိတ်မှာ ကျပ် ၅၅၀၀၀ ဖြင့် အရောင်းအဝယ်ဖြစ်နေကြောင်း သိရှိရသည်။

DOCA(မွန်)

         စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်၊ ပေါက်ခေါင်းမြို့နယ်တာဝန်ခံ ဦးကျော်ကျော်ထွန်းနှင့် အဖွဲ့သည် (၁၇.၃.၂၀၂၂) ရက်နေ့ နံနက် ၁၀:၀၀နာရီ အချိန်တွင် ဗောဓိကုန်းအုပ်စု၊ ဗောဓိကုန်းကျေးရွာရှိ ဖရဲသီးစိုက်တောင်သူနှင့်တွေ့ဆုံ၍ ဖရဲဈေးနှုန်းဈေးကွက်အခြေအနေနှင့် တစ်ဧကစိုက်ပျိုးထုတ်လုပ်ကုန်ကျစရိတ် အကျိုးအမြတ်တို့ကို တွေ့ဆုံမေးမြန်းခဲ့ ပါသည်။

          ပေါက်ခေါင်းမြို့နယ်တွင် ဖရဲကို ယခုနှစ်တွင်လေးကြီးရွာ၊ သဖန်းချိုရွာ၊ ကမ်းနီရွာနှင့် ဗောဓိကုန်းကျေးရွာများတွင် အများဆုံးစိုက်ပျိုးကြပါသည်။ ပေါက်ခေါင်းမြို့နယ်အနေဖြင့် ဖရဲသီး စိုက်ဧကမှာ (၁၅၀)ရှိပြီး၊ ဗောဓိကုန်းအုပ်စု၊ ဗောဓိကုန်းကျေးရွာနေ ဖရဲစိုက်ပျိုးသူ တောင်သူဦးဝင်းဇော်နှင့် တွေ့ဆုံ၍ မေးမြန်းခဲ့ရာ ဖရဲကို (၂)ဧကစိုက်ပျိုးပြီး တန်ဆောင်မုန်းလတွင် စတင်စိုက်ပျိုးပါသည်။ စိုက်ပျိုးသည့်မျိုးများမှာ ၇၄၇မျိုး၊ မျှားနီမျိုးနှင့် ဟီးရိုးမျိုးတို့ဖြစ်ပါသည်။ ဖရဲတစ်ဧကလျှင် ဖရဲစေ့ (၄၀၀)ကျော်စိုက်ပျိုးရပြီး တစ်ဧကအထွက်နှုန်းမှာ (၇၅၀-၈၀၀)ခန့် ထွက်ရှိပါသည်။ ဖရဲကို စိုက်ပျိုးပြီး ၂လခွဲအကြာတွင် စတင်အသီးများဆွက်ခူးရပါသည်။ ဖရဲတစ်ဧက စိုက်ပျိုးထုတ်လုပ်ကုန်ကျစရိတ်မှာ (၅)သိန်းဝန်းကျင်ခန့် ကုန်ကျသဖြင့် တစ်ဧက အကျိုးအမြတ်အနေဖြင့် (၇)သိန်းကျပ်ခန့်ရရှိသည်ဟုသိရပါသည်။

          ပေါက်ခေါင်းဒေသထွက် ဖရဲသီးကို ယခုအချိန်တင်ပို့မှုမရှိဘဲ ဒေသတွင်းသာရောင်းချရသဖြင့် ဈေးကောင်းမရဘဲ ဖရဲသီး (ကြီး/လတ်/သေး) တစ်လုံးလျှင် ၁၅၀၀/၁၀၀၀/၅၀၀ကျပ်ဖြင့် ရောင်းချရကြောင်းသိရပါသည်။ ဖရဲစိုက်ပျိုးသူတောင်သူများအနေဖြင့် သွင်းအားစုများဈေးကြီးခြင်း၊ စက်သုံးဆီဈေးမြင့်မားနေမှုကြောင့် ထွန်ယက်ခများဈေးကြီးခြင်း၊ ဖရဲသီးဈေးကောင်းမရခြင်းတို့ကြောင့် ယခုနှစ်ဖရဲစိုက်တောင်သူများအနေဖြင့် အကျိုးအမြတ်မှာရသင့်သလောက်မရဘဲ အနည်းငယ်သာရရှိကြောင်း သိရှိရပါသည်။

DOCA(ပဲခူး)

               ပဲခူးတိုင်းဒေသကြီး၊ တောင်ငူခရိုင်၊ အုတ်တွင်းမြို့၊ ကြက်သွန်ခင်း(၂)ရပ်ကွက်၊ တောင်ငူ-ပြည်လမ်းမပေါ်ရှိ ရွှေမြှားအမှတ်တံဆိပ် အာလူးကြော်၊ စာကလေးချောင်းကြော်နှင့် ငှက်ပျောကြော်လုပ်ငန်းသည် စားသုံးသူများပြီး ဈေးကွက်ဝင်သည့်အတွက် တောင်ငူမြို့အပါအဝင် တစ်နိုင်ငံလုံးသို့ ဖြန့်ချရောင်းချနေရပြီး အစားအသောက်နှင့် ဆေးဝါးကွပ်ကဲရေးဦးစီးဌာန (FDA)၏ အစားအသောက်ထုတ်လုပ်ခြင်း ထောက်ခံချက်လက်မှတ် ရရှိထားသည့် စားသောက်ကုန်လုပ်ငန်းဖြစ်ပါသည်။

              အာလူးကြော်ထုတ်လုပ်ရန်အတွက် လိုအပ်သော အာလူးများကို ရှမ်းပြည်နယ်တောင်ပိုင်း၊ အောင်ပန်းမြို့မှ မှာယူရပါသည်။ အာလူးကြော်ထုတ်လုပ်ရာတွင် အာလူးများကို ပါးပါးလှီး၊ ရေစင် အောင်ဆေးပြီးမှ ဆီသန့်ဖြင့်ကြော်ရခြင်းဖြစ်ပါသည်။ ထို့နောက် ဆီစစ်ပြီး အရသာစုံအောင်ပြန်မွှေ၍ တံဆိပ်ရိုက်ပြီးသား အိတ်များထဲသို့ထည့်၍ ထုပ်ပိုးခြင်းဖြစ်ပါသည်။

              စာကလေးချောင်းကြော်အတွက် လိုအပ်သော ကုလားပဲများကို မန္တလေးမှ မှာယူရပြီး ၎င်းကုလားပဲများကို အမှုန့်ကြိတ်၊ ရေဖျော်ပြီး ကျိုပေးရပါသည်။ ကျိုချက်၍ ရလာသော အရည်ပျစ်ပျစ်ကို ညှစ်စက်ထဲသို့ထည့်ပြီး မီးဖိုပေါ်တင်ထားသော ပွက်ပွက်ဆူသည့် ဆီအိုးထဲသို့ ညှစ်ထည့်ပြီး ကြော်ရပါသည်။ ဆီစစ်ပြီးသော စာကလေးချောင်းကို အိတ်ထဲထည့်ပြီး ၎င်းအိတ်ထဲသို့ ပျဉ်းတော်သိမ်ရွက်ကြော်၊ ငရုပ်သီးခြောက်တောင့်နှင့် မြေပဲဆံအနည်းငယ်ဆီထည့်၍ ထုပ်ပိုးပါသည်။

              ငှက်ပျောကြော်အတွက် လိုအပ်သော ရခိုင်ငှက်ပျောသီးကို တောင်ငူမြို့မှ မှာယူပြီး မှည့်လာသည့်အချိန်တွင် ပါးပါးလှီးကာ ဆီဖြင့်ကြော်ရပါသည်။ ရွှေမြှားအမှတ်တံဆိပ် အာလူးကြော်၊ စာကလေးချောင်းကြော်နှင့် ငှက်ပျောကြော်များကို ယခင်က တစ်ထုပ်လျှင် ၈၀ ကျပ်နှုန်းဖြင့် ရောင်းချဖြန့်ဖြူးပြီး ယခုအခါ ကုန်ကြမ်းဈေးနှုန်းများ တက်လာသဖြင့် တစ်ထုပ်လျှင် ၁၅၀ ကျပ်နှုန်း ဖြင့် ဈေးကွက်အတွင်းသို့ ရောင်းချဖြန့်ဖြူးလျှက်ရှိကြောင်း ရွှေမြှားစားသောက်ကုန်လုပ်ငန်း မန်နေဂျာဒေါ်ဝေ၏ ပြောကြားချက်အရ သိရှိရပါသည်။

DOCA(ပဲခူး)

           ပဲခူးတိုင်းဒေသကြီး၊ ပြည်ခရိုင်၊ ပြည်မြို့ရှိ ပြည်ကုန်စည်ဒိုင်တွင် အရောင်းအဝယ်ဖြစ်လျှက်ရှိသော မတ်ပဲသီးနှံဈေးမှာ ဖေဖော်ဝါရီနောက်ဆုံးပတ်တွင် ပိဿာ(၂၀)ဝင် ပဲတစ်တင်းကို ၄၁၇၀၀-၄၂၅၀၀-၄၂၇၀၀ ကျပ်ဈေးဖြင့် တစ်ရက်ကို အိတ် ၂၀၀/၃၀၀ခန့် ရန်ကုန်အဝယ်ရှိခဲ့ပြီး မတ်လအစတွင် ပဲတစ်တင်းကို ၄၄၀၀၀-၄၄၂၀၀ကျပ်ဈေးဖြင့် အရောင်းအဝယ်ရှိခဲ့၍ လှောင်သမားများလည်း အဝယ်ရှိခဲ့ပါသည်။ ဒုတိယပတ်ဈေးမှာ မြင့်လာခဲ့ပြီး ပဲတစ်တင်းလျှင် ၄၅၀၀၀-၄၆၀၀၀ကျပ်ဖြင့် အရောင်းအဝယ်ရှိပြီး တစ်ရက်လျှင်အိတ် ၂၅၀/၃၀၀ခန့် ရန်ကုန်တင်ပို့မှု့ရှိခဲ့ပါသည်။ တတိယပတ်တွင် ပဲတစ်တင်းလျှင် ၄၅၅၀၀-၄၆၇၀၀ကျပ်ဈေးဖြင့် အရောင်းအဝယ်ဖြစ်ခဲ့ပါသည်။

          ပဲစင်းငုံသီးနှံဈေးမှာ မတ်လပထမပတ်တွင် ပဲတစ်တင်းလျှင် ၄၃၈၀၀-၄၄၀၀၀ ကျပ်ဖြင့် ရန်ကုန်အဝယ် တစ်ရက်ကိုအိတ် ၃၀၀/၄၀၀ခန့် ဝယ်ယူမှုရှိခဲ့ပါသည်။ ဒုတိယပတ်တွင် ပဲတစ်တင်းလျှင် ၄၄၀၀၀-၄၄၅၀၀ကျပ်ဖြစ်ခဲ့ပြီး ပဲစင်းငုံအဝယ်လိုက်၍ အိတ် ၄၀၀-၅၀၀ခန့် အဝယ်ရှိပြီး လှောင်သမားနှင့်ရန်ကုန်အဝယ်ရှိခဲ့ပါသည်။ တတိယပတ်တွင် ပဲတစ်တင်းဈေးမှာ ၄၄၀၀၀ကျပ် ဖြင့် အရောင်းအဝယ်ဖြစ်လျှက်ရှိပါသည်။

          ကုလားပဲသီးနှံအနေဖြင့် မတ်လပထမပတ်တွင် ပဲတစ်တင်းလျှင် ၄၁၅၀၀-၄၂၅၀၀ကျပ် ဈေးဖြင့် အရောင်းအဝယ်ရှိပြီး တတိယပတ်တွင် ပဲတစ်တင်းလျှင် ၄၄၀၀၀-၄၅၀၀၀-၄၆၀၀၀-၄၆၅၀၀ကျပ်ထိ ဈေးမြင့်လာခဲ့ပြီး လှောင်သမားများရန်ကုန်ဝယ်လက်များနှင့် ခွဲစက်သမားများ အဝယ်ရှိခဲ့ပြီး တစ်ရက်လျှင် အိတ် ၄၀၀/၄၀၀ခန့် အဝယ်ရှိခဲ့ပါသည်။ တတိယပတ်တွင် ၄၄၀၀၀ကျပ်ဖြင့် ရန်ကုန်ဝယ်လက်နှင့် ပဲခွဲကြမ်းများကို နယ်စုံသို့ တင်ပို့ရောင်းချခဲ့ပါသည်။

          ပဲကြီး(ရွှေကျွန်း)ဈေးမှာ ယခင်အပတ်က ပဲတစ်တင်းကို ၅၂၀၀၀-၅၃၀၀၀ကျပ်ဖြင့် အရောင်းအဝယ်ရှိပြီး ယခုတစ်ပတ်တွင် ၆၃၀၀၀-၆၄၀၀၀-၆၅၀၀၀ကျပ်၊ ပဲကြီး (ကမ်းနား)တစ်တင်းကို ၆၀၀၀၀-၆၂၀၀၀ကျပ်ဈေးထိမြင့်လာခဲ့ပါသည်။ အရောင်းအဝယ်ဖြစ်မှုမှာ တစ်ရက်လျှင်အိတ် ၇၀၀/ ၈၀၀ခန့် ပဲကြော်သမားနှင့် ရန်ကုန်အဝယ်ရှိကြောင်း သိရပါသည်။

          ယခုနှစ်အနေဖြင့် ပြည်ကုန်စည်ဒိုင်တွင် ပဲမျိုးစုံဈေးကွက်ဈေးနှုန်းအခြေအနေမှာ ကောင်းမွန်လျှက်ရှိပြီး ဈေးနှုန်းအနေဖြင့်လည်း ယခင်နှစ်ကထက် ပိုမိုရရှိသည့်အတွက် စိုက်ပျိုးထုတ်လုပ်သူတောင်သူများအနေဖြင့်လည်း ယခုနှစ်သွင်းအားစုများ ဈေးမြင့်ခဲ့သော်လည်း ပဲဈေးများ ဈေးကောင်းရရှိသည့်အတွက် အကျိုးအမြတ်ရရှိလျှက်ရှိကြောင်း သိရှိရပါသည်။

DOCA(ပဲခူး)

        ပဲခူးတိုင်းဒေသကြီး၊ ပြည်ခရိုင် ၊ ပြည်မြို့ရှိပွဲရုံများတွင် အရောင်းအဝယ်ဖြစ်လျှက်ရှိသော နှမ်းရောင်စုံ ဈေးနှုန်းဈေးကွက်အခြေအနေများကို လေ့လာသုံးသပ်တင်ပြရာတွင် နှမ်းနီဈေးနှုန်းများ အနေဖြင့် ၂၀၂၂ ခုနှစ် ဇန်နဝါရီလဆန်းတွင် (၃)တင်း တစ်အိတ်လျှင် (၁)သိန်းကျပ်ခန့်ရှိခဲ့ပြီး ဇန်နဝါရီလကုန်တွင် (၃)တင်းတစ်အိတ်လျှင် ၁၆၀၀၀၀ကျပ်ဖြင့် ဈေးများမြင့်တက်လာခဲ့ပါသည်။ မြို့တွင်းဆီစက်သမားများနှင့် နယ်ဘက်ရှိဆီစက်သမားများက ဆီကြိတ်ရန် အဝယ်ရှိလာသဖြင့် ဈေးမြင့်တက်လာခဲ့ပါသည်။ ဖေဖော်ဝါရီလဆန်းတွင် နှမ်းနီဈေးမှာ (၃)တင်းတစ်အိတ်လျှင် ၁၆၀၀၀၀ကျပ်ဖြင့် ဈေးများဆက်လက်ငြိမ်နေပြီး၊ ဖေဖော်ဝါရီလကုန်ပိုင်းတွင် ဆောင်းနှမ်းများ အဝင်လှိုင်လာချိန် ဝယ်လိုအားနည်းသွားသဖြင့် (၃)တင်း တစ်အိတ်လျှင် ၁၃၀၀၀၀ကျပ်ဖြင့် ဈေးပြန်ကျလာခဲ့ပါသည်။ မတ်လ တတိယပတ်တွင် ဆီစက်သမားများက အဝယ်ပြန်ရှိလာသဖြင့် (၃)တင်း တစ်အိတ်လျှင် ၁၅၀၀၀၀ကျပ်ထိ ဈေးပြန်မြင့်လာခဲ့၍ တစ်နေ့လျှင်အိတ် (၅၀၀)ခန့် အရောင်းအဝယ်ဖြစ်လျှက်ရှိပါသည်။

          နှမ်းနက်ဈေးနှုန်းများမှာ ၂၀၂၂ ခုနှစ် ဇန်နဝါရီလဆန်းပိုင်းတွင် (၃)တင်း တစ်အိတ်လျှင် ၁၄၀၀၀၀ကျပ်ဖြင့် အရောင်းအဝယ်ဖြစ်ခဲ့ပြီး၊ ဇန်နဝါရီလကုန်ပိုင်းတွင် (၃)တင်းတစ်အိတ်လျှင် ၂၀၀၀၀၀ကျပ်ခန့် ဈေးပြန်မြင့်လာခဲ့ပါသည်။ ရန်ကုန်၊ မန္တလေးဝယ်လက်များက တစ်နေ့လျှင် အိတ် (၅၀၀)ခန့် အဝယ်ရှိလာသဖြင့် ဈေးမြင့်လာခဲ့ပါသည်။ ဖေဖော်ဝါရီလလဆန်းပိုင်းတွင် အရောင်းအဝယ်ပုံမှန်ဖြစ်ခဲ့ပြီး (၃)တင်းတစ်အိတ်လျှင် ၂၀၀၀၀၀ကျပ်ဖြင့် ဈေးများဆက်လက်ငြိမ်နေပါသည်။ ဖေဖော်ဝါရီလကုန်ပိုင်းတွင် (၃)တင်းတစ်အိတ်လျှင် ၁၆၀၀၀၀ကျပ်ဖြင့် ဝယ်လိုအားနည်းသွားသဖြင့် ဈေးပြန်ကျလာခဲ့ပါသည်။ မတ်လ တတိယပတ်တွင် ကျောက်ပန်းတောင်း၊ ပခုက္ကူနှင့် မြင်းခြံဘက်မှ ဝယ်လိုအားကောင်းလာသဖြင့် ဈေးပြန်မြင့်လာပြီး တစ်နေ့လျှင်အိတ် (၃၀၀)ခန့် အရောင်းအဝယ် ဖြစ်လျှက်ရှိပါသည်။

        စမုံနက်နှမ်းဈေးနှုန်းများမှာ ၂၀၂၂ခုနှစ် ဇန်နဝါရီလဆန်းပိုင်းတွင် (၃)တင်း တစ်အိတ်လျှင် ၁၇၀၀၀၀ကျပ်ဖြင့် အရောင်းအဝယ်ဖြစ်ခဲ့ပြီး၊ ဇန်နဝါရီလကုန်ပိုင်းတွင် (၃)တင်းတစ်အိတ်လျှင် ၂၂၀၀၀၀ကျပ်ဖြင့် မန္တလေးဝယ်လက်များနှင့် အောင်လံဘက်မှ အဝယ်ရှိလာသဖြင့် ဈေးမြင့် တက်လာခဲ့ပါသည်။ ဖေဖော်ဝါရီလဆန်းပိုင်းတွင် (၃)တင်းတစ်အိတ်လျှင် ၂၂၀၀၀၀ကျပ်ဖြင့် ဈေးငြိမ်နေပြီး အရောင်းအဝယ်မှာ ပုံမှန်ဖြစ်လျှက်ရှိပါသည်။ ဖေဖော်ဝါရီလကုန်တွင် မန္တလေး ဝယ်လက်များမှ အဝယ်နည်းသွားပြီး ဆောင်းနှမ်းများအထွက်လှိုင်လာသဖြင့် ဈေးကျလာခဲ့ပါသည်။ မတ်လတတိယပတ်တွင် အညာဒေသမှ အဝယ်ပြန်ရှိလာသဖြင့် ဈေးပြန်မြင့်လာပြီး တစ်နေ့လျှင် အိတ် (၄၀၀)ခန့် အရောင်းအဝယ်ဖြစ်လျှက်ရှိပါသည်။

          နှမ်းသီးနှံဈေးကွက်မှာ ယခုနှစ်တွင် သွင်းအားစုများ ဈေးမြင့်တက်နေပေမယ့် နှမ်းဈေးမှာ ဈေးကောင်းများရရှိသဖြင့် နှမ်းစိုက်တောင်သူများအနေဖြင့် အကျိုးအမြတ်များပိုမိုရရှိကြောင်း သိရှိရပါသည်။

DOCA(ပဲခူး)