ပြည်တွင်းကုန်သွယ်မှုသတင်း

                 ကျိုင်းတုံမြို့သည် ပွင့်လင်းရာသီရောက်ရှိလာသည်နှင့်အမျှ မတ်လအတွင်း မန်ကျည်းသီးဈေးကွက်အခြေအနေမှာ ကျိုင်းတုံရှိ နေအိမ်များ၊ ခြံများ၌ ပေါက်ရောက်လျက်ရှိသော မန်းကျည်းပင်များကို အပင်ချုပ်စနစ်ဖြင့်ဝယ်ယူပြီး အစေ့ထုတ်ကာ ကျိုင်းတုံမြို့ဈေးများ၌ အရောင်းအဝယ်ဖြစ်နေကြောင်း သိရှိရပါသည်။

                ကျိုင်းတုံမြို့တွင် မန်ကျည်းသီးတစ်ပင်၏ထွက်ရှိနှုန်းမှာ ပျှမ်းမျှပိဿာချိန် (၄၀) မှ (၅၀) ထိ ထွက်ရှိကြောင်းသိရှိရပြီး၊ တစ်ပိဿာလျှင် ရောင်းဈေး (၂၅၀၀)ကျပ် မှ (၃၀၀၀)ကျပ် ထိ ရရှိကာ သဘာဝကပေးသော မန်ကျည်းပင်ကြောင့် အထွေထွေကုန်ကျစရိတ်များနုတ်ကာ တစ်ပင်လျှင် (၂၅၀၀၀) ကျပ်နှုန်း အမြတ်အစွန်းရရှိပါသည်။ မန်ကျည်းသီးရောင်းဝယ်ဖောက်ကားသူများ အလုပ်အကိုင်၊ အခွင့်အလမ်းများရရှိ၍ ဝင်ငွေများရရှိနေပါသည်။

         ယခင်နှစ်နှင့် ယခုနှစ်နှိုင်းယှဉ်ကြည့်လျှင် ယခင်နှစ်မန်ကျည်းသီးတစ်ပင်လျှင် (၃၀၀၀၀)ကျပ်၊ အပင်တက်ခ (၁၅၀၀၀)ကျပ်၊ မန်ကျည်းသီးကောက်ခ (၁၅၀၀၀)ကျပ်၊ အစေ့ထုတ်ခ (၈၀၀၀)ကျပ် နှင့် သယ်ယူပို့ဆောင်ခ (၁၅၀၀၀)ကျပ် ရှိ၍ အမြတ်အစွန်းမှာ မန်ကျည်းသီးတစ်ပင်လျှင် (၁၇၀၀၀) ကျပ်ထိ ရရှိပါသည်။ ယခုနှစ်တွင် မန်ကျည်းပင်တစ်ပင်လျှင် (၃၅၀၀၀)ကျပ်၊ အပင်တက်ခ (၂၀၀၀၀)ကျပ်၊ မန်ကျည်းသီးကောက်ခ (၁၈၀၀၀)ကျပ်၊ အစေ့ထုတ်ခ (၁၂၀၀၀)ကျပ်နှင့် သယ်ယူပို့ဆောင်ခ (၂၀၀၀၀)ကျပ် ကုန်ကျပြီး အမြတ်အစွန်းမှာ တစ်ပင်လျှင် (၂၅၀၀၀)ကျပ် ဖြစ်သည့်အတွက် ယခင်နှစ်ထက်အမြတ်အစွန်းပိုမိုရရှိကာ မန်ကျည်းပင်လုပ်ကိုင်ရောင်းဝယ်သည့် မိသားစုများအပိုဝင်ငွေရရှိနေကြောင်း ရေးသားလိုက်ရပါသည်။

DOCA(ရှမ်း)

           မွန်ပြည်နယ်၊ ဘီးလင်းမြို့နယ်တွင် ပဲတီစိမ်းနှင့် ပဲလွန်းဖြူ ဈေးနှုန်းများ ယခင်နှစ်ထက် ဈေးနှုန်းပိုမိုရရှိနေပြီး ယခုလက်ရှိပဲတီစိမ်းပေါက်ဈေးမှာ ပိဿာ (၂၀) ပါတစ်တင်းလျှင် ၄၅၀၀၀ ကျပ်နှင့် ပဲလွန်းဖြူ ပိဿာ (၂၀) ပါ တစ်တင်းလျှင် ၃၀၀၀၀ ကျပ် ရရှိနေပြီး ယခင်နှစ် ပဲတီစိမ်း ဈေးနှုန်းမှာ ပိဿာ (၂၀) ပါ တစ်တင်းလျှင် ၃၆၀၀၀ ကျပ်နှင့် ပဲလွန်းဖြူ ဈေးနှုန်းမှာ ပိဿာ (၂၀) ပါ တစ်တင်းလျှင် ၂၈၀၀၀ ကျပ် ရရှိခဲ့ကြောင်း သိရှိရသည်။ အဆိုပါ ပဲတီစိမ်းနှင့် ပဲလွန်းဖြူများကို ပဲခူးမြို့ရှိ ပွဲရုံများသို့ တင်ပို့နေကြောင်း သိရှိရသည်။

           ဘီးလင်းမြို့နယ်တွင် ပဲတီစိမ်းနှင့် ပဲလွန်းဖြူ စိုက်ဧကမှာ (၁၇၂၇၄) ဧကရှိပြီး ယခုနှစ်တွင် အချိန်အခါမဟုတ် မိုးရွာသွန်းမှုကြောင့် အထွက်နှုန်းများ ကျဆင်းခဲ့ပြီး တစ်ဧက အထွက်နှုန်း (၁၂) တင်းဝန်းကျင်ခန့် ထွက်ရှိကြောင်း သိရှိရသည်။

DOCA(မွန်)

           မော်လမြိုင်မြို့၌ ယခုမတ်လဒုတိယအပတ်တွင် ဘိလပ်မြေဈေးကွက်မှာ အရောင်းအဝယ် ပုံမှန်ရှိပြီး ဈေးနှုန်းတည်ငြိမ်နေကြောင်းသိရှိရသည်။ ဈေးကွက်ထဲအရောင်းအဝယ်ပုံမှန်ဖြစ်နေတဲ့ဈေးမှာ  ယခုအပတ်တွင် ကြံ့နှစ်ကောင်(အနီ) ကျပ်၁၀၃၀၀၊ ဆင်(ထိုင်း) ကျပ် ၁၀၅၀၀၊ ကြံ့တံဆိပ်(အဝါ) ကျပ်၉၅၀၀ ဖြင့် အရောင်းအဝယ်ဖြစ်နေကြောင်း သိရှိရသည်။

                မော်လမြိုင်မြို့၌ ဓါတ်မြေဩဇာမှာ ဈေးနှုန်းအနည်းငယ်တက်လာပြီး အရောင်းအေးနေပြီး အရောင်းအဝယ်ဖြစ်နေသောဈေးမှာ ယခင်အပတ်တွင် ကွန်ပေါင်း (မြန်မာ့ဩဘာ ရွှေကောမက်) ၁၅:၁၅:၁၅ 50kg ပါတစ်အိတ်မှာ ကျပ် ၈၄၇၀၀၊ကွန်ပေါင်း ၂၀:၁၂:၁၂ 50kg ပါတစ်အိတ်မှာ ကျပ် ၈၀၀၀၀၊ ကွန်ပေါင်း(Thai Grow How) ၁၅:၁၅:၁၅ 50kg ပါတစ်အိတ်မှာ ကျပ် ၈၅၀၀၀၊ ပုလဲ(အသေး) ၄၆%  မြန်မာ (MPE) 50kg ပါတစ်အိတ် မှာ ကျပ်၄၈၅၀၀၊ ပုလဲ (အသေး) ၄၆%  တရုတ် (ရွှေတောင်) 50kg ပါတစ်အိတ်မှာ ကျပ် ၅၉၀၀၀၊ ပုလဲ(အကြီး) ၄၆% ထိုင်း(မြင်းပျံ) 50kg ပါတစ်အိတ်မှာ ကျပ်၈၅၀၀၀၊ တီစူပါ တရုတ် (သံကွင်း) 50kg ပါတစ်အိတ်မှာ ကျပ် ၅၂၀၀၀၊ ရှိခဲ့ပြီး ယခုအပတ်တွင် ကွန်ပေါင်း (မြန်မာ့ဩဘာ ရွှေကောမက်) ၁၅:၁၅:၁၅ 50kg ပါတစ်အိတ်မှာ ကျပ် ၈၆၅၀၀၊ကွန်ပေါင်း ၂၀:၁၂:၁၂ 50kg ပါတစ်အိတ်မှာ ကျပ် ၈၅၀၀၀၊ ကွန်ပေါင်း(Thai Grow How) ၁၅:၁၅:၁၅ 50kg ပါတစ်အိတ်မှာ ကျပ် ၈၈၅၀၀၊ ပုလဲ(အသေး) ၄၆%  မြန်မာ (MPE) 50kg ပါတစ်အိတ် မှာ ကျပ်၅၂၀၀၀၊ ပုလဲ (အသေး) ၄၆%  တရုတ် (ရွှေတောင်) 50kg ပါတစ်အိတ်မှာ ကျပ် ၆၁၅၀၀၊ ပုလဲ(အကြီး) ၄၆% ထိုင်း(မြင်းပျံ) 50kg ပါတစ်အိတ်မှာ ကျပ်၉၃၀၀၀၊ တီစူပါ တရုတ် (သံကွင်း) 50kg ပါတစ်အိတ်မှာ ကျပ် ၅၅၀၀၀၊ ဖြင့် အရောင်းအဝယ်ဖြစ်နေကြောင်း သိရှိရသည်။

DOCA(မွန်)

          ရန်ကုန်တောင်ပိုင်းခရိုင် သန်လျင်၊ ကျောက်တန်း၊ ခရမ်း၊ သုံးခွမြို့နယ်များအတွင်းတွင် ပဲတီ ရွှေဝါနှင့် ရေဆင်းမျိုးများ မတ်လဆန်းမှစ၍ ဈေးနှုန်းများမြင့်တက်လာနေကြောင်း ပဲစိုက်တောင်သူများထံမှ သိရသည်။

          ရန်ကုန်တောင်ပိုင်းခရိုင်အတွင်း မတ်လဆန်းအထိ ပဲတီစိမ်း ( ၃၅၄၇၂၈ ) ဧက စိုက်ပျိုးထား ရှိပြီး (၁၇၂၃၇၉)ဧက ရိတ်သိမ်းပြီးဖြစ်ကြောင်း စိုက်ပျိုးရေးဦးစီးဌာနမှ စုံစမ်းသိရှိရသည်။

          ယခင် ဖေဖော်ဝါရီလ (တတိယ)ပတ်တွင် ပဲတီစိမ်းဈေးနှုန်းမှာ တစ်တင်းလျှင်(၄၆၀၀၀/-) ကျပ် ဈေးနှုန်းဖြင့်ရောင်းချခဲ့ရာမှ မတ်လ(ဒုတိယ)ပတ်အတွင်း ပဲတီရွှေဝါတစ်တင်းလျှင် (၅၁၀၀၀/-) ကျပ် ရေဆင်းမျိုးတစ်တင်းလျှင် (၄၉၅၀၀/-)ကျပ်နှုန်းထိ မြင့်တက်လာသဖြင့် ပဲစိုက်တောင်သူများ ဝင်ငွေတိုး၍ အဆင်ပြေလျက်ရှိကြောင်း ပဲစိုက်တောင်သူတစ်ဦးထံမှ သိရသည်။

DOCA(ရန်ကုန်)

         ရန်ကုန်တိုင်းဒေသကြီး၊ မြောက်ပိုင်းခရိုင် တိုက်ကြီးမြို့နယ်တွင် တောင်သူလယ်သမားများက နွေစပါး၊ အခြားသီးနှံစိုက်ပျိုးထုတ်လုပ်နိုင်ရန်အတွက် ယူရီးယားဓါတ်မြေဩဇာများကို လအလိုက် အထူးဈေးနှုန်းဖြင့် ရောင်းချပေးလျက်ရှိပါတယ်။ ယူရီးယားဓါတ်မြေဩဇာကားများ ဝင်ရောက်လာမှုအား အိတ်အရေအတွက်၊ တန်၊ ဝိတ်ချိန်ပြည့်ဝမှုရှိ/မရှိ သေချာစွာ စိစစ်လက်ခံ၍ တောင်သူလယ်သမားများသို့ ကျေးရွာအုပ်စုအလိုက် အချိန်မီရရှိရေးကို ဆောင်ရွက်ပေးလျက်ရှိနေပါတယ်။

             ထိုသို့ ဆောင်ရွက်ရာတွင် တိုက်ကြီးမြို့နယ်အတွက် ယူရီးယားဓါတ်မြေဩဇာတစ်အိတ် ဈေးနှုန်းမှာ (၃၂၀၀၀)ကျပ်ဖြစ်ပြီး ယူရီးယားဓါတ်မြေဩဇာခွဲတမ်းရရှိမှုမှာ တန်(၁၃၉၅.၂၅၀)၊ အိတ် (၂၇၉၀၅)ဖြစ်ပြီး ယနေ့အထိ လက်ခံရရှိမှု ယူရီးယားဓါတ်မြေဩဇာမှာ (၅၅၅)တန်၊ အိတ်(၁၁၀၉၉) အားရရှိပြီးဖြစ်ပါသည်။ ဖြန့်ဝေပြီးစီးပါကြောင်းနှင့် ထပ်မံဝင်ရောက်သည့်ကားများကိုလည်း ဆက်လက်တင်ပြဆောင်ရွက်နေပါကြောင်း သိရှိရပါတယ်။

DOCA(ရန်ကုန်)